སངས་རྒྱས་ལ་ཕྱག་འཚལ་ལོ། །
ལོ་གསུམ་མིག་འཕྲུལ་བཞིན་དུ་ཡུད་ཀྱིས་ཐལ། །
ཏོག་དབྱིབས་ཁོ་ནས་ལོ་གཉིས་ཁྱུར་མིད་བྱས། །
མདོར་ན་ཇ་ཡུན་ཙམ་ཡང་མ་འགོར་བར། །
སྔར་གྱི་གནས་དེར་ཡང་བསྐྱར་ཐེངས་གཅིག་བསླེབས། །
ཐྲ་སིས（Tasmania）ཡུལ་ལ་འགྱུར་ལྡོག་ཆེར་མི་སྣང་། །
རི་བོ་ཝོའུ་ལན་ཁྲན་（Mount Wellington）ཡང་སྔར་བཞིན་ཏེ། །
ཆུ་དང་སྤང་ལྗོངས་ནགས་ཀྱི་ལྗོན་པ་ཀུན། །
ཤིན་ཏུ་བབ་རླིངས་བརྟན་གསུམ་ལྡན་པར་མཆིས། །
ས་ལ་མན་གྷ(Salamanca Market)འི་སྤེན་པའི་ཁྲོམ་འདུས་ནས། །
ཧོ་བྷ(Hobart)འི་དཀྱིལ་གྱི་ཉི་མའི་ཁྲོམ་རའི་བར། །
སྦྲང་རྩི་ཚོད་མ་སྲན་འདག་པག་ལེབ་སོགས། །
སླད་མེད་ཐོན་རྫས་ཡོད་ཚད་སྔར་བཞིན་གདའ། །
འོན་ཀྱང་ཆ་རྒྱུས་ཟབ་པའི་ཁོར་ཡུག་དེར། །
འགྱུར་བའི་ཆོས་ཉིད་འགའ་ཡང་མངོན་པ་སྟེ། །
གནས་པོ་ཨ་ལན་དགའ་མོས་བསྐྱུར་བ་མཐོང་། །
ད་ལྟ་ཁོ་རང་གཅིག་པུར་བསྡད་པ་མཐོང་། །
གྲོགས་མོ་ཁོ་ཁོ་མི་སེར་ཆགས་པ་མཐོང་། །
མ་ཟད་ཆང་ས་རྒྱག་གྲབ་ཡོད་པ་མཐོང་། །
སློབ་མ་ཧཱ་ན་མཛེས་སུ་ཕྱིན་པ་མཐོང་། །
མ་ཟད་བློ་སྤོབས་ཆེ་རུ་སོང་བ་མཐོང་། །
ད་དུང་སྔར་ཡོད་ཚོང་ཁང་ཟ་ཁང་འགའ། །
ངོ་བོ་རྣམ་པ་ཅི་རིགས་འགྱུར་བ་མཐོང་། །
ཕིས་ཟ་ཞིམ་པོ་ཡོད་པའི་ཟ་ཁང་ཞིག །
སྒོ་ཐེལ་བརྒྱབ་ནས་བཙོང་རྒྱུར་བཞག་པ་མཐོང་། །
ཁོ་བོ་ལོ་གཅིག་དེ་རུ་བསྡད་པའི་སྐབས། །
གྲུ་ཁ་གན་ནས་རྒྱང་བལྟས་བྱས་པ་ཡོད། །
མཚོ་འགྲམ་དེ་ནས་འཚིག་ཇ་འཐུང་བ་ཡོད། །
ཚོང་འདུས་འདི་ནས་ཚོད་མ་ཉོས་པ་ཡོད། །
ནགས་ཀྱི་གསེབ་ཏུ་ཏིང་འཛིན་བསྒོམས་པ་ཡོད། །
འབབ་ཆུའི་བརྒྱུད་ནས་མགུར་ཆུང་བླངས་པ་ཡོད། །
ཕྱི་མ་རེད་བཞིན་ནགས་ཀྱི་ལམ་ཕྲན་ནས། །
ཆོས་དབྱིངས་མཛོད་ཀྱི་རྩ་བ་བཏོན་པ་ཡོད། །
སྐབས་རེ་རོང་ཟོམ་དྲན་བཞིན་གསོལ་བ་བཏབ། །
ཐེངས་རེ་གནུབས་ཆེན་དྲན་བཞིན་གདུང་བས་བོས། །
དེ་མིན་འགྲོ་འཆག་ཉལ་འདུག་མང་ཞིག་ལ། །
སྨྲ་བའི་སེང་གེའི་རྣལ་འབྱོར་བསྒོམས་པ་ཡོད། །
ཁྱད་པར་ཝོའུ་ལན་ཁྲན་གྱི་རི་མགུལ་ནས། །
བསམ་གཏན་རྒན་པོ་ཞིག་དང་ཐོལ་གྱིས་མཇལ། །
དམ་ཆོས་རིན་ཆེན་ཐེག་མཆོག་སྟེགས་བུའི་མདོ། །
ལྷག་ཆད་ནོར་གསུམ་བྲལ་བར་བོད་དུ་བསྒྱུར། །
ཁ་བ་མཐོང་ནས་ཕ་ཡུལ་དྲན་གླུ་བླངས། །
མཛེས་མ་དྲན་ནས་སྙན་ངག་ཐ་ཚིག་བྲིས། །
དེ་སོགས་རྟོག་པའི་སྤྲོ་བསྡུ་སྣ་ཚོགས་ཀྱང་། །
ཟླ་བ་བཅུ་གཉིས་དེ་ཡི་ཆ་ཤས་ཡིན། །
མི་ཡི་སྔུན་སོར་དམ་བཅའ་ཤོར་བ་གཅིག །
རང་གི་སེམས་སུ་དམ་བཅའ་བཞག་པ་གཉིས། །
འགལ་འདུའི་སྤྱི་ཚོགས་གདོང་གིས་བསུས་པ་གསུམ། །
འདི་ནས་ཡང་བསྐྱར་ལམ་ལ་ཆས་པ་ཡིན། །
ཏོག་དབྱིབས་རྗེས་ཀྱི་རྒྱང་བཞུད་དང་པོ་དེ། །
དེ་ལྟར་སྔར་གྱི་གནས་དེར་ཁྱུག་ཙམ་ཕྱིན། །
དྲན་པའི་ཡུལ་ལ་ཞེན་པའི་ཕྱི་མིག་བལྟས། །
སྒྱུ་མའི་མཐོང་སྣང་སྙན་ངག་རིས་སུ་ཕབ། །
ཐྲ་སི་མ་ནེ་ཡ་ནས་ཚུར་རི་སྔོན་པོར་འབྱོར་འཕྲལ་འགྲུལ་བཞུད་ཟིན་བྲིས་ཤིག་གི་ཚབ་ཙམ་དུ་རྫ་ཚེ་རིང་བཀྲ་ཤིས་ཀྱིས(2022/6/28)ཉིན་་བྲིས་པའོ།།