ཨོ་གླིང་། འདྲེ་གླེན་པ།
དྲན་གདུང་ཆེ་སྐབས་སྙན་ངག་འབྲི
སེམས་པ་མི་སྐྱིད་སྐབས་རོལ་མོ་དཀྲོལ
ཀླད་པར་མུན་པ་འཐིབས་སྐབས་རི་མོ་འབྲི
སྙན་ངག
དཔལ་འབྱོར་མ་རེད
ཚན་རིག་མ་རེད
ཆོས་ལུགས་ཀྱང་མ་རེད
འུ་གཉིས་གཅིག་པུའི་སེམས་ཁྲལ་ཐོལ་པ་རེད
དུས་ཚོད་མི་ཆོད་སྐབས་ལུས་རྩལ་སྦྱོང་
གཉིད་མི་ཁུག་སྐབས་རྒུན་ཆང་འཐུང་
རྨི་ལམ་མི་རྨིས་སྐབས་གློག་བརྙན་ལ་བལྟ
རོལ་མོ
བརྩེ་དུང་མ་རེད
ཁྲེལ་གཞུང་མ་རེད
གནས་ལུགས་ཀྱང་མ་རེད
འུ་གཉིས་གཅིག་པུའི་སྡུག་བསྔལ་ཐོལ་པ་རེད
ཆུ་སྒྲ་ལ་ཉན་ནས་སྐྱོ་གར་མི་དྲན
རླུང་སྒྲ་ལ་ཉན་ནས་སྨྲེ་ངག་མི་འདོན
མེ་སྒྲ་ལ་ཉན་ནས་ཀྱང་མིག་ཆུ་མི་གཏོར
རི་མོ
ང་མ་རེད
ཁྱོད་མ་རེད
གཟིགས་ཅན་ཞིག་ཀྱང་མ་རེད
འུ་གཉིས་གཅིག་པུའི་འཆར་སྣང་གཞན་ཞིག་རེད
16/7/2021.