བློ་བཟང་གི་བྱས་རྗེས་འཇོག་འདོད་ཀྱི་འུ་ཐུག་གི་བྱ་སྤྱོད།

བློ་བཟང་དབང་རྒྱལ་གྱིས་བརྩམས། ཨ་མདོ་སྐྱབས་ཀྱིས་བསྒྱུར།
 
ཉེ་ཆར་རམ། སྤྱི་ལོ་༢༠༢༠ ལོའི་ཟླ་༡༡ པའི་ཚེས་༢༣ ཉིན་བློ་བཟང་སེངྒེ་མཆོག་གིས་གསལ་བསྒྲགས་ཤིག་སྤེལ་ཏེ། ང་ནི་ཨ་རིའི་ཕོ་བྲང་དཀར་པོའི་ནང་འགྲོ་མཁན་གྱི་བོད་ཀྱི་འགོ་ཁྲིད་དང་པོ་དེ་ཡིན་ཞེས་ཁྱབ་བསྒྲགས་བྱས་པ་དེས་བོད་མི་དམངས་ཁྲོད་ཟང་ཟིང་ལྟ་བུ་ཞིག་བཟོས་སྟབས། དེ་ནི་དབྱེ་ཞིབ་གཏིང་ཟབ་བྱེད་དགོས་ངེས་ཀྱི་གནས་བབ་ཅིག་ཏུ་འགྱུར་ཡོད།

སྤྱི་ལོ་ ༡༩༩༡ ལོར་༸གོང་ས་ཏཱ་ལའི་བླ་མ་མཆོག་ཨ་རིའི་ཕོ་བྲང་དཀར་པོར་ཆེད་ཕེབས་ཀྱིས་སྲིད་འཛིན་འཇོར་བྷུ་ཞི་རྒན་པ་དང་མཇལ་འཕྲད་གནང་སྐབས་བློ་བཟང་སེངྒེ་ཕལ་ཆེར་རྒྱལ་ས་ལྡི་ལིར་སློབ་མ་ཞིག་རང་གི་སློབ་ཆེན་གྱི་ལག་འཁྱེར་གྱི་ཆེད་དུ་ཕར་རྒྱུག་ཚུར་རྒྱུག་བྱེད་བཞིན་པའི་དུས་སྐབས་ཤིག་ཡིན་ངེས་རེད། སྐབས་དེའི་མཇལ་འཕྲད་དེ་ལོ་རྒྱུས་རང་བཞིན་ཡིན་པ་མ་ཟད། རྒྱལ་སྤྱིའི་གསར་ལམ་ཁག་ཏུ་ཡང་ཚ་ཚ་འུར་འུར་ཐོག་ནས་དེའི་སྐོར་གནས་ཚུལ་སྤེལ་ཡོད།

དེ་ལྟ་བུའི་ལོ་རྒྱུས་རང་བཞིན་གྱི་མཇལ་འཕྲད་དེ་ཡིས། རིམ་བཞིན་ཨ་རིའི་སྲིད་འཛིན་རིམ་པ་སྟེ་ཁི་ལིན་ཊན་དང་བྷུ་ཞི་གཞོན་པ། དེ་བཞིན་ཨོ་བྷ་མ་བཅས་ནས་སྔ་རྗེས་སུ་ཕོ་བྲང་དཀར་པོར་ཏཱ་ལའི་བླ་མ་གདན་ཞུས་ཀྱིས་མཇལ་འཕྲད་གནང་བའི་ལམ་ཁ་གསར་ཏུ་བཏོད་པ་མ་ཟད། སྲིད་འཛིན་རིམ་པས་ཀྱང་བོད་དོན་ལ་རྒྱབ་སྐྱོར་ཡོད་པ་གསལ་སྟོན་གནང་བ་བརྒྱུད་ནས། ཨ་རིའི་སྲིད་འཛིན་རྣམ་གྱིས་རྒྱ་ནག་གི་འགོ་ཁྲིད་ཚོར་༸གོང་ས་ཏཱ་ལའི་བླ་མ་མཆོག་ལ་མཇལ་འཕྲད་གནང་རྒྱུ་དང་། ཁོང་གིས་ཐུགས་རེ་གནང་བཞིན་པའི་རང་སྐྱོང་གི་གནས་བབ་ཀྱི་ཐད་བཀའ་མོལ་གནང་སྟེ་དཀའ་རྙོག་སེལ་དགོས་བའི་བརྡ་ལན་རིམ་པར་ཕུལ་ཡོད་པ་རེད།

སྲིད་འཛིན་ཨོ་བྷ་མའི་ལས་ཡུན་གཉིས་སམ། ལོ་ངོ་བརྒྱད་ཀྱི་རིང་ལ། ༸གོང་ས་ཏཱ་ལའི་བླ་མ་མཆོག་དང་ཐེངས་བཞི་ལ་མཇལ་འཕྲད་གནང་ཡོད་པ་དེ་དག་ཕོ་བྲང་དཀར་པོའི་ནང་དུ་ཡིན་པ་ལས། སྲིད་འཛིན་རྣམས་འཛམ་གླིང་གི་དབུ་ཁྲིད་གཞན་ལ་མཇལ་འཕྲལ་གནང་སའི་འཇོང་དབྱིབས་ཀྱི་ལས་ཁུངས་ནང་མ་རེད། མཇལ་འཕྲད་དེ་དག་གིས་བོད་དོན་གྱི་གནས་ཚུལ་དེ་རྒྱལ་སྤྱིའི་སྒང་ལ་བསྐྱལ་ཡོད་པ་རེད། སྲིད་གཞུང་འདྲ་མིན་ཁག་གིས་དུས་སྐབས་སྣ་མང་རིང་ལྡིང་ཆ་སྣ་ཚོགས་སྟེང་རྒྱ་ནག་ལ་གནོན་ཤུགས་སྤྲད་རྐྱེན་རྒྱ་ནག་གཞུང་གིས་༸གོང་ས་མཆོག་གི་སྐུ་ཚབ་དང་ལྷན་དུ་གྲོས་མོལ་མི་བྱེད་ཐབས་མེད་ཀྱི་གནས་སྟངས་སུ་གྱུར་ཏེ་གྲོས་མོལ་ཐེངས་ཁ་ཤས་བྱུང་ཞིང་། དེ་དག་ལས་གྲོས་མོལ་མཐའ་མ་དེ་ནི་སྤྱི་ལོ་ ༢༠༡༠ ལོ་མགོར་བྱུང་ཡོད་པ་རེད། གྲོས་མོལ་དེ་དག་གི་ཁྲོད་ནས་ཕྱོགས་གཉིས་ཀྱི་གནས་བབ་དེ་བརྡ་འཕྲོད་པོ་བྱུང་ཡོད། བོད་མི་རྣམས་ཀྱིས་རང་བཙན་ལས་རྒྱ་ནག་གི་རྩ་ཁྲིམས་མངའ་འོག་ནས་ཆེས་མཐོའི་རང་སྐྱོང་གི་ཁེ་ཕན་ཞིག་དགོས་པ་རྩོད་འདོན་བྱས་ཡོད་ནའང་། རྒྱ་ནག་གིས་བོད་ཀྱི་དགོས་འདུན་དེར་ངོས་ལེན་མ་བྱས་པ་མ་ཟད། བོད་མིའི་དགོས་འདུན་དེ་ནི་ཕྱེད་རང་བཙན་དང་། ཡང་ན་ཡོངས་སུ་རང་བཙན་ཡིན་ལུགས་ཨུ་ཚུགས་མཐར་སྐྱེལ་བྱས་ཡོད་པ་རེད། རྒྱ་ནག་གི་བྱེད་བབས་དེ་ནི་སྐུ་མདུན་དགོངས་པ་རྫོགས་རྒྱུར་ངང་སྒུག་བྱེད་རྒྱུའི་ལྐོག་གཡོ་ཞིག་ཡིན་པ་མ་ཟད། ཁོང་དགོངས་པ་རྫོགས་མཚམས་བོད་དོན་དེ་རིམ་བཞིན་ཡལ་ངེས་ཡིན་པར་རེ་བ་རྒྱག་གི་ཡོད་པ་རེད།

དེ་ལྟ་བུའི་གནས་བབ་ཀྱི་འོག་ནས་བོད་རྒྱ་གྲོས་མོལ་ལ་འགྱུར་བ་གང་ཡང་ཕྱིན་མེད་དང་སྐབས་ཐོག་དེར་༸གོང་ས་མཆོག་གིས་ཆབ་སྲིད་ཀྱི་སྐུ་དབང་ཡོད་ཚད་འོས་བསྡུའི་ལམ་ནས་བདམས་པའི་འགོ་ཁྲིད་ལ་རྩིས་སྤྲོད་གནང་བའི་དུས་སུ་གྱུར་ཡོད། འོན་ཀྱང་སྐུ་མདུན་ནི་བོད་བརྒྱུད་ནང་བསྟན་གྱི་ཆོས་ལུགས་ཀྱི་དབུ་ཁྲིད་མཐོ་ཤོས་དེ་ཡིན་པར་བརྟེན་བོད་མི་སུ་ཞིག་གིས་ཀྱང་སྐུ་མདུན་གྱི་ཚབ་བྱེད་ཐབས་བྲལ། དེ་ལྟར། སྤྱི་ལོ་ ༢༠༡༡ ལོར་བཙན་བྱོལ་བོད་མི་རྣམས་ཀྱིས་བློ་བཟང་སེངྒེ་ཁོང་རྒྱལ་ཁ་ཆེན་པོའི་ཐོག་ནས་ཆབ་སྲིད་ཀྱི་དབུ་ཁྲིད་དུ་བདམས་པ་རེད། ཁོང་དབུ་ཁྲིད་དུ་བདམས་དོན་གཙོ་བོ་ནི་ཁོང་ལ་ཧར་བར་ཊྲི་མཐོ་སློབ་ནས་སློབ་སྦྱོང་ཚད་མཐོ་གནང་ཡོད་པ་དང་། ཆབ་སྲིད་ཀྱི་ལས་འགུལ། དེ་བཞིན་རྒྱ་ནག་གི་མཁས་དབང་ལྷན་དུ་གྲོས་མོལ། གཞན་ཡང་ཁོང་ལྟ་བཟོ་ཡག་པོ་ཡོད་པ་སོགས་ལ་གཞི་བཅོལ་ནས་ཁོང་ཆབ་སྲིད་ཀྱི་དབུ་ཁྲིད་དུ་བདམས་ནས་དེང་རབས་ཀྱི་དུས་སྐབས་དང་བསྟུན་ནས་འཛིན་སྐྱོང་གི་ནང་དུ་འགྱུར་བ་གསར་བ་ཞིག་སླེབས་རྒྱུར་མི་མང་ནས་རེ་བ་ཆེན་པོ་བྱས་པ་རེད།

སྟབས་མ་ལེགས་པ་ཞིག་ལ། ཁོང་ནི་བསམས་པ་ནང་བཞིན་མ་བྱུང་བར་བྱས་རྗེས་ཡོད་པའི་ལས་དོན་གང་ཡང་སྒྲུབ་མ་ཐུབ་པར་ཆགས་པར་དཔེར་ན། བོད་རྒྱ་གྲོས་མོལ་ཕར་ཞོག མི་མང་གི་བདེ་སྡུག་ཡང་རང་སོར་གནས་བའི་སྒང་ལ། སྡུག་ཤོས་ནི་སྤྱི་ལོ་ ༢༠༡༦ ལོའི་ལོས་བསྡུའི་རྗེས་ནས་བཟུང་། བཙན་བྱོལ་ནང་གི་བོད་མི་ཆིག་འབུམ་ལྔ་ཁྲི་ལྷག་གི་སྤྱི་ཚོགས་ཆུང་ཆུང་འདི་ཡང་ཕྱོགས་གཏོགས་གཉིས་སུ་གྱེས་ཟིན་པ་དེ་རེད། རྒྱ་གཞུང་ལ་འགུལ་བསྐྱོད་གཏོང་རྒྱུ་ནི་ལས་སླ་པོ་ཞིག་མིན་པ་དངོས་བདེན་རེད། དེ་ནི་བློ་སེང་དང་བོད་མི་རྣམས་ཀྱི་ལག་ཏུ་མེད་ཀྱང་། བོད་པའི་སྤྱི་ཚོགས་ཆུང་ཆུང་འདིའི་མཐུན་སྒྲིལ་ནི་ཁོང་གིས་ཞི་སྒྲིག་གནང་ཐུབ་ཡག་ཅིག་ཡིན་རུང་། དེར་ཁོང་གིས་འབད་བརྩོན་ཙམ་ཡང་མ་གནང་བར། འགལ་ཟླ་ཡོད་པ་དེ་ནི་མི་ཉུང་ཤས་ཤིག་གམ། འདོད་བློ་མ་ཁེངས་པ་ཚོས་བཟོས་པ་རེད་ཤ་སྟག་བརྗོད་དེ་རྡོག་སྒྲིག་ཐབས་ནམ་ཡང་གནང་མེད།

བློ་སེང་མཆོག་ལ་ཁང་བརྩེགས་རེ་འགའ་མ་གཏོགས་ཁོང་གི་བྱས་རྗེས་འདི་རེད་ཅེས་པ་ཞིག་མེད་པར་བརྟེན་ཨ་ཆད་འུ་ཐུག་གིས་གོ་སྐབས་ཡོད་ཚད་སྤྱད་ནས་ལས་དོན་ཡོད་ཚད་ཁོང་གི་བྱས་རྗེས་ཡིན་པར་སྒྲུབ་ཐབས་བྱེད་ཀྱིན་པ་ལྟར། ཨ་རིའི་ཁུལ་གྱི་༸གོང་ས་མཆོག་གི་སྐུ་ཚབ་དངོས་གྲུབ་ཚེ་རིང་མཆོག་དང་ལྷན་དུ་ཕོ་བྲང་དཀར་པོའི་ཉེ་འགྲམ་གྱི་ Eisenhower Building ཞེས་པའི་ཕྱི་སྲིད་ལས་ཁུངས་ནང་དུ་སོང་ཙམ་གྱིས་ཨ་རིའི་ཕོ་བྲང་དཀར་པོའི་ནང་དུ་སོང་བ་ཡིན་ཚུལ་ཕྱིར་བསྒྲགས་གནང་ཡོད་པ་རེད། ཐ་ན་དབུས་བོད་མིའི་སྒྲིག་འཛུགས་ཀྱི་དྲ་གནས་དང་མི་འབོར་ཁྲི་དྲུག་ཙམ་གྱིས་དོ་ཁུར་ཡོད་པའི་བློ་སེང་མཆོག་གི་ངོ་དེབ ༼Facebook༽ ངོས་སུ་ཐེངས་འདིའི་ཕོ་བྲང་དཀར་པོར་བསྐྱོད་པ་དེ་ནི་ལོ་རྒྱུས་རང་བཞིན་ལྡན་པ་ཞིག་ཡིན་པར་བརྗོད་པ་དེ་ནི་གུས་ཞབས་མེད་པ་ཁོ་ན་ཞིག་མིན་པར། རྫུན་གཏམ་འཁྲུལ་མེད་ཅིག་ཡིན་སྟབས། ཅི་ཞིག་གྲུབ་འབྲས་ཐོན་པ་ཡིན་ཚུལ་གསུངས་པ་ནི་བརྗོད་གཞི་གཞན་ཞིག་རེད། རང་ཉིད་ལ་འོས་བབ་མེད་པའི་བྱས་རྗེས་ལེན་འདོད་ཀྱིས་རྫུན་གཏམ་ཕྱིར་བསྒྲགས་བྱེད་པ་ནི་བློ་སེང་ཅི་བྱེད་འདི་བྱེད་མེད་པར་ལུས་ཡོད་པའི་གནས་སྟངས་གསལ་པོར་བསྟན་པ་ཞིག་ཡིན་པ་མ་ཟད། ད་དུང་། ཁོང་གིས་མ་འོངས་པའི་བོད་པའི་དབུ་ཁྲིད་རྣམས་ལ་ཨ་རིའི་སྲིད་གཞུང་དང་མཉམ་དུ་ཕྱག་ལས་གནང་རྒྱུའི་ལམ་ཁ་བཏོད་ཡོད་པར་བརྗོད་པ་དེ་ནི་ཧ་ཅང་གི་ངོ་ཚ་ཁྲེལ་མེད་ཀྱི་བྱ་སྤྱོད་ཅིག་རེད།

བློ་སེང་གིས་ཕྱིར་བསྒྲགས་དེ་གནང་མ་ཐག ཨ་རིའི་ཕྱི་སྲིད་ལྷན་ཁང་གི་ལས་བྱེད་དམ། མི་མང་གི་བདེ་འཇགས་དང་མང་གཙོ། དེ་བཞིན་འགྲོ་བ་མིའི་ཐོབ་ཐང་། ཨ་རིའི་བོད་དོན་འབྲེལ་མཐུད་པ་བཅས་ཀྱི་འགན་ཁུར་མཁན་གྱི་དྲུང་གཞོན་སོགས་ཀྱི་སློབ་སྟོན་པ། སྐུ་ཞབས (Todd Stein) ཊོ་ཌ་སི་ཊྲིན་མཆོག་ཁོང་མི་སྒེར་གྱི་ཊུ་ཝི་ཊར་ (Twitter) ངོས་སུ་བློ་སེང་ཕོ་བྲང་དཀར་པོའི་ནང་ཕེབས་ཡོད་ཅེས་པ་དེ་བདེན་པ་མིན་པའི་དགག་གཞག་གནང་ཡོད།

བློ་སེང་མཆོག་གིས་གཅིག་བྱས་ན་མ་ཤེས་པའི་དབང་གིས་སམ། ཡང་ན་ཤེས་བཞིན་དུ་༸གོང་ས་མཆོག་གིས་མཛད་འཆར་ཁག་ལ་སྣང་ཆུང་གཏོང་གི་ཡོད་པ་ཡིན་སྲིད། དེ་བཞིན་སྐུ་མདུན་གྱིས་དབུ་ཁྲིད་པའི་འདས་པོ་དམ་པ་རྒྱ་རི་བློ་གྲོས་རྒྱལ་མཚན་མཆོག་དང་བཀྲས་མཐོང་བསྟན་འཛིན་རྣམ་རྒྱལ་མཆོག་སོགས་ཀྱིས་ཨ་རིར་བོད་དོན་ལ་དོ་ཁུར་གྱིས་རྒྱབ་སྐྱོར་གྱི་ལམ་ཁ་ཞིག་ལོ་མང་སྔོན་ནས་བཏོན་ཟིན་ཡོད་སྟབས། བློ་སེང་ཁོང་གིས་རྒྱག་ཐེངས་གཅིག་གིས་ཁོང་ཚོ་ཚང་མ་ནག་གསུབ་གཏོང་བ་དེ་ནི་ཧང་སང་དགོས་པ་ཞིག་རེད། ཁོས་ངེས་པར་དུ་ཤེས་དགོས་པ་ཞིག་ནི་ཁོ་རང་ད་ལྟ་དངོས་སུ་སྐུ་མདུན་དང་རྒྱ་རི་བློ་གྲོས་རྒྱལ་མཚན། དེ་བཞིན་བཀྲས་མཐོང་སོགས་ཀྱི་བཟོས་ཟིན་པའི་ལམ་ཁ་དེར་སྐྱོད་བཞིན་པ་དེ་རེད།

བློ་སེང་གིས་ངོ་དེབ་ Facebook ངོས་སུ་བྲིས་པ་ལྟར་ན། དབུས་བོད་མིའི་སྒྲིག་འཛུགས་ཀྱི་དབུ་ཁྲིད་ཅིག་ཐེངས་དང་པོར་གཞུང་འབྲེལ་གྱི་ཐོག་ནས་ཨ་རིའི་ཕོ་བྲང་དཀར་པོའི་ནང་ཕེབས་ཐུབ་པ་གཟི་བརྗིད་ཆེན་པོ་རེད་ཅེས་བཀོད་ཡོད། འོན་ཀྱང་༸གོང་ས་སྐྱབས་མགོན་ཆེན་པོ་མཆོག་ནི་ཨ་རིའི་ཕོ་བྲང་དཀར་པོར་ཕེབས་ནས་སྲིད་འཛིན་རིམ་པར་མཇལ་འཕྲད་གནང་བ་དང་། དེ་བཞིན་ཕྱི་སྲིད་ལྷན་ཁང་དུ་ཕེབས་ནས་དྲུང་ཆེ་མང་པོར་མཇལ་བ་དེ་ཚོ་ཤེས་ཀྱི་མེད་དམ། བློ་སེང་ཁོང་དབུས་བོད་མིའི་སྒྲིག་འཛུགས་ཀྱི་དབུ་ཁྲིད་ནམ་ཆགས་པ་རེད། ༸གོང་ས་སྐྱབས་མགོན་ཆེན་པོ་མཆོག་ནི་སྤྱི་ལོ་ ༢༠༡༡ ལོར་ཆབ་སྲིད་ཀྱི་སྐུ་དབང་མ་གནང་བར་དུ་བོད་ཀྱི་ཆོས་སྲིད་གཉིས་ཀྱི་དབུ་ཁྲིད་རེད།

སྤྱི་ལོ་ ༢༠༡༠ ལོར་༸གོང་ས་སྐྱབས་མགོན་རིན་པོ་ཆེ་མཆོག་ཨ་རིའི་ཕྱི་སྲིད་དྲུང་ཆེ། ལྕམ་སྐུ་ Hillary Clinton མཆོག་དང་མཇལ་འཕྲད་གནང་ཡོད་པ་དང་། ཨ་རིའི་སྲིད་འཛིན་སྦིལ་ཁི་ལིན་ཊན་སྐབས་ཀྱི་ཕྱི་སྲིད་དྲུང་ཆེ་སྐུ་ཞབས་ Warren Christopher སྐུ་དུས་བར་ཕྱི་སྲིད་དྲུང་ཆེ་རྣམས་དང་མཇལ་འཕྲད་གནང་མྱོང་ཡོད་པ་རེད། ཡིན་ནའང་། ཉེ་ཆར་བློ་སེང་ཨ་རིའི་བོད་དོན་འབྲེལ་མཐུད་པ་ཁོང་གི་ལས་ཁུངས་སུ་མཇལ་འཕྲད་ཞུས་པའི་པར་དེ། དབུས་བོད་མིའི་སྒྲིག་འཛུགས་ཀྱི་དྲ་རྒྱའི་མདུན་ངོས་སུ་མངོན་གསལ་དོད་པོའི་སྒོ་ནས་མགོ་བརྗོད་དུ། ལོ་རྒྱུས་གསར་བཟོ། སྲིད་སྐྱོང་གཞུང་འབྲེལ་གྱི་ཐོག་ནས་ཨ་རིའི་ཕྱི་སྲིད་ལྷན་ཁང་དུ་གདན་ཞུ་ཞེས་རྫོགས་རྒྱུ་མེད་པར་ཟླ་གཅིག་རིང་བཀོད་ཡོད།

འདི་ལྟ་བུའི་རྫུན་གཏམ་སྤེལ་ན་བོད་དོན་ལ་ཕན་ཐོགས་རྒྱུ་ཕར་ཞོག་བོད་ཀྱི་བྱ་གཞག་ལ་འགོག་རྐྱེན་བཟོ་བ་ཞིག་དང་། བོད་མི་དམངས་ལ་འཕྱ་སྨོད་བྱེད་སའི་རྒྱུར་འགྱུར་བར་ངེས། ད་ནི་དུས་རྒྱུན་ནས་ང་དང་ངའི། དེ་བཞིན་ང་རང་རྐྱང་རྐྱང་ཟེར་བ་མང་དྲག་སོང་། ཐེངས་འདིར་བློ་བཟང་སེངྒེ་ཡིས་རྫུན་གཏམ་དེ་འདྲ་ཞིག་བཤད་པར་བོད་མི་དམངས་ལ་ཁུངས་སྐྱེལ་དག་འབུད་དང་དགོངས་སེལ་ཞུ་དགོས་ངེས་ཤིག་ཏུ་མཐོང་།