ཆང་སྐྱེས།
ཁ་བ་ཤུགས་ཀྱིས་འབབ་པའི་དགུན་ཁ་ཞིག་སྟེ།།
ཅེ་སྤྱང་འདུར་རྒྱུགས་རྒོད་པའི་སྨག་རུམ་ཀློང་ནས།།
གངས་རི་རྩེ་ན་འཛུམ་པའི་ཟླ་བ་དཀར་པོ།།
གློ་རྡེག་དགྲ་གཅན་ནག་པོས་ཁྱུར་མིད་བཏང་སོང་།།
གནམ་འདེགས་ཀ་བ་བརྡིབས་པའི་མཚན་མོ་དེ་ལ།།
མཆོག་སྤྲུལ་ཟླ་བ་གཞོན་ནུ་རེ་ཞིག་ནུབ་པས།།
གངས་དཀར་རི་བོའི་དབུ་འཕང་བྲང་ལ་སྨད་དེ
རྨ་འབྲི་གཙང་བོས་སྐྱོ་གླུ་ཤུགས་ཀྱིས་བླངས་སོང་།།
གང་གིས་མཛད་པའི་ཡིག་འབྲུ་ཁྲི་བདུན་ནང་ན།།
ལ་རྒྱའི་གད་རྒྱངས་དགུང་སྔོན་དབྱིངས་ལ་སྤུར་བས།།
མི་ལོ་དགུ་ལ་མུན་ནག་བཙོན་ཏུ་བཞུགས་ནས།།
ས་ཡ་དྲུག་གི་ཆེད་དུ་སྐུ་ངལ་བཞེས་སོང་།།
སྐྱབས་མགོན་པཎ་ཆེན་སྣང་བ་མཐའ་ཡས་མཆོག་གི།
རིགས་ལ་ཞེན་པ་དཀར་པོའི་་ཐུགས་རྗེ་འོད་ཀྱིས།།
བསྟན་པ་ཆོས་ཀྱི་མེ་རོ་ཡང་བསྐྱར་གསོས་ཏེ།།
སྐད་དང་ཡི་གེ་སྲུང་བའི་གོ་ཆ་གནང་སོང་།།
མདོ་སྨད་ཉི་ཟླ་རི་བའི་ཁུགས་ནས་ཆས་ཏེ།།
གངས་རི་ཁ་བ་དཀར་པོའི་རྩེ་མོར་བསྙེགས་ནས།།
བོད་ཡུལ་སྟོད་སྨད་བར་གསུམ་ཞབས་ཀྱི་བཅཊ་པ།།
རིགས་ཀྱི་བདེ་སྡུག་ཁོ་ནའི་ཆེད་དུ་ལགས་སོ།།
དུས་གསུམ་རྗེན་པར་གཟིཊ་པའི་རྣམ་སྤྲུལ་མཆོག་གི།
ཆོས་སྐུ་མི་མངོན་དབྱིངས་ལ་གཤེགས་པའི་རྗེས་སུ།།
བོད་མི་ས་ཡ་དྲུག་གི་ངོ་གདོང་སྐྱ་བོ།།
སྐྱོ་གདུང་དྲག་པོའི་མིག་ཆུས་ཡང་ཡང་བརླན་སོང་།།
བུ་ཆུང་སློབ་གྲྭར་སྐྱེལ་བའི་ལམ་བར་ནས་ཐོལ་གྱིས་བྲིས།