པདྨ་འབུམ།
ན་ནིང་དབྱར་ཀའི་ཕྱི་དྲོ་ཞིག་ལ། ངའི་ར་སྐོར་གྱི་ནང་གི་རྩྭ་འབྲེག་རན་ནས་ཡུན་ཙམ་འགོར་ཡོད། ཡིན་ན་ཡང་རྩྭ་འབྲེག་འཕྲུལ་འཁོར་མེ་ཁ་སྦར་ཐུབ་ཀྱི་མི་འདུག དེ་ཞིག་གསོ་ཁང་ལ་བསྐྱལ་ན་ཉིན་ཤས་འགོར་འགྲོ་ལ། ར་སྐོར་ནང་གི་རྩྭ་མགོ་མཐོ་ནས་སྒུག་དཀའ་བར་འདུག
ངས་རུ་ཁ་ཁྱིམ་མཚེས་ཀྱི་འཕྲིན་ཚོམ་གྱི་ནང་དུ་འཕྲིན་ཐུང་ཞིག་བཏང་ནས། གླ་ཡོན་སྒོར་མོ་ཅུང་ཙམ་སྤྲད་ན་ངའི་ར་སྐོར་གྱི་རྩྭ་འབྲེག་མི་ཡོད་མེད་རྩད་གཅོད་བྱས་པ་ཡིན། དགུན་ཁ་ཁ་བ་བབས་སྐབས། རང་གིས་ཁ་བ་འཕྱག་མི་ཐུབ་ན། རུ་ཁ་ཁྱིམ་མཚེས་ཀྱི་འཕྲིན་ཚོམ་ལ་བརྡ་སྤྲོད་བྱས་ན། འབྲིང་རིམ་དང་མཐོ་འབྲིང་གི་སློབ་མ་འགའ་རེས་ཁ་བ་ཕྱགས་ནས་སྒོར་འགའ་རེ་བཙལ། ཡིན་ན་ཡང་རྩྭ་འབྲེག་མི་ཡོད་མེད་ངས་ད་བར་དུ་མ་ཤེས།
འཕྲིན་ཚོམ་གྱི་ནང་དུ་ལན་ཞིག་མགྱོགས་པོར་སླེབས་སོང་། “ངའི་བུ་མགྱོགས་པོར་ཡོང་ངེས་ཡིན།”ཞེས་ལན་ཐུང་ཞིག་བརྒྱབ་འདུག ལན་རྒྱག་མཁན་ངས་མི་ཤེས།
ངོ་མས་མགྱོགས་པོར་སླེབས་སོང་། ངའི་ར་སྐོར་གྱི་ནང་དུ་རྩྭ་འབྲེག་འཕྲུལ་འཁོར་གྱི་ལྡིར་སྒྲ་གྲགས་སོང་། ངས་སྒེའུ་ཁུང་ནས་ཕྱི་ལོགས་ལ་བལྟས་པ་ཡིན། བུ་ཆུང་ལོ་བཅུ་བཞི་བཅོ་ལྔ་ཙམ་ཞིག་གིས་རྩྭ་འབྲེག་བཞིན་འདུག ཅུང་ཙམ་འགོར་ནས་ངས་ཡང་སྒེའུ་ཁུང་ནས་བལྟས་པ་ཡིན། ཉིན་དེར་གནམ་གཤིས་ཧ་ཅང་ཚ། བུ་ཆུང་དེའི་གདོང་རྔུལ་ཆུས་བརླན་ཡོད་པ་ཧ་ཅང་གསལ། ངས “སྙིང་རྗེ། ཁོ་ལ་སྒོར་མོ་འགའ་རེ་དགོས་པ་རེད་མ་གཏོགས། དེ་རིང་ལས་ཀ་འདི་འདྲ་བྱེད་པའི་ཉིན་མོ་མ་རེད།”སྙམ།
ཅུང་ཙམ་འགོར་ནས། རྩྭ་འབྲེག་འཕྲུལ་འཁོར་གྱི་ལྡིར་སྒྲའི་ནང་དུ་ཡང་ལྡིར་སྒྲ་དེ་ལས་ཆུང་བ་ཞིག་གྲགས་ཡོང་། ངས་ཡང་སྒེའུ་ཁུང་ནས་ཕྱི་ལོགས་ལ་བལྟས་པ་ཡིན། ངའི་ར་སྐོར་གྱི་མདུན་དུ་BMWརྟགས་ཅན་གྱི་རླངས་འཁོར་ཞིག་བཞག་ཡོད་པ་དང་། སྟོད་གོས་ཕུད་ཀྱང་ཚིལ་ལེན་དང་ལྷམ། དོར་མ་བཅས་ཧ་ཅང་སྤུས་དག་གོན་པའི་ཁྱོ་ག་ཞིག་གིས་decker trimmer ཞིག་བཟུང་ནས་ར་སྐོར་གྱི་མཐའ་དང་ཟུར་ཁུག་གི་རྩྭ་འབྲེག་འཕྲུལ་འཁོར་གྱིས་འབྲེག་མི་ཐུབ་པའི་རྩྭ་འབྲེག་བཞིན་འདུག ཕར་བལྟས་ན་ཁོ་ལས་ཁུངས་གྲོལ་མ་ཐག་ཁོའི་བུ་ལ་རོགས་པ་བྱེད་དུ་ཡོང་བ་འདྲ། ཁོའི་ཆ་བྱད་ལ་བལྟས་ན་ཁོའི་བུ་ཡིས་རྩྭ་བྲེག་ནས་གླ་འཚོལ་དགོས་པའི་ཚོད་མ་རེད། གཅིག་བྱས་ན་རང་གི་བུ་ལ་རང་ཁ་རང་གསོ་ཡི་ནུས་པ་རེ་སློབ་ཏུ་འཇུག་པ་ཡིན་ནམ།
བུ་དེས་རྩྭ་བྲེག་ཚར་གྲབས་འདུག ངས་ཁོའི་ལས་ཡོན་དེ་ཡིག་སྐོགས་ཤིག་གི་ནང་དུ་བཅུག་ནས་སྤྲད་པ་ཡིན།
ཕ་བུ་དེ་གཉིས་སོང་ནས་ཡུན་ཙམ་འགོར་རྗེས། ངའི་ཁང་པའི་སྒོ་དྲིལ་གྲགས་སོང་། ང་སྒོ་ཁར་སོང་བ་ན་བུ་དེའི་ཕ་སྒོ་ཁ་ན་ལངས་འདུག ངས་སྒོ་ཕྱེ་བ་ན་ཁོས་ཡིག་སྐོགས་ཤིག་ང་ལ་བསྲིངས་སོང་། དེ་ནི་ངས་ཁོའི་བུ་ལ་ལས་ཡོན་བཅུག་ནས་སྤྲད་པའི་ཡིག་སྐོགས་དེ་རེད།
“གླ་ཉུང་དྲགས་འདུག་གམ།”ངས་ཁོ་ལ་དེ་ལྟར་དྲིས།
“མང་དྲགས་འདུག ཁྱེད་ཀྱི་ར་སྐོར་དེ་འདྲའི་ཆེན་པོ་མ་རེད།”ཁོས་དེ་ལྟར་ཟེར། ངས་ཡིག་སྐོགས་བླངས་པ་ན་ཁོ་ཕྱིན་སོང་།
ནང་དུ་ཡོང་ནས་ངས་ཡིག་སྐོགས་ཁ་ཕྱེ་བ་ན། ངས་ཕར་སྤྲད་པའི་ལས་ཡོན་གྱི་ཕྱེད་ཀ་ཕྱིར་སློག་འདུག
ཕ་དེས་རང་གི་བུ་ལ་རང་ཁ་རང་གསོ་ཡི་ནུས་པ་སྦྱོང་དུ་འཇུག་པ་དང་མཉམ་དུ་དྲང་མོ་དྲང་བཞག་གི་ཀུན་སྤྱོད་ཀྱང་སྦྱོང་དུ་འཇུག་གི་ཡོད་པ་འདྲ།
ལེགས།
འབྱུང་འགྱུར་མི་རབས་ཀྱི་ཐད་ལ་རེ་བ་མེད་པའི་བསམ་བློ་གཏོང་མཁན་མང་དྲག་འདུག
ལེགས།
འདི་ཕྱི་གླིང་པས་མྱི་སྐྱོང་སྟངས་རེད། “ངས་ཨ་ཕའི་ལག་ནས་སྒོར་མོ་འགའ་གཡར་ཡོད་” ཅེས་པའི་སྐད་ཆ་དེ་དང་པོ་བློ་ཡུལ་ལ་མི་ཤོང་གྲབས་འདྲ་བྱེད་ཀྱི་འདུག