རྔ་བ་ཀུན་བཟང་།
ནུབ་ཕྱོགས་པའི་ལྟ་གྲུབ་ཞེས་པའི་དེབ་དེ་བཀློགས་ཐེངས་རེ་རེར་ངས་ཁྱེད་ཀྱི་སྐོར་ལ་བསམ་བློ་མི་གཏོང་རང་གཏོང་རེད་མོད། མི་ཁྱེད་ནི་ཞི་མོ་ལ་དགའ། ཆུང་ལ་དགའ། དེབ་ལ་དགའ། ད་དུང་རོལ་དབྱངས་ལ་དགའ། ཁྱེད་དང་ངའི་བར་ན་ཤ་དང་རུས་པའི་བརྩེ་དུང་དམིགས་བསམ་ཞིག་མེད་མོད། ཡིན་ནའང་ངེད་གཉིས་ཡང་དང་ཡང་དུ་དཔེ་དེབ་ཁང་དང་འཚིག་ཇ་ཁང་ནས་ཐུག་མྱོང་ཡོད། ཆེས་སྤྱིར་བཏང་གི་འཚོ་བའི་ཁྲོད་ནས་ཕན་ཚུན་གྱི་འབྲེལ་ལམ་རྒྱུན་བསྲིངས་ནས་ད་བར་ལྷག
དྲང་པོ་བརྗོད་ན། ང་ནི་དལ་དལ་ལྷོད་ལྷོད་དང་། བློ་བདེ་བག་ཕེགས་ངང་ནས་འཚོ་བ་རོལ་མཁན་ཁྱེད་ལ་ཡིད་སྨོན་ཤོར། ནུབ་ཕྱོགས་ཀྱི་ལྟ་གྲུབ་སྨྲ་བ་ཁྱེད་ཀྱང་དོ་ནུབ་སྒོ་ར་ཞིག་ལ་ནང་ལ་བསྡད་ནས། བདག་མི་ཐུབ་པའི་སེམས་པ་དང་ཆ་སོང་ཆ་མེད་དུ་གྱུར་བའི་རྣམ་ཤེས་སོགས་ལ་བསམ་བློ་གཏོང་གི་ཡོད་ན་ཐང་། དེ་དག་གི་ཁྲོད་ནས་ངའི་སེམས་པ་དེ་ཁྱེད་མཐོང་ན་སྟོན་ཁའི་ལོ་མ་དང་ཆ་ཡིན། སྐར་མ་གང་
སྔོན་ལ་ཡལ་བ་དང་སྐར་མ་གང་རྗེས་ལ་ཡལ་རྒྱུ་ནི་སུས་ཀྱང་བརྗོད་ཐབས་མེད་མོད། རེད་དེ། སྐད་ཅིག་ཙམ་ཡང་བདག་མི་ཐུབ་པའི་སེམས་པ་འདི་དང་དེའི་བྱེད་ལས་དག་ལ་དཔྱད་ན། ད་གཟོད། ཁྱེད་ཇི་ལྟར་ནུབ་ཕྱོགས་པའི་ལྟ་གྲུབ་སྨྲ་བ་ཆགས་པ་ཡིན་མིན་ལ་གོ་བ་མི་ལོན་པ་མི་འདུག
དགུན་ཁ་ཞིག་ལ་ཁྱེད་ཀྱིས་ནུབ་ཕྱོགས་པའི་ལྟ་གྲུབ་ཞེས་པའི་དེབ་འདི་ཉོས་ཏེ་ང་ལ་ལེགས་སྐྱེས་ལ་བྱིན་པ་བརྗོད་ཡོད་ནི་རེད། གཅིག་བྱས་ན་ངའི་མིག་མདངས་ལས་ཁྱེད་ང་མཐོང་ཡོང་ན་ཐང་། ཡང་ན་བུ་མོ་ཁྲི་ཁྲི་འབུམ་འབུམ་གྱི་ཁྲོད་ནས་དཔེ་ཀློག་ལ་དགའ་མཁན་ཞིག་རེད་བསམ་ནས་ལྷག་བསམ་དྭངས་མའི་མཆོད་པ་ཡིན་སྲིད། གང་ལྟར། ཆུ་ཚོད་ཀྱི་ཐག་སྒྲ་དང་མི་ཚོགས་ཀྱི་རྡོག་སྒྲར་ཉན་ཞོར་ལ། བདག་མི་ཐུབ་པའི་སེམས་པ་ཞེས་པའི་ཚིག་ལ་ཡང་ཡང་བསམ་བློ་གཏོང་བཞིན་ཁྱེད་ཀྱི་ལྟ་གྲུབ་དང་སློབ་ཁྲིད་ལ་ཉན་བཞིན་ཡོད།