ནམ་མཁའ།
ལོ་ངོ་དྲུག་བརྒྱའི་དུས་ཀྱི་སྔ་རོལ་དུ།།
མདོ་ཁམས་གཡར་མོ་ཐང་གི་ཡུལ་ལྗོངས་ཀྱི།
ཙོང་ཆུ་སྔོན་མོའི་འགྲམ་གྱི་སྦྲ་ཁྱིམ་རུ།།
རིག་པའི་ཁྱེའུ་འཁྲུངས་པ་དེ་ལ་འདུད།།
ལྟེ་ཁྲག་ཕོད་པའི་གནས་སུ་རྒྱལ་སེང་གི།
སྐུ་ཡི་གཟུགས་བརྙན་འབུམ་ཕྲག་བྱོན་པ་ཡི།།
ངོ་མཚར་ལྗོན་ཤིང་སྐྱེས་བའི་རྟགས་མཚན་གྱི།
ཀུན་དགའ་སྙིང་བོ་ཁྱེད་ལ་གུས་པས་འདུད།།
དགུང་ལོ་གསུམ་ལ་སོན་པའི་དུས་ཀྱི་ཚེ།།
རེབ་གོང་ཡུལ་དུ་འཁྲུངས་བར་གྲགས་པ་ཡི།།
མཁས་གྲུབ་ཟུང་ལྡན་ཆོས་རྗེ་དོན་འགྲུབ་ཀྱིས།།
ཡབ་ཡུམ་ཚབ་ཏུ་བསྐྱངས་བའི་བུ་ཆུང་འདུད།།
བྱ་རྒྱལ་ཁྱུང་ཆེན་འདྲ་བའི་གནས་མཆོག་དེར།།
ཕ་བུ་གཉིས་ཀྱིས་བརྩོན་པའི་གོ་ཆ་ཡིས།།
ཤེས་རབ་ལྷ་མཆོག་གཟུངས་སྔགས་སྒྲུབ་པས་ན།།
བྱ་ཁྱུང་དགོན་གྱི་གྲྭ་རྒྱུན་དང་པོར་འདུད།།
བཅུ་དྲུག་ལངས་ཚོ་དར་ལ་བབས་པའི་ཚེ།།
སེམས་ཀྱི་ཟས་སུ་བླ་མའི་གདམས་ངག་དང་།།
ལུས་ཀྱི་ཟས་སུ་རྒྱབ་ཏུ་རྩམ་ཁུག་ཞིག།
ཁུར་བའི་དབུས་འགྲོ་ཨར་སྐྱོང་བུ་ལ་འདུད།།
རི་ཆུ་སྟོང་ཕྲག་བརྒལ་དུས་སློང་ཞོར་དུ།།
དབུས་ཀྱི་གྲྭ་ས་འགྲིམས་དུས་དབུལ་བོ་ཁྱེད།།
ལུས་ཟས་དབུལ་ཡང་སེམས་ཟས་ཕྱུག་པོ་ཡིས།།
མདོ་སྔགས་རྒྱ་མཚོའི་ཀློང་དུ་བསྐྱོད་ལ་འདུད།།
དབུས་ཀྱི་གཙང་ཆུའི་འགྲམ་གྱི་བཀའ་བསྟན་ཡི།།
མེ་ཏོག་ཚལ་གྱི་གུང་ཐང་དགོན་པ་རུ།།
རྒྱ་འགྲེལ་ཉེར་གཅིག་གསེར་གྱི་ཕྲེང་བ་ལ།།
རྒྱུས་ཏེ་བརྩམས་པའི་ཙོང་ཁའི་ཞབས་ལ་འདུད།།
ཀླུ་སྒྲུབ་ཟླ་གྲགས་གཞུང་ལུགས་འོ་མའི་མཚོར།།
རིག་པའི་དབྱུག་པས་སྲུབས་ཏེ་དབུ་མའི་ལམ།།
གསེར་གྱི་མར་ལོ་འཁྲུངས་པའི་བློ་བཟང་གྲགས།།
གངས་ཅན་ཤིང་རྟའི་སྲོལ་འབྱེད་ཁྱེད་ལ་འདུད།།
རབ་འབྱམས་མདོ་སྔགས་ནམ་མཁའི་མཁའ་དབྱིངས་ཀྱི།།
ངོ་མཚར་གཏམ་གྱི་ཁྱེད་ཀྱི་གཞུང་ལུགས་ལ།།
སྔོན་མའི་ལས་ཀྱིས་ཅུང་ཟད་སྦྱངས་མོད་ཀྱང་།།
ཕྱེ་མ་ལེབ་ཀྱིས་གནམ་འཕང་གཅོད་དང་མཚུངས།།
ཡོ་རུབ་གླིང་དུ་འཁྱམས་པའི་དགེ་བོ་ཡིས།།
སྟོང་པའི་དབྱིངས་ལ་བྲིས་བའི་རི་མོ་འདི།།
དགོད་པའི་གཏམ་ལ་དྲངས་ཏེ་བྲིས་མོད་ཀྱང་།།
ཕྲག་དོག་འདྲེ་མོ་ངུ་བའི་རྒྱུ་ཡང་སྲིད།།
29/12/2021ལ་ཡོ་རུབ་ནས་ནམ་མཁས་དགོད་གཏམ་གྱི་ཞིག་གི་ཚུལ་དུ་བྲིས།