སྒྲོན་ཉེར།
༡༽ སྤྱི་འཐུས་ཚོགས་གཙོ་དང་རྒྱུན་ལས་རྣམ་པས་ཟླ་བ་མང་པོའི་རིང་གྲོས་ཚོགས་འཚོགས་དུས་ཕར་འགྱངས་བྱེད་ཆོག་པའི་ཆ་རྐྱེན་ཞིག་བཅའ་ཁྲིམས་ནང་གསལ་མེད་པ་མཁྱེན་ཡོད་ཅིང་། བཅའ་ཁྲིམས་ཀྱི་དགོངས་དོན་མ་ཡིན་པ་ཞིག་ཤེས་བཞིན་ལག་ལེན་བསྟར་ཡོད་ན་དེ་ཁྲིམས་འགལ་མིན་ན་ཅི་རེད། གྲོས་ཚོགས་འཐུས་མིས་བཅའ་ཁྲིམས་ནང་དུ་ནད་ཡམས་དང་ས་ཡོམ། ཆུ་ལོག་ལ་སོགས་པའི་དུས་ཀྱི་གོད་ཆག་རིགས་བྱུང་ཚེ་དེ་ལ་དམིགས་བསལ་གང་ཡང་མི་དགོས་པའི་གནས་སྟངས་ཤིག་མ་འོངས་སྔོན་གཟིགས་ཀྱིས་བཅའ་ཁྲིམས་ནང་དུ་མ་གསལ་བ་ཡིན་རྒྱུ་རེད། གཞན་དུ་ན་གྲོས་ཚོགས་འཚོགས་དུས་ཤིག་ཕར་འགྱངས་ཇི་ལྟར་བྱེད་དགོས་མིན་གྱི་ས་མཚམས་གསལ་བོ་ཤིག་ཀྱང་མེད་པའི་གནས་སྟངས་འོག་བལྟས་པ་ཙམ་གྱིས་མཐོང་ཐུབ་པ་ནི་གྲོས་ཚོགས་ཀྱི་འཐུས་མི་རྣམ་པའི་སྤུས་ཚད་ཡིན་དགོས་པ་མ་རེད་དམ།
༢༽ སྤྱི་འཐུས་ཚོགས་གཙོ་པདྨ་འབྱུང་གནས་ལ་མཚོན་ན། རང་གི་གོ་གནས་ཀྱི་ཆེད་དུ་ཁྲིམས་ལུགས་ལ་རྒྱབ་གཏད་ནས་གོ་སྐབས་དམ་འཛིན་བྱེད་པར་རང་ནུས་གང་ཡོད་ཀྱིས་འཕག་འཚག་རྒྱག་མཁན་ཞིག་ཡིན་པ་ལས་ཁྲིམས་ཀྱི་དབང་སྒྱུར་ལ་ཐུགས་མཉེས་པོ་ཡོད་པའི་སྐུ་ངོ་ཞིག་མིན་པ་འདྲ། ན་ནིང་ཡང་བཀའ་བློན་ཞིག་གསང་བའི་འོས་ཤོག་བླུགས་ནས་འདེབས་སྐབས་ཁྲིམས་འགལ་གཅིག་བྱས་པ་རེད། མཐར་ཁིམས་ཞིབ་ཁང་གིས་བཀའ་བློན་དམ་འབུམ་གྱི་ལས་དོན་ངོས་ལེན་གནང་མེད། ཡིན་ནའང་། ཚོགས་གཙོ་པད་འབྱུང་གིས་རང་སྐྱོན་ངོས་ལེན་གྱི་ཚབ་ཏུ་གཡོལ་ཐབས་ཤ་སྟག་གིས་བརྒྱུད་ལམ་ཁག་ལ་མཐོང་ན་དགོད་བྲོ་ཞིང་བསམ་ན་སྙིང་ན་བ་གང་མང་ཞིག་གཅིག་རྗེས་གཉིས་མཐུད་དུ་བཤད་སོང་མོད། མི་གཅིག་གིས་ཀྱང་སྤྱི་འཐུས་ཚོགས་གཙོས་བཅའ་ཁྲིམས་ལ་མ་བརྩིས་པའི་ཉེས་ཆད་གཅོད་དགོས་པའི་བསམ་འཆར་བཤད་མཁན་ཧ་ལམ་བྱུང་མ་སོང་། ནམ་རྒྱུན་བདེན་པ་གཙུག་ཏུ་བཀུར་དགོས་པའི་གནས་ལུགས་ལ་བློ་གཏད་ནས་བླ་མའི་བཀའ་བཞིན་སྒྲུབ་མཁན་ང་ཡིན་ཟེར་བའི་མི་དེ་ཚོ་ཡང་འཇམ་མོག་གེར་ཅི་ཡང་མི་སྨྲ་བའི་རྟུལ་ཞུགས་བཟུང་ནས་བསྡད་སོང་བ་དེ་ཡང་ཡ་མཚན་པོ་མཐོང་སོང་། དེ་ལ་ཆོལ་ཁའི་ཕྱོགས་རེས་ཟེར་ཆོག་གམ། ངས་ནི་ཆོལ་ཁའི་ཕྱོགས་རེས་དང་ཆོས་ལུགས་འཐེན་འཁྱེར་ཟེར་བ་ཅི་འདྲ་ཡིན་པ་ངོས་འཛིན་མི་ཤེས། དེའི་ཕྱོགས་ནས་ང་ལ་ཉམས་མྱོང་གང་ཡང་མེད་པས་ངས་མི་ཤེས་སོ།།
༣༽ ཚོགས་གཙོ་པད་འབྱུང་གིས་གྲོས་ཚོགས་འཐུས་མི་རྣམས་ལ་སྟངས་འཛིན་ནན་པོ་བྱེད་ཐུབ་ཀྱིན་མེད་པའི་གནས་སྟངས་འོག་ནས་གཡོན་ཐལ་ཆེ་ཞིང་མི་མང་བློ་ཕམ་འོས་པའི་དོན་དག་རེ་གཉིས་བྱུང་ཡོད་དེ། ཁ་སང་བྱུང་མ་ཐག་པའི་ཁྲིམས་ཞིབ་པ་གསུམ་གྲོས་ཚོགས་འཐུས་མིས་གནས་དབྱུང་བཏང་ཡོད་པ་འདི་གཅིག་རེད། བཅའ་ཁྲིམས་སུ་མི་གསལ་བ་ཞིག་སྤྱི་འཐུས་ཚོགས་གཙོ་གཙོས་པའི་སྤྱི་འཐུས་རྒྱུན་ལས་རྣམས་ཀྱིས་ཐག་གཅོད་གསལ་བསྒྲགས་མ་བྱས་སྔོན་ལ་འབྲེལ་ཡོད་ཞིབ་ཁང་གི་མཛད་གཙོ་རྣམ་པར་གོ་བསྡུར་ཙམ་ཡང་མེད་པར་ནད་ཡམས་ཀྱི་རྐྱེན་གྱིས་གྲོས་ཚོགས་འཚོགས་དུས་ཕར་འགྱངས་བྱས་ཡུན་བཅའ་ཁྲིམས་ཀྱི་ལྕགས་རི་བརྒལ་སོང་ན་འགྲིག་ཐབས་ག་ལ་ཡོད། ཚོགས་གཙོའི་དབང་ཚད་དེ་ཡང་བཅའ་ཁྲིམས་ཀྱི་དགོངས་དོན་ལ་བསྟུན་ནས་བེད་སྤྱོད་བྱེད་དགོས་པ་ཞིག་ལོས་ཡིན་སྙམ། སྤྱི་འཐུས་ཚོགས་གཙོ་ཡང་མི་རེད། སྤྱིར་ན་ཉེ་རིང་ཆགས་སྡང་ལོས་ཡོད། འོན་ཀྱང་། ཆེས་མཐོའི་ཁྲིམས་ཞིབ་པ་རྣམས་ལ་ཞེ་འཁོན་སྡང་ཟུག་ཅི་བས་ཆེ་བ་ནི་བློ་ཡུལ་ལས་འདས་ཞིང་། བོད་ཀྱི་རྩ་དོན་ལ་ཕན་ཐོགས་རྩ་བ་ནས་མེད་པ་ཞིག་རེད།
དེ་ནས་གྲོས་ཚོགས་འཐུས་མིས་ཆ་ཤས་ལེན་སྟངས་དང་ཚོགས་གཙོས་སྟངས་འཛིན་གནང་སྟངས་ཀྱི་ཆ་ནས་དཔེ་མཚོན་གཅིག་བཤད་ན། ཚོགས་གཙོ་པད་མ་འབྱུང་གནས་ལགས་ནི་བཅའ་ཁྲིམས་ལ་རྒྱུས་མངའ་ཡོད་པའི་མི་ཞིག་ཡིན་པའི་ཆ་ནས། བཙན་བྱོལ་བོད་མིའི་སྒྲིག་འཛུགས་ཀྱི་སྲིད་བྱུས་དབུ་མའི་ལམ་ལ་ཡིད་ཆེས་མེད་བཞིན་དུ་གྲོས་ཚོགས་ར་བའི་ནང་དུ་ཡོང་ནས་གྲོས་ཚོགས་འཐུས་མིས་སྤྱི་མོས་ཐོག་གཏན་འབེབས་གནང་བའི་གཞུང་གི་སྲིད་བྱུས་ལ་ཚད་ལས་བརྒལ་བའི་མཐོང་ཆུང་ཁྱད་གསོད་ཀྱི་སྐད་ཆ་བཤད་ན་བཅའ་ཁྲིམས་ཀྱི་དགོངས་དོན་དང་འགལ་མེད་དམ། གལ་སྲིད་གོ་བོ་ཕན་བདེ་ཟེར་བ་དེས་ཀྱང་མཆོག་གསུམ་དཔང་དུ་བཙུགས་ནས་དམ་བཅས་ཡོད་པས་བཅའ་ཁྲིམས་ཀྱི་དགོངས་དོན་ཚུལ་བཞིན་བརྩི་སྲུང་བྱེད་མི་དགོས་དོན་ཅི་ཡིན་ནམ། གྲོས་ཚོགས་འཚོགས་འདུའི་སྐབས་སུ་ཚོགས་གཙོས་སྟངས་འཛིན་ནན་པོ་བྱེད་མི་དགོས་པའི་རིགས་ཀྱི་དབྱེ་བ་ཡང་དགར་ཆོག་གི་རེད་དམ། སྤྱི་འཐུས་ཚོགས་གཙོའི་དབང་ཚད་ཀྱིས་མང་གཙོའི་ལམ་ལུགས་ཀྱི་ལྕགས་རི་གཏོར་ནས་མི་མང་གི་འཐུས་ཚབ་ཅི་ལྟར་གནང་རྩིས་ཡོད་དམ། མདོར་ན། ཚོགས་གཙོ་པདྨ་འབྱུང་གནས་ཀྱིས་མགོ་ཁྲིད་པའི་ཁྲིམས་བཟོ་ལྷན་ཚོགས་ནི་གང་ཟག་གི་དབང་སྒྱུར་སྟབས་བདེ་ཡོང་ཆེད་ཁྲིམས་གཞི་སྣ་ཚོགས་བསྐྱར་བཅོས་བྱས་ཏེ་མང་གཙོའི་གསོལ་རས་ཀྱི་སྲོག་ལ་སྒེར་གཅོད་ཀྱི་དུག་མདའ་འཕངས་དང་འཕེན་འཆར་ཡོད་པའི་ལྷན་ཚོགས་ཤིག་ཡིན་པ་མི་མང་གིས་ཤེས་དགོས་སོ།།