དེ་རིང་རྒྱ་གར་ལྷོ་ཕྱོགས་སུ་མང་ཚོགས་དང་དགོན་སྡེ་ཁག་གིས་ཆོ་འཕྲུལ་དུས་ཆེན་སྲུང་བརྩི་ཞུས་པ།

རྒྱ་གར་ལྷོ་ཕྱོགས་གསར་འགོད་པ་དོན་གྲུབ་བཀྲིས།

དེ་རིང་རྒྱ་གར་ལྷོ་ཕྱོགས་གཞིས་ཆགས་ཁག་གི་ནང་ཚོང་ཁང་དང་ཟ་ཁང་ལས་ཁུངས་བཅས་ཡོངས་རྫོགས་སྒོ་བརྒྱབ་ཏེ་ཆོ་འཕྲུལ་དུས་ཆེན་སྲུང་བརྩི་ཞུ་བཞིན་འདུག ཡིན་ན་ཡང་ཏོག་དབྱིབས་ནད་ཡམས་ཀྱིས་རྐྱེན་པས་འདི་ལོ་མང་ཚོགས་རྣམས་དགོན་པ་ཁག་ལ་མཆོད་མཇལ་དང་བཅོ་ལྔ་མཆོད་པའི་མཇལ་ཁ་སོགས་མི་འདུག ལྷོ་ཕྱོགས་བོད་མིའི་གཞིས་ཆགས་ཆེ་ཤོས་སྦེལ་ཀོབ་བོད་མིའི་གཞིས་ཆགས་ལ་ཆ་མཚོན་ན་མང་ཚོགས་ཚོས་ཞོགས་པ་སྔ་པོ་ནས་ཞལ་ལག་དང་། བཞེས་ཏོག གསོལ་ཇ་བཅས་བསྣམས་ཏེ་གཞིས་སྤྱི་རྒྱལ་བའི་ཕོ་བྲང་ལ་མཇལ་ཁ་དང་། རྣམ་གྲོལ་གླིང་དགོན་པར་གོས་སྐུ་མཇལ་ཁ། གཞིས་གྲོང་གཉིས་པའི་མཆོད་རྟེན་སྐོར་བ་སོགས་ཉིན་གང་རིང་རྣམ་དཀར་ཆོས་ཕྱོགས་ཀྱི་བྱ་བ་ལ་འབད་བཞིན་འདུག

ཡང་གདན་ས་གྲྭ་ཚང་ཁག་ལ་མཚོན་ན་འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་ཆེན་རྡོ་རྗེ་འཆང་ཆེན་པོ་མཆོག་གིས་འདི་ལོའི་ལྷ་ལྡན་ཆོ་འཕྲུལ་སྨོན་ལམ་ཆེན་མོ་དེ་ཏོག་དབྱིབས་ནད་ཡམས་སྔོན་འགོག་ཀྱི་ཐབས་ལམ་ཡོད་པའི་ཐོག་ནས་ཚོགས་ཐབས་དགོས་པའི་བཀའ་སློབ་ལམ་སྟོན་གནང་བ་གཞིར་བཟུང་གདན་ས་གྲྭ་ཚང་ཁག་དྲུག་གི་མཁན་ལས་ཟུར་རྣམས་བཀའ་གྲོས་གནང་བ་དང་དགའ་ལྡན་ཁྲི་རིན་པོ་ཆེ་མཆོག་གི་བཀའ་ཁྲོལ་ཐོབ་པ་གཞིར་བཟུང་འདི་ལོ་ལྷ་ལྡན་ཆོ་འཕྲུལ་སྨོན་ལམ་ཆེན་མོའི་མཛད་རིམ་དེ་མང་ཇ་གཉིས་ཚོགས་ཐེངས་གཉིས་ཉུང་དུ་བཏང་བ་དང་། སྨོན་ལམ་ཚོགས་མཁན་དགེ་འདུན་ཞལ་གྲངས་ཉུང་དུ་བཏང་ཏེ་གྲྭ་ཚང་རེ་ནས་དགེ་འདུན་ཞལ་གྲངས་༡༥༠ལས་མ་མང་བ་དང་།ཚོགས་ཡུན་ཉིན་བདུན་ནས་ལྔ་བར་ཉུང་དུ་བཏང་བ། ཚོགས་ཡུལ་གདན་ས་ཁག་ཁུངས་སོར་སོར་ཚོགས་ཆེན་དུ་ཚོགས་བཞིན་ཡོད་པ་རེད་འདུག དེ་ཡང་རྒྱལ་སྤྱིའི་དགེ་ལྡན་ལྷན་ཚོགས་ཀྱི་ངེས་སྟོན་པ་དང་དགའ་ལྡན་ཁྲི་ཐོག་ཁང་གི་དྲུང་ཆེ་དགའ་ལྡན་ཤར་རྩེ་མཁན་ཟུར་བྱང་ཆུབ་ཆོས་ལྡན་ལགས་ཀྱིས་གསུངས་བྱུང་།

དེ་སྔ་བོད་ནང་ལོ་རྒྱུས་ཐོག་ནས་ལྷ་ལྡན་ཆོ་འཕྲུལ་སྨོན་ལམ་དེ་གདན་ས་སེ་འབྲས་དགེ་གསུམ་གྱི་མཚོན་པའི་དགོན་སྡེ་ཁག་ཅིག་གི་དགེ་འདུན་པ་ཞལ་གྲངས་ཁྲི་གཅིག་ཙམ་ཞིག་གིས་ལྷ་སའི་གཙུག་ལག་ཁང་དུ་བོད་ཟླ་དང་པོའི་ཚེས་༣ནས་ཚེས་༢༥བར་མཉམ་དུ་ཚོགས་སྲོལ་ཡོད་འདུག་ཀྱང་བཙན་བྱོལ་ནང་དེ་སྔ་གནས་མཆོག་རྡོ་རྗེ་གདན་དུ་གོང་ས་སྐྱབས་མགོན་ཆེན་པོ་མཆོག་གི་བཀའ་ཆོས་དང་བསྟུན་ནས་དུས་ཚོད་ངེས་མེད་དུ་གདན་ས་གསུམ་མཉམ་དུ་ལྷ་ལྡན་ཆོ་འཕྲུལ་སྨོན་ལམ་ཆེན་མོ་འཕར་མ་ཐེངས་ཁ་ཤས་ཤིག་ཚོགས་ཡོད་པ་ལས་གཞན་སྔར་སྲོལ་བོད་ཟླ་དང་པོའི་ནང་གི་སྨོན་ལམ་ཆེན་མོ་དངོས་གཞི་དེ་དགའ་ལྡན་འབྲས་སྤུངས་གཉིས་མཉམ་དུ་ཚོགས་པ་དང་སེ་ར་ཐེག་ཆེན་གླིང་ལོགས་སུ་ཚོགས་ཀྱི་ཡོད་སྟབས་གདན་ས་གསུམ་མཉམ་དུ་ཚོགས་མ་ཐུབ་ཀྱི་མེད་པ་རེད་འདུག་དེའི་རྒྱུ་རྐྱེན་གང་ཡིན་མིན་སྐོར་བཀའ་དྲི་ཞུས་པར་སེ་ར་དང་དགའ་ལྡན་འབྲས་སྤུངས་བར་ས་ཐག་རྒྱང་པོ་ཡོད་པའི་རྐྱེན་གྱིས་ཡིན་པ་གསུངས་གནང་སོང་།

སེ་ར་ཐེག་ཆེན་གླིང་དུ་བཅོ་ལྔ་མཆོད་པ་གཏོར་རྒྱག་དང་བྱམས་པ་གདན་འདྲེན་མེད་སྐོར་ཁྲིམས་བདག་དགེ་བསྐོས་དགེ་བཤེས་བྱམས་པ་ནོར་བུ་ལགས་ཀྱིས་གསུངས་བྱུང་།

རྒྱ་ནག་གཞུང་གིས་བོད་བཙན་བཟུང་བྱས་ཏེ་ཕྱི་ལོ་༡༩༥༩ལོའི་རྗེས་ནས་ཕྱི་ལོ་༡༩༨༦ལོ་བར་ལོ་ངོ་༢༦ རིང་བོད་ནང་སྨོན་ལམ་ཆེན་མོ་ཚོགས་ཐུབ་མེད་པ་རེད། བོད་ནང་སྨོན་ལམ་ལོ་མཐའ་མ་༡༩༥༩ ལོར་གོང་ས་སྐྱབས་མགོན་ཆེན་པོ་མཆོག་གིས་ལྷ་ལྡན་ཆོ་འཕྲུལ་སྨོན་ལམ་ཆེན་མོར་དགེ་བཤེས་ལྷ་རམས་པའི་མཚན་རྟགས་བཞེས་ཡོད།

འོན་ཀྱང་བཙན་བྱོལ་ནང་༡༩༦༠ལོར་སྦྱིན་བདག་དགེ་འདུན་པ་ཞིག་གིས་སྦག་ས་ཆོས་སྒར་ནས་བོད་ཀྱི་ཆོས་བརྒྱུད་རིས་མེད་ཀྱི་དགེ་འདུན་པ་ཞལ་གྲངས་༥༠༠གནས་མཆོག་རྡོ་རྗེ་གདན་དུ་གདན་ཞུ་གནང་ནས་བཙན་བྱོལ་ནང་ལྷན་ལྡན་ཆོ་འཕྲུལ་སྨོན་ལམ་ཆེན་མོ་དེ་ཐེངས་དང་པོ་དེ་གནས་མཆོག་རྡོ་རྗེ་གདན་དུ་ཚོགས་པ་དང་དུས་དེ་ནས་ད་བར་སྨོན་ལམ་ཆེན་མོ་གཏན་ནས་ཆད་མྱོང་ཡོད་པ་མ་རེད་ཅེས་སྐབས་དེར་གནས་མཆོག་རྡོ་རྗེ་གདན་ལ་སྨོན་ལམ་ལ་ཕེབས་མཁན་གྲས་ད་ལྟ་དགུང་གྲངས་༨༨ཡིན་པ་སེ་ར་ཐེག་ཆེན་གླིང་སེར་སྨད་ཡེར་པ་ཁང་ཚན་དུ་བཞུགས་པའི་དགེ་བཤེས་བསྟན་འཛིན་ཆོས་འཕེལ་ལགས་ཀྱིས་གསུངས་བྱུང་།

ཡང་བཀྲིས་ལྷུན་པོ་དང་བརྒྱུད་སྨད་གྲྭ་ཚང་རྫོང་ཆོས་གྲྭ་ཚང་སོགས་ལ་ཡང་ཁུངས་སོ་སོར་སྨོན་ལམ་ཚོགས་བཞིན་འདུག་ལ་འདི་ལོ་སྨོན་ལམ་དགེ་བཤེས་ལྷ་རམས་པའི་དམ་བཅའ་འཇོག་མཁན་དགེ་བཤེས་བརྒྱ་ཙམ་ཡོད་པ་རེད་འདུག རྒྱུན་གཏན་ཡིན་ན་བོད་ཚེས་བཅོ་ལྔ་ཉིན་མང་ཚོགས་རྣམས་ལ་བཅོ་ལྔ་མཆོད་པ་མཇལ་ཁ་དང་མཆོད་པའི་གླུ་གར་གཟིགས་འབུལ་བཅས་གནང་ཏེ་ཆོ་འཕྲུལ་དུས་ཆེན་སྲུང་བརྩི་ཟབ་རྒྱས་གནང་སྲོལ་ཡོད་ཀྱང་འདི་ལོ་ནད་ཡམས་སྔོན་འགོག་ཆེད་མང་ཚོགས་ལ་བཅོ་ལྔ་མཆོད་པའི་མཇལ་ཁ་དེ་མེད་པ་རེད་འདུག