རྫ་ཚེ་རིང་བཀྲ་ཤིས།
རྨི་ལམ་མ་ཡིན་པ་ཡི་རྨི་ལམ་ཞིག །
རྟོག་ལྗོངས་（幻想）ལུ་གུ་རྒྱུད་དུ་འགྱེད་ཅིང་འཕྲོ། །
འཕྲོ་འདུའི་ཐགས་སྣེ་ཡར་ནས་ཡར་ལ་བསྣར། །
མཚམས་རེ་ལན་རེར་ང་ལ་སྡུག་ཀྱང་གཏོད། །
རྒྱུ་སྐར་གཞན་གྱི་ཉུལ་ཞིབ་ཕོ་ཉ་ཞིག །
ཧོབ་སྟེ་བོད་ལ་འབྱོར་བ་ཡིན་ནམ་ཅི། །
གང་ནས་ཡོང་དང་གང་དུ་ཕྱིན་པ་ཡི། །
རྗེས་ཤུལ་ལྐོག་ཏུ་གྱུར་པའི་ཁྱེའུ་ཞིག །
རྒྱ་ཡན་རང་གྲོལ་ཨ་རོ་ཡ་མཚན་ཅན། །
ཡེ་ཤེས་འབྱུང་གནས་རྩོད་མེད་སྤྲུལ་པའི་སྐུ། །
ང་ཡི་སེམས་ལ་རོང་ཟོམ་ཆེན་པོ་བཞིན། །
འཁོར་འདས་སྒྱུ་མའི་གར་མཁན་ཁྱེད་ཁོ་ན། །
བདག་གི་སེམས་ཀྱི་ནགས་ཚལ་ཁྱེད་ཡིན་ནོ། །
ཧ་ཅང་མཚར་དུ་བརྩིས་པ་ཁྱེད་ཡིན་ནོ། །
སེམས་ཀྱི་གབ་སར་ཅིས་ཀྱང་མ་འཆུན་པའི། །
ཁྱེད་ནི་བདག་གི་འོད་ཀྱི་ཕོ་ཉའོ། །
གལ་ཏེ་ང་ལ་རྣ་བ་གཞན་ཞིག་དང་། །
ཡང་ན་རིམ་པ་མཐོ་བའི་མིག་དབང་ཞིག །
དེ་མིན་སྲིད་པ་ཕྱིར་ལྡོག་ནུས་པ་ཞིག །
ཡོད་ན་ཁྱེད་ཉིད་ལན་ཅིག་མཇལ་སྙིང་བྲོད། །
ཁོ་བོའི་ཁྱེད་ཀྱི་ཕྱོགས་ལ་རྟོག་པ་ན། །
སེམས་ནི་ཡོངས་སུ་བཀྱིགས་པའི་བཙོན་མ་བཞིན། །
འགུལ་འདོད་འཕག་འདོད་ཡོད་ཚད་དོན་མེད་དེ། །
མཐར་ནི་ཨ་ཐང་ཆད་པ་ཙམ་དུ་ཟད། །
ནམ་མཁའ་འདི་ནི་ཤིན་ཏུ་སྲ་ཞིང་འཐས། །
རྣམ་ཤེས་འདི་ནི་ཤིན་ཏུ་བླུན་ཞིང་ལྐུག །
ཁོ་བོས་ཁྱེད་ཀྱི་མཐའ་ལ་བསམ་པ་ནི། །
བྲག་གཡང་གཟར་པོར་ཐུར་དུ་ལྟ་བ་བཞིན། །
ཁྱེད་ནི་ང་དང་མཉམ་དུ་ཡོད་ངེས་སྙམ། །
རྒྱུན་ལྡན་ལྟར་དུ་ལྷོད་བཞུགས་ཡིན་ངེས་སྙམ། །
འོན་ཀྱང་ང་ནི་གྱང་རའི་བཙོན་མ་བཞིན། །
ཁྱེད་གྱི་རྡོག་སྒྲ་ཙམ་ཡང་མི་ཐོས་སོ། །
ཆུང་ངུའི་དུས་ཀྱི་རུ་པ་འདུག་སའམ། །
རྒྱང་རིང་མཛའ་མོ་བཞིན་དུ་སེམས་ངོར་བླངས། །
བོར་འཐོར་ཤོར་བའི་ནོམ་པ་རྩ་ཆེན་བཞིན། །
རུམ་དང་འདུག་ས་ཡོད་ཚད་ལག་པས་ཉུག །
འགའ་རེས་ཟེར་ན་དཔལ་སྤྲུལ་ཁྱེད་རེད་ཟེར། །
པགས་རྩག་གོན་ནས་ས་འདིར་ཡོང་སོང་ཟེར། །
རྫ་ཆུའི་ཆུ་ཁར་ཚུགས་མལ་མཛད་སོང་ཟེར། །
འོན་ཀྱང་ཁོ་བོ་བསླེབས་པ་འཕྱིས་སོང་འདྲ། །
བསམ་སྟངས་འགའ་ཡིས་མགོ་ཡི་རུས་སྒྲོམ་ན། །
དྲན་སྟངས་འགའ་རེས་གློ་བའི་གུར་མཐའ་བཀྱགས། །
གླེང་སྟངས་འགའ་ཡིས་སྙིང་གི་འཕར་ཚད་མགྱོགས། །
སེམས་ཚོར་ཚང་མ་ར་སྤྲོད་ཞུ་ཐབས་བྲལ། །
དུས་དང་ནམ་མཁའ་སེམས་ཀྱི་སྒྲིབ་པ་འདི། །
བྷིར་ལན་རྩིག་གྱང་ལས་ཀྱང་མཐོ་ལ་ཡེར། །
མེད་ལ་སྣང་ལ་ཡོད་ལ་གཞི་མེད་པའི། །
སེམས་ཀྱི་ཡོལ་བ་ཁོ་ན་འཇིགས་རེ་ཆེ། །
ཁ་པར་བཏང་ན་ཆོག་པ་ཨ་ཅང་ཅང་། །
གཟུགས་མཐོང་ལམ་ནས་ངོ་འཕྲད་ཆོག་དུས་འདིར། །
དུས་ཀྱི་ཡོལ་བ་གཅིག་གི་སྒྲིབ་ཙམ་འདི། །
རེ་ཞིག་རྩིས་མེད་བཏང་ན་མི་ཆོག་གམ། །
བཻ་རོའི་ཞལ་ནས་སྤྲུལ་པའི་སྐུ་ཡིན་གསུང་། །
གཉགས་ཆེན་ཛྷཱ་ནས་ས་བརྒྱད་སེམས་དཔར་བཞེད། །
བླ་ཆེན་ཞབས་ཀྱིས་ཀླུ་སྒྲུབ་སྤྲུལ་པར་དགོངས། །
ཡེ་ཤེས་རྡོ་རྗེས་རྡོ་རྗེ་སེམས་དཔར་མཇལ། །
ཆུང་ངུའི་དུས་ནས་ཚད་མེད་བརྟུལ་ཞུགས་བསྐྱངས། །
མཁས་དང་བཙུན་དང་གྲུབ་པའི་རྩེ་མོར་བསྙེགས། །
མཁས་གྲུབ་རྒྱལ་པོ་རྣམས་དང་དགོངས་ཉམས་བསྡུར། །
ཡེ་ཤེས་འབྱུང་གནས་བསྟན་པའི་བདག་པོ་དངོས། །
ཡེ་ཤེས་གཞོན་ནུས་རྡོ་རྗེ་རྣོན་པོར་གསོལ། །
སེམས་ཉིད་གཉུག་མའི་ཉི་ཟླ་འོད་དུ་འབར། །
ཡ་མཚན་སྤྲུལ་པའི་སྒྱུ་མ་ཆེན་པོ་ཁྱོད། །
བདག་གི་སེམས་ལ་འཆར་ནུབ་བྲལ་བར་གསོལ། །
ད་ཆ་ཁྱེད་གསུང་ཆ་ཤས་འགའ་རེ་ཙམ། །
མང་པོ་ཕྱི་མའི་དུས་འདིར་མི་སྣང་ཡང་། །
གལ་ཏེ་བཞེད་ན་བདག་གི་སླད་དུ་ཡང་། །
རྣམ་རོལ་སྒྱུ་མའི་རྩེད་འཇོ་ཡུད་ཙམ་གསོལ། །
མི་ལྡོག་དད་པ་ཡིན་མིན་ཞུ་མ་ཤེས། །
སྔོན་བསགས་ལས་འཕྲོ་ཡོད་མེད་ཆ་མ་འཚལ། །
འོན་ཀྱང་བདག་གི་སེམས་ཀྱི་མཐའ་དབུས་ན། །
ཡེ་ཤེས་འབྱུང་གནས་གསལ་འཚེར་ལྷུན་སྡུག་འབར། །
ནམ་ཞིག་ང་ཡང་སྒྱུ་མའི་རྒྱ་གྲོལ་ནས། །
ཁྱིམ་སྡོད་བཀའ་རྒྱ་ཡོད་ཚད་རང་ཞི་སྟེ། །
དུས་ཀྱི་ཁབ་ལེན་ར་བ་བརྟོལ་ཉིན་དེར། །
ཁྱེད་དང་མཉམ་དུ་མཇལ་བའི་ཞལ་ཆད་ཞུ། །
ཞེས་པ་འདིའང་། སྤྲུལ་པའི་སྐུ་ཨ་རོ་ཡེ་ཤེས་འབྱུང་གནས་ཀྱི་ལོ་རྒྱུས་ཆེན་མོ་དང་། ཨ་རོའི་ལུགས་ཀྱི་རྫོགས་ཆེན་གྱི་བསྐོར་ལ་ལེགས་པར་མཇལ་བའི་ལས་འཕྲོ་བཟང་པོ་དང་ལྡན་པ་རྫ་ཚེ་རིང་བཀྲ་ཤིས་ཀྱིས། ཨོ་གླིང་རི་བོ་སྔོན་པོའི་ཡང་རྩེ་ནས་སྤྲུལ་པའི་སྐུ་ཨ་རོ་ཡེ་ཤེས་འབྱུང་གནས་དྲན་བཞིན་གང་དྲན་ཡི་གེར་བྲིས་པའོ།།སྤྱི་ལོ་ ༢༠༢༡ ཟླ་ ༣ ཚེས་ ༢༢ ལའོ།།