གངས་ཕྲུག་ནས།
ཉེ་ལམ་སྤྱི་འཐུས་གྲོས་ཚོགས་ནས་ཆེས་མཐོའི་ཁྲིམས་ཞིབ་པ་གསུམ་ག་འཕོ་འགྱུར་བཏང་རྗེས། ཉུང་མཐར་ཡང་སྤྱི་འཐུས་ ༡༥ ལྷག་གིས་རང་གི་དགའ་ཉེ་ངོ་ཤེས་ཚོར་མནའ་སྐྱེལ་ཐོ་བཙུགས་ཀྱིས། འཕོ་འགྱུར་གྱི་གྲོས་ཆོད་དེར་རྒྱབ་སྐྱོར་བྱས་མེད་ལུགས་དངོས་ཤུགས་བརྒྱུད་གསུམ་ནས་གསུང་གླེང་གནང་བ་གོ་ཐོས་བྱུང་བས། གནད་དོན་འདི་ངེས་པར་གཙང་མ་བཟོ་དགོས་གལ་ཆེན་ཆགས་འདུག
གལ་སྲིད་སྤྱི་འཐུས་ ༡༥ ནས་འཕོ་འགྱུར་གྱི་གྲོས་ཆོད་ལ་རྒྱབ་སྐྱོར་བྱས་མེད་པ་བདེན་པ་ཡིན་ན། མགོ་རྙོག་དེའི་ཡོང་ཁུངས་ནི་འོས་ཤོག་གྲངས་བཤེར་གནང་སྟངས་མ་གཏོགས་དོགས་པ་བྱེད་ས་མི་འདུག སྤྱི་འཐུས་ཀྱི་གསང་བའི་འོས་བསྡུ་བྱེད་མཁན་སྤྱི་འཐུས་རྣམ་པ་ཡིན་པ་ལས། འོས་བསྡུ་ལས་ཁང་ལ་འབྲེལ་བ་མེད། དངོས་འབྲེལ་བྱས་ན། འོས་བསྡུ་དེའི་རིགས་ལ་འོས་ཤོག་གྲངས་བཤེར་བྱེད་
མཁན་དང་། ལྟ་རྟོག་བྱེད་མཁན། ཟུར་དཔང་བཅས་ལོགས་སུ་བསྐོ་གཞག་དགོས་ཀྱི་ཡོད་ནའང་། དེ་ལྟར་མ་གནང་བར། ལས་བྱེད་གཅིག་གིས་འོས་སྒམ་ནང་གི་འོས་ཤོག་ཁ་ཕྱེས་ཏེ་ཚོགས་གཙོར་སྤྲད། ཚོགས་གཙོས་ལྗགས་ཀློག་གནང་བ་དེ་ཚོགས་དྲུང་གིས་ཐོ་བརྒྱབ་རྗེས། འོས་ཤོག་རྣམས་ཚོགས་གཞོན་ལ་སྤྲད་པའི་བརྒྱུད་རིམ་རྣམས་ང་ཚོ་ཚང་མས་བརྙན་འཕྲིན་ནས་མཐོང་ཡོད།
ཚོགས་གཞོན་གྱིས་ཉར་བའི་འོས་ཤོག་དེ་དག་ལ་བརྟག་ཞིབ་བྱེད་མཁན་སུ་གང་བྱུང་མ་སོང་ལ། ཚོགས་གཙོས་ལྗགས་ཀློག་གནང་བའི་འོས་ཤོག་གི་ངོས་སུ་རྒྱབ་སྐྱོར་ཡོད་པའི་རྟགས་བརྒྱབ་ཡོད་དམ། ཡང་ན་མེད་པའི་རྟགས་བརྒྱབ་ཡོད་མེད་སྤྱི་འཐུས་ཚོར་མིག་སྟོན་ཡང་གནང་མ་སོང་བས། མང་ཚོགས་ནང་འོས་ཤོག་གྲངས་བཤེར་བྱེད་སྟངས་དེའི་ཐོག་ལ་དོགས་པ་མང་པོ་ཞིག་རང་བཞིན་གྱིས་ཡོང་གི་ཡོད།
གལ་སྲིད་སྤྱི་འཐུས་ཚོགས་གཙོ་དང་ཚོགས་གཞོན་གཉིས་ཁ་མཐུན་བྱུང་སྟེ་འོས་ཤོག་གྲངས་བཤེར་ཐོག་མ་དྲང་བའི་ཕྱག་ལས་གནང་ཡོད་ཚེ། ད་ཆ་དེ་ལ་བརྩད་གཅོད་བྱེད་པའི་ཐབས་ལམ་ཡང་མེད་པ་ཆགས་ཡོད། རྒྱུ་མཚན་ནི། འོས་ཤོག་བཟོ་སྐྲུན་བྱེད་མཁན་སུ་ཡིན་དང་། འོས་ཤོག་གྲངས་ག་ཚོད་དཔར་སྐྲུན་བྱས་ཡོད་མེད། འོས་ཤོག་རེ་རེའི་སྟེང་ཐོན་གྲངས་ serial number དང་། དམ་ཕྲུག མཚན་རྟགས་བཀོད་ཡོད་མེད་སུ་གང་གིས་གསལ་བཤད་གནང་མེད་ལ། ལྷག་དོན་འོས་ཤོག་རྣམས་བདག་ཉར་བྱས་ཡོད་མེད་དང་། ཇི་ལྟར་བྱས་ཡོད་མེད། སུས་ཉར་ཡོད་མེད་ཀྱང་ང་ཚོས་ཤེས་རྟོགས་ཐུབ་ཐབས་མེད་པ་ཆགས་ཡོད།
ད་ལྟ་ང་ཚོར་ཐབས་ལམ་གཅིག་ཡོད་པ་ནི། ཁྲིམས་ཞིབ་པ་འཕོ་འགྱུར་ལ་རྒྱབ་སྐྱོར་མེད་པའི་སྤྱི་འཐུས་ ༡༥ དེ་དག་དངོས་སུ་ཐོན་ནས་མང་ཚོགས་ལ་གསལ་བཤད་གནང་རྒྱུ་དེ་ཡིན་པས། བཀུར་འོས་སྤྱི་འཐུས་རྣམ་པས་རང་གི་དགའ་ཉེ་ངོ་ཤེས་ཚོར་གསུངས་པ་ཙམ་ཞིག་མ་ཡིན་པར། མངོན་གསལ་དོད་པོས་སྤྱི་ཚོགས་སྟེང་རང་རང་སོ་སོའི་ལངས་ཕྱོགས་གསལ་སྟོན་གནང་རྒྱུ་དུས་ལ་བབས་འདུག དེ་བཞིན་དུ་ཆེས་མཐོའི་ཁྲིམས་ཞིབ་པ་རྣམ་པས་འཁྱུར་ཁའི་གསལ་བཤད་གནང་སྐབས། ཁྲིམས་ཞིབ་ཁང་རྩ་གཏོར་བཏང་བའི་རྩོད་པ་དེ་ཐག་གཅོད་བྱེད་མཁན་མང་གཙོའི་ཀ་བ་བཞི་པ་རེད་ཅེས་གསུངས་ཟིན་པ་ལྟར། གསར་འགྱུར་བརྒྱུད་ལམ་ཁག་ནས་སྤྱི་འཐུས་རེ་རེ་བཞིན་གནད་དོན་དེའི་ཐོག་དྲི་བ་བཀོད་དགོས་ཀྱི་འདུག
ང་ཚོས་ཕྱི་ཚེས་ ༥ བར་གནས་སྟངས་གསལ་པོ་མ་ཆགས་ཚེ། ང་ཚོས་རྒྱ་བལ་གཉིས་ཀྱི་གཞིས་སྒར་ཁག་ཡོངས་སུ་རྫོགས་པར་བཙན་བྱོལ་བོད་མིའི་མང་གཙོའི་གཤེད་མ་འཚོལ་ཞིབ་ལས་འགུལ་ཚོགས་ཆུང་རེ་འཛུགས་རྒྱུའི་རེ་འདུན་ཞུ་གི་ཡོད་པ་དང་། ལས་འགུལ་འདིར་རྒྱབ་སྐྱོར་ཡོད་མཁན་ཚོས་ད་ལྟ་ནས་རང་རང་གནས་ཡུལ་ས་གནས་སོ་སོར་ཚོགས་ཆུང་རེ་འཛུགས་ཆོག་པ་དང་། ང་ཚོའི་རེ་འདུན་བདག་སྤྲོད་བྱེད་མཁན་མ་བྱུང་ཚེ། ཕྱི་ཚེས་ ༦ ནས་ ༨ བར་གཞི་རྒྱ་ཆེ་བའི་མང་ཚོགས་རང་བཞིན་གྱི་ལས་འགུལ་རྒྱ་ཆེར་སྤེལ་རྒྱུ།
བཙན་བྱོལ་བོད་མིའི་མང་གཙོའི་གཤེད་མ་འཚོལ་ཞིབ་ལས་འགུལ་འདིའི་ནང་། ང་ཚོས་ཚོགས་གཙོ་དབུས་གཙང་སྤྱི་འཐུས་པད་མ་འབྱུང་གནས་དང་། ཚོགས་གཞོན་དབུས་གཙང་སྤྱི་འཐུས་ཡེ་ཤེས་ཕུན་ཚོགས། རྙིང་མའི་སྤྱི་འཐུས་བསོད་ནམས་བསྟན་འཕེལ། བཀའ་བརྒྱུད་སྤྱི་འཐུས་བསྟན་པ་ཡར་འཕེལ། ས་སྐྱའི་སྤྱི་འཐུས་ཀཿབྲག་དངོས་གྲུབ་བསོད་ནམས། དགེ་ལུགས་སྤྱི་འཐུས་གོ་བོ་བློ་བཟང་ཕན་བདེ། བོན་པོ་སྤྱི་འཐུས་སྨོན་ལམ་མཐར་ཕྱིན། མདོ་སྟོད་སྤྱི་འཐུས་གསེར་རྟ་ཚུལ་ཁྲིམས། མདོ་སྟོད་སྤྱི་འཐུས་ངག་དབང་ཐར་པ། མདོ་སྨད་སྤྱི་འཐུས་བློ་བཟང་ཆོས་འབྱོར། མདོ་སྨད་སྤྱི་འཐུས་དོན་གྲུབ་བཀྲ་ཤིས་བཅས་རྒྱུན་ལས་ ༡༡ འདི་དག་བྱེད་གཏེ་གཙོ་བོར་ངོས་འཛིན་བྱས་ཐོག གཤེད་རོགས་སུ་ལངས་མཁན་སྤྱི་འཐུས་རྣམས་རེ་རེ་བཞིན་ཐེར་འདོན་བྱས་ཏེ། མི་མང་གི་འོས་ཤོག་ལ་བརྟེན་ནས་མང་གཙོ་གཏོར་བཤིག་གཏོང་མཁན་རྣམས་ལོ་རྒྱུས་ཀྱི་གད་སྙིགས་ནང་གཡུག་གི་ཡིན།
ལས་འགུལ་འདིའི་དམིགས་ཡུལ་ནི་མང་གཙོའི་གཤེད་མ་གཞན་ ༢༠ དམར་ཧྲེང་ངེར་བཏོན་ཏེ། སྤྱི་འཐུས་གྲོས་ཚོགས་ནས་ཁྲིམས་ཞིབ་པ་གསུམ་འཕོ་འགྱུར་བཏང་བའི་གྲོས་ཆོད་དེ་ཕྱིར་བསྡུ་བྱེད་དགོས་པའི་དགོས་འདུན་འགྲུབ་ཐུབ་པ་བྱ་རྒྱུ་དེ་ཡིན། །
ད་ལམ་སྤྱི་འཐུས་གྲོས་ཚོགས་ནས་ཆེས་མཐོའི་ཁྲིམས་ཞིབ་པ་ཆ་ཚང་གསང་བའི་འོས་བསྡུའི་ལམ་ནས་འཕོ་འགྱུར་བཏང་བ་དེ་བཙན་བྱོལ་བོད་མིའི་བཅའ་ཁྲིམས་དང་ཕྱོགས་མཐུན་བྱུང་ཡོད་མེད་ཐོག་མི་མང་གི་བསམ་ཚུལ་སླེབས་དགོས་པ་དེ་མང་གཙོ་དང་ཁྲིམས་ཀྱི་དབང་བསྒྱུར་ལ་འགན་ཁུར་ནས་བཅའ་ཁྲིམས་དོན་ཚན་བཅུ་གསུམ་ནང་གསལ་བའི་བོད་ཀྱི་ཡུལ་མིའི་ལས་འགན་སྒྲུབ་དགོས་པ་ནས་རང་དབང་ཅན་གྱི་ཚོགས་ཆུང་བཙུགས་ནས་ཆེས་མཐོའི་ཁྲིམས་ཞིབ་ཁང་དང་སྤྱི་འཐུས་གྲོས་ཚོགས་སུའི་ནོར་ཡོད་མེད་ཐོག་ཞིབ་འཇུག་གནང་དགོས་པ་དེ་གལ་ཆེན་ཞིག་ལ་ངོས་འཛིན་ཞུ་གི་ཡོད་།
ཁྲིམས་ཞིབ་པ་རྣམ་པ་གསུམ་འཕོ་འགྱུར་ལ་རྒྱབ་སྐྱོར་མ་བྱེད་མཁན་སྤྱི་འཐུས་བཅོ་ལྔ་པོ་སུ་དང་སུ་ཡིན་མིན་ཁོང་ཅག་ཚོའི་མིང་གསལ་འདོན་བྱེད་རོགས། ཁོང་ཚོར་དགའ་སྤྲོའི་ངང་འོས་འཕེན་གྱི་ཡིན་ལ་རང་གི་དགའ་ཉེ་སྤུན་གྲོགས་ཚང་མ་ལའང་དེ་ལྟར་གནང་དགོས་པའི་འབོད་སྐུལ་ཡང་ཞུ་རྒྱུ་ཡིན།
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དབུ་ཁྲིད་འོག་དམངས་གཙོའི་ལམ་ལུགས་ལེགས་པོ་བཙུགས་ཡོད་པ་རེད།
དེ་གོ་ལ་ཡོངས་ནས་བསྔགས་བརྗོད་ཀྱི་སྐད་འབྲུག་གྲག་གྲག་ཡོད་པ་རེད།
འོན་ཀྱང་། ཆབ་སྲིད་ཀྱི་དབང་ཤུགས་ཀྱིས་དམངས་གཙོའི་ལམ་ལུགས་ལ་རྡོག་རོལ་བྱས་པ་འདི།
བོད་ཙམ་མ་ཟད་འཛམ་གླིང་གི་ཁྲིམས་ལུགས་ལོ་རྒྱུས་ཁྲོད་དུའང་རྙེད་དཀའ་བ་ཞིག་རེད།
འདི་ལ་ངེས་བར་ཏུ་བསམས་གཞིགས་ཞིབ་མོ་གཏང་དགོས།