ཉེ་སྔོན་སྐྱོ་བྲག་དགའ་དབང་ལགས་ཀྱི་རྩོམ་ཡིག་ལྕགས་མོ་འཚོའི་འཕྲིན་ལན་ཟེར་བ་ཞིག་ཁ་བརྡའི་ངོས་སུ་བཀོད་པ་ཡིན། ཕྱི་ཚེས་༡༡སྟེ་གཟའ་ཉི་མའི་ཉིན་རྩོམ་དེའི་མཆན་བུ་རྣམས་ལ་རོབ་བལྟས་ཙམ་བྱེད་རྒྱུ་བྱུང་། སྐབས་དེར་མཆན་བུ་བཅུ་ཙམ་བསུབ་པ་མ་ཟད་ཁ་བརྡའི་རེ་སྐུལ་ཞིག་ཀྱང་མཆན་གྱི་ཁོངས་སུ་བཞག་ཡོད། འོན་ཀྱང་། ལས་བྲེལ་གྱི་དབང་གིས་དེའི་རྗེས་ཀྱི་ཉིན་གཉིས་རིང་ང་ཚོར་མཆན་བུ་གཞན་དག་ལ་བསྐྱར་དུ་བལྟ་ཁོམ་མ་བྱུང་། དེ་རིང་་བསྐྱར་དུ་མཆན་བུ་རྣམས་བསྔོགས་དུས། མཆན་བུའི་ཁོངས་སུ་གང་ཟག་སྒེར་དང་འབྲེལ་བའི་གནས་ཚུལ་མ་འོས་བ་ཁ་ཤས་ཀྱང་འདུག་སྟབས། གནས་སྐབས་རིང་རྩོམ་དེ་ཕྱིར་བསྡུ་བྱས་ཡོད། དོ་དགོང་ལྕགས་མོ་འཚོའི་གསལ་འདེབས་དེ་ཡང་འབྱོར་ནས་ཁ་བརྡའི་སྒང་ལ་བཞག་ཡོད། ཁ་བརྡ་རྩོམ་སྒྲིག་ཚོགས་ཆུང་གི་ངོས་ནས་ཉིན་འགའི་རིང་མཆན་བུ་རྣམས་ལ་དུས་ཐོག་ཏུ་བརྟག་ཞིབ་བྱེད་མ་ཐུབ་པར་འཐུས་ཤོར་ཕྱིན་པ་ལ། བཀུར་འོས་ལྕགས་མོ་འཚོ་དང་འབྲེལ་ཡོད་རྣམ་པར་དགོངས་དག་ཞུ་བཞིན་ཡོད།
ཁ་བརྡ་རྩོམ་སྒྲིག་ཚོགས་ཆུང་གིས།
ཁ་བརྡ་ཚང་ལ་ཡུན་རིང་ཡོང་རྒྱུ་བྱུང་མ་སོང་། ཁ་སང་དེ་རིང་གཞི་ནས་གོ་སྐབས་དེ་རག་བྱུང་བས་མུ་མཐུད་དུ་ཡོང་རྒྱུ་ཡིན། ངས་ཉིན་གཉིས་ཙམ་གྱི་སྔོན་ནས་རྩོམ་ཉོག་ཅིག་དེ་གར་བསྐུར་ཡོད་པས་གཞན་ཚོའི་རྩོམ་རྣམས་བཀོད་ཚར་རྗེས་ས་མིག་འདྲ་འདུག་ན་འགོད་རོགས། དེ་མིན་བཤད་ཅི་ཡང་མེད། ཡ་བདེ་མོ་གྱིས།
བཀྲ་ཤིས་བདེ་ལེགས་ཞུ།
ངའི་རྩོམ་དུམ་ལ་བརྟེན་ནས་ཁ་བརྡའི་དགོངས་སེལ་ཚིག་གསུམ་ཞུ་དགོས་ཐུག་འདུག་པས། ངས་ཁ་བརྡའི་རྩོམ་སྒྲིག་ཚོགས་ཆུང་ལ་དགོངས་དག་ཞུ་ཡག་ཡིན། འོན་ཏེ་རྩོམ་གྱི་ཐོག་མའི་ཡོང་རྐྱེན་ཡིག་ལན་ཙམ་རེད་ལ། ནང་དོན་ལ་ཡང་ཕོག་ཐུག་འགྲོ་གཞི་མེད་ཕྱིར་བཀོད་མོད། ལྕགས་མོ་འཚོ་མི་སྣ་གྲགས་ཅན་ཡིན་པའི་རྒྱུ་མཚན་གྱིས་མཆན་འགོད་པ་ཚོས་འདྲ་མིན་བྲིས་ཏེ་ཚོར་རྐྱེན་རྣོ་བའི་རྩོམ་ཡིག་ཞིག་ཏུ་འགྱུར་སོང་འདུག །
སྤྱིེར་ང་རང་གི་ངོས་ནས་འཕྲིན་ལན་ཟེར་བ་དེ་ཁ་བརྡ་ཚང་གིས་སྤེལ་བར་ཁ བརྡ་དྲ་ཚིགས་ཀྱི་ཕྱག་ལས་གནང་མཁན་ཚོར་ལྟ་ཚུལ་དང་བསམ་འཆར་གང་ ཡང་བཟུང་མེད། ཡིན་ནའང་ཁ་བརྡའི་དགོངས་སེལ་ཚིག་གསུམ་འདི་ཁ་བརྡ་ཚང་གིས་དྲ་གྲོགས་དཀྱུས་མ་ཞིག་གི་མི་གཤིས་ལ་གུས་བརྩི་དང་སྲུང་སྐྱོབ་བྱས་པར་ངོས་འཛིན་གྱིས་རྣམ་པ་ཚོར་བཀའ་དྲིན་ཆེ་ཞུ་འདོད་བྱུང་།
ལྕགས་མོ་འཚོས་གུས་ཕུལ།