གཞུང་པ་ཚེ་དབང་བསོད་ནམས།
སྤྱི་ལོ་ ༡༩༥༩ ལོར་རྒྱ་མིའི་བོད་ལ་བཙན་འཛུལ་གྱིས་༸གོང་ས་མཆོག་གི་དབུ་འཁྲིད་འོག་ཁོང་གི་བཀའ་ཤག་ལྷན་རྒྱས་དང་། བོད་མི་ཁྲི་ཚོ་བརྒྱད་ལྷག་ཙམ་ཞིག་རྒྱ་གར་འཕགས་པའི་ཡུལ་དུ་༸གོང་ས་མཆོག་གི་ཕེབས་རྗེས་སུ་འབྱོར་ནས་མ་འོངས་བོད་གསར་པའི་འཛུགས་བསྐྲུན་གྱི་ལས་གཞི་དང་པོ་མ་འོངས་བོད་ཀྱི་ཆབ་སྲིད་ལམ་ལུགས་དེ་དེང་རབས་རྒྱལ་སྤྱིའི་ཆབ་སྲིད་ལམ་ལུགས་དང་མཐུན་པའི་མང་གཙོ་ཅན་དུ་བསྒྱུར་ནས་སྤྱི་ཚོགས་ཀྱི་བརྟན་ལྷིང་དང་། ཆོལ་གསུམ་བོད་མིའི་ཆིག་སྒྲིལ་ལ་འགན་འཁུར་ནས་ཆོལ་གསུམ་ཆོས་ལུགས་དང་བཅས་པའི་སྐུ་ཚབ་མི་སྣ་ལས་སྒྲུབ་པའི་བོད་མི་མང་གི་སྐུ་ཚབ་སྤྱི་འཐུས་བསྐོ་བཞག་དང་འབྲེལ་བོད་དོན་བདེན་མཐའ་སེལ་སླད་བཙན་བྱོལ་གཞུང་གསར་འཛུགས་ཀྱིས་བཙན་བྱོལ་བོད་མིའི་འཚོ་བའི་མདུན་ལམ་ཆེད་བཟོ་གཞིས་ཁག་གསར་འཛུགས་དང་འབྲེལ་སློབ་གྲ་དང་།
ཆོས་སྒར་ཁག རྒན་གསོ་ཁང་སོགས་གང་ལ་ཅི་དགོས་ཀྱི་སྒྲིག་འཛུགས་གསར་འཛུགས་འོག་བཙན་བྱོལ་བོད་མིའི་འཚོ་བའི་མདུན་ལམ་ལ་ཚད་མཐོའི་བཀོད་སྒྲིག་གིས་སོ་ནམ་གཞིས་ཆགས་ཁག་བསྲ་བརྟན་དང་། རྒྱུན་གནས་ཐུབ་པའི་ཆེད་གནས་ཡུལ་རྒྱ་གར་རྒྱལ་ཁབ་ཀྱི་རྩ་ཁྲིམས་འོག་མངའ་སྡེ་སོ་སོའི་ཁྲིམས་ལུགས་འོག་དེབ་སྐྱེལ་ཞུས་ཏེ་མི་མང་མཉམ་འབྲེལ་བཙུགས་ནས་ས་གནས་གཞིས་མི་རང་ལོ་བཅོ་བརྒྱད་ཡན་དེའི་ཚོགས་མི་མ་ཤེར་བདག་པོ་ཆགས་ནས་མཉམ་འབྲེལ་གྱིས་ལས་དོན་ཚགས་ཚུད་དང་ལས་དོན་བཀོད་སྒྲིག་བཏང་འཛིན་གནང་མཁན་མཉམ་འབྲེལ་བལྟ་རྟོགས་ཚོགས་མི་འམ་མཉམ་འབྲེལ་འཐུས་མི་ཤེར་བདག་མང་ཚོགས་ནས་འོས་བསྡུའི་ལམ་ནས་བསྐོ་བཞག་དགོས་པ་དང་། འགན་འཛིན་ལྷན་ཚོགས་ ( Board of Directors ) རང་ཁུངས་ནས་ཚོགས་གཙོ་དང་ཚོགས་གཞོན་འོས་འདེམས་དགོས་པ་དང་། མཉམ་འབྲེལ་འགན་འཛིན་ལྷན་ཚོགས་ཀྱི་གྲོས་ཆོད་ལམ་སྟོན་འོག་མཉམ་འབྲེལ་གྱི་སྤྱི་ཁྱབ་འགན་འཛིན་གྱི་འགན་འཁུར་འོག་མཉམ་འབྲེལ་གྱི་ལས་བྱེད་རྣམས་ནས་ཉིན་རེ་ཉིན་རེའི་སོ་སོའི་ལས་དོན་སྒྲུབ་དགོས་པའི་ལམ་ལུགས་སམ་ཁྲིམས་སྒྲིག་ལྟར་འགྲོ་དགོས་པ་དང་། ས་གནས་མི་མང་གིས་འཚོ་བའི་ལས་གཞི་དང་འབྲེལ་བའི་དགོས་མཁོ་ཁག་མཉམ་འབྲེལ་ནས་མཁོ་སྒྲུབ་གནང་དགོས་པ་དང་མི་མང་ནས་མཉམ་འབྲེལ་གྱིས་མཁོ་སྒྲུབ་ཟིན་པའི་དངོས་ཟོག་རྣམས་དུས་ཐོག་བེད་སྤྱོད་གནང་དགོས་པ་དང་། ས་ཞིང་འདེབས་ལས་འཁྲུལ་རྨོས་དུས་ཐོག་ཚར་དགོས་པ་དང་སོན་དང་ལུད་དུས་ཐོག་བགོ་སྤྲོད་དགོས་པ་དང་གཞིས་མིའི་སྟོན་འབྲས་ཨ་ཤོམ་སྒེར་གྱི་ཚོང་པ་ཁག་ལ་ཕམ་ཚོང་མ་ཤོར་ཆེད་ས་གནས་མཉམ་འབྲེལ་ནས་དུས་ཐོག་ཉོ་ཚོང་མཐུན་བསྒྱུར་གནང་དགོས་པ་སོགས་མཉམ་འབྲེལ་ནས་ས་གནས་གཞིས་མིའི་འཚོ་བའི་ལས་གཞི་ཁག་ལ་འགན་འཁུར་ནས་གཞིས་ཆགས་བསྲ་བརྟན་དང་རྒྱུན་གནས་ཐུབ་དགོས་པ་ནི་གལ་ཆེན་དོན་ཆེན་ཡིན་པའི་ངོས་འཛིན་ཞུ་གི་ཡོད་ལ་། གཞིས་ཆགས་བསྲ་བརྟན་དང་རྒྱུན་གནས་ཐུབ་དགོས་ན་གཞིས་མི་ཁྱིམ་ཚང་སོ་སོའི་ས་ཞིང་འདེབས་ལས་བྱ་དགོས་པ་ལས་ས་ཞིང་སྟོང་པ་བཞག་ནས་གཞིས་ཆགས་བསྲ་བརྟན་དང་རྒྱུན་གནས་ཟེར་བའི་ཐ་སྙད་དེ་ཁ་སྒྲུང་ཙམ་ལས་དོན་དངོས་ལག་ལེན་དུ་ནམ་ཡང་འཁེལ་མི་ཐུབ་པ་དང་། དབུས་བོད་མིའི་སྒྲིག་འཛུགས་དབུས་ས་གཉིས་ནས་ས་ཞིང་འདེབས་ལས་མ་བྱས་པར་ས་སྟོང་དུ་འཕྲོ་ཅན་དུ་བཞག་པ་འདི་དག་ལ་ལམ་སྟོན་བཀོད་ཁྱབ་ནན་པོ་གནང་མ་ཐུབ་ཚེ་གཞིས་ཆགས་ནང་ས་ཞིང་འདེབས་ལས་བྱེད་མཁན་དེ་ལོ་རེ་ནས་ལོ་རེ་བཞིན་ཉུང་དུ་ཕྱིན་ནས་ནམ་ཞིག་གཞིས་ཆགས་ཁག་རྒན་གསོ་ཁང་མི་ཆགས་པའི་ངེས་པ་མེད་ན་དབུས་བོད་མི་སྒྲིག་འཛུགས་དབུས་ས་གཉིས་ནས་གཞིས་ཆགས་བསྲ་བརྟན་དང་རྒྱུན་གནས་ཐུབ་པའི་ཆེད་གཞིས་མིའི་དགོས་མཁོ་རྣམས་མཁོ་སྒྲུབ་དང་ཁྱིམ་ཚང་སོོ་སོར་ཡོང་འབབ་ཅན་གྱི་ལས་གཞི་གསར་གཏོད་སྤེལ་ནས་ན་གཞོན་ཚོ་གཞིས་ཆགས་ནང་རྒྱུན་གནས་ཐུབ་པའི་འཁོར་ཡུག་བསྐྲུན་དགོས་པ་དང་། ས་ཞིང་འདེབས་ལས་མ་ཐུབ་པའི་ཞིང་ས་སྟོང་པ་བཞག་མཁན་གྱི་ས་ཞིང་ཕྱི་བསྡུ་གནང་ནས་ས་ཞིང་མེད་མཁན་ཚོར་སྤྲོད་དགོས་པ་དང་ཁང་པ་རང་འཇགས་བཞག་ནས་ཁང་གླའི་དོད་དབུས་བོད་མིའི་སྒྲིག་འཛུགས་ནང་སྲིད་ལྷན་ཁང་ལ་འབུལ་དགོས་པའི་ཁྲིམས་སྒྲིག་ས་ཁང་གི་སྒྲིག་གཞི་ལ་ཁྲིམས་བཟོ་སྤྱི་འཐུས་གྲོས་ཚོགས་ནས་བསྐྱར་བཅོས་གནང་ནས་གཏན་འབེབས་གནང་དགོས་པ་ནི་གཞིས་ཆགས་བསྲ་བརྟན་དང་རྒྱུན་གནས་ཐུབ་པའི་ཐབས་ལམ་བཟང་ཤོས་དེ་ཡིན་པ་དང་། སློབ་གྲ་དང་རྒན་གསོ་ཁང་སོགས་ཟླ་སྒྲིལ་ཐུབ་ན་ཡང་གཞིས་ཆགས་ཟླ་སྒྲིལ་གཏོང་རྒྱུ་དེ་ལས་སླ་པོ་ཞིག་ཡིན་པ་ནམ་ཡང་ངོས་འཛིན་ཞུ་དཀའ་བ་ནི་གཞིས་མི་ཚོའི་གཞིས་ཆགས་ནང་ལོ་མང་རིང་དཀའ་ལས་རྒྱབ་ནས་སོ་སོའི་སྒོ་རའི་ནང་ཁང་པ་གསར་རྒྱག་དང་འབྲེལ་བའི་འཛུགས་བསྐྲུན་གྱི་ལས་གཞི་མང་པོ་སྤེལ་ཡོད་པ་དེ་དག་བཞག་ནས་གཞིས་ཆགས་གཞན་ལ་འགྲོ་རྒྱུ་དེ་ཁག་པོ་ཆགས་སྲིད་པ་དང་། ཁྱིམ་ཚང་གཅིག་གི་ནང་མི་གཅིག་ལས་མེད་ན་ཡང་ས་ཞིང་འདེབས་ལས་གནང་གི་ཡོད་ཚེ་ས་ཁང་རང་འཇགས་བཞག་ནས་ས་གླ་དང་ཁང་གླའི་དོད་དབུས་བོད་མིའི་སྒྲིག་འཛུགས་ལ་འབུལ་དགོས་པའི་ལམ་ལུགས་མ་བཟོས་པར་ནང་མི་གཅིག་ཕྱི་ལ་ཕྱིན་ན་ས་ཁང་བསྡུ་ཀྱང་དང་ནང་མི་གཉིས་ཕྱི་ལ་ཕྱིན་ན་ས་ཁང་བསྡུ་ཀྱང་བྱ་རྒྱུའི་ལམ་ལུགས་འདིའི་ནམ་ཞིག་གཞིས་ཆགས་སྟོང་པ་མི་ཆགས་པའི་ངེས་པ་མེད་ན་ད་ལྟ་ནས་འབྲེལ་ཡོད་ནང་སྲིད་ལྷན་ཁང་ནས་གཞིས་ཆགས་བསྲ་བརྟན་དང་རྒྱུན་གནས་ཐུབ་པའི་ལས་གཞིའི་ཐོག་འཆར་འགོད་ཁྱད་མཁས་མི་སྣའི་ཞིབ་འཇུག་ཚོགས་ཆུང་བཙུགས་ནས་ཉམས་ཞིབ་གནང་མ་ཐུབ་ཚེ་ནམ་ཞིག་ནམ་མ་ལངས་གོང་དུ་ས་གསལ་ཟེར་བའི་དུས་ཚོད་ཤར་མི་སྲིད་པ་མིན་ན་གཞིས་ཆགས་བསྲ་བརྟན་དང་རྒྱུན་གནས་ཟེར་བའི་སྐོར་ལ་དཔྱད་པའི་གཏམ་འདི་བཞིན་བཙན་བྱོལ་བོད་མིའི་བཅའ་ཁྲིམས་དོན་ཚན་བཅུ་གསུམ་ནང་གསལ་བའི་བོད་ཀྱི་ཡུལ་མིའི་ལས་འགན་སྒྲུབ་ནས་གང་ཟག་སྒེར་གྱི་བསམ་ཚུལ་གླེང་པ་འདིའི་ཀྱང་གཞིས་ཆགས་བསྲ་བརྟན་དང་རྒྱུན་གནས་ཐུབ་པའི་ལས་འཆར་ཁག་ལ་ཉི་མ་མེ་གྲོགས་དང་ཆར་པ་ཆུ་གྲོགས་ཐུབ་པའི་ཀུན་སློང་བཟང་པོའི་རྒྱན་སྟེ་རེ་ཞིག་འདིར་འཇུག་བསྡུས་པའོ་།
གཞུང་པས་། ༢༠༢༢ / ༠༡ / ༡༥