རྒྱ་སྟོན་བུ་དར་རྒྱས།
དུས་རབས་ད་ལྟའི་རྣམ་འདྲེན་སྟོན་པ་འམ།།
ཤཱཀྱའི་ཡོན་ཏན་མངའ་བའི་བདག་ཉིད་མཆོག།
རྒ་བའི་ཚེ་འདིར་དམོད་པ་འདེབས་ཕོད་པའི།།
བསྟན་དགྲའི་ལྟ་བ་ཅན་ནི་བོད་ལ་མང་།།
ཕ་ས་སྨུག་པོའི་མཐིལ་དུ་བོད་རྣམས་འཕྲི།།
སྡང་ཕྱོགས་དགྲ་བོའི་རིགས་ནི་ཉིན་ལྟར་འཕེལ།།
བྱེས་སུ་གྲམ་པའི་བོད་མིང་སྒེར་གཙོ་བ།།
དབྱེན་སྦྱོར་ཀུ་ཅོ་ཅན་ནི་བོད་ལ་མང་།།
རིས་མེད་ཆོས་དང་ཆོལ་ཁ་བཙན་འོག་ལྷུང་།།
རང་དབང་ཡུལ་ལ་གྱར་བའི་གདོང་དམར་བ།།
ལས་དབང་གཅིག་ཀྱང་ལ་ཞེན་ལོག་པ་ཡིས།།
ཁྲམ་པར་རེ་ལྟོས་ཅན་ནི་བོད་ལ་མང་།།
གནའ་བོའི་བོན་གྱི་དྲིན་ལ་གོ་ལོག་ཞིང་།།
གཞན་བརྟེན་གཤིས་སུ་གྲུབ་བའི་བླ་སློབ་འབུམ།།
གདོན་གཟུཌ་བོན་བསྟན་བསྣུབས་ཞེས་འདོན་གོམས་པ།།
ནེ་ཙོའི་རང་སྣང་ཅན་ནི་བོད་ལ་མང་།།
འདི་ཕྱིའི་ཚེ་རབས་སྟོང་ཉིད་ཐར་པའི་ལམ།།
སྐད་གཅིག་མི་ལྷོད་ཚེ་གང་ངག་ནས་ཟླས།།
ལྷ་ཀླུའི་ཡུལ་དང་དམྱལ་ཁམས་མཁྱེན་པས་གཟིགས།།
རྫུན་རྐྱལ་རྟོག་པ་ཅན་ནི་བོད་ལ་མང་།།
རིགས་ཀྱི་སྲོག་ནི་ཕ་སྐད་རག་ལས་ཞེས།།
སྙན་པའི་སློབ་གསོ་བཅོས་མའི་སྐད་འཕང་མཐོ།།
གསར་སྐྱེས་དག་ལ་ལེགས་སྤེལ་ཐབས་ཟད་པའི།།
བཟང་རྫུན་ཤེས་ཡོན་ཅན་ནི་བོད་ལ་མང་།།
བསགས་པའི་རྒྱུ་ནོར་ངོམ་གྱིས་མི་ཚིམས་ཤིང་།།
ལོངས་སུ་སྤྱོད་ལ་ཚེ་ལོ་སྟོང་གིས་བྲིན།།
མནའ་འགམས་ཕྱུག་བདག་ཉམས་ཆེན་ཚོན་པོ་སྟེ།།
སྤྱི་སྨན་སེར་སྣ་ཅན་ནི་བོད་ལ་མང་།།
སྙིགས་དུས་མཐའ་ལ་བོད་ཙམ་འབོད་པ་ལས།།
བགྲེས་སོང་དྲན་ཤེས་བོར་ཞིང་དུར་སར་ཆས།།
གཞོན་ནུ་གཞན་དབང་སྟབས་ཀྱིས་སྦུམ་མའི་བུ།།
རིགས་འདྲེས་ཚུལ་མིན་ཅན་ནི་བོད་ལ་མང་།།
རང་དབང་རྨང་ནས་བཅོམས་པའི་ཁ་བ་རི།།
རང་ས་དགྲ་ལ་ཤོར་ཏེ་རྒྱལ་མཚམས་བརྒལ།།
རང་རིགས་འབུམ་རམས་འཛིན་པ་བརྒྱ་ཕྲག་ནས།།
རང་ཡིག་རྨོངས་པ་ཅན་ནི་བོད་ལ་མང་།།
བོད་དུངས་ཀ་མད་བསྐོལ་བའི་གྲལ་མཐའི་བུའི།།
ཡ་ཁོག་སྙིང་ཁར་ཟུག་གཟེར་ལང་སྟངས་ཤིག།
མ་གསང་སྙིང་གཏམ་དྲང་མོར་མི་འཐད་མཁན།།
བརྩིས་ན་གྲངས་ཀྱིས་མི་ལོང་བོད་ལ་མང་།།
08/01/2022