ཆང་སྐྱེས།
ང་རང་ཉིད་ལ་མཚོན་ན་ལོ་བཅུ་ལ་བུད་པའི་ལོ་དེར་ཨ་མ་ཚེ་ལས་འདས་སོང་བ་དང་། ལོ་བཅོ་བརྒྱད་ལ་སོན་པའི་སྐབས་དེར་ཨ་ཕ་ཡང་གློ་བུར་ཏུ་ཚེ་ལས་འདས་སོང་བའི་དྭ་ཕྲུག་ལས་ངན་ཞིག་ཡིན།
ངས་བཤད་འདོད་པ་ནི་སོ་སོའི་ཕ་མའི་དྲུང་དང་ལྷག་པར་ཏུ་ཨ་མའི་བྱམས་བརྩེ་དྲོན་མོའི་ཐུ་འོག་ན་ནར་སོན་མ་ཐུབ་པའི་བྱིས་པ་ཞིག་ལ་མཚོན་ན་ལུས་སེམས་གཉི་གའི་སྟེང་ན་ཅི་འདྲའི་སྐྱི་གཡའ་བའི་སྡུག་བསྔལ་ཞིག་དང་སྲོན་མི་ཐུབ་པའི་ན་ཟུག་ཅིག་ཡོད་པ་སྐད་ཆའི་ལམ་ནས་བཤད་མི་ཤེས་པ་ཞིག་དང་ངག་གི་སྒོ་ནས་བརྗོད་མི་ནུས་པ་ཞིག་རེད། དེ་བས་ཁོ་བོས་རྩོམ་ཐུང་འདི་བརྒྱུད་ནས་ཉེ་བའི་ལོ་ངོ་བཅུ་ཡར་མར་ཞིག་གི་སྔོན་ནས་བྱིས་པ་ལོ་དྲུག་བདུན་་ཙམ་ལ་བུད་པ་ནས་བཟུང་ཕ་མ་དང་ཁ་བཀར་ཏེ་བཅའ་སྡོད་གྲྭ་ནས་ཞག་སྡོད་བྱེད་དུ་འཇུག་གི་ཡོད་པ་འདིའི་སྐོར་བསམ་ཚུལ་ལམ་ཡང་ན་ལྟ་ཚུང་ཐུང་ཐུང་ཞིག་བཤད་འདོད་བྱུང་།
བྱིས་པ་ཞིག་ལ་མཚོན་ན་ལོ་བཅུ་གཉིས་ལ་མ་བུད་པའི་བར་ཏུ་ཨ་ཕའི་བསླབ་བྱ་དང་ཨ་མའི་བྱམས་སྐྱོང་གཉིས་ནི་ངེས་པར་ཏུ་མེད་དུ་མི་རུང་བའི་ཆེས་ཐོག་མའི་སློབ་གསོ་དང་ཆེས་ཐོག་མའི་བརྩེ་བ་དེ་ཡིན་པ་དང་། གལ་ཏེ་ཕ་མ་དང་ཁ་བྲལ་ནས་འདུག་དགོས་པ་བྱུང་ཚེ་བྱིས་པ་ཚོས་ལུས་ཀྱི་དཀའ་ངལ་མང་པོ་ཞིག་མྱང་དགོས་མ་ཟད། སེམས་ཀྱིས་ཀྱང་བརྗོད་ཐབས་མེད་པ་དང་བཟོད་ཐབས་དཀའ་བའི་སྡུག་བསྔལ་ཅིག་མྱང་དགོས་པ་རེད། དེ་བཞིན་དུ་བྱིས་པ་ཚོའི་སེམས་ཁམས་ཀྱི་བདེ་ཐང་ལ་ཡང་ཧ་ཅང་གིས་གནོད་པ་ཕོག་སྟེ་མ་འོངས་པའི་མདུན་ལམ་ལ་དེ་བས་ཀྱང་ཤུགས་རྐྱེན་ངན་པ་དྲག་པོ་ཐེབས་སྲིད་པ་རེད། ཁ་སང་དེ་རིང་གི་སློབ་གསོའི་ལམ་ལུགས་འདིས་བྱིས་པ་ལོ་ཆུང་ཐ་ན་སོ་སོའི་ལྷམ་སྒྲོག་ཀྱང་བཅིངས་མི་ཤེས་མཁན་ཏག་ཏག་ཕ་མའི་རྩིབ་ན་སྡོད་དུ་མ་བཅུག་པར་མང་པོ་ཞིག་ཉལ་ཁང་གཅིག་གི་ནང་དུ་བསྡུས་ནས་བརྙས་བཅོས་དང་གཅར་རྡུང་མྱང་དུ་འཇུག་པ་ནི་ཅི་འདྲའི་སློབ་གསོའི་ཐབས་ལམ་ཡ་མཚན་ཞིག་མ་རེད་དམ། ད་དུང་བྱིས་པ་ཚོར་རང་གི་ས་ཕྱོགས་ཡུལ་ཕྱོགས་དང་ཕ་མ་ཚོའི་རྩིབ་ནས་ཡ་རབས་སྤྱོད་བཟང་དང་། འགྲོ་ཤེས་འདུག་ཤེས། སྐད་དང་ཡུལ་སྲོལ་སོགས་ཀྱི་བསླབ་བྱ་ཁ་ཏའི་ཕྱོགས་ལ་དུས་ཚོད་དང་དབང་ཆ་ཅུང་ཙམ་ཡང་སྤྲོད་དབང་དང་བཤད་ཁོམ་མི་སྟེར ་བར་རུབ་རུབ་བྱས་ནས་གཅིག་ཏུ་བསྡུས་ཏེ་རྒྱ་ཡིག་རྒྱ་སྐད་འདྲ་བཙན་གྱིས་སྦྱང་གི་འཇུག་གི་ཡོད་པ་འདི་ཅི་རེད། རང་ས་རང་ཡུལ་ནས་གཞན་གྱི་སྐད་དང་ཡི་གེ གཞན་གྱི་སྤྱོད་ལུགས་འགྲོ་སྟངས་ཐ་ན་བསམ་བློ་གཏོང་སྟངས་སོགས་ཀྱང་ནན་གྱིས་སློབ་ཏུ་བཅུག་སྟེ་ ཡིན་གཅིིག་མིན་གཉིས་ངོ་བོ་གཞན་ཞིག་ལ་སྦྱོར་དགོས་དོན་ཨ་ཡོད་དམ། ཡོད་ཚད་བཙན་དང་ནན་གྱིས་བྱེད་ཀྱི་མང་ན་ནི་བྱིས་པ་ཚོས་སེམས་ཁམས་ཐང་ཐང་མེད་པར་ཆགས་ནས་བྱིས་པའི་མི་ཚེ་གང་བོ་བརླག་རྒྱུར་ཉེན་ཁ་ཆེན་པོ་་ཡོད་པ་རེད་། བྱིས་པ་ཚོ་ལོ་ན་ཆུང་དུས་ཕ་མའི་སློབ་གསོ་དང་བྱམས་སྐྱོང་འདི་གལ་ཆེན་ནང་གི་འགངས་ཆེན་ཞིག་ཡིན་པས་ཚང་མས་ཐུགས་འཁུརརེ་བྱེད་རྒྱུ་ནི་ཤིན་ཏུ་ནས་བཀའ་དྲིན་ཆེ ། བཅའ་སྡོད་སློབ་གྲྭའི་སྐོར་ལ་ཁོ་བོས་དུས་རྒྱུན་གྲོགས་པོ་ཚོ་དང་མཉམ་དུ་གླེང་སློང་བྱེད་ཀྱིན་ཡོད་ལ། ད་དུང་ཡིན་ན་ཡང་མུ་མཐུད་དུ་གླེང་ངེས་ཡིན།
༢༠༢༡ ༠༤ ༡༥ མཚན་མོ།