བློ་བཟང་རིན་ཆེན།
དོ་ནུབ་ཆམ་པ་ཅུང་ཙམ་ན་བར་ཁ་གཡར་ནས་དགོང་མོའི་ཆོས་ར་ལ་དགོངས་ཞུ་བྱས། དེ་ནས་ཆོས་ར་འོག་ཏུ་ཇ་ཚ་བོ་ཞིག་འཐུང་ཞོར་ཉེ་ཆར་ཁོ་བོས་བཀླགས་པའི་<< བོད་གངས་ཅན་གྱི་ཁྱད་ནོར་>>ཞེས་པའི་དཔེ་དེབ་དེ་ལ་བཀླགས་བྱང་ཞིག་འབྲི་དགོས་སྙམ་ནས་སྦྱོར་བ་བརྩམས།
དཔེ་དེབ་དེ་ནི་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་དགུང་ལོ་ལྔ་བཅུ་ང་གསུམ་ཐོག་མི་དམངས་ལ་གནང་བའི་བཀའ་ཆོས་ཤིག་(རིགས་སློབ་ལྷག་བརྩེགས་ཚོགས་ཆུང་གིས་)ཡིག་ཐོག་ཏུ་ཕབ་བསྒྱུར་བྱས་པ་ཞིག་རེད། ལེའུ་བཞི་དང་ཤོག་ངོས་བརྒྱ་དང་གོ་དྲུག་གི་བདག་ཉིད་ཅན་གྱི་དཔེ་དེབ་ཆུང་ཆུང་འདིའི་ནང་དུ། བདག་ཅག་སྟོན་པ་སངས་རྒྱས་བཅོམ་ལྡན་འདས་དང་པོ་མི་ཕལ་པ་ནང་བཞིན་རྒྱལ་པོའི་ཁྱིམ་ལ་བཞུགས་ཏེ་བཙུན་མོ་སྲས་དང་བཅས་པའི་སྲིད་པའི་ཕུན་ཚོགས་ཆ་ཚང་ལ་ལོངས་སྤྱོད་བྱས། དེ་ནས་སྐྱེ་རྒ་ན་འཆིའི་སྡུག་བསྔལ་གཟིགས་ཏེ་ངེས་འབྱུང་སྐྱེས་ནས་རབ་ཏུ་བྱུང་། དེ་ནས་ལོ་དྲུག་དཀའ་བ་སྤྱད་པ་སོགས་ལ་བརྟེན་ནས་གནས་མཆོག་རྡོ་རྗེ་གདན་དུ་མངོན་པར་རྫོགས་སངས་རྒྱས་པའི་མཛད་པ་བསྟན་ཏེ་གདུལ་བྱ་རྣམས་ལ་ཆོས་ཀྱི་འཁོར་ལོ་རིམ་པ་གསུམ་བསྐོར་བའི་ཚུལ་དང་། འཁོར་ལོ་སོ་སོའི་བརྗོད་བྱ་དང་ཐུན་མིན་གྱི་ཁྱད་ཆོས་སོགས་ཞིབ་བརྗོད་གནང་འདུག མ་ཟད་ཆོས་ཀྱི་སྡོམ་བཞི་དང་། དྲང་དོན་དང་ངེས་དོན་གྱི་ཁྱད་པར། སྤྱོད་འཇུག་གི་བཟོད་པ་དང་བརྩོན་འགྲུས་ཀྱི་ལེའུ་རྩལ་འདོན་བྱས་ཏེ་ཁོང་ཁྲོའི་ཉེས་དམིགས་དང་བཟོད་པའི་ཕན་ཡོན་ཞིབ་མོ་རྣམ་འཐག་གནང་འདུག དེ་ནས་སྐྱབས་འགྲོ་ལ་སློབ་ཚུལ་དང་རྡོ་རྗེ་ཐེག་པ་ལ་སློབ་ཚུལ། མདོ་སྔགས་ཀྱི་ཁྱད་པར་དང་རྒྱུད་སྡེའི་མིང་འདོགས་ཚུལ། བྱ་རྒྱུད་སྤྱོད་རྒྱུད་སོགས་གསང་སྔགས་ཀྱི་སྐོར་ནས་བཀའ་སློབ་ཟབ་རྒྱས་ཤིག་གནང་ཡོད་པ་ལགས་ན། ནང་ཆོས་ལ་དད་གུས་ཆེ་ཞིང་ནང་ཆོས་ཆེད་སྦྱོང་བྱེད་མི་ཐུབ་པའི་སྤྱི་ཚོགས་སློབ་གྲྭ་ཁག་ན་ཡོད་པའི་སློབ་མ་དང་། ཡང་ན་ལས་ཀའི་བྲེལ་ཟིང་བར་ནས་ནང་ཆོས་ལ་དོ་སྣང་བྱེད་འདོད་པ་དག་ལ། ལག་ཏུ་ལེན་བདེ་ཞིང་ས་ཆོད་གཞན་ལས་ཆེ་བའི་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གི་གསུང་དེབ་འདི་ཧ་ཅང་འོས་འཚམ་ཞིག་རེད་ཅེས་ངོ་སྤྲོད་ཞུ་འདོད་བྱུང་ངོ་།།
2020/12/25 མཚན་མོར་རྩོད་པ་ལ་མ་སོང་བར་འདི་ཉིད་བྲིས་པ་དགེའོ།།