བྱང་པ་མིག་དམར།
ཉུང་མཐའ་ནས་བྱས་ན། ཉེ་བའི་ལོ་བཅོ་ལྔའི་རིང་ལ་མང་ཚོགས་ནང་ཆོས་བརྒྱུད་སྤྱི་འཐུས་དགོས་དང་མི་དགོས་ཟེར་བའི་གླེང་གཞི་བྱུང་ཡོད། སྐད་ཆ་འདི་ད་དུང་ཡང་རྒྱུན་མཐུད་ནས་གནས་ཡོད། འདི་ནི་སྐབས་སོ་སོའི་ཆོས་བརྒྱུད་སྤྱི་འཐུས་ཚོའི་བྱ་སྤྱོད་ཀྱིས་བསྐྲུན་པ་ལས་གཞན་གང་ལའང་ངན་ཁག་དཀྲི་ས་མེད།
ངའི་ལྟ་སྟངས་ནི་ཆོས་བརྒྱུད་སྤྱི་འཐུད་མུ་མཐུད་ནས་གནས་དགོས་པའི་ལངས་ཕྱོགས་ཅན་ཡིན། ཡང་། ལངས་ཕྱོགས་འདིས་ད་ཡོད་ཀྱི་གནས་སྟངས་རང་འཇགས་གནས་དགོས་པའི་ངོས་འཛིན་བྱེད་ཀི་མེད། ད་ལྟའི་ང་ཚོའི་ཆོས་བརྒྱུད་སྤྱི་འཐུས་ཀྱི་བྱ་སྤྱོད་ནི་གྲྭ་པའི་ཀུན་སྤྱོད་ལས་བརྒལ་ཆེས་པ། མི་ནག་སྐྱ་བོ་ཞིག་གི་གནས་ཚད་ལས་ཀྱང་བརྒལ་བའི་བྱ་སྤྱོད་ཅན་དུ་མཐོང་གི་ཡོད།
མ་གཞི་འདི་ནི་ཡུས་དང་འཁང་ར་བཤད་དགོས་པ་དེ་འདྲ་མ་རེད། ཆོས་བརྒྱུད་སྤྱི་འཐུས་ཚོ་ནི་ཤེས་ཡོན་གནས་ཚད་མཐོ་པོ་ཡོད་མེད་ལ་བལྟས་ནས་འདམ་གི་མེད་པར། གྲྭ་ཆས་གྱོན་མཁན་ཡིན་པ་གང་ཞིག་སེམས་ཁམས་དང་བྱ་སྤྱོད་ཀྱི་ཆ་ནས་མི་ནག་སྐྱ་བོ་དང་ཁྱད་དེ་ཙམ་མེད་མཁན་ཞིག་ལ་བསམ་བློ་བཏང་ནས་འདམ་གི་ཡོད། མ་གཞི་གྲྭ་ས་ན་འདམ་སྒྲུག་མང་པོ་ཡོད། མཁན་པོ། དགེ་བསྐོས། དབུ་མཛད་སོགས་འདམ་གི་ཡོད། དེ་ཚོ་ནི་ཡོན་ཏན་ཆེ་ལོས། ཚུལ་ཁྲིམས་གཙང་མིན། མི་གཤིས་སོགས་གཞི་ལ་བཞག་ནས་འདམ་གི་ཡོད། སྤྱི་འཐུས་ནི་མི་ནག་སྐྱ་བོའི་གྲས་ལ་བཏང་བ་ཡིན་ན་གྱོན་ཆས་ཙམ་གྱི་ཁྱད་པར་ལས་མེད་པར་བྱ་སྤྱོད་ཀྱི་ཐད་ནས་མི་ནག་སྐྱ་བོ་དང་འདྲ་མཚུངས་སམ་དེ་ལས་ལྷག་བྱེད་མཁན་ཞིག་འདམ་གི་ཡོད་ཙང་། ང་ཚོས་ཆོས་ལུགས་སྤྱི་འཐུས་ཚོ་གྲོང་པ་མི་ནག་ལས་སྡུག་པ་འདུག་ཟེར་ནས་སྡིག་དམོད་བྱེད་ཀྱི་ཡོད་ནའང་། དེ་ལ་གྲྭ་ས་ནས་ལྟ་མཁན་ཚོས་བལྟས་ན་ཕལ་ཆེར་འགྲིག་བསྡད་ཡོད་སྲིད།
ཆོས་ལུགས་སྤྱི་འཐུས་ཟེར་བ་ནི་སྤྱི་ཚོགས་ཀྱི་གླེང་གཞི་ཅན་ཆེན་པོ་ཞིག་ཆགས་ཡོད། འདི་ལྟར་མུ་མཐུད་ནས་སོང་ན། གྲྭ་སའི་གྲྭ་པ་ཚོ་འདི་འདྲ་ཡིན་ས་རེད་བསམ་མཁན་དང་། དགེ་བཤེས་ཚོ་འདི་འདྲ་ཡིན་ས་རེད། མཁན་པོ་ཚོ་འདིོ་འདྲ་ཡིན་ས་རེད་ཟེར་ནས་ལོག་ལྟ་སྐྱེ་མཁན་ཇེ་མང་ལ་འགྲོ་གི་རེད། སྤྱི་ཚོགས་ཀྱིས་ད་ལྟའི་གླེང་སྟངས་ལ་བལྟས་ན། སྤྱི་འཐུས་ནང་ལ་གྲྭ་ཆས་གྱོན་མཁན་ཞིག་ཡོང་ས་མེད་པ་བྱས་ན་ཡག་པོ་ཡད་པར་རེ་བ་རྒྱག་གི་འདུག ཡང་། ཆོས་ལུགས་སྤྱི་འཐུས་ཀྱི་ལོ་རྒྱུས་ནང་ལ་མི་ནག་སྐྱ་བོ་དེ་འདྲ་ཡང་ཡོང་མྱོང་ཡོད་པ་རེད། དེ་ཚོས་ཀྱང་བག་ཆགས་དམིགས་བསལ་ཡག་པོ་དེ་འདྲ་བཞག་པའི་ལོ་རྒྱུས་ཕལ་ཆེར་མེད། མ་མཐར་ཡང་ཉེ་བའི་ལོ་ངོ་བཅོ་ལྔའི་རིང་ཆོས་བརྒྱུད་སྤྱི་འཐུས་ཀྱི་བྱ་སྤྱོད་གླེང་བའི་ལྟ་སྟངས་ན་ལེགས་པའི་མཚན་མ་ཕལ་ཆེར་མཐོང་རྒྱུ་མེད།
འོ་ན་ཆོས་བརྒྱུད་སྤྱི་འཐུས་གང་འདྲ་ཞིག་དགོས་རེད་ལབ་ན། ང་ཚོས་ཞབས་འདྲེན་ཞུ་མཁན་མང་བ་ནས་ཉུང་དུ་བཏང་། ཉུང་བ་ནས་སྤུས་ཀ་ལྡན་པ་ཡོང་བའི་རེ་བ་ཚར་གཅིག་རྒྱག་དགོས་པ་རེད་འདོད། ཆོས་བརྒྱུད་སྤྱི་འཐུས་རྦད་དེ་མི་དགོས་པར་བཤད་ནས་གཡུགས་བཞག་ན་དེ་ནི་ཐོག་མར་བསྐོ་འཛུགས་ཀྱི་དགོངས་གཞི་དང་དགོས་དམིགས་གཞིགས་བྱེད་མ་ཤེས་པ་ཞིག་ཆགས་ཀྱི་ཡོད། ཐོག་མའི་དགོས་དམིགས་ནི་མདོར་ན་ཆོལ་ཁ་གསུམ་ཆོས་ལུགས་ཆོས་བརྒྱུད་དང་བཅས་པ་མཐུན་སྒྲིལ་གྱི་ཆེད་དུ་རེད། འདི་ལས་གཞན་གྱི་དམིགས་ཡུལ་མེད་པ་རེད། ད་ལྟའི་ཆོས་ལུགས་ཆོས་བརྒྱུད་ཀྱི་སྤྱི་འཐུས་ནི་ཆོལ་ཁ་གསུམ་གྱི་མཐུན་ལམ་གཏོར་བཤིག་གཏོང་མཁན་འདྲ་པོ་ཆགས་ཀི་ཡོད། ཁོང་ཚོའི་བྱ་སྤྱོད་ཀྱིས་གོ་བརྡ་འདི་འདྲ་ཞིག་སྤྲོད་ཀི་ཡོད། ད་གཟོད་མང་ཚོགས་ཀྱིས་ཆོས་བརྒྱུད་སྤྱི་འཐུས་མི་དགོས་པའི་གླེང་སློང་ཆེན་པོ་ཡོང་གི་ཡོད།
ང་ཚོས་ཆོས་ལུགས་སྤྱི་འཐུས་ཀྱི་ད་ལྟའི་ཡོད་སྟངས་ལ་འགྱུར་བ་ཞིག་བཏང་ན་འགྲིག དེ་ནི་སྟོན་པ་ཤཱཀྱ་ཐུབ་པའི་རྗེས་འབྲངས་ཆོས་པ་ཚོས་འདམ་པའི་སྤྱི་འཐུས་གཅིག་དང་། སྟོན་པ་གཤེན་རབ་ཀྱི་རྗེས་འབྲངས་པ་ཚོས་འདམ་པའི་སྤྱི་འཐུས་གཅིག་བཅས་ཆོས་ལུགས་སྤྱི་འཐུས་གཉིས་ཁོ་ནར་གཏན་འབེབས་བྱས་པ་ཡིན་ན། ཆོས་ལུགས་ཆེ་ཁག་གཉིས་ལ་སྤྱི་འཐུས་འདྲ་མཚུངས་ཀྱི་ཁྱད་ཆོས་ཤིག་ཡོད། ད་ལྟའི་གནས་སྟངས་ནི། སྟོན་པ་ཤྰཀྱ་ཐུབ་པའི་རྗེས་འཇུག་པ་ཚོར་སྤྱི་འཐུས་བརྒྱད་ཀྱི་ཐོབ་ཐང་ཡོད་པ་དང་སྟོན་པ་གཤེན་རབ་ཀྱི་རྗེས་འཇུག་པ་ཚོར་སྤྱི་འཐུས་གཉིས་ཀྱི་ཐོབ་ཐང་ལས་མེད། འདི་ནི་གྲངས་ཀའི་ཐད་ཀྱི་བསྡུར་གྲངས་རེད། ཡང་འགའ་རེ་ནས་མི་གྲངས་ཀྱི་སྐད་ཆ་བཤད་སྲིད་པ་རེད། ཆོས་ལུགས་གླེང་དུས་མི་གྲངས་བཤད་ས་འགྲོ་གི་མ་རེད། སྟོན་པ་དང་བསྟན་པའི་ཆ་ནས་བཞག་དགོས་པ་རེད།
ད་ཡོད་ཆོས་ལུགས་དང་ཆོས་བརྒྱུད་སྤྱི་འཐུས་ཀྱི་གྲངས་ཀ་བཅུ་དེ་གཉིས་སུ་ཕབ་ཐུབ་པ་ཡིན་ན། ལམ་སང་སྤུས་ཀའི་ཆ་ནས་ཆོས་པའི་བྱ་སྤྱོད་ཅན་ཆགས་མི་ཐུབ་ནའང་། ད་ཡོད་ལྟར། ཆོས་ལུགས་དང་ཆོས་བརྒྱུད་ཀྱི་ཞབས་ནས་འདྲེན་མཁན་མང་བ་ལས་ཉུང་ན་མཛེས་པ་དེ་གནས་ལུགས་ཤིག་ཡིན། གང་ལྟར།་ཆོས་ལུགས་ཆོས་བརྒྱུད་ཀྱི་སྤྱི་འཐུས་ལ་འདི་ལྟ་བུའི་འགྱུར་བ་ཞིག་འགྲོ་དགོས་པ་གལ་ཆེན་པོ་རེད། འགྱུར་བ་འདི་འདྲ་ཞིག་གི་གོ་སྐབས་ཤིག་སྤྲོད་དགོས་པ་རེད། དེ་ནས་ཀྱང་ད་དུང་གདན་ས་གྲྭ་ཚང་དང་དགེ་འདུན་པ་སྤྱིའི་མཚན་མཐོང་ལ་གནོད་རྐྱེན་ལས་མེད་པ་ཡིན་ན། དེ་ནས་ད་གཟོད་ཆོས་ལུགས་སྤྱི་འཐུས་རྦད་དེ་མཚམས་འཇོག་གི་གླེང་སློང་བྱེད་དགོས་པར་འདོད།
ཆོས་ལུགས་སྤྱི་འཐུས་དགོས་དང་མི་དགོས་གླེང་བ་དང་། ཆོས་ལུགས་སྤྱི་འཐུས་དགོས་པ་གང་ཞིག་ལ་ད་ལྟའི་གནས་སྟངས་ལ་འགྱུར་བ་ཆེན་པོ་ཞིག་གཏོང་བའི་གླེང་སློང་བྱེད་པ་གང་ཡིན་ནའང་། ཆོས་བརྒྱུད་ཁག་གི་འཛིན་སྐྱོང་སྒྲིག་འཛུགས་ཁག་དང་། གདན་ས་གྲྭ་ཚང་ཁག་ལ་སྙན་ཞུ་འབུལ་བ་དང་། དེ་འབྲེལ་གྱི་ལས་འགུལ་སྣ་ཚོགས་སྤེལ་དགོས། གསར་འགྱུར་བརྒྱུད་ལམ་ཁག་གིས་བླ་ཆེན་ཁག་དང་གདན་ས་ཁག་གི་མཁན་པོ་ཁག ལས་རིགས་སྣ་ཚོགས་ཀྱི་མཁས་པ་དང་ཤེས་ཡོན་པ་བཅས་ཀྱི་ལྟ་ཚུལ་སྔོག་འདོན་གྱི་བཅར་འདྲི་ཤུགས་ཆེ་བྱེད་པ་བརྒྱུད་ཆོས་ལུགས་སྤྱི་འཐུས་ལ་འགྱུར་བ་གཏོང་བའི་ལམ་དུ་བསྐྱོད་དགོས་པའང་དུས་ཀྱི་དགོས་མཁོ་ཞིག་རེད།
ཀློག་རིན་ཡོད་པ་ཞིག་བྲིས་འདུག
དེ་དེ་བཞིན་ནོ། རྒྱབ་སྐྱོར་ཡོད།
སྔ་མོ་རྒྱུ་མཚན་མང་པོ་པོ་གཅིག་བཤད་ཟིན་པས་ཡང་ནས་བསྐྱར་དུ་ཞུ་འདོད་མི་འདུག གང་ཆོས་བརྒྱུད་ཁག་གི་སྤྱི་འཐུས་རྣམས་ངེས་པར་མེད་པ་བཟོ་དགོས་འདུག་ ཡང་ན་ཆོས་ལུགས་ཡོད་མཁན་བོད་རིགས་ཡོངས་རྫོགས་ནས་འོས་བསྡུ་ལམ་ནས་ཆོས་བརྒྱུད་སྤྱི་འཐུས་འདེམས་དགོས་འདུག་དེ་མེད་མང་གཙོ་ཡོང་དག་པ་ཞིག་རེད ་་གཙོ་བོ་གྲྭ་བ་བླ་ཆེན་ཡིན་ཟེར་མཁན་འགན་ལེན་དགོས་འདུག་ ཞལ་ནས་ཆོས་བཤེད། ཞེ་ལ་སྲིད་ནག་རྐྱང་རྐྱང་གནང་སྡེད་ན་ཡོང་ཐབས་མེད་པ་ཞིག སྐྱབས་སུ་འཆི་ ་བླ་མ་ཚོ་ད་དངོས་ནས་དྲང་ནས་ཆོས་ཉམས་སུ་བླངས་རན་འདུག
ཆོས་བརྒྱུད་ཀྱི་སྤྱི་འཐུས་ཀྱི་དགོས་པ་མིན་འདུག གྲྭ་པ་རྣམས་ཆོས་བྱེད་པ་ཡིན་པ་ལས་སྲིད་དོན་པ་མིན། ཁོས་ཚོས་རྩ་བ་བོར་ནས་ཡལ་ག་འཇུ་མི་རུང་བ་ཡིན། གལ་ཏེ་གྲྭ་པ་ཚོས་སྲིད་དོན་བྱེད་དགོས་ཀྱི་ཡོད་ན། གྲྭ་ཆས་ཕུད་དེ་སྐྱེས་པ་མི་ནག་གི་གྲས་སུ་འཛུལ། ད་ལྟའི་ཆོས་བརྒྱུད་ཀྱི་སྤྱི་འཐུས་རྣམས་ལ་ལྟོས་དང་། དཔེ་ཆ་མ་ཤེས་པའི་སྟེང་དེང་རབས་ཀྱི་ཤེས་ཡོན་གྱིས་ཕོངས། དེ་གཉིས་མེད་དུས་རང་ཉིད་གནས་སའི་སྤྱི་ཚོགས་སྟོར་བརླག་ལ་འབད་པ་མ་གཏོགས་མི་རིགས་དང་རྒྱལ་ཁབ་ལ་ཕན་པའི་ལས་ཀ་བྱས་མྱོང་མེད། བོད་མིའི་དབུས་འོས་བསྡུ་ལས་ཁུངས་དང་བཀའ་ཤག་གིས་ཐག་གཅོད་གནང་དགོས་པ་གལ་ཆེན་ཞིག་ནི། བོད་མི་སུ་རུང་ལ་འོས་ཤོག་གཅིག་གི་ཐོབ་ཐང་ལས་མེད་པ་བཟོ་དགོས་པ་མང་གཙོའི་ལུགས་སྲོལ་ཡིན། བོད་མི་ཆེ་གེ་མོ་ཞིག་ལ་འོས་ཤོག་གཅིག་ལས་མང་བའི་ཐོབ་ཐང་ཡོད་ན་བོད་མི་ཡོད་དོ་ཅོག་ཚང་མར་ཐོབ་ཐང་དེ་དགོས་པ་མང་གཙོའི་འགྲོ་ལུགས་ཡིན། ད་ལྟའི་ཆོས་བརྒྱུད་ཀྱི་སྤྱི་འཐུས་ཐ་ཞན་རྣམས་ལ་ལྟོས་དང་། མ་རབས་ཀྱི་གོང་བུ་ཡིན་པ་མ་ཟད་ད་དུང་མགོ་བོ་སྟེགས་དེ་བོད་མིའི་ཞབས་འདྲེན་ཞུ་བཞིན་ཡོད། མ་འོངས་པར་བོད་མིའི་སྤྱི་འཐུས་ཀྱི་འོས་གཞིར་ཞུགས་སྐབས་ཤེས་ཡོན་གྱི་ཚད་འཛིན་ཞིག་དགོས་ཀྱི་འདུག ཐ་ན་བོད་ཡིག་འཛིན་རིམ་བཅུ་གཉིས་བར་དང་དེ་དང་ལྷན་དུ་དབྱིན་ཡིག་ཀྱང་འཛིན་རིམ་བཅིུས་ཐོན་པ་ཞིག་དགོས་འདུག དེ་ལྟར་བྱུང་ན་དེང་རབས་ཀྱི་འགྲོ་སྟངས་ལས་སྤྱི་ཚོགས་ལ་ཕན་ཐོགས་ཆེ་བ་ཡོང་སྲིད།
གོང་བསམ་ཚུལ་ཧ་ཅང་ཡག་པོ་འདུག