གནས་ཚུལ་མཁོ་སྤྲོད་པ། ཞིབ་འཇུག་ཚོགས་པའི་ཡིག་ཚང་།
དེ་ཡང་། ད་ལྟའི་ཆར་རྒྱ་གར་དུ་ནད་ཡམས་ཀྱི་ཛ་དྲག་གི་གནས་སྟངས་ཁྲོད་ཀྱི་བོད་མི་ཡོངས་ལ་ཕན་ཐོགས་ཡོང་ཆེད། ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་ཞིབ་ཚོགས་ཀྱིས་འབོད་སྐུལ་བརྒྱུད་ཐའེ་ཝན་གནས་བཞུགས་བོད་ཀྱི་མཁན་སྤྲུལ་དགེ་བཤེས་སོགས་དགེ་འདུན་པ་བདུན་ཅུ་བརྒལ་བ་ཞིག་གིས་ཧིན་སྒོར་ས་ཡ་གཉིས་དང་བདུན་འབུམ་བརྒྱ་ཁྲི་ལྔ་སྟོང་སྟེ། ཧིན་སྒོར་ཁྲི་ཉིས་བརྒྱ་བདུན་དོན་ལྔ་ལྷག་ཅིག་སྤྱི་ལོ་ ༢༠༢༡ ཟླ་ ༥ ཚེས་ ༢༠ ཉིན་དངོས་སུ་བོད་ཀྱི་འབྲས་ནད་ཚོགས་པ་བརྒྱུད་བོད་པ་ཡོངས་ལ་དམིགས་བསལ་ཛ་དྲག་གི་རོགས་སྐྱོར་ཞལ་འདེབས་སུ་ཕུལ་ཡོད་དང་།
དེ་ཡང་ཞིབ་འཇུག་ཚོགས་པའི་འབྲེལ་ཡོད་གསལ་བཤད་དུ།
རང་རེ་བོད་པ་ཡོངས་ལ་བཀའ་དྲིན་ཆེ་བའི་ཕ་ཡུལ་གཉིས་པ་རྒྱ་གར་འཕགས་པའི་ཡུལ་ལ་ནད་ཡམས་ཀྱི་དཀའ་ངལ་ཆེན་པོ་འཕྲད་བཞིན་པའི་སྐབས་འདིར། དེར་འཁོད་རང་རེའི་བོད་པ་དག་ལའང་ནད་ཡམས་ཀྱི་དཀའ་ངལ་མི་ཉུང་བ་ཞིག་འཕྲད་རྒྱུ་གཡོལ་ཐབས་མེད་པས། འཛམ་གླིང་ས་ཕྱོགས་གང་སར་ཡོད་པའི་བོད་པ་ཚང་མས་རང་རང་གི་ནུས་ཚོད་ཀྱིས་རོགས་པ་གང་ཐུབ་དགོས་པ་ཧ་ཅང་གལ་ཆེན་ཡིན་པ་ལྟར། རྒྱ་གར་དུ་ཡོད་པའི་བོད་ཀྱི་ཚོགས་པ་དང་། མི་སྒེར་མང་པོ་ཞིག་གཡུལ་ས་མདུན་མར་ཐོན་ཏེ་རང་འདུན་གྱིས་ཁརྒྱུ་ཚེགས་གཉིས་ཀྱིས་རོགས་སྐྱོར་གནང་བཞིན་པར་ལྷག་བསམ་གྱི་རྒྱབ་སྐྱོར་མཚོན་ཆེད། འདི་ག་ཐའེ་ཝན་བོད་བརྒྱུད་ནང་བསྟན་ཞིབ་འཇུག་ཚོགས་པས་སྣེ་ཁྲིད་དང་འབོད་སྐུལ་ཞུས་འབྲས། ཞིབ་འཇུག་ཚོགས་པ་བརྒྱུད་ཐའེ་ཝན་གནས་བཞུགས་བོད་ཀྱི་མཁན་སྤྲུལ་དགེ་བཤེས་དགེ་འདུན་པ་བདུན་ཅུ་བརྒལ་བ་ཞིག་གིས་ཞལ་འདེབས་སུ་ཕུལ་བའི་རྒྱ་གར་སྒོར་མོ་ས་ཡ་གཉིས་དང་བདུན་འབུམ་བརྒྱད་ཁྲི་ལྔ་སྟོང་ཐམ་པ། (ཧིན་སྒོར་ཁྲི་ཉིས་བརྒྱ་བདུན་ཅུ་དོན་བརྒྱད་ལྷག་) སྤྱི་ལོ་2021 ཟླ་ 05 ཚེས་ 20 ཉིན། ལྡི་ལིར་རྟེན་གཞི་བྱེད་པའི་ ༼བོད་ཀྱི་འབྲས་ནད་ཚོགས་པ༽འི་འབྲེལ་ཡོད་འགན་ཁུར་མཁན་གྱི་ཕྱག་ཏུ་ཡོངས་སུ་རྩིས་འབུལ་ཞུ་ཐུབ་པ་བྱུང་ཡོད་པ་འདིས། ཛ་དྲག་རོགས་སྐྱོར་དགོས་མཁན་དག་ལ་ཁ་ཡོད་ལག་ཡོད་ཀྱི་ཕན་ཐོགས་ཅུང་ཟད་ཡོང་ངེས་ཡིན་པའི་ཡིད་ཆེས་ཡོད།
ཅེས་བཀོད་འདུག
