སྟོབས་ཀྱིས་བཞུད་པའི་བཤུལ་ལམ།

སློབ་དཔོན་ཆེན་མོ་མཁས་པའི་དབང་ཕྱུག་ཟམ་གདོང་རིན་པོ་ཆེ་མཆོག་ཉིད་དགུང་གྲངས་གྱ་གཉིས་བཞེས་པའི་འཁྲུངས་སྐར་དུས་སྟོན་ལ་ཕུལ་བའི་ཚིགས་སུ་བཅད་པ།

ཧོར་གཙང་འཇིགས་མེད།

འབད་དང་བརྩོན་པའི་རྣོ་གྲིའི་དབལ་གྱིས་གནའ་དེང་ཤེས་བྱའི་ནགས་ལ་ཟ།།

རྒུད་དང་རྨོངས་པའི་ཚང་ཚིང་བསྲེགས་ཏེ་མཁྱེན་རབ་ལྗང་ལོའི་འདབ་མ་ལྡེམ།།

བློ་དང་ཐོས་པའི་ཉིང་རྡུལ་བསགས་ཏེ་འཇིགས་མེད་སྤོབས་པའི་གད་རྒྱངས་ཅན།།

དུས་ཀྱི་མཐའ་ན་མཁས་པའི་མཁས་པ་བསོད་ནམས་སྟོབས་ཀྱི་སློབ་དཔོན་མཆོག།

ཞབས་མེད་འཁོར་བའི་དོང་ནས་ཕྱུང་སྟེ་ཞི་བསིལ་ངུར་སྨྲིག་ཚལ་དུ་གཤེགས།།

བརྟན་གཡོའི་བཀོད་པ་འབྱམས་སུ་ཀླས་པའི་གདོད་ལུགས་གཞི་ཡི་ཆོས་ཉིད་བཙལ།།

སྒྲིབ་གཉིས་འཁྲུལ་བའི་སྨུག་སྤྲིན་བསལ་ཕྱིར་ས་དང་ལམ་གྱི་བཤུལ་ལམ་བགྲོད།།

འབྲས་བུ་སྐུ་བཞིའི་གྲོང་ལ་ཕྱོགས་པའི་ཐེག་པ་མཆོག་གི་བཤེས་གཉེན་གཅིག།

ཞུམ་མེད་སྟག་གི་སྙིང་ཁམས་འབར་ཀྱང་གུས་རྟག་སྦྱོར་བ་དང་དུ་བླངས།།

ལུང་རིགས་འཕུར་ལྡིང་གཤོག་རྩལ་རྫོགས་ཀྱང་ངར་འཛིན་ཁ་ལ་ཐལ་བ་བྱིན།།

བློ་གསལ་རྐང་དྲུག་འཚུབ་པའི་ཀློང་ན་བསླབ་གསུམ་སྦྲང་རྩིའི་ཟིལ་མངར་ཅན།།

མི་གཤིས་འཆོལ་བའི་ས་ཡོམ་ཁྲོད་ན་ཇོ་འབྲོམ་ཡབ་སྲས་རྣམ་ཐར་འཛིན།།

བཙན་པོའི་བླ་མཁར་ཆག་གྲུམ་གསེབ་ནས་རྡུལ་དང་བྱེ་མ་རླུང་གིས་འཁྱེར།།

ཉེས་མེད་མི་ཚོགས་འཚུབ་པའི་བུ་ཡུག་ལྷོ་རྒྱུད་འཕགས་པའི་ཡུལ་ལ་བདས།།

རྒྱལ་བ་དགྱེས་པའི་མཆོད་སྤྲིན་མེ་ཏོག་ཁྱེད་ཀྱང་ལྷོ་མཐའི་ལྗོངས་ལ་བབ།།

ས་ཡ་དྲུག་གི་སེམས་ཀྱི་རྟེན་གཞི་རྒྱལ་ཐབ་གསར་བའི་ཀ་ཆེན་བཏེགས།།

བདག་མེད་དྭ་ཕྲུག་གཅེར་བུའི་ཚོགས་ལ་འཚོ་ཐབས་སྒྲོ་ཡི་ཐུལ་བ་བསྩལ།།

ས་ཁུག་འགོལ་བོའི་ནགས་པ་མགོ་རྒོད་མི་ཆོས་དཀར་པོའི་ལམ་དུ་དྲངས།།

རྨོངས་ཤིང་འཐོམ་པའི་མི་ཡི་ཚོགས་ལ་སྔ་ན་མེད་པའི་ལེགས་བྱང་སྟབས།།

ཁྱེད་ནི་དཔག་ཚད་སྟོང་གི་དབྱིངས་ན་གཤོག་རྩལ་རྫོགས་པའི་གླག་རྒོད་ཅིག།

རྒྱལ་བའི་ཐུགས་རྗེ་ཉི་འོད་སྙོམས་པོས་ས་ཆེན་གདག་སྲིབ་དྲོད་ཀྱིས་བསྐྱངས།།

ཁྱེད་ཀྱི་འགྱུར་མེད་དད་དམ་གཙང་མས་ཚེ་དང་བགྱི་བ་སྙོམས་པར་མཛད།།

ས་ཡ་དྲུག་གི་སེམས་པུའི་སྦུབས་ན་ཁྱེད་ལ་དང་བའི་ཟུངས་ཁྲག་ཡོད།།

ཕྱི་རབས་གཞོན་ནུའི་མདུན་སྐྱོད་ཁྲོད་ན་ཁྱེད་ཉིད་འཕྱར་བའི་ང་རྒྱལ་ཡོད།།

མཁས་མང་བློ་གསལ་བྱེ་བའི་གླིང་ནས་གྲགས་པའི་འབྲུག་སྐད་ཟིལ་གྱིས་ལྡིར།།

དྲང་སྲོང་ལྷུང་བ་ནགས་ཀྱི་མཐའ་རུ་མི་གཤིས་རིག་པའི་བཟོ་སྐྲུན་མཛད།།

དྷོ་ལ་དྷར་གྱི་རི་བོའི་ངོགས་སུ་ཡང་དག་ཁྲིམས་ཀྱི་སྒྲོམ་གཞི་བསྐྲུན།།

རང་དབང་དམངས་གཙོའི་ལམ་ཆེན་བཤངས་པའི་ཟླ་མེད་དུས་ཀྱི་དྲང་སྲོང་ཞིག།

མདོ་དང་རྒྱུད་སྡེའི་ཉིང་ཁུ་བསྐྱིལ་བས་འབྱུང་མེད་ཤེས་བྱའི་རྒྱ་མཚོ་ལྟེམས།།

སྒྲིག་དང་ཁྲིམས་ཀྱི་སྲོལ་ལ་དབང་བས་དམངས་གཙོའི་ཇུས་ཀྱི་ས་ཁྲ་བཀྲམས།།

ཤར་དང་ནུབ་ཀྱི་ལེགས་བྱང་སྦྲུམ་པས་མཁས་རྒུའི་གཙུག་གི་རྒྱན་གཅིག་སྟེ།།

ན་ལནྡྲ་ཡི་གྱང་རོའི་འདབས་ན་རིགས་པའི་དབང་ཕྱུག་གསུམ་པ་ཞིག།

ནག་ཕྱོགས་ཁྲོས་པའི་སྡིགས་ར་གཉན་པོ་དཔའ་དང་སྤོབས་པས་ཟིལ་གྱིས་གནོན།།

ཉམ་ཐག་སྐྱོ་བའི་ངུ་འབོད་ནག་པོ་བྱམས་བརྩེའི་ཐུགས་ཀྱིས་དང་དུ་ལེན།།

འགྱུར་མེད་ཐུགས་ཀྱི་དམ་བཅའ་བརྟན་པོས་རྣོ་ལྕགས་ངར་གྱི་སྒལ་ཚིགས་འཛིན།།

ལས་བཞིའི་ནུས་པ་མཆོག་ཏུ་འབར་བའི་སྟོང་ལོ་གསར་བའི་གྲུབ་ཐོབ་གཅིག།

རྒྱལ་བའི་དབང་བོའི་རྨད་བྱུང་འཕྲིན་ལས་གྱེན་དུ་འདེགས་པའི་བྱེད་པོ་སྟེ།།

ས་ཡ་དྲུག་གི་མངོན་འདོད་སྒྲུབ་པའི་སྐྱོ་ངལ་མེད་པའི་དྲང་སྲོང་མཆོག།

དཀའ་སྡུག་ཀློང་གི་གདོང་དམར་བོད་ལ་ཁྱེད་ཉིད་ཡོད་པ་གཟི་བརྗིད་མཐོ།།

མིག་འབུར་གཏོད་པའི་གདུལ་བྱའི་ཚོགས་རྣམས་ཁྱེད་དང་མཇལ་བ་སྐལ་བ་སྦོམ།།

དམན་པས་བློ་ཡིས་ཐོ་ཅོ་གཉེར་ཏེ་ཁྱེད་ཀྱི་ཡོན་ཏན་བསྒྲག་འདོད་པ།།

སློང་མོ་མཁན་གྱིས་ཕྱུག་པོའི་བུ་ལ་འབྱོར་བ་སྒྲུབ་པའི་ལམ་སྟོན་བཞིན།།

འཁོར་དང་གདུལ་བྱའི་སྐལ་བ་དམན་ཀྱང་ཡུན་རིང་དཔྱད་པའི་མྱོང་བ་ཡིས།།

ཟོལ་བསྟོད་གཅམ་བུའི་གཡའ་དང་བྲལ་བའི་ཡིད་ཀྱི་མེ་ཏོག་སིལ་མ་གཏོར།།

ཕྱིར་མི་ལྡོག་པའི་ཐུགས་སྐྱེད་བརྟན་པོས་ཆོས་དང་སྲིད་ལ་མངའ་དབང་བསྒྱུར།།

ཚེ་དང་སྙོམས་པའི་ལེགས་ཚོགས་བགྱི་བ་ཀུན་བཟང་ཞིང་དུ་སིམ་གྱུར་ཅིང་།།

ཡིད་བཞིན་འཁོར་ལོའི་བྱིན་རླབས་འོད་ཀྱིས་རྡོ་རྗེའི་བྲག་གི་དཔལ་བརྙེས་ཏེ།།

གྲུ་འཛིན་རི་བོའི་གཞལ་མེད་ཁང་དུ་ཡབ་སྲས་ལྷན་ཅིག་འབྱོན་པར་སྨོན།།

སྟོབས་ཀྱིས་བཞུད་པའི་བཤུལ་ལམ་ཞེས་པ་འདི་ཡང་རིང་ནས་ངོ་ཤེས་པའི་སྐུ་ཞབས་ཀུན་དགའ་བཀྲ་ཤིས་ལགས་ཀྱིས་རྩོམ་སྐུལ་གནང་བ་རང་གི་སེམས་འདུན་དང་ཧྲིལ་གྱིས་མཐུན་པར་གྱུར་པས། མི་ཡི་རྗེ་བོ་དང་ལྷ་ཡི་སྲས་པོ་མཁས་མཆོག་ཟམ་གདོང་རིན་པོ་ཆེ་མཆོག་དགུང་གྲངས་གྱ་གཉིས་ཧྲིལ་བོར་བདེ་ཕེབས་བྱུང་བའི་འཁྲུངས་སྐར་བསུ་སྟོན་གྱི་ཚིགས་སུ་བཅད་པ་འདི་དག་བགྱིད་པོ་ནི་ཡུལ་མདོ་སྨད་ཀྱི་ལྗོངས་སུ་སྐྱེས་ཤིང་རིག་པའི་གནས་དུ་མ་ལ་སྦྱངས་བརྩོན་བྱས་ཤིང་། གསེར་བཟང་ལྟ་བུའི་དར་མའི་མི་ཚེ་ཧྲིལ་བོ་མི་ཡུལ་གྱི་རྒྱལ་ཁམས་འགྲིམས་ནས་རྫོགས་པ་ཧོར་གཙང་འཇིགས་མེད་དུ་འབོད་པས། ཕྱི་ལོ་༢༠༢༡ ལོའི་ཟླ་༡༠ ཚེས་༢༨ ཉིན་ཕུལ་བ་དགེའོ།།