དོན་འགྲུབ་བཀྲ་ཤིས།
ཉེ་ཆར་ཕྱི་ཟླ་༢ཚེས་༡༨ཉིན་རྒྱ་གར་ལྷོ་ཕྱོགས་ཀར་ལྦར་རྫོང་ཁོངས་སུ་ཏོག་དབྱིབས་ནད་ཡམས་ལ་མཉམ་རུབ་ཀྱི་གདོང་ལེན་གྱི་ལས་དོན་ལེགས་པོ་བསྒྲུབས་གནང་མཁན་མོན་གྷོ་འདོད་རྒུ་གླིང་བོད་མིའི་གཞིས་ཆགས་ཚུད་པའི་ས་གནས་ཁག་བཞི་ནས་མི་བཞི་ལ་གཟེངས་བསྟོད་ཀྱི་མཛད་སྒོ་ཞིག་མོན་གྷོ་ཀར་ལྦར་རྫོང་དུ་ཚོགས་པ་དང་གཞིས་འགོ་ལྷག་པ་ཚེ་རིང་ལ་རྫོང་དཔོན་མཆོག་གི་ཕྱག་ནས་གཟེངས་བསྟོད་ཕྱགས་འཁྱེར་གསོལ་རས་གནང་ཡོད་པ་རེད། གཟེངས་བསྟོད་གནང་དགོས་དོན་དེ་ཡང་འདས་པའི་ལོ་གཅིག་ཙམ་རིང་རྒྱ་ནག་ནས་ཁྱབ་པའི་ཏོག་དབྱིབས་ནད་ཡམས་ཁྱབ་གདལ་གྱི་ཛ་དྲག་གནས་སྐབས་སུ་མོན་གྷོ་འདོད་རྒུ་གླིང་བོད་མིའི་གཞིས་ཆགས་ཀྱི་ཏོག་དབྱིབས་ནད་ཡམས་ཛ་དྲག་ཚོགས་ཆུང་གིས་གཙོ་བོ་འགན་ཁུར་སྣེ་ཁྲིད་འོག་གཞིས་ཆགས་ནང་གི་དགོན་སྡེ་གྲྭ་ཚང་ཁག་དང་སྡེ་ཚན་ཁག་དང་མང་ཚོགས་ནས་རྒྱ་གར་དབུས་དང་མངའ་སྡེ་གཞུང་གི་ལམ་སྟོན་བཀོད་ཁྱབ་གཞིར་བཟུང་ནད་ཡམས་ལ་གདོང་ལེན་ལེགས་པོ་གནང་བ་དང་ལྷག་དོན་དུ་དབུས་དང་མངའ་སྡེ་སོ་སོར་ཧིན་སྒོར་འབུམ་ཕྲག་མར་མང་པོའི་ཞལ་འདེབས་ཕུལ་བ་རྒྱ་གར་ས་གནས་ཡུལ་མིར་ཟ་ཆས་ཀྱི་རོགས་རམ་རྒྱ་ཆེ་གནང་བཅས་ནད་ཡམས་ཀྱི་ཛ་དྲག་སྐབས་སུ་མཉམ་རུབ་ཀྱི་གཟེངས་སུ་ཐོན་པའི་ལས་དོན་ལེགས་པོ་བསྒྲུབས་པའི་ངོས་འཛིན་དུ་ཀར་ལྦར་རྫོང་དཔོན་ཕྱག་ནས་གཟེངས་བསྟོད་ཕྱག་འཁྱེར་དེ་མོན་གྷོ་འདོད་རྒུ་གླིང་བོད་མིའི་གཞིས་ཆགས་ཀྱི་ཏོག་དབྱིབས་ནད་ཡམས་ཛ་དྲག་ཚོགས་ཆུང་གི་འགན་འཛིན་མོན་གྷོ་འདོད་རྒུ་གླིང་གི་ས་གནས་འགོ་འཛིན་ལྷག་པ་ཚེ་རིང་ལགས་སུ་གནང་ཡོད་པ་དང་སྦྲགས་ཐུགས་རྗེ་ཆེ་ཞུའི་གསུང་བཤད་གནང་འདུག་དེ་ཡང་གཞིས་འགོ་ལྷག་པ་ཚེ་རིང་ལགས་ཀྱིས་འགྲེལ་བརྗོད་གནང་སོང་།
ཕྱོགས་མཚུངས་ས་གནས་གཞིས་འགོའི་ངོས་ནས་ཀྱང་གཟེངས་བསྟོད་དེ་གནང་བར་མོན་གྷོ་འདོད་རྒུ་གླིང་གཞིས་ཆགས་ཀྱི་སྐྱ་སེར་མང་ཚོགས་ཡོངས་ཀྱི་ཚབ་ཞུས་ནས་ཐུགས་རྗེ་ཆེ་ཞུས་པ་དང་ལྷག་དོན་དུ་རྒྱ་གར་དབུས་དང་མངའ་སྡེ་གཞུང་དམངས་གཉིས་ནས་ད་བར་བཙན་བྱོལ་བོད་མིར་མཐུན་འགྱུར་རོགས་རམ་གནང་བར་ཐུགས་རྗེ་ཆེ་ཞུས་པ་དང་སྦྲགས་མུ་མཐུད་རོགས་རམ་གནང་སྐྱོང་ཡོང་བའི་འབོད་སྐུལ་དང་ད་དུང་ཏོག་དབྱིབས་ནད་ཡམས་སྐབས་རྫོང་དཔོན་ནས་ས་གནས་ལ་ཆེད་ཕེབས་ཀྱིས་སྔོན་འགོག་ལས་དོན་ལ་རྟོག་ཞིབ་དང་མཐུན་གྱུར་རོགས་རམ་༧གོང་ས་མཆོག་གི་སྐུའི་འཁྲུངས་སྐར་སྲུང་བརྩི་གནང་ཕྱོགས་བཅས་ལ་ཡང་རྒྱབ་སྐྱོར་གནང་བར་ཐུགས་རྗེ་ཆེ་ཞུས་གནང་འདུག་སྒྲ་་་ད་དུང་ཉིན་དེར་ས་གནས་ཀྱི་རྫོང་དཔོན་གསར་རྙིང་འཕོ་འགྱུར་གྱི་ཉིན་མོ་ཡང་ཁེལ་ཡོད་སྟབས་རྫོང་དཔོན་གསར་པར་འཚམས་འདྲི་དང་སྦྲགས་མོན་གྷོ་བོད་མིའི་གཞིས་ཆགས་ངོ་སྤྲོད་དང་རྫོང་དཔོན་གོང་མ་ལྟར་བོད་མིའི་གཞིས་ཆགས་ལ་མུ་མཐུད་མཐུན་གྱུར་རོགས་རམ་དང་རྒྱབ་སྐྱོར་ཡོང་བ་མ་ཟད་ལྷག་དོན་གཞིས་ཆགས་ནང་ད་ཡོད་དཀའ་ངལ་ཆེ་ཤོས་ལམ་ཁ་དང་ས་རྡོ་ལག་འཛིན་གྱི་དཀའ་ངལ་དེ་སེལ་ཐབས་ཡོང་བའི་འབོད་སྐུལ་ཞུས་གནང་འདུག
མཛད་སྒོ་དེ་ནི་གར་གྱི་གསར་ཁང་གྲགས་ཅན་་ཌྲི་ཀེན་ ཧིརལ་ཌྲི་དང་ཀར་ན་ཀྲ་ཀའི་གསར་ཁང་པརཱ་ཇ་ལྦ་ནི་གཉིས་ནས་Decan Herald and Prajavani གོ་སྒྲིག་འོག་ཚོགས་པ་ཞིག་རེད་འདུག ཐེངས་འདིའི་ཏོག་དབྱིབས་ནད་ཡམས་སྔོན་འགོག་གདོང་ལེན་གཟེངས་བསྟོད་དེ་ནི་རྒྱ་གར་གྱིས་བོད་མིར་གནང་བའི་ནད་ཡམས་ལས་དོན་གྱི་གཟེངས་བསྟོད་ཐོག་མ་ལྟ་བུ་ཡིན་པ་རེད་འདུག
དེ་དང་ཆབས་ཅིག་མོན་གྷོ་འདོད་རྒུ་གླིང་དུ་རྟེན་གཞི་བྱས་པའི་གདན་ས་གྲྭ་ཚང་ཁག་གི་དགེ་འདུན་པ་རྣམས་ཏོག་དབྱིབས་ནད་ཡམས་ཁྱབ་པ་ནས་ད་བར་དུས་ཡུན་ལོ་ངོ་གཅིག་ལ་ཉེ་བའི་རིང་དགོན་པའི་ཕྱི་ལ་གཏན་ནས་སྐྱོད་མ་ཆོག་པའི་དམ་དྲག་ནན་པོ་གནང་ཡོད་ཀྱང་གཞིས་ཆགས་ནང་ཞབས་བརྟན་གནང་མཁན་དགེ་འདུན་པ་མ་རགས་པ་སོགས་ཀྱི་དཀའ་ངལ་ལ་དམིགས་ནས་བོད་ཀྱི་ལོ་གསར་གོང་ནས་བཟུང་གདན་ས་དགའ་ལྡན་དང་འབྲས་སྤུངས་ར་སྟོད་གྲྭ་ཚང་ས་སྐྱའི་དགོན་པ་བཙུན་དགོན་བྱང་ཆུབ་ཆོས་གླིང་བཅས་ཀྱི་དགེ་འདུན་པ་རྣམས་གཞིས་གྲོང་ཁག་ནང་ཕེབས་ཆོག་པ་བཟོས་འདུག་འོན་ཀྱང་གྷོ་དང་ཧུབ་ལི་གྲོང་ཁྱེར་ལ་སྔར་བཞིན་ཕེབས་ཆོག་གི་མེད་པའི་རེད་འདུག་དེ་ཡང་འབྲས་སྤུངས་ལ་ཕྱི་ཟླ་དང་པོའི་ཚེས་༢༨ ནས་ལྷུག་ཡངས་སུ་བཏང་དགོས་དོན་སྐོར་འབྲས་སྤུངས་བློ་གསལ་གླིང་གྲྭ་ཚང་གི་མཁན་རིན་པོ་ཆེ་བློ་བཟང་བསམ་གཏན་ལགས་ཀྱིས་གསུང་དོན་སྒྲ།།
ཡིན་ན་ཡང་སྦེལ་ཀོབ་བོད་མིའི་གཞིས་སུ་རྟེན་གཞི་བྱས་པའི་གདན་ས་ཆེན་པོ་སེ་ར་ཐེག་ཆེན་གླིང་དང་རྣམ་གྲོལ་གླིང་།བཀྲིས་ལྷུན་པོ་བཅས་སྦེལ་ཀོབ་ཁུལ་གྱི་དགོན་སྡེ་ཁག་དང་ཧུན་སུར་གཞིས་ཆགས་ནང་རྫོང་ཆོས་གྲྭ་ཚང་དང་བརྒྱུད་སྨད་གྲྭ་ཚང་བཅས་གཞིས་ཆགས་གཞན་ཁག་ནང་གནས་ཡོད་པའི་དགོན་སྡེ་གྲྭ་ཚང་ཁག་སྔར་བཞིན་དགོན་པའི་ཕྱི་ལ་སྐྱོད་ཆོག་གི་མེད་པ་རེད་འདུག
རྒྱ་གར་ལྷོ་ཕྱོགས་གསར་འགོད་པ་དོན་གྲུབ་བཀྲིས།