གཞུང་འབྲེལ་མ་ཡིན་པའི་ཚོགས་པ་བཞི་ཡི་ཚོགས་གཙོ་རྣམ་པར་བསམ་ཚུལ་ཞིག་ཞུ་དགོས་བྱུང་།

རྩོམ་པ་པོ། མཁའ་སྤྱོད་མ།

—བོད་མིར་སྐྱིད་ན་མཉམ་སྐྱིད་དང་སྡུག་ན་མཉམ་སྡུག་གི་འདུ་ཤེས་འཛིན་མཁན་ཞིག་ཡིན་ཕྱིན། བོད་མིའི་སྒྲིག་འཛུགས་དཀྱིལ་སྙིང་དུ་འཛིན་དགོས་པ་ནི་སྒྲིག་འཛུགས་འདི་སྲ་བརྟན་རྒྱུན་གནས་དང་ནུས་པ་གོང་འཕེལ་དུ་གཏོང་བའི་ཐབས་ལམ་ཉག་གཅིག་པུ་དེ་རེད་།

གུས་པ་བཙན་བྱོལ་དུ་བསླེབས་ནས་ལོ་ངོ་ ༢༠ མ་ཟིན་ཙམ་འགྲོ་བཞིན་འདུག་ལ། འདས་པའི་ལོ་ངོ་ ༢༠ དེའི་ནང་ཕལ་ཆེར་སྔ་གཞུག་ཚང་མ་བསྡོམས་ན་ལོ་གཅིག་དང་ཕྱེད་ཙམ་རིང་རྒྱ་གར་ལྷོ་ཕྱོགས་དང་ལྡི་ལི་སོགས་ནས་བསྡད་ཡོད་སྲིད་མོད། དེ་མིན་གྱི་ལོ་དུས་ཡོད་ཚད་རྡ་རམ་ས་ལ་དང་ལྷག་པར་དུ་གངས་ཅན་སྐྱིད་གཤོངས་ཀྱི་གཡས་གཡོན་ནས་བསྡད་པ་ཡིན། ད་ལྟའང་གངས་སྐྱིད་ཀྱི་ཉེ་འཁྲིས་དེར་བསྡད་ནས་རང་འཁྲིའི་ལས་དོན་གང་ཐུབ་ཅིག་བྱེད་མུས་ཡིན། འདི་ངས་སྔོན་གླེང་ཙམ་དང་ཡང་ན་ང་རང་གངས་ཅན་སྐྱིད་གཤོངས་ཀྱི་དཀྱིལ་འཁོར་འདིར་རྒྱུས་མེད་ནང་གི་རྒྱུས་ཆེན་གཅིག་ཡིན་ཟེར་བའི་དོན་དུ་ཡིན་ལ། དེང་སང་སྤྱི་ཚོགས་དྲ་ལམ་ཁག་ཏུ་གངས་ཅན་སྐྱིད་གཤོངས་མིག་གིས་མཐོང་མ་མྱོང་། འགྲོ་ཡང་མ་མྱོང་། ཡིན་ཡང་དེར་ཡོད་ཀྱི་ང་ཚོའི་གཞུང་དེར་རྩ་བ་ནས་ཡིད་ཆེས་མེད། དེར་ཡོད་ལས་བྱེད་ཚོས་ཉི་མ་འཁྱོལ་ཐབས་རང་བྱས་ནས་བསྡད་ཡོད་པ་རེད་ཟེར་མཁན་གྱི་རྒྱུས་མེད་འུར་གཏམ་ཅན་གྱི་སྒེར་དོན་ཉིན་མཚན་གཉིས་སུ་གཉེར་བཞིན་པ་རྣམས་ལ་ངོ་སྤྲོད་ཀྱི་ཚུལ་དུ་ཞུས་ཡིན།

ཁ་སང་ཕྱི་དྲོ་ཙམ་ལ་རྡ་རམ་ས་ལར་ཡོད་པའི་དབུས་བོད་ཀྱི་གཞོན་ནུ་ལྷན་ཚོགས་དང་དབུས་བུད་མེད་ལྷན་ཚོགས། བོད་རྒྱལ་ཡོངས་མང་གཙོ་ཚོགས་པ། རྒྱ་གར་ནང་གི་བོད་རང་བཙན་སློབ་ཕྲུག་ཚོགས་པ་བཅས་ཀྱི་ཚོགས་གཙོ་རྣམ་པས་གསར་འགོད་གསལ་བསྒྲགས་ཤིག་གནང་འདུག་ཅེས་དྲ་ལམ་ནས་པར་སོགས་མཐོང་བ་དང་ཡར་མར་སྔོག་བཤེར་ཅིག་བྱས་པ་ཡིན། ད་ལྟའི་བཙན་བྱོལ་བོད་མིའི་རྩོད་རྙོག་དེར་ཚོགས་པ་དང་མི་སྒེར། དེ་བཞིན་སྒེར་གྱི་ཐུན་མོང་འབོད་སྐུལ་དང་བསམ་ཚུལ་སོགས་ཧ་ཅང་མང་པོ་ཞིག་མཐོང་རྒྱུ་འདུག་པས། དེ་ཚོར་ཆུ་ཚོད་གང་ཡོད་ཀྱིས་ལྟ་ཀློག་དང་ལྷག་པར་དུ་བོད་མིའི་སྒྲིག་འཛུགས་ཀྱི་འབྲེལ་ཡོད་ལྷན་ཁང་དང་འབྲེལ་ཡོད་འགན་ལྡན་རྣམ་པའི་གསལ་བཤད་དང་ལམ་སྟོན་རིགས་ལ་དུས་རྒྱུན་དུ་དོ་སྣང་ཆེན་པོ་བྱེད་ཀྱི་ཡོད། ཡིན་ནའང་། གླེང་རྙོག་འདི་ཕྱི་ལོ་ ༢༠༢༠ ཟླ་ ༨ པར་མགོ་བཙུགས་པའི་མགོ་བརྩམས་པ་ནས་བཟུང་བསམ་ཚུལ་རྩོམ་ཡིག་གཅིག་ཀྱང་སྤེལ་བའི་ཡི་ག་བསླེབས་མ་བྱུང་།

ང་ཚོས་གླེང་རྙོག་འདིའི་ཐད་ནས་ནང་ཁུལ་སྐྱོན་འཛུགས་དང་བཤད་རེས་གཏུགས་ཏེ་ལོ་གཅིག་ཙམ་ཕྱིན་ཡོད་པ་དང་། ད་ལྟ་དཀའ་རྙོག་དེ་ཐད་ཀར་བཅའ་ཁྲིམས་ཀྱིས་འགན་དབང་བསྐུར་ཡོད་པའི་དབུས་འོས་བསྡུ་ལས་ཁུངས་ནས་ཐག་གཅོད་ལེན་པའི་སྐེ་མཚམས་དེར་སླེབས་སྐབས། གཞུང་འབྲེལ་མ་ཡིན་པའི་ཚོགས་པ་བཞི་ཡིས། ནང་འགྲིག་ཞི་གནས་ཡོང་ཐབས་སུ་ལས་གང་ཡང་མགོ་མ་བརྩམས་གོང་ལ་གསར་འགོད་པ་རྣམས་བསྡུས་ཏེ། འོས་བསྡུ་ལས་ཁུངས་ཀྱིས་དཀའ་རྙོག་དེའི་ཐད་བཅའ་ཁྲིམས་ནང་གསལ་གྱིས་མཐའ་དེ་རིང་བར་དུ་གནང་བཞག་པ་དང་གནང་མུར་ལུས་པ་དེར་ངོས་ལེན་དང་རྒྱབ་སྐྱོར་མེད་པའི་ཡོངས་ཁྱབ་བསྒྲགས་གཏམ་སྤེལ་བ་དེར་བློ་འཚབ་ཆེན་པོ་བྱུང་ལ། འདིས་ང་ཚོའི་དཀའ་རྙོག་གྲིབ་ནག་ཅན་འདི་མུ་མཐུད་ལྷག་རྒྱུར་ཉེན་ཁ་བཟོ་ཡི་ཡོད་པ་མ་ཟད། བོད་མིའི་སྒྲིག་འཛུགས་ཀྱི་འབྲེལ་ཡོད་ལྷན་ཁང་ནས་བཅའ་ཁྲིམས་སྲུང་སྐྱོབ་དང་ལག་བསྟར་གྱི་སྐྱོན་གནས་དང་བར་སྟོང་ཆེན་པོ་ཞིག་ཏུ་གྱུར་ཏེ། མ་འོངས་པར་ག་དུས་འདི་ལྟ་བུའི་དཀའ་རྙོག་བྱུང་ན་དེ་དུས་ཕྱི་ལོ་ ༢༠༢༡ ལོར་དཀའ་རྙོག་བྱུང་སྐབས་ཐག་གཅོད་འདི་འདྲ་བྱས་པའི་ལམ་ལུགས་ཡོད་པ་རེད་ཟེར་ནས་ལུང་འདྲེན་དང་། བདེན་སྣ་འདྲེན་བྱེད་ཀྱི་ཆབ་སྲིད་པའི་ལག་ཆ་ཞིག་ཏུ་འགྱུར་རྒྱུ་ཡིན་པ་ནི། ད་ལྟའི་ལམ་ལུགས་ལུང་འདྲེན་ལས་གསལ་པོ་ཆགས་ཡོད་དུས། བོད་ལ་སེམས་འཁུར་ཡོད་ཟེར་མཁན་ཞིག་གིས་བསམ་ཚུལ་ཞིག་མ་བཤད་ན་འཁན་མ་འཁུར་བ་རེད་བསམ་པའི་ཐོག་ནས་རྩོམ་ཐུང་འདི་འབྲི་བའི་ལས་བརྩམས་པ་ཡིན།

ཚོགས་པ་བཞི་དེའི་འབོད་སྐུལ་དོན་ཚན་གསུམ་གྱི་ནང་ནས་དང་པོ་དང་གཉིས་པར་དོགས་འདྲི་གཉིས་ཡོད།

གཅིག བདམས་ཐོན་སྤྱི་འཐུས་ ༤༤ ནས་དམ་འབུལ་ཞུ་ཡུལ་ཁག་གཉིས་བྱས་ནས་ཕུལ་ཟིན་པ་དེ་དག་བཅའ་ཁྲིམས་ནང་གསལ་ཆ་མེད་ཅེས་པ་དེ་ཁྱེད་རྣམ་པས་གཞི་རྩ་གང་ཞིག་གི་ཐོག་ནས་བསྒྲགས་པ་ཡིན།

ཁྱེད་རྣམས་ཀྱི་གསལ་བསྒྲགས་ནང་བདམས་ཐོན་སྤྱི་འཐུས་ ༤༤ ནས་དམ་འབུལ་ཞུ་ཡུལ་ཁག་གཉིས་བྱས་ནས་ཕུལ་ཟིན་པ་དེ་དག་བཅའ་ཁྲིམས་ནང་གསལ་ཆ་མེད་ཀྱང་དེ་སྔ་ཚོགས་གཙོ་རེས་མོས་བྱེད་པའི་ལམ་ལུགས་ཡོད་པ་བཞིན་ཞེས། ཁྲིམས་སྒྲིག་གི་འགྲེལ་བཤད་ལས་སྔར་བྱུང་ཟིན་པའི་དཀའ་ངལ་ལམ་འུ་ཐུག་གི་ཐག་གཅོད་དེ་གལ་ཆེ་བ་ཡིན་པའི་སྐད་ཆ་དེ་མཐོང་བ་དང་ཨ་ཁ་་་་་་་་་། སྐྱབས་མགོན་ཡིད་བཞིན་ནོར་བུས་གསོལ་སྩལ་གནང་བཞག་པའི་ང་ཚོའི་དམངས་གཙོ་འདི་མ་འོངས་པར་བཅའ་ཁྲིམས་ཟུར་འཇོག་བྱས་ཏེ་ཐབས་སྡུག་གི་ལམ་ལུགས་ཀྱིས་དབང་བསྒྱུར་འགྲོ་བ་དང་། ལམ་ལུགས་དེའང་གང་ཟག་གི་དབང་བསྒྱུར་བའི་ལམ་ལུགས་ཤིག་གི་དབང་དུ་འགྲོ་ས་རེད་དྲན་ནས་སེམས་ཕམ་པོ་བྱུང་།

ང་ཚོའི་བཅའ་ཁྲིམས་རིན་པོ་ཆེའི་དོན་ཚན་ཞེ་བདུན་པའི་ནང་དུ། འདེམས་ཐོན་སྤྱི་འཐུས་ཁོངས་ནས་སྤྱི་འཐུས་ལས་རྒྱུན་རིང་སོས་དེར་སྤྱི་འཐུས་རྒྱུན་ལས་ཀྱིས་བར་བརྒལ་ཚོགས་གཙོར་བསྐོ་གཞག་བྱེད་དགོས། གལ་ཏེ་ལས་རྒྱུན་འདྲ་མཉམ་བྱུང་ཚེ་དེའི་ཁོངས་ནས་རང་ལོ་བགྲེས་ཤོས་དེར་བསྐོ་གཞག་བྱེད་དགོས། བར་བརྒལ་ཚོགས་གཙོས་ཆེས་མཐོའི་ཁྲིམས་ཞིབ་པ་ཆེ་བའི་མདུན་སར་དམ་འབུལ་ཞུས་རྗེས། སྤྱི་འཐུས་རེ་རེས་རང་ཉིད་སྤྱི་འཐུས་ཀྱི་ལས་འཁུར་དུ་མ་ཞུགས་གོང་བར་བརྒལ་ཚོགས་གཙོའི་མདུན་སར་ཁྲིམས་ལུགས་སུ་གཏན་འབེབས་བྱས་པའི་ཚིག་གཞི་ལྟར་ལས་འཁུར་དམ་བཅའམ། ཁས་ལེན་བྱེད་དགོས། ཚོགས་གཙོ་དང་ཚོགས་གཞོན་འདེམས་ཐོན་བྱུང་རྗེས་ཚོགས་གཙོའི་མདུན་སར་དམ་འབུལ་ཞུ་དགོས་པ་དང་། ཚོགས་གཙོ་ས་གནས་སུ་མེད་སྐབས་ཚོགས་གཞོན་མདུན་སར་དམ་འབུལ་ཞུ་དགོས། ཞེས་ཧ་ཅང་ཁ་གསལ་པོ་ཡོད་བཞིན་དུ། ཚོགས་པ་བཞི་ཡི་ཚོགས་གཙོ་རྣམ་པས་དམ་འབུལ་ཞུ་ཡུལ་ཁག་གཉིས་དེ་དག་བཅའ་ཁྲིམས་ནང་གསལ་ཆ་མེད་ཅེས་བཅའ་ཁྲིམས་རིན་པོ་ཆེར་འདི་ལྟར་ཀླན་ཀ་འཚོལ་དགོས་དོན་གང་ཡིན་ནམ། ཁྱེད་རྣམ་པས་བསམ་པ་ཡར་སེམས་དང་སྐུད་པ་ཡར་འཁེལ་གྱི་དགོངས་པ་བཞེས་ཀྱི་ཡོད་ན། མ་གསལ་པ་ཞིག་གསལ་པོ་བཟོ་ཐབས་ཀྱི་ལམ་སྟོན་དགོས་པ་ལས། གསལ་པོ་ཡོད་པ་ཞིག་མི་མང་ནང་གསལ་པོ་མེད་ཐབས་དང་དོགས་འདྲོགས་ཡོང་བའི་ལས་རྩོམ་བཞིན་པ་ནི། ཚོགས་པ་སྒྲིག་འཛུགས་ཤིག་གི་གནང་སྟངས་རྩ་བ་ནས་མིན་ལ། ལས་ཐོག་ཚོགས་གཙོ་རྣམ་པས་མི་མང་གིས་མགོ་ཡག་པོ་འཚོས་ཀྱི་མེད་པའི་གོ་སྐབས་བཟུང་སྟེ་མགོ་འཐོམ་བྱེད་བཟོ་བ་དང་། ང་ཚོའི་རྒན་རབས་པ་རྣམས་པས་ཁ་སྟབས་ཧ་ཅང་སྐྱོ་པོ་ཞིག་གི་འོག་ནས་སྐུ་ལས་བསྐྱོན་ཏེ་གཏན་འབེབས་གནང་བཞག་པའི་བཅའ་ཁྲིམས་རིན་པོ་ཆེར་གསལ་བཞིན་དུ་གསལ་ཆ་མེད་པ་རེད་ཅེས་དམའ་འབྱིན་ཐབས་གནང་དགོས་དོན་ཅི་ཡིན་ནམ།

དེང་སང་འཛམ་གླིང་གི་དམངས་གཙོའི་རྒྱལ་ཁབ་མང་པོའི་ནང་དམངས་གཙོ་ནུས་མེད་དང་ཉམས་ཞན་དུ་འགྱུར་བཞིན་པའི་རྒྱུ་གཙོ་བོ་ཞིག་ནི། ཆབ་སྲིད་ཀྱི་གནད་འགག་ལ་ཐུག་སྐབས། སྔར་གྱི་ལམ་ལུགས་སྡུག་པོ་རྣམས་ལག་ཆ་ལྟ་བུར་བཀོལ་སྤྱོད་བྱེད་ཡོང་གི་ཡོད་པ་རེད་ལ། དུས་རབས་ཉེར་གཅིག་པའི་ནང་དམར་ཤོག་ཡུལ་ལུང་ཁག་གི་ནང་དམངས་གཙོའི་མྱུ་གུ་འབུས་མ་ཐུབ་པའི་རྐྱེན་རྩ་ངོ་མ་དེའང་སྔར་གྱི་ལམ་ལུགས་ངན་པ་རྣམས་སྒེར་གཅོད་ཆབ་སྲིད་པས་རྒྱུན་འཁྱོངས་བྱེད་བཞིན་པའི་དབང་གིས་ཡིན་པ་དེ་ཚང་མས་མཁྱེན་ཆུབ་ཏུ་སོང་འདིར་ཞུ་དགོས་མ་མཆིས། ལྷག་པར་དུ་ང་ཚོའི་གཞུང་འབྲེལ་མ་ཡིན་པའི་ཚོགས་པ་ཁག་གི་ཚོགས་གཙོ་རྣམ་པས་ཆབ་སྲིད་ཀྱི་འཐབ་རའི་ནང་དམངས་གཙོ་ངོ་མ་ཞིག་ཇི་ལྟར་སྲུང་སྐྱོབ་དང་གཅེས་སྤྲས། ལག་བསྟར་དགོས་མིན་མཁྱེན་དགོས་ངེས་ཡིན་སྟབས་ངེས་པར་དུ་ཐུགས་གཟབ་གནང་རོགས། ངེས་པར་དུ་འཕྲལ་ཕུགས་རྒྱངས་གསུམ་ལ་དགོངས་པ་བཞེས་པའི་ཐོག་ནས་ང་ཚོའི་དམངས་གཙོ་འདི་སྲུང་སྐྱོབ་གནང་རོགས། སྐབས་འཕྲལ་གྱི་གནས་དོན་ལ་བསྟུན་མཁས་དང་སྐབས་འཕྲལ་གྱི་འགག་རྩ་དེ་ཁོ་ན་ལས་གྲོལ་ཆེད། ང་ཚོའི་རིན་ཐང་བྲལ་ཞིང་སྐྱབས་མགོན་དོན་གྱི་བདག་པོའི་ཐུགས་དགོངས་ཀྱི་རྒྱ་མཚོ་ལས་འཁྲུངས་པའི་མྱུ་གུ་རྩ་ཆེན་པོ་འདིའི་ལོ་མ་ཙམ་ལ་བལྟས་ཏེ་རྩ་བ་ནས་རུལ་འགྲོ་བའི་ཉེན་གནས་རིགས་གཏན་ནས་མ་རྩོམ་རོགས་ཞུ།

གཉིས། སྐབས་ ༡༧ པའི་སྤྱི་འཐུས་དང་སྲིད་སྐྱོང་གི་དམ་འབུལ་ཞུ་ཕྱོགས་ཁྲིམས་སྒྲིག་དང་མཐུན་མིན་གྱི་རྙོག་གླེང་དེ་རིགས་ཕྱོགས་ཚང་མས་གཞུང་བསྟེན་སྲུང་མ་དམར་ནག་གཉིས་དཔང་པོར་བཞག་ནས་མ་འོངས་པར་གླེང་སློང་རྩ་བ་ནས་མི་གནང་རྒྱུ་ཞེས་བརྗོད་འདུག ཁྱེད་རྣམ་པར་གནས་དོན་དེ་དངོས་སུ་ལག་བསྟར་ཡོང་ཐུབ་པའི་རང་ངོས་ཀྱི་ནུས་ཤུགས་དང་རོགས་ངོས་ཀྱི་རམ་འདེགས་ག་ཚོད་ཅིག་ཡོད་པའི་གདེང་ཚོད་ཡོད་དམ།

ད་ལྟ་འདེམས་ཐོན་སྤྱི་འཐུས་ ༤༥ ནང་གཞུང་འབྲེལ་སྲུང་མ་ཁས་ལེན་དང་མི་ལེན་མཁན་གཉིས་ཀ་ཡོད་པ་འདས་པའི་གྲོས་ཚོགས་ཀྱི་ལས་རིམ་ནང་ནས་ང་ཚོས་གསལ་པོ་ཤེས་ཀྱི་ཡོད་དུས། གཞུང་འབྲེལ་སྲུང་མ་ཁས་མི་ལེན་མཁན་རྣམས་ཁྱེད་རྣམ་པས་མཉམ་འཁྲིད་གནང་ཐུབ་པའི་ཐབས་དང་ལམ་སྟོན་ག་རེ་གནང་ཟིན་པ་དང་གནང་འཆར་ཡོད་དམ། ཁྱེད་རྣམ་པས་ཕྱོགས་ཚང་མས་ཞེས་བརྗོད་དུས་འདེམས་ཐོན་སྤྱི་འཐུས་རྣམས་ཁོ་ནར་གསུང་གི་ཡོད་ན། གྲོས་ཚོགས་ནང་མ་གསུང་པ་ཙམ་གྱིས་གླེང་རྙོག་དེ་ང་ཚོའི་སྤྱི་ཚོགས་ནང་འཇའ་ཡལ་བ་ལྟར་མེད་འགྲོ་བ་ཞིག་ཡོང་གི་རེད་དམ། དེ་འདྲ་མ་ཡོང་ན་གལ་སྲིད་གླེང་གི་མིན་ཞེས་ཁས་ལེན་དམ་བཅའ་བྱེད་མཁན་ཞིག་བྱུང་བའི་དབང་དུ་བཏང་ཡང་ང་ཚོའི་གླེང་རྙོག་འདི་མུ་མཐུད་ལྷག་འདུག་པ་རེད།

སྤྱིར་བཏང་ང་ནི་ལོ་ངོ་ ༡༥ ཙམ་རིང་སློབ་གྲྭ་འདྲ་མིན་ནང་ཕྱིན་བསྡད་པ་ཞིག་མ་གཏོགས་ཆོས་ཕྱོགས་ནས་གང་ཡང་མི་ཤེས་པའི་བླུན་པོ་དད་པའི་རྗེས་འབྲིང་བ་རྣལ་མ་ཞིག་ཡིན། ཡིན་ནའང་། གངས་ཅན་སྐྱིད་གཤོངས་ནས་ཡུན་རིང་བསྡད་པ་དང་གྲོས་ཚོགས་རིམ་པའི་ལས་ཉིན་ཕལ་ཆེར་བ་ཆད་ལུས་མེད་པར་ལྟ་འདུག་མཁན་ཞིག་ཡིན་སྟབས། ཁྱེད་རྣམ་པའི་ཉིན་མོའི་རྨི་ལམ་ལྟ་བུ་ཞིག་གསུང་བཞིན་པ་དེ་ནི་ཁ་ཙམ་ལས་དོན་དུ་ཡོང་བ་ཞིག་ཡིན་པའི་ངེས་ཤེས་རྩ་བ་ནས་རྙེད་ཀྱི་མི་འདུག་པས་དོགས་འདྲི་འདི་ཞུ་དགོས་བྱུང་། ཁྱེད་རྣམ་པ་ཡིན་ནའང་དེང་དུས་ཀྱི་ཤེས་ཡོན་ཡོད་པའི་ཐོག་རང་གི་སྤྱི་ཚོགས་ལ་འགན་འཁུར་བའི་དམ་བཅའ་བཞག་ཟིན་པའི་རྒྱུན་ལས་འགན་ལྡན་ཤ་སྟག་ཡིན་དུས། ཚིག་སྙན་པོ་དང་ཉན་པོ་བདེ་བོ་ཙམ་ལ་བརྩོན་ལེན་མ་གནང་བར་ངེས་པར་དུ་དོན་ལ་ཡོང་མིན་སྔ་ས་ནས་དགོངས་པ་བཞེས་གལ་ཆེན་པོ་རེད། ལྷག་པར་དུ་དྲིལ་བསྒྲགས་རིགས་ཀྱི་སྡིངས་ཆར་ཆ་ཤས་བཞེས་སྐབས། ང་ཚོ་ཚང་མར་སྐྱོན་ཆེན་པོ་ཞིག་ཡོད་པ་ནི། བོད་དོན་བོད་མིས་གཅེས་པའི་ཁ་ཚ་དགོས་གཏུག་ཅན་དང་གཞན་ཕྱོགས་ཟིལ་གྱིས་གནོན་པའི་དགོས་མཁོ་ཅན་གཉིས་དབྱེ་བ་དེ་ཙམ་མེད་པའི་ཐོག་ནས་རྨི་ལམ་ལྟ་བུ་ཞིག་ཏུ་འདྲིས་ཏེ་ལས་ཀ་བྱེད་པ་དང་སྐད་ཆ་བཤད་པའི་སྐྱོན་ཆེན་པོ་འདུག སྐྱོན་དེ་ལྷག་པར་དུ་ཁྱེད་རྣམས་ལས་འགུལ་བ་དང་ཆབ་སྲིད་པའི་ནང་ཧ་ཅང་མང་པོ་ཡོང་གི་འདུག

དེ་འདྲ་སོང་ཙང་། ད་ལྟའི་དུས་སྐབས་འདི་ལ་ང་ཚོ་བོད་མི་སྒེར་རེ་རེ་དང་། ཚོགས་པ་སྐྱིད་སྡུག་དག་གིས་སེམས་ཚོར་ཙམ་འཁུར་ཏེ། ཆབ་སྲིད་པའི་བཤད་ཡམས་དང་ཤུགས་རྐྱེན་འདྲ་མིན་གྱི་འོག་ནས་ང་ཚོའི་དཀའ་རྙོག་འདི་ལ་ཁ་ལག་ཐོན་ན་ཕན་ལས་གནོད་ཆེ་བར་མཐོང་། གཅིག་ནས་བོད་མིའི་སྒྲིག་འཛུགས་ཀྱི་འབྲེལ་ཡོད་ལྷན་ཁང་གི་འགན་དབང་ལ་དོ་ཕོག་ཡོང་གཞི་དང་། དེའི་རྐྱེན་པས་ལོ་རྒྱུས་ནང་སྐྱོན་གནད་ལྷག་ཉེན་ཡོད་པ། གཉིས་ནས་བོད་ཀྱི་ཚོགས་པ་བཞི་དེ་ང་རང་ཚོའི་སྤྱི་ཚོགས་ནང་གང་ལ་གང་ཙམ་གྱི་ཆེ་མཐོང་དང་བརྩི་བཀུར་ཐོབ་པའི་ཚོགས་པ་རེ་ཡིན་ལ། ཚོགས་པ་དེ་དག་གི་ཚོགས་མིའི་ཁྲོད་ད་ལན་གྱི་དཀའ་རྙོག་འདིའི་ཐད་ལྟ་བ་དང་ལངས་ཕྱོགས་མ་འདྲ་བ་འཛིན་མཁན་ཡོད་པ་བརྗོད་མི་དགོས་པ་ཞིག་ཡིན་སྟབས། ཚོགས་པ་བཞི་དེའི་ལས་ཐོག་ཚོགས་གཙོ་རྣམ་པས་གནད་དོན་འདིའི་ཐད་སྐྱིད་སྡུག་མཉམ་མྱོང་གནང་མཁན་གྱི་ཚོགས་མི་ཚོར་བསམ་ཤོག་བསྡུ་རུབ་དང་གྲོས་བསྡུར་རིགས་གནང་ཡོད་དམ། གལ་སྲིད་མེད་པ་ཡིན་ན་ཚོགས་པའི་ཆེ་མཐོང་དང་ངོས་འཛིན་ལའང་གནོད་སྐྱོན་ཡོང་སྲིད་པ་ཞིག་རེད།

གང་ལྟར་བརྒྱ་བཤད་སྟོང་བཤད་ཀྱི་རྩ་བ་ནི། ད་ལྟ་རང་རིགས་བོད་མི་མང་པོས་དབུས་འོས་བསྡུ་ལས་ཁང་དང་ཚོགས་དྲུང་ལས་ཁུངས་ནས་ང་ཚོའི་དཀའ་རྙོག་འདི་ལ་བཅའ་ཁྲིམས་གཞི་རྩར་བཟུང་བའི་ཐོག་ནས་ལམ་སྟོན་དང་ཐག་གཅོད་ཅིག་གི་མགོ་བརྩམ་གནང་གི་རེད་བསམ་པའི་ཆོད་སེམས་བརྟན་པོའི་ཐོག ཉིན་དང་ཉིན་བྱས་ཏེ་རེ་སྒུག་བྱེད་བཞིན་པའི་སྐབས་འདིར། ཚོགས་པ་དང་སྐྱིད་སྡུག་སོགས་ནས་ཀྱང་དབུས་བོད་མིའི་སྒྲིག་འཛུགས་ཀྱི་འབྲེལ་ཡོད་ལྷན་ཁང་གི་བཅའ་ཁྲིམས་གཞིར་བཟུང་གི་ཐག་གཅོད་དང་ལམ་སྟོན་ལ་གུས་བརྩི་དང་རྒྱབ་སྐྱོར་གནང་དགོས་པ་དེ་ནི། གཞིས་ཀྱི་སྤུན་ཟླ་ཁྲི་ཕྲག་མང་པོས་ང་ཚོར་བསྐུར་བའི་ལས་འགན་ཡིན་ལ། ལོ་རྒྱུས་ཀྱིས་ང་ཚོར་བསྐུར་བའི་གཡོལ་དུ་མེད་པའི་འོས་འགན་ཡང་རེད། མདོར་བསྡུས་ན། བོད་མིར་སྐྱིད་ན་མཉམ་སྐྱིད་དང་སྡུག་ན་མཉམ་སྡུག་གི་འདུ་ཤེས་འཛིན་མཁན་ཞིག་ཡིན་ཕྱིན། བོད་མིའི་སྒྲིག་འཛུགས་དཀྱིལ་སྙིང་དུ་འཛིན་དགོས་པ་ནི་སྒྲིག་འཛུགས་འདི་སྲ་བརྟན་རྒྱུན་གནས་དང་ནུས་པ་གོང་འཕེལ་དུ་གཏོང་བའི་ཐབས་ལམ་ཉག་གཅིག་པུ་དེ་རེད་ཅེས་ཞུ།