རིགས་ཀྱི་བུ།
དེ་རིང་ནི་བོད་ཟླ་བཅུ་གཉིས་པའི་ཚེས་ཉི་ཤུ་དགུ་ཡིན་པ་དང་། བོད་ཀྱི་ལོ་གསར་མ་སླེབས་གོང་གི་ཉིན་གཉིས་པ་རེད། ཡོངས་གྲགས་སུ་དགུ་ཐུག་ཞེས་འབོད་སྲོལ་ཡོད། བོད་དང་རྒྱ་གར་ཕྱོགས་ལ་དགུ་ཐུག་བཏུང་ཟིན་པ་དང་། བྱང་ཨ་རིར་དེ་རིང་དགོང་དྲོ་དགུ་ཐུག་འཐུང་རྒྱུ་རེད། དྲྭ་ཐོག་ནས་བོད་དང་རྒྱ་གར་ཁུལ་ལ་དགུ་ཐུག་བཏུང་པའི་པར་དང་གནས་ཚུལ་མི་ཉུང་བ་ཞིག་མཐོང་རྒྱུ་འདུག་ལ། བོད་ཀྱི་ལོ་གསར་དང་འབྲེལ་བའི་གཏམ་བཤད་དང་། གླུ་གཞས། གཏམ་བརྗོད་སོགས་ཀྱང་མང་པོ་ཞིག་གཞུང་སྒེར་སོ་སོས་འདོན་སྤེལ་བྱས་དང་བྱེད་མུས་སུ་འདུག དེ་དག་གི་ཁྲོད་ལས་དེ་རིང་ཞོགས་ཟས་བཟའ་ཞོར་ནང་མི་ལྷན་དུ་བོད་ཀྱི་བརྙན་འཕྲིན་དྲྭ་རྒྱའི་ཐོག་ལ་ (ནད་ཡམས་ཁྲོད་ཀྱི་འཚོ་བ། གཏམ་བརྗོད།) ཞེས་པ་མཐོང་བས་བལྟས་པ་ཡིན། བརྙན་འཕྲིན་གཏམ་བརྗོད་ལ་དུས་ཡུན་སྐར་མ་ ༣༣ དང་སྐར་ཆ་ ༢༢ འདུག་ལ། བོད་སྐད་གཏམ་བརྗོད་རེད་འདུག བརྙན་ཐུང་འགན་འཁུར་པ་བོད་ཀྱི་ཟློས་གར་ཚོགས་པ་དང་། འཁྲབ་གཞུང་འབྲི་མཁན་བསོད་ནམས་ཚེ་བརྟན་ཞུ་བའི་བོད་རིགས་གཞོན་སྐྱེས་ཤིག་འདུག ཉིན་ཤས་གོང་ཨ་རི་བོད་ཀྱི་རླུང་འཕྲིན་ཁང་གི་དཔེ་ཀློག་ལེ་ཚན་ཐོག་ཁོང་དང་མཉམ་དུ་བོད་ཀྱི་སྐད་ཡིག་ཐོག་ཡོད་པའི་བརྩམས་སྒྲུང་གྲགས་ཅན་ ( གཙུག་གཡུ་ ) སྐོར་བགྲོ་གླེང་བྱས་པའི་ལེ་ཚན་ཞིག་མཐོང་། བརྙན་ཐུང་གི་འཁྲབ་ཁྲིད་པ་ནི་བསོད་ནམས་ཚེ་བརྟན་ལགས་དང་། ཉི་མ་དོན་གྲུབ་ལགས་རེད་འདུག གཏམ་བརྗོད་ཀྱི་འཁྲབ་སྟོན་པ་མི་སྣ་དྲུག་འདུག་པ་ནི་འཇམ་དཔལ་རྒྱ་མཚོ་ལགས་དང་། བསྟན་འཛིན་ཉི་མ་ཀ་ལགས་དང་ཁ་ལགས། ཉི་མ་དོན་གྲུབ་ལགས། ངག་དབང་སྒྲོལ་མ་ལགས། བསོད་ནམས་ཚེ་བརྟན་ལགས་བཅས་རེད་འདུག པར་ལེན་དང་བརྙན་སྦྱོར་པ་ནི་བོད་མིའི་སྒྲིག་འཛུགས་ཀྱི་བོད་ཀྱི་བརྙན་འཕྲིན་ཚན་པ་ཡིན་པ་དང་། གར་སྟེགས་ཇུས་འགོད་པ་ནོར་བུ་བསམ་འཕེལ་ལགས་རེད་འདུག དེ་ནས་ཕྲན་གྱིས་ད་ལན་ཚིག་གསར་ཞིག་ཤེས་པ་ནི་སྐད་སྦུག་ཞེས་པ་དེ་རེད། སྐད་སྦུག་སྒྲིག་སྦྱོར་པ་བསྟན་འཛིན་ལགས་ཞེས་བྲིས་འདུག
བདག་གི་དྲིན་ཅན་བླ་མས། སངས་རྒྱས་འཕགས་པས་གང་གནང་བ་ཙམ་ཐམས་ཅད་དོན་དང་ལྡན་པ་དང་། བྱང་སེམས་འཕགས་པས་གང་གནང་བ་ཕལ་ཆེ་བ་དོན་དང་ལྡན་པ། སོ་སྐྱེས་གང་བྱས་ཕལ་ཆེ་བ་དོན་དང་མི་ལྡན་པ་ཡིན་སྟབས་གཞན་དོན་ཡང་དག་པར་བསྒྲུབ་པར་སངས་རྒྱས་ཀྱི་གོ་འཕང་ལ་བརྩོན་དགོས། ཞེས་གསུངས་མྱོང་། རང་རེ་སོ་སྐྱེ་ཐ་མལ་བ་ཚོས་གང་བྱས་ཕལ་ཆེ་བ་དོན་དང་མི་ལྡན་པ་ཡིན་པ་གཞིར་བཅས་ཀྱིས་ད་ལན་བོད་ཀྱི་བརྙན་འཕྲིན་ཁང་ནས་འདོན་སྤེལ་གནང་བའི་གཏམ་བརྗོད་ནད་ཡམས་ཁྲོད་ཀྱི་འཚོ་བ་ཞེས་པ་བལྟས་རྗེས་མཐོང་སྣང་ཇི་བྱུང་མདོར་ཙམ་ཐད་ཀར་བྲིས་པ་ཡིན་སྟབས་ནོར་འཛོལ་བྱུང་ཡོད་ན་དགོངས་སེལ་ཞུ་གི་ཡོད། གཏམ་བརྗོད་འགོ་བཙུགས་པ་དང་། ལུས་ལ་བོད་ཆས་གྱོན་པའི་མི་སྣ་བསོད་ནམས་ཚེ་བརྟན་གྱི་ལག་པར་དཔེ་དེབ་ཉར་ནས་ཀློག་བཞིན་པའི་རྣམ་པ་དེ་མཐོང་བ་ཙམ་གྱིས་དགའ་སྣང་སྐྱེས་བྱུང་། སྣང་བརྙན་དེ་གཅིག་པུས་བོད་པའི་སྤྱི་ཚོགས་ཁྲོད་དུ་དེབ་ཀློག་མཁན་གྱི་གྲངས་འབོར་ཉུང་བ་ནས་མང་དུ་གཏོང་རྒྱུར་བསྐུལ་སློང་དང་ཕན་ཐོགས་ངེས་ཅན་ཡོང་ངེས་པ་དང་། ད་དུང་འཁྲབ་སྟོན་པས་ནད་ཡམས་ཁྲོད་དུ་དེབ་མང་པོ་བཀླགས་པར་བརྟེན་ནས་དེ་སྔ་རོལ་དབྱངས་ལ་དོ་སྣང་མེད་ནའང་ས་པཎ་གྱི་རོལ་མོའི་བསྟན་བཅོས་སོགས་བཀླགས་ནས་རོལ་མོར་དོ་སྣང་དང་གོ་རྟོགས་གསར་པ་སླེབས་པ་སོགས་བརྗོད་པར་བརྟེན་དེབ་ཀྱི་རིན་ཐང་མང་ཚོགས་སམ་རྒྱ་ཆེའི་གཟིགས་མོ་བ་ཚོར་ངོ་སྤྲོད་ཡག་པོ་བྱས་འདུག་དྲན། དེ་ནས་བཟང་ཕྱོགས་སམ་ཕྲན་གྱིས་མཐོང་བའི་དགའ་འོས་པའི་གནས་ཚུལ་གཅིག་རེད།
ཉེ་ལམ་གསར་འགྱུར་དང་། དྷ་སའི་གླིང་སྐོར་ཉེ་འཁྲིས་སུ་བཞུགས་མཁན་བོད་ཀྱི་མཁས་པ་རྣམ་གྲྭ་ཐུབ་བསྟན་ཡར་འཕེལ་ལགས་ཀྱི་ངོ་དེབ་སོགས་ཀྱི་ནང་གླིང་སྐོར་ཕེབས་ལམ་གཡས་གཡོན་ལ་དོམ་སླེབས་པའི་གནས་ཚུལ་སྤེལ་བ་དང་སྦྲགས་གཙོ་བོ་ཞོགས་པ་སྔ་པོ་གླིང་སྐོར་ལ་ཕེབས་མཁན་རྣམས་ཀྱི་བདེ་འཇགས་ལ་ཐུགས་གཟབ་གནང་དགོས་པའི་དངོས་ཡོད་སྤྱི་ཕན་གྱི་གནས་ཚུལ་སྤེལ་ཡོད། གནས་ཚུལ་སྤེལ་མཁན་གྱིས་དུས་ཐོག་ཆར་པ་ལྟར་སྤེལ་བར་བརྟེན་ནས་ད་བར་དོམ་གྱིས་ཞབས་སྐོར་ལ་ཕེབས་མཁན་ལ་གནོད་འཚེ་བཏང་པའི་གནས་ཚུལ་ཐོན་མེད་པ་ནི་གཟེངས་སུ་བསྟོད་འོས་པ་ཞིག་ལ་ཅི་ལ་མིན། ཡིན་ནའང་། བློ་ཕམ་དང་བཅས་ཞུ་རྒྱུ་གཏམ་བརྗོད་དེའི་ནང་ལ་གླིང་སྐོར་ལ་དོམ་ཡོད་པའི་སྐོར་གླེང་ཁུལ་གྱིས་དོམ་དེ་དག་མི་དེ་དང་དེ་རེད་ཅེས་མི་མིང་སྦྱར་ནས་དགོད་བྲོ་སློང་ཁུལ་བྱས་པ་ནི་ཆེས་མི་འོས་པ་ཞིག་ལ་མཐོང་། འོ་ན། འཁྲབ་གཞུང་འབྲི་མཁན་བསོད་ཚེ་ལགས་ཀྱིས་གླིང་སྐོར་ལ་དོམ་སླེབས་པའི་གནས་ཚུལ་དེ་ནི་བདེན་པ་མ་རེད་ཅེས་བརྗོད་ཀྱི་ཡོད་དམ། ཡང་ན། མི་མིང་འབོད་པ་དེ་དག་དོམ་དང་འདྲ་པོ་ཡོད་རེད་ཅེས་བརྗོད་ཀྱི་ཡོད་དམ། ཡང་ན། གླིང་སྐོར་ལ་དོམ་སླེབས་ཡོད་པས་ཐུགས་གཟབ་དགོས་པའི་གསལ་བསྒྲགས་སྤེལ་མཁན་རྣམས་ཀྱིས་རྫུན་བཟོ་བྱས་པ་རེད་ཟེར་གྱི་ཡོད་དམ།
འཁྲབ་གཞུང་ནང་གི་གླེང་མོལ་ཁ་ཤས་གོ་བ་ལེན་རྒྱུར་ཅུང་ཁག་པོ་འདུག་ལ། སྡུག་ཉེས་ན་གོ་བ་ལོག་པ་སྟེར་ཉེན་མཐོང་། དཔེར་ན། པཱ་ལགས་ངས་མ་བསད་སྔོན་ལ་ནད་ཡམས་ཀྱིས་བསད་ས་རེད་དཱ། ཞེས་པ་དེས་གོ་བ་གང་འདྲ་སྟེར་པ་འདུག་གམ། ངས་རེ་བ་བྱེད་བཞིན་པ་ནི་ཕྲན་གྱིས་གོ་ནོར་ཐེབས་པ་ལས་འཁྲབ་གཞུང་ནང་གི་གླེང་མོལ་ལ་ནོར་འཁྲུལ་མེད་པ་ཤོག དེ་ནས་གོ་ནོར་ཐེབས་ཉེན་ཆེ་བའི་གནས་ཚུལ་ཁ་ཤས་མཐོང་བ་ནི་མི་ཞུ་ཀ་མེད་ལྟ་བུར་མཐོང་། རྒྱུ་མཚན་ནི། གཏམ་བརྗོད་དེའི་དམིགས་ཡུལ་གཙོ་བོ་ནི་ནད་ཡམས་ཁྲོད་འཕྲོད་བསྟེན་ཉེན་སྲུང་ལ་དོ་གཟབ་དགོས་པའི་སློབ་གསོ་སྤྲོད་རྒྱུ་དེ་རེད་འདུག སློབ་གསོ་སྤྲད་པ་ཙམ་མིན་པར་ཡང་དག་པའི་སློབ་གསོ་མ་ནོར་བ་ཞིག་སྤྲོད་རྒྱུ་ནི་གལ་ཆེ་ཡིན་པ་ལས་དེ་མིན་སློབ་གསོ་སྤྲད་པ་ལས་མ་སྤྲད་ན་ལེགས་པའི་གནས་སྟངས་ཆགས་ཉེན་ཡོད། དཔེ་མཚོན་ཁ་ཤས་ཞུས་ན། དྲིལ་བསྒྲགས་ལས་ཁུངས་ནས་ཡིན་ཟེར་མཁན་མི་གསུམ་ཁྱིམ་ཚང་ནང་ལ་སླེབས་སྐབས་ཁ་རས་མེད་པ་དང་། ཕན་ཚུན་བར་ཐག་ངེས་ཅན་མེད་པར་སྐད་ཆ་བཤད་པ། ཁང་པའི་ནང་ལ་མི་གསར་པ་ཞིག་སླེབས་སྐབས་ཚ་བ་ཡོད་མེད་འཕྲུལ་ཆས་ཀྱིས་བརྟག་དཔྱད་བྱེད་སྲོལ་ཡོད་པ་མ་བྱས་པ། ནང་དུ་ཡོང་མཁན་ཚོས་གཏམ་བརྗོད་ནང་ལ་སྨན་ཆུ་ཞེས་མིང་ཚིག་བེད་སྤྱོད་བྱས་པའི་ཅ་དངོས་ཨིན་སྐད་དུ་ Sanitizer ཡིས་ལག་པ་གཙང་མ་མ་བཟོས་པ་དང་། ཡང་མིན་ན་ལག་པ་འཁྲུ་དགོས་ནའང་མ་བཀྲུས་པ། Sanitizer ཡིས་ལག་པ་གཙང་བཟོ་བྱ་དགོས་པ་མ་བྱས་པར་། ཤིང་ཏོག་སྟེང་ལ་གཏོར་བའི་གནས་སྟངས་གཏམ་བརྗོད་དེའི་ནང་ལ་མཐོང་རྒྱུ་འདུག དེ་དག་གིས་འཕྲོད་བསྟེན་ཉེན་སྲུང་ཐད་སློབ་གསོ་མི་འདྲ་བ་ཞིག་སྤྲོད་ཉེན་འདུག་བསམ་ནས་ལྷག་བསམ་རྣམ་དག་གིས་བྲིས་པ་ལས་སྐྱོན་བརྗོད་གང་ཡང་མིན་པས་གོ་འཛོལ་མི་ཡོང་བའི་རེ་བ་ཞུ་གི་ཡོད།
ད་དུང་གཏམ་བརྗོད་བརྙན་ཐུང་དེའི་ནང་ལ་གོ་ནོར་ཐེབས་ཉེན་ཡོད་པའི་གནས་ཚུལ་ཁ་ཤས་གསལ་པོ་མཐོང་རྒྱུ་འདུག དཔེར་ན། པཱ་དོན་གྲུབ་ལགས་དགེ་རྒན་རྒན་ཡོལ་ཡིན་པ་དང་། ལོ་ན་ ༥༢ རེད་ཟེར་པ་དེ་རིགས་རང་ལོ་དང་ཞབས་ལོ་གང་གི་ཐོག་ནས་རྒན་ཡོལ་ཡིན་མིན་གློག་བརྙན་བལྟ་མཁན་མང་པོས་མི་ཤེས་པས་གོ་ནོར་ཐེབས་ཉེན་ཆེ། གློག་བརྙན་བལྟ་མཁན་ཁ་ཤས་ཀྱིས་བཙན་བྱོལ་བོད་མིའི་དགེ་རྒན་རྒན་ཡོལ་འགྲོ་བའི་ལོ་ཚད་ ༥༠ ཙམ་མིན་ནམ་དྲན་མི་སྲིད་པ་མ་རེད། དེ་རིགས་ལ་འཁྲབ་གཞུང་འབྲི་སྐབས་དང་། འཁྲབ་ཁྲིད་བྱ་སྐབས་སུ་ཐུགས་སྣང་དགོས་པ་གལ་ཆེ། དགེ་རྒན་རྒན་ཡོལ་ལ་འགྲོ་བའི་ལོ་ཚད་ག་རེ་རེད་དམ། རྒྱུས་ལོན་གནང་ངམ། དེ་ནས་བཙན་བྱོལ་བོད་མིའི་སྤྱི་ཚོགས་ནང་ལ་ཕྱི་ལུགས་སྨན་པའི་གྲངས་འབོར་ཧ་ཅང་ཉུང་ཉུང་ཡིན་སྟབས་གཞིས་ཆགས་ཚང་མར་སྨན་པ་བསྐོ་བཞག་ཐུབ་མེད་པ་དངོས་ཡོད་གནས་ཚུལ་རེད། གནས་སྟངས་དེ་འདྲའི་འོག་ལ་ཁྱིམ་ཚང་སོ་སོར་རྒན་རྒོན་ལ་ཏོག་དབྱིབས་ནད་དུག་སྔོན་འགོག་བརྟག་དཔྱད་དང་སློབ་གསོ་སྐྱོན་པར་སྨན་པ་དང་སྨན་ཞབས་འགྲོ་གི་རེད་དམ། སྨན་ཞབས་ལས་རོགས་སུ་མེད་པར་སྨན་པ་གཅིག་པུ་འགྲོ་བ་འཁྲབ་པ་དེ་ལན་པོ་འདུག་གམ། དོན་དངོས་དང་མཐུན་ནམ།
དུས་ཡུན་སྐར་མ་ ༣༣ ཙམ་གྱི་གཏམ་བརྗོད་ཀྱི་འཁྲབ་གཞུང་ནི་རིང་པོ་མ་རེད། ཡིན་ནའང་། གཏམ་བརྗོད་འདིའི་འཁྲབ་གཞུང་ནང་ལ་གླེང་མོལ་སྔ་ཕྱི་ནང་འགལ་དང་། ཞེ་ས་རྐང་ཀྱོག་ལྟ་བུ་བེད་སྤྱོད་བྱས་པ་མངོན་གསལ་དོད་པོ་འདུག དཔེར་ན། སྔོན་ལ། དམྱལ་བའི་ནང་ལ་རོས་ཁེངས་ནས་བསྡད་ས་མེད་པར་མི་ཡུལ་ལ་ཡོང་བ་ཡིན། ཞེས་པ་དང་། རྗེས་ལ། དམྱལ་བའི་ནང་ལ་རོ་མ་འདང་བར་བརྟེན་མི་ཡུལ་ལ་རོ་ཐོལ་བ་གཅིག་ལེན་པར་སླེབས་པ་ཡིན། ཟེར་པ་གཉིས་སྔ་ཕྱི་ནང་འགལ་གྱི་སྐད་ཆ་ཡིན་པ་ཕྲུ་གུ་ཆུང་ཆུང་ཚོས་ཀྱང་དོ་སྣང་ཡོང་ངེས། དེ་ནས་ཞེ་ས་རྒྱབ་སྟངས་ཐད་དོ་སྣང་དགོས་པ། དཔེར་ན། གདོན་འདྲེ་ལགས། ཞེས་པའི་ཐ་སྙད་གཏམ་བརྗོད་དེའི་ནང་ལ་བེད་སྤྱོད་ཐེངས་ཁ་ཤས་བཏང་འདུག གདོན་འདྲེ་དང་ལགས་གཉིས་མཉམ་དུ་སྦྱར་ཐུབ་ན། ཁྱི་ལགས་དང་། བ་ཕྱུགས་ལགས་ཞེས་སྦྱོར་ཐུབ་བམ། མདོར་ན། གཏམ་བརྗོད་འཁྲབ་སྟངས་དང་བོད་སྐད་སྒྲ་དག་པོ་སོགས་ལ་ཞུ་དགོས་མ་མཐོང་ཡང་། འཁྲབ་གཞུང་འབྲི་སྐབས་སུ་སྤྱི་ཚོགས་ཀྱི་འཚོ་བ་དངོས་མཚོན་ཐབས་སུ་ཉམས་ཞིབ་དང་རྒྱུས་ལོན་མང་ཙམ་གནང་དགོས་པ་མཐོང་བས་ལྷག་བསམ་རྣམ་དག་གིས་བྲིས་པ་ལས་སྐྱོན་མེད་སྐྱོན་འཚོལ་བྱས་པ་རྩ་བ་ནས་མིན་སྟབས་གོ་འཛོལ་མེད་པ་མཁྱེན་ནོ།།
Attachments area