ཨ་འདུས་པས།
ཇི་སྙེད་ཤེས་བྱ་ཡི་སྒོ་བརྒྱ།།
ལུང་རིགས་ལྡེ་མིག་གིས་འབྱེད་པའི།།
གནས་བཅུའི་ཤིང་རྟ་བ་ཆེན་པོ།།
ས་སྐྱ་པཎ་ཆེན་དེ་མཁྱེན་ནོ།།
འཆད་ལ་ཁྱོད་འདྲ་ཞིག་མེད་པ།།
སློབ་མ་བསྐྱངས་ཚུལ་དེས་རྟོགས་སོ།།
རྩོད་པའི་སྒྱུ་འཕྲུལ་དེར་བསམ་ན།།
དད་གུས་དབང་མེད་དུ་སྐྱེ་ཡོང་།།
མཛད་པའི་གཙོ་བོ་རུ་གྱུར་པའི།།
རྩོམ་ཚུལ་ཅུང་ཟད་ཅིག་རྗོད་དེ།།
ཁྱེད་ཉིད་མྱང་འདས་ཀྱི་དུས་དྲན།།
སྙིང་ནས་སྲུང་གཙི་ཞིག་ཞུའོ།།
ནང་བསྟན་དབྱིག་ནོར་གྱི་རིན་ཐང༌།།
ལུང་རིགས་དཔུང་ཚོགས་ཀྱིས་བསྲུངས་པའི།།
སྡོམ་གསུམ་རབ་དབྱེ་དང་མཇལ་དུས།།
ས་སྐྱ་པཎ་ཆེན་ཁོང་དྲན་བྱུང༌།།
ཕྱི་ནང་ལོག་རྟོག་གི་ལྕགས་གོང༌།།
རིགས་འཕྲུལ་ཐོ་བ་ཡིས་བསྙིལ་བའི།།
ཚད་མ་རིགས་གཏེར་དང་མཇལ་དུས།།
ས་སྐྱ་པཎ་ཆེན་ཁོང་དྲན་བྱུང༌།།
ཐུབ་བསྟན་ཁང་བཟང་དུ་བསྐྱོད་ལ།།
འཁྲུལ་བྲལ་ཐེམ་སྐས་སུ་གྱུར་པའི།།
ཐུབ་པ་དགོངས་གསལ་དང་མཇལ་དུས།།
ས་སྐྱ་པཎ་ཆེན་ཁོང་དྲན་བྱུང༌།།
འཆད་རྩོད་རྩོམ་པ་ཡི་སྦྲང་རྩི།།
ཤེས་རབ་གཡུ་སྦྲང་གིས་གཞིབས་པའི།།
མཁས་པ་འཇུག་སྒོ་དང་མཇལ་ཚེ།།
ས་སྐྱ་པཎ་ཆེན་ཁོང་དྲན་བྱུང༌།།
གོ་སླའི་སྡེབ་སྦྱོར་གྱི་ར་བར།།
བསླབ་བྱའི་མེ་ཏོག་གིས་བཀང་བའི།།
ས་སྐྱ་ལེགས་བཤད་དང་མཇལ་དུས།།
ས་སྐྱ་པཎ་ཆེན་ཁོང་དྲན་བྱུང༌།།
སྙན་འཇེབས་སྒྱུ་རྩལ་གྱི་མདུད་བརྒྱ།།
ལེགས་བཤད་གསང་ཚིགས་ཀྱིས་འབྱེད་པའི།།
རོལ་མོའི་བསྟན་བཅོས་དང་མཇལ་དུས།།
ས་སྐྱ་པཎ་ཆེན་ཁོང་དྲན་བྱུང་།།
སྙན་ཚིག་མེ་ཏོག་གི་ལང་ཚོ།།
སྙན་དངགས་སྲད་བུ་ལ་བརྒྱུས་པའི།།
མཁས་པའི་ཁ་རྒྱན་དང་མཇལ་ཚེ།།
ས་སྐྱ་པཎ་ཆེན་ཁོང་དྲན་བྱུང་།།
བགྲང་ཡས་ཤེས་བྱ་ཡི་ཆུ་གཏེར།།
མངོན་བརྗོད་ནོར་བུ་ཡིས་བརྒྱན་པའི།།
བསྟན་བཅོས་ཚིག་གཏེར་དང་མཇལ་དུས།།
ས་སྐྱ་པཎ་ཆེན་ཁོང་དྲན་བྱུང་།།
དེ་སྔོན་ཁྱེད་ཉིད་ཀྱི་ཞལ་ནས།།
ང་ཡི་རྣམ་ཐར་ཀུན་རྟོགས་ན།།
མཁས་གཞན་གཟུགས་བརྙན་ཙམ་ཡིན་ཞེས།།
གསུངས་པ་བདེན་པ་རང་གོའོ།།
ཁྱེད་རང་འཇམ་དབྱངས་སུ་མཐོང་ཞིང་།།
འཇམ་དཔལ་ཁྱེད་ཉིད་དུ་འདུག་པ།།
མཁས་པ་གཙང་ནག་པས་གོ་ཚུལ།།
འཁྲུལ་ཟད་རྣམ་ཐར་ལས་ཤེས་སོ།།
མཁྱེན་ནོ་ས་སྐྱ་པ་མཁྱེན་ནོ།།
འཇམ་དཔལ་དབྱངས་དངོས་དེ་མཁྱེན་ནོ།།
བདག་བློའི་རྨོངས་པ་ཡི་འཇིག་རྟེན།།
དྷཱི་ཡིག་སྒྲོན་མེ་ཡིས་སེལ་ཅིག།
དེ་ལྟའི་བྱིན་རླབས་ཀྱི་འོད་དཀར།།
གཟུགས་མེད་སེམས་ཁོང་དུ་རུམ་སྟེ།།
རྨད་བྱུང་རྣམ་ཐར་ལ་ཞུགས་ཚེ།།
སྒོ་གསུམ་དད་གུས་ཀྱིས་བཟི་འགྲོ།།
ཅེས་པའང་ཆོས་ཀྱི་རྗེ་ས་སྐྱ་པཎྜིཏ་ཆེན་པོ་ཀུན་དགའ་རྒྱལ་མཚན་དཔལ་བཟང་པོའི་དགོངས་རྫོགས་དུས་དྲན་སྲུང་གཙིའི་སླད་གང་གི་གསུང་རབ་ལ་ཐོས་བསམ་ཕྲན་བུ་བྱ་མྱོང་བའི་ཨ་འདུས་ཀྱི་མུ་ལྟོ་བས་གནས་མཆོག་རྡོ་རྗེ་གདན་དུ་སྔར་བྲིས་ལ་ཅུང་ཁ་སྣོན་གྱིས་སྤེལ་བ་དགེའོ།།