གཡུ་སྔོན་པོས།
དང་པོ། ཐོག་མའི་གླེང་གཞི།
ང་ཚོ་འགྲོ་བ་མིའི་རིགས་ཀྱི་གྲས་སུ་གཏོག་པ་ཞིག་ཡིན་དུས་ང་ཚོར་འགྲོ་བ་མིའི་ཐོབ་ཐང་དགོས་ལ། ང་ཚོར་རྒྱལ་སྤྱིའི་ཨོ་ལིམ་པིག་རྩེད་འགྲན་གྱི་རང་དབང་ཡང་དགོས། ཨོ་ལིམ་པིག་རྩེད་འགྲན་གྱིས་ང་ཚོར་བློ་སྟོབས་བསྟེར་ཐུབ་ལ། བལྟ་རྒྱ་དང་མཐོང་རྒྱ་ཆེ་རུ་འགྲོ་རྒྱུར་ཕན་ཐོགས་ཡོད། རྩེད་མོ་འདི་ནི་ཆེས་གཞི་རྩ་མིན་ཡང་མིའི་སྤྱི་ཚོགས་སུ་ཤིན་ཏུ་གལ་ཆེན་ཡིན། དེ་ཡང༌། ང་ཚོས་ངེས་པར་འདྲི་དགོས་པའི་དྲི་བ་ནི། རྒྱལ་སྤྱིའི་ཨོ་ལིམ་པིག་རྩེད་འགྲན་གྱི་ཆེད་དུ་གང་ཟག་སྒེར་ལ་མཁོ་བའི་འགྲོ་བ་མིའི་ཐོབ་ཐང་ཞེས་པ་དེ་གཙེགས་ཆེར་འཛིན་རྒྱུ་ཡིན་ནམ། འགྲོ་བ་མིའི་རིགས་སྤྱི་ལ་མཁོ་བའི་ཀུན་ཕན་དང་ཡར་རྒྱས་རྩ་བར་བཟུང་ནས་ཨོ་རྩེད་གཙེགས་ཆེར་འཛིན་རྒྱུ་ཡིན་ནམ། དོན་དངོས་རྒྱལ་སྤྱིའི་ཨོ་ལིམ་པིག་རྩེད་འགྲན་ཚོགས་པ་ཞེས་པ་དེ་གང་འདྲ་ཞིག་ཡིན་ནམ།
གཉིས་པ། ཨོ་ལིམ་པིག་གྱི་གལ་གནད།
ཕྱིའི་སྣོད་འདི་ཚན་རྩལ་རིག་པའི་འོག་ནས་འཛམ་གླིང་གོ་ལ་འདི་ཆུང་དུ་འགྲོ་བཞིན་པའི་སྣང་བ་དང་། འཛམ་གླིང་གཡས་གཡོན་འབྲེལ་སྒྲིལ་ཤུགས་ཆེར་འགྲོ་བཞིན་པའི་གནས་སྐབས་ཤིག་དང་། འཛམ་གླིང་གཅིག་གྱུར་གྱི་ཕྱོགས་སུ་བསྐྱོད་བཞིན་པའི་དུས་རབས་ཤིག་རེད། ནང་བཅུད་སེམས་ཅན་འགྲོ་བ་མིའི་རིགས་ལ་ཆ་མཚོན་ཡང་བདེ་སྐྱིད་རྫོགས་ལྡན་གྱི་དུས་སྐབས་ཤིག་རེད། རྒྱལ་སྤྱིའི་ཨོ་ལིམ་པིག་རྩེད་འགྲན་དེ་རྒྱལ་ཁབ་མང་པོ་མཉམ་གཅིག་ཏུ་འཛོམས་སའི་མདུན་ཐང་ཆེན་པོ་ཞིག་ཡིན་པ་མ་ཟད། རྒྱལ་ཁབ་མང་པོ་མཉམ་དུ་འཛོམས་ཏེ་འགྲོ་བ་མིའི་གཞི་རྩའི་སེམས་ཁོངས་ན་ཡོད་པའི་མཛའ་མཐུན་གྱི་ཀུན་སྤྱོད་སྟོན་སའི་སྡིང་ཆ་ཞིག་རེད། དེ་ཡང་འཛམ་གླིང་སྟེང་རྒྱལ་སྤྱིའི་ཨོ་ལིམ་པིག་རྩེད་འགྲན་འགོ་འཛུགས་དགོས་པའི་རྒྱུ་མཚན་གཙོ་བོ་ཡང༌། ཁ་འཐོར་དུ་འཚོ་བཞིན་པའི་རྒྱལ་ཁབ་དག་མཉམ་རུབ་བྱེད་པ་དང༌། རྩེད་འགྲན་པའི་རྣམ་དཔྱོད་དང་ལུས་རྩལ་ཕྱིར་སྟོན་བྱེད་པ། འགྲོ་བ་མིའི་རིགས་སྤྱི་ལ་མཁོ་བའི་ཐོབ་ཐང་དང་ཀུན་ཕན་བདེ་རྩའི་ཕྱོགས་ལ་བསམ་གཞིགས་དང་བརྩི་བཀུར་ཡོང་བའི་ཆེད་དུ་ཡིན་པ་མ་ཟད། གོ་ལའི་སྟེང་གི་དམག་འཁྲུག་ཐམས་ཅད་ཞི་ཞིང་འཛམ་གླིང་རྒྱལ་ཁབ་དག་འཆམ་མཐུན་མཉམ་གནས་ཡོང་ཐུབ་པའི་ཆེད་དུ་ཡང་ཡིན།འདི་ལྟར་རྒྱལ་སྤྱིའི་ཨོ་ལིམ་པིག་རྩེད་འགྲན་ནི་འཛམ་གླིང་གཅིག་གྱུར་དང༌། སྤྱི་ཚོགས་ཀྱི་བདེ་ཐབས། མིའི་རིགས་མཉམ་གནད་གོང་འཕེལ་དང་། འགྲོ་བ་མིའི་ཐོབ་ཐང་བཅས་ཡར་རྒྱས་སུ་གཏོང་བར་དམིགས་པའི་རྩེད་འགྲན་གལ་ཆེན་ཞིག་ཡིན་ཞེས་བཤད་ཆོག
གསུམ་པ། མི་གྲངས་མང་ཉུང་བར་གྱི་ཐོབ་ཐང་གི་གལ་གནད།
ང་ཚོ་སྐྱེས་པས་ང་ཚོ་འཚོ་ལ། ང་ཚོ་འཚོ་ནས་འཆི་ངེས། དེར་བརྟེན་ང་ཚོ་འཆོ་དགོས་ན་ཐུན་མོང་དུ་འཚོ་དགོས། ཐུན་མོང་གིས་མིའི་རིགས་ཀྱི་སྤྱི་ཚོགས་ལ་ཕན་ཐོགས་སྒྲུབ་དགོས། འོན་ཀྱང༌། ང་དང་ངའི་ནང་མི་ཉེ་འཁོར་ཁ་ཤས་སྐྱེས་ཏེ་འཆི་བ་ནི་འཇིག་རྟེན་གྱི་ཆོས་ཉིད་ཅིག་ལས་མིའི་རིགས་སྤྱི་ལ་ཕན་གནོད་གང་ཡང་མེད། དེ་ནི་ང་རང་ཚོ་ཉུང་ཉུང་ཡིན་པས་སོ། མིའི་རིགས་སྤྱིའི་འཚོ་རྒྱུན་རིང་མིའི་རིགས་སྤྱིའི་དགོས་མཁོ་དང་ཐོབ་ཐང་ཡོད་ཚད་ལྡན་དགོས། མིའི་རིགས་ཐུན་མོང་དུ་འཚོ་བ་ལ་དོན་སྙིང་ཡོད་དགོས་ན་མིའི་རིགས་ཐུན་མོང་གི་སྤེལ་བཞིན་པའི་བྱ་སྤྱོད་ལ་དོ་ཁུར་བྱེད་དགོས། རང་ཉིད་ཀྱི་མི་ཚེ་རང་ཉིད་ལ་ཤིན་ཏུ་རྩ་ཆེ་བར་འཛིན་མཁན་དེ་དག་ལ་ཀུན་ཕན་དང་ཐུན་མོང་གི་བསམ་བློ་མེད་པ་ཡིན། དེ་བཞིན་གཞན་ལ་ཡང་གང་ཟག་སྒེར་དེ་གལ་ཆེན་ཡིན་པའི་ལམ་སྟོན་བསླབ་བྱ་བྱེད་བཞིན་པ་ཡང་གཅིག་མཚུངས་ཀྱི་ན་ཚ་དེ་ཁྱབ་ཡོད། དེའི་ཕྱིར། འགྲོ་བ་མི་ཞིག་ཡིན་པས་ཆ་ནས་ཁེར་རྐྱང་དུ་འཚོ་ཐབས་མེད་པར་མཉམ་གནས་ཀྱི་ཐོག་ནས་འཚོ་དགོས། མཉམ་གནས་ཀྱི་ཐོག་ནས་གོང་འཕེལ་གཏོང་དགོས། མཉམ་གནས་ཀྱི་ཐོག་ནས་མི་རབས་རྗེས་མར་མིག་དཔེ་སྟོན་དགོས། དེ་ཡང་མི་སྒེར་ལ་སྐྱེས་པའི་དུས་ནས་སྲོག་འཚོ་བའི་ནུས་པ་ཡོད་ལ། སྲོག་འཚོ་བ་ནས་མི་ཚེ་དོན་དང་ལྡན་པ་སྐྱེལ་བའི་ནུས་པ་ཆ་ཚང་ཡོད༌པ་བཞིན་མིའི་རིགས་ཀྱི་སྤྱི་ཚོགས་འདི་མུ་མཐུད་ནས་མཉམ་རུབ་ཐོག་འཚོ་དགོས་པ་དང་། འཚོ་བ་དེ་ཡང་གཅིག་འགྱུར་དང་། ཀུན་ཕན་གྱི་ཐོག་ནས་འཚོ་བར་བྱེད་དགོས་དུས་མིའི་རིགས་མཉམ་གནས་ཀྱི་འཚོ་ཐབས་ལ་ཐུགས་ཁུར་མང་ཙམ་ལེན་དགོས། འདིར་རྗོད་བཞིན་པའི་འགྲོ་བ་མིའི་རིགས་སྤྱིའི་ཐོབ་ཐང་ཞེས་པ་ནི། མི་སྣ་ཁ་ཤས་སམ་ཚོགས་སྡེ་ཁ་ཤས་ཀྱི་སྣེ་འཁྲིད་འོག་ནས་བག་མེད་ལོངས་སྤྱོད་ཀྱི་མིའི་རིགས་སྤྱིའི་ཐོབ་ཐང་མིན་ལ་རྒྱས་སྤྲོས་གཟབ་འཆོར་གྱི་ཐོབ་ཐང་མིན། དེ་བས་མི་སྒེར་གྱི་དགོས་མཁོ་རྩ་བར་བཟུང་ནས་འགྲོ་བ་མིའི་ཐོབ་ཐང་ཞེས་པ་དེ་བས་མིན། ཁ་རྒྱུན་དུ་ཁ་དང་ཁ་སྤུ་དབྱེ་འབྱེད་ཤེས་དགོས་ཞེས་པ་བཞིན། མི་མང་བའམ་སྤྱི་ཚོགས་ཁྱོན་ཡོངས་ཀྱི་ཐོབ་ཐང་དང་མི་ཁ་ཤས་སམ་གཅིག་གི་ཐོབ་ཐང་བར་ལ་དབྱེ་འབྱེད་གསལ་པོར་ཤེས་པ་བྱས་ནས་ཨོ་ལིམ་པིག་རྩེད་འགྲན་གྱིས་མི་མང་བའི་ཐོབ་ཐང་དང་སྡིང་ཆ་གོང་མཐོར་གཏོང་བཞིན་ཡོད་པ་དང་། འགྲོ་བ་མིའི་རིགས་མཉམ་འབྲེལ་གྱི་ཐོག་ནས་འཚོ་དགོས་པའི་གནས་ལུགས་བསྟན་གྱི་ཡོད། མིའི་འཇིག་རྟེན་ཡར་རྒྱས་ཚགས་ཚུད་དང་། གཅིག་ཕན་གཅིག་གྲོགས་ཀྱི་ཐབས་ལམ་བཟང་ཤོས་སམ་གཅིག་པོ་དེ་ཡིན་པ་ཡང་གསལ་སྟོན་བྱེད་ཀྱི་ཡོད། མདོར་ན། ཨོ་ལིམ་པིག་རྩེད་འགྲན་འདི་ནི་འགྲོ་བ་མིའི་རིགས་སྤྱི་ཚོགས་ཀྱི་བདེ་ཐབས་དང་འཛམ་གླིང་ཞི་བདེ། གོ་ལའི་འབྱུང་འགྱུར་བཅས་ལ་ལེགས་སྐྱེས་འབུལ་ཐུབ་པར་ནུས་པ་ལྡན་པའི་ཐབས་ལམ་གཅིག་པོ་དེ་ཡིན་པ་ལས་མི་ཁ་ཤས་ཀྱི་ཐོབ་ཐང་དང་འབྲེལ་བའི་རྒྱལ་སྤྱིའི་རྩེད་རིགས་ཤིག་གཏན་ནས་མིན།
བཞི་པ། ༢༠༠༨ ལོའི་རྒྱལ་སྤྱིའི་ཨོ་ལིམ་པིག་རྩེད་འགྲན་གྱི་དོན་དངོས།
༢༠༠༨ ལོའི་རྒྱལ་སྤྱིའི་ཨོ་ལིམ་པིག་རྩེད་འགྲན་གྱི་མགྲོན་བདག་རྒྱ་ནག་པེ་ཅིན་གཞུང་གིས་བྱས་པའི་འོག་ནས་སྔར་རྒྱུན་བཞིན་པེ་ཅིང་དུ་བསྐོང་འཚོགས་ཐུབ་པ་བྱུང་ཡོད། རྒྱ་ནག་མི་མང་ལ་སྨྲ་བརྗོད་ཀྱི་རང་དབང་མེད་ཅེས་བརྗོད་བཞིན་ཡོད་ཀྱང་རྒྱ་ནག་མི་མང་གི་ཨོ་ལིམ་པིག་རྩེད་འགྲན་འཚོགས་རྒྱུར་དགའ་བསུ་ཞུས་ཡོད། དེ་ནི་ཁོ་ཚོས་སྨྲ་བརྗོད་རང་དབང་གི་ཐོག་ནས་དགའ་བསུ་ཞུས་པ་ཞིག་ཡིན། སྐབས་དེའི་རྒྱལ་སྤྱིའི་ཨོ་ལིམ་པིག་རྩེད་འགྲན་འདི་རྒྱ་ནག་ཡར་རྒྱས་སུ་ཕྱོགས་པ་དང་རྒྱ་ནག་ཏུ་འགྲོ་བ་མིའི་ཐོབ་ཐང་ཡར་རྒྱས་སུ་གཏོང་བའི་གོ་སྐབས་ལྟ་བུར་བརྩིས་ཏེ་འཛམ་གླིང་རྒྱལ་སྤྱིའི་ངོས་ནས་ཕྱིེར་བསྣུར་བྱས་མེད་པར་བརྩི་བཞིན་ཡོད་ཀྱང་དོན་དངོས་གོ་ལ་གཅིག་འགྱུར་དང་མིའི་རིགས་མཐུན་ལམ་སྔར་ལྷག་ཡོང་དགོས་ན་རྩེད་འགྲན་ཚོགས་ཡུལ་དེ་རྒྱ་ནག་ལས་ལྷག་པ་ཞིག་མེད་པ་ཡང་དོན་དངོས་ཡིན། དེར་བརྟེན་རྒྱ་ནག་གཞུང་གི་བློ་སྟོབས་ཆེན་པོས་མིའི་རིགས་མཉམ་གནས་ཀྱི་ཆེད་ལ་མདུན་སྐྱོད་བྱས་ཡོད། དེའི་རྒྱབ་ཕྱོགས་ན་རྒྱལ་ཁབ་ཁ་ཤས་དང་མི་རིགས་ཁ་ཤས་ཀྱི་ཡོད་ཚད་སྐྱོན་ཏུ་བཟུང་ནས་བཤད་ཁུལ་བྱས་ཀྱང་ཁོ་ཚོར་བདེན་པ་མེད་པ་རང་བཞིན་གྱི་སྒྲུབ་ཡོད་པ་ནི་ཨོ་ལིམ་པིག་རྒྱལ་ཁའི་ངང་བསྐོང་ཚོགས་ཐུབ་པ་དེ་གསལ་བཤད་བྱས་ཡོད།
ལྔ་པ། རྩེད་འགྲན་དང་འགྲོ་བ་མིའི་ཐོབ་ཐང༌།
རྒྱལ་སྤྱིའི་ཨོ་ལིམ་པིག་རྩེད་འགྲན་ཐོག་མ་མགོ་བཙུགས་པ་ནས་བཟུང༌། ལོ་རྒྱུས་ཐོག་རྒྱལ་སྤྱིའི་ཨོ་ལིམ་པིག་རྩེད་འགྲན་ལ་གུས་བརྩི་དང་ཆེ་མཐོང་མཚོན་ཆེད་དུ་ རྒྱལ་སྤྱིའི་སྒེར་གཉེར་བཟོ་ཚོང་ལས་ཁང་ཁག་གིས་སྒོར་དུང་ཕྱུར་མང་པོ་འགྲོ་གྲོན་བཏང་ནས་ཨོ་ལིམ་ཕིཀ་རྩེད་འགྲན་ལ་སྦྱིན་བདག་བྱས་ཡོད། དེའི་ཤུགས་རྐྱེན་ལས་རྒྱལ་ཁབ་ཕན་ཚུན་དབར་གྱི་དམག་འཁྲུག་མཚམས་བཞག་པ་བྱུང་མྱོང་ཡོད་ལ། འཛམ་གླིང་དམག་འཁྲུག་མ་བྱུང་བ་ལ་བརྟེན་ནས་རྒྱལ་སྤྱིའི་ཨོ་ལིམ་པིག་རྩེད་འགྲན་མུ་མཐུད་མདུན་ནས་མདུན་དུ་བསྐྱོད་ཐུབ་པ་བྱུང་ཡོད། དེང་སྐབས་ཚོགས་པ་རེ་གཉིས་དང་མི་སྣ་ཁ་ཤས་ཀྱི་འགྲོ་བ་མིའི་ཐོབ་ཐང་ཞེས་མི་ཁ་ཤས་སམ་མི་གཅིག་གི་རང་འདོད་ཀྱི་བསམ་པ་དང་ཨོ་རྩེད་བར་འབྲེལ་བ་དམ་ཟབ་དང་འབྲེལ་བ་དེ་རྩེགས་ཆེར་འཛིན་དགོས་པའི་མུན་ནག་འདའ་འཕེལ་ལྟ་བུ་ཞིག་ཤོད་བཞིན་ཡོད་ཀྱང་མི་མང་བའམ་མིའི་རིགས་སྤྱི་ཡོངས་ལ་ཐུགས་བསམ་བཞེས་མཁན་ཚོས་རྩེད་རིགས་འདི་དང་རྒྱལ་ཁབ་ཀྱི་འཛིན་སྐྱོང་ལམ་ལུགས་སམ་གཞུང་འབྲེལ་གྱི་གནད་དོན་བར་འབྲེལ་བ་མཐུད་ཀྱི་མེད་པ་སྟེ། ཨོ་ལིམ་པིག་འཛིན་སྐྱོང་ལྷན་ཚོགས་ཀྱི་གཙོ་འཛིན་གཞོན་པ་བྷེ་ཁེས་ཨོ་ལིམ་པིག་རྩེད་འགྲན་ནི་ཆབ་སྲིད་ལ་འབྲེལ་བ་མེད། རྒྱལ་སྤྱིའི་ཨོ་ལིམ་པིག་འཛིན་སྐྱོང་ལྷན་ཚོགས་གཞུང་འབྲེལ་མིན་པའི་སྒྲིག་འཛུགས་ཤིག་ཡིན། སྒྲིག་འཛུགས་འདིས་དུས་དང་རྣམ་པ་ཀུན་ཏུ་ཆབ་སྲིད་ཐོག་ཏུ་བཏང་སྙོམས་ཀྱི་ལངས་ཕྱོགས་འཛིན་གྱི་ཡོད་ཅེས་བཤད། རྒྱལ་སྤྱིའི་ཨོ་ལིམ་པིག་འཛིན་སྐྱོང་ལྷན་ཚོགས་ཀྱི་ལས་སྣེ་གཞན་ཚོས་ཆབ་སྲིད་ཀྱི་གནད་དོན་ལ་འབྲེལ་བ་མཐུད་ན་ཨོ་ལིམ་པིག་རྩེད་འགྲན་འཚོགས་མི་ཐུབ་པར་རྩ་བརླག་འགྲོ་ངེས་རེད་ཅེས་གསུངས་ཡོད། བཀའ་མོལ་དེ་དག་ཐོག་ནས་ཨོ་རྩེད་ཆབ་སྲིད་ཀྱི་ལག་ཆར་འགྱུར་འདོད་ཆེ་བའི་བསམ་ངན་དེ་དག་ནམ་ཡང་ལམ་ལྷོངས་ཡོང་རྒྱུ་མིན་པ་གསལ་པོ་ཆགས་ཡོད། དེའི་ཐོག་ནས་ང་ཚོས་འགྲོ་བ་མིའི་རིགས་མཉམ་གནས་ཀྱི་དགོས་ཕན་དང་ཀུན་ཕན་བདེ་རྩའི་ཕྱོགས་ལ་བསམ་གཞིགས་དང་བརྩི་བཀུར་བྱ་དགོས་ན་རྒྱལ་སྤྱིའི་ཨོ་ལིམ་པིག་རྩེད་འགྲན་གྱི་སྡིང་ཆ་འདི་བཞིན་དཔལ་འབྱོར་ཡར་ཐོན་ཅན་དང་མི་འབོར་མང་བའི་རྒྱལ་ཁབ་ཅིག་ལ་སྦྱིན་བདག་བྱ་དགོས་པའི་རེ་སྐུལ་ཞུ་རྒྱུ་ནི་གནད་ཀྱི་དམ་པའོ།
དྲུག་པ། མཐའ་མའི་མཇུག་སྡོམ།
རྒྱལ་སྤྱིའི་ཨོ་ལིམ་པིག་རྩེད་འགྲན་ལ་མགྲོན་བདག་བྱེད་རྒྱུ་ནི་གཟི་བརྗིད་དང་སྙན་གྲགས་ཡིན་པ་མ་ཟད་འགྲོ་བ་མིའི་རིགས་མཉམ་གནས་གོང་འཕེལ་ཡོང་རྒྱུར་མདུན་བསྐྱོད་བྱས་པ་ཞིག་ལགས་ན་། ཨོ་ལིམ་པིག་གི་རྩེད་འགྲན་དེ་ཉིད་ཆབ་སྲིད་དང་འབྲེལ་བ་མེད་ཅིང་། དེ་བས་འགྲོ་བ་མིའི་ཐོབ་ཐང་ཞེས་གང་ཟག་སྒེར་ལ་དགོས་མཁོའི་ཆ་རྐྱེན་དུ་མ་གྱུར་བར་སྤྱི་སྙོམས་དང་། ཀུན་ཕན་གཞི་རྩར་བཟུང་བའི་རྒྱལ་སྤྱིའི་རྩེད་རིགས་ཤིག་ཏུ་ངོས་འཛིན་དགོས་རྒྱུ་ནི་ཀླད་པ་ཡོད་པའི་ཨ་མིའི་བུའི་རྣམ་དཔྱོད་ཅིག་ཡིན་པར་སོང་། ༢༠༢༢ ལོའི་དགུན་དུས་ཀྱི་ཨོ་ལིམ་པིག་འགྲན་ཚོགས་དེ་རྒྱ་ནག་ཏུ་འཚོགས་རྒྱུར་གང་ཟག་རེ་གཉིས་ཀྱི་ཐོབ་ཐང་རྡོག་རོལ་གཏོང་བཞིན་པའི་སྐད་འབོད་འོག་ནས་གནོད་སྐྱེལ་བྱེད་ཐབས་སྤྱོད་པ་ནི་དོན་དངོས་ཐོག་ནས་འགྲོ་མིའི་རིགས་སྤྱིའི་ཐུན་མོང་གི་སེམས་ཁམས་ལ་གནོད་སྐྱོན་གཏོང་བའི་བྱ་སྤྱོད་ཅིག་ལས་མ་འདས། ང་བོད་པ་ཡིན་པས་རྒྱ་ནག་ལ་དགའ་བ་མིན་ཡང་དོན་དངོས་ཀྱི་གནས་སྟངས་འོག་ནས་བོད་མིའི་སྒྲིག་འཛུགས་ཀྱི་ཨོ་ལིམ་པིག་རྒྱ་ནག་ཏུ་འཚོགས་རྒྱུར་འགག་བྱ་གང་ཡང་མེད་པའི་ལྟ་གྲུབ་དེར་མོས་མཐུན་དང་། ལྟ་གྲུབ་དེའི་འོག་ནས་རྒྱ་བོད་བར་ལ་འབྲེལ་ལམ་གསར་དུ་འགོ་ཚུགས་ཐུབ་པའི་ཡིད་ཆེས་བྱེད་ཀྱི་ཡོད།
དཔྱད་རྩོམ་ལ་རིན་ཐང་འདུག་། འོན་ཀྱང་རྒྱ་ནག་གི་འགྲོ་བ་མིའི་ཐོབ་ཐང་ལ་རྩི་མེད་རྡོག་གཏོང་བཞིན་པ་ལ་སྐྱོན་བརྗོད་ཀྱི་ངོ་རྒོལ་བྱས་པ་ཙམ་གྱི་ཨོ་ལེམ་པིག་རྩེད་མགྲན་གྱི་འགྲོ་བ་མིའི་ཐོབ་ཐང་ལ་གནོད་འདུག་ཟེར་བའི་གོ་བ་བླང་ན་འགྲིག་གི་ཨ་ཡོད་། རྒྱ་ནག་གི་གྲངས་ཉུང་མི་རིགས་ཐོག་འཛིན་པའི་སྲིད་ཇུས་དེ་འགྲོ་བ་མིའི་ཐོབ་ཐང་དང་འགལ་བའི་བྱ་སྤྱོད་ལ་ངོས་འཛིན་གྱི་འཛམ་གླིང་གི་ས་ཕྱོགས་ག་ས་ག་ནས་རྒྱ་ནག་ལ་ངོ་རྒོལ་བྱེད་བཞིན་པ་དེ་མང་གཙོའི་ལམ་ལུགས་སམ་མང་གཙོའི་རང་དབང་དང་མཐུན་པ་ཞིག་ཡིན་པ་ལས་ཨོ་ལེམ་པིག་རྩེད་མགྲན་ལ་ངོ་རྒོལ་ཡིན་པ་ལ་ནམ་ཡང་ངོས་འཛིན་བྱ་མི་ཉན་།