གཡུ་ལུང་རྣོ་གྲི།
རྡ་རམ་ས་ལ་ནས་ནང་འཁྲུག་དང་སྐད་ལོག་རེ་བརྒྱབ་སྟེ་སྡོད་པར་དེ་ཙམ་ཁྱད་པར་མེད་ཀྱང་། ཐག་ཉེ་རྡ་ས་གངས་སྐྱིད་ནས་ཧི་མ་ཅལ་མངའ་སྡེའི་གྲོས་ཚོགས་ར་བ་དང་དེ་ལས་བརྒལ་ནས་གང་ལ་བསྐྱོད་ཀྱང་། ངེས་པར་མཁོ་བ་ནི་སྐད་ཡིག་གཉིས་གསུམ་རེའི་མཁྱེན་རྒྱ་ཅན་མཁོ་བར་མཐོང་། ཁ་སང་དེ་རིང་རྡི་ལི་ན་ཞུ་གཏུགས་ཀྱི་ལས་ཀ་སྒྲུབ་ཀྱི་ཡོད་པའི་སྤྱི་འཐུས་རྣམ་པས་དཀའ་ལས་མང་པོ་ཞིག་བསྐྱོན་བཞིན་པ་རྗེས་སུ་ཡི་རང་གི་གནས་རེད། ཁོང་ཚོའི་སྤྱི་སེམས་དང་འབད་བརྩོན་ལ་སྐྱོན་བརྗོད་གང་ཡང་མེད་དེ། ལྷ་རྒྱ་རིའི་བུ་མོ་རྣམ་རྒྱལ་སྒྲོལ་དཀར་དང་ཆོས་གྲགས་རྒྱ་མཚོ་གཉིས་ཀྱིས་གོི་བརྡ་འཕྲོད་པ་ལས་གཞན་དག་གིས་སྐད་ཡིག་གཞན་གྱིས་སྤྱིར་བཏང་གི་ཟ་སྐད་འཐུང་སྐད་ཀྱང་མི་འཁྲོལ་བ་དངོས་ཡོད་ཆགས་ཡོད། དྲང་པོར་བཤད་ན། སྐད་བརྡ་མི་འཕྲོད་པ་རྣམས་བང་སྒྲིག་ནས་འགྲོ་བ་འགྲོ་སོང་འཕྲོ་བརླག་རེད། ཞུ་གཏུགས་ནི་བརྡ་འཕྲོད་དགོས་པ་དེ་གཙོ་བ་ལས་མི་གྲངས་མང་པོ་ཞིག་བང་སྒྲིག་ནས་འགྲོ་དགོས་པ་ཞིག་ཆགས་ཀྱི་མེད།
འདི་ལྟར་བསམ་བློ་བཏང་ན། ང་ཚོས་སྤྱི་འཐུས་ཀྱི་འོས་ཆོས་བགྲངས་སྐབས། བཅའ་ཁྲིམས་ནང་ལ་མ་མཐར་ཡང་སྐད་ཡིག་གཉིས་ཤེས་དགོས་པའི་ཆ་རྐྱེན་འདོིན་དགོས་པར་དགོས་མཁོ་ཆགས་འདུག གང་ལ་ཟེར་ན། ཞུ་གཏུགས་ནི་རྒྱལ་ཁབ་གཞན་དང་མི་རིགས་གཞན་ལ་བྱེད་དགོས་པ་ཡིན་ཙ་ན། གོ་ལའི་སྤྱི་སྐད་དུ་གྱུར་ཡོད་པ་དབྱིན་སྐད་ཀྱི་ལམ་ནས་གཞུང་གི་སྲིད་བྱུས་དང་རང་གི་ལྟ་ཚུལ་ལྷུག་པོར་བརྗོད་ཐུབ་པ་ཞིག་ཡོད་ན་བཟང་། དཔེར་ན། བོད་མི་མང་སྤྱི་འཐུས་ཡོངས་རྫོགས་བོད་སྐད་ཁོ་ན་ལས་མི་ཤེས་མཁན་ཡིན་པའི་དབང་དུ་བཏང་ན། ང་ཚོས་རྡ་རམ་ས་ལ་བརྒལ་བའི་ལས་དོན་མང་པོ་ཞིག་བྱེད་མི་ཐུབ། དེང་སང་ང་ཚོར་སྐད་ཡིག་གཉིས་ནས་གསུམ་རང་རྐྱ་འཕེར་མཁན་ཧ་ཅང་མང་པོ་ཡོད་སྟབས། དེ་ཚོར་གོ་སྐབས་ཕུལ་ན། ལས་ཆོད་ཆེ་བ་ཡོང་བར་ཕན།
ཡང་བཅའ་ཁྲིམས་སུ་གསལ་མེད་ནའང་། འོས་མིར་ལངས་མཁན་དང་འོས་འཕེན་མཁན་གྱི་ངོས་ནས་ཚོད་འཛིན་བྱེད་ཐུབ་པ་ཞིག་ཀྱང་ཡོད། སྐྱ་སེར་སུ་ཡིན་ཡང་། རང་ཉིད་ཀྱིས་རང་ཉིད་ལ་བརྟག་སྟེ། སྐད་ཡིག་གཉིས་ལྡན་གྱི་ཆ་རྐྱེན་མི་ལྡན་ཚེ། སྤྱི་འཐུས་སུ་མི་ལངས་པའི་ཐག་གཅོད་བྱས་ནས་གཞན་དང་གཞན་ལ་གོ་སྐབས་སྤྲོད་ཐུབ་དགོས་པ་དང་། འོས་ཤོག་འཕེན་མཁན་མང་ཚོགས་ཀྱིས་ཀྱང་འོས་མི་དེར་སྐད་ཡིག་གཉིས་ཀྱི་ཤེས་ཚད་ཡོད་མེད་ལ་བརྟག་ནས་འོས་ཤོག་འཕེན་པའི་ལངས་ཕྱོགས་འཛིན་པའི་ལམ་སྲོལ་ཞིག་དར་བ་ཡིན་ན། ཕན་ཐོགས་ཆེན་པོ་གཉིས་ཡོད། གཅིག་ནི་རྒྱལ་སྤྱིའི་གནས་ཚུལ་ཤེས་ཤིང་རྒྱལ་སྤྱིར་ཞུ་གཏུགས་ཀྱི་ནུས་པ་འདོན་ཐུབ། གཉིས་ནི་རྡ་རམ་ས་ལ་ནས་ནང་འཛིང་གི་སྐད་ངན་གོ་རྒྱུ་ཇེ་ཉུང་དུ་འགྲོ་བར་ཕན། རྒྱུ་མཚན་འདི་ལ་བརྟེན་ནས། ང་ཚོས་མ་འོངས་པར་དགོངས་པ་འདི་འདྲ་རེ་བཞེས་དགོས་པའང་དུས་བསྟུན་གྱི་ལེགས་བཅོས་གལ་ཆེན་ཞིག་རེད།
བསམ་ཚུལ་ཡག་པོ་བྲིས་འདུག་། འོས་ཤོག་འཕེན་མཁན་མི་མང་གི་ནོར་བ་རེད་། ཕྱོགས་གཏོགས་དང་ལུང་ཚན་ཤོག་སྒྲིལ་ལ་འགན་འཁུར་ནས་འོས་ཤོག་འཕེན་པའི་འབྲས་བུ་འདི་རེད་། སྔ་མོ་ལོ་རབས་ལྔ་བཅུ་དྲུག་བཅུའི་ནང་ཡིན་ན་ཁག་མེད་། དེང་སྐབས་བཙན་བྱོལ་སྤྱི་ཚོགས་ནང་མཐོ་སློབ་འཐོན་པའི་ཤེས་ཡོན་ཅན་བརྒྱ་ཕྲག་སྟོང་ཕྲག་མང་པོ་ཡོད་པ་དེ་ཚོ་ལ་འོས་མ་འཕེན་པ་ཕྱོགས་གཏོགས་དང་ལུང་ཚན་ཤོག་སྒྲིལ་ལ་འགན་འཁུར་ནས་འོས་ཤོག་འཕེན་ན་ཡོང་རྒྱུ་འདི་མ་རྟོགས་གང་ཡོང་། སྤྱི་འཐུས་ཀྱི་ནོར་བ་མ་རེད་། མི་མང་ནས་ནོར་བ་རེད་།
སྐུ་ཉིད་ཀྱི་དགོངས་འཆར་ཧ་ཅང་ཡག་པོ་འདུག མོས་མཐུན་བརྒྱ་ཆ་རྒྱ་ཡོད།
གཞུང་པ་ཚེ་དབང་གིས་གསུངས་པ་ལྟར་མི་མང་དང་ལྷག་པར་དུ་གྲྭ་ས་ཁག་ནང་བཞུགས་པའི་སངས་རྒྱས་ན་བཟའ་མཆོད་མཁན་དགེ་འདུན་པ་ཚོར་དེང་དུས་ཀྱི་ཆབ་སྲིད་འགྲོ་སྟངས་འགྲོ་ལུངས་སོགས་ཀྱི་སློབསྦྱོང་སྤྲོད་དགོས་པ་ཤིན་ཏུ་ནས་གལ་ཆེ།ལོ་ཤས་སྔོན་ཆབ་སྲིད་མཁས་དབང་ཟམ་གདོང་རིན་པོ་ཆེ་མཆོག་གིས་གདན་ས་ཁག་འོས་ཤོག་གི་སྦེང་ངམ་ཕྱོགས་གཏོགས་རུབ་རྒྱག་གཏོང་ས་མ་ཆགས་པའི་ལམ་སྟོན་ཁ་གསལ་གནང་ཡོད་ནའང་ད་ལན་གྱི་འོས་ཤོག་འཕེན་སྟངས་ནས་ཁ་གསལ་ཤེས་ཐུབ།གང་ལྟར་ཡང་ནང་པ་སངས་རྒྱས་པའི་ཆོས་ངོ་མ་དེ་ཆགས་སྡང་ཕྱོགས་ལྷུང་མེད་པ་བདག་མེད་རྟོགས་པ་དང་ང་འཛིན་སྤུ་ཙམ་མེད་པ་སྟོང་ཉིད་ཀྱི་ངོ་བོ་གཟིགས་དགོས་པ་ཕར་བཞག་སྟེ་བསམ་བློ་བུ་དོགས་དང་འཇིག་རྟེན་པའི་བྱ་སྤྱོད་རང་རེད།
མ་འོངས་བཙན་བྱོལ་སྒྲིག་འཛུགས་སྒོ་རྒྱབ་ཚར་བ་དང་དེ་རྣམས་སྐད་སྒྱུར་ལ་ཕན་ཐོགས་སྲིད།