རིགས་སློབ་ཁམས་བཟང་།
སྤྱི་ལོ་ ༢༠༢༢ སྤྱི་ཟླ་ ༡༡ ཚེས་ ༨ དང་། བོད་ཟླ་དགུ་པའི་ཚེས་བཅོ་ལྔའི་ཉིན་མོ་འདི་ནི། ཚེས་བཟང་དུས་བཟང་གི་ཉིན་མོ་ཞིག་ཡིན་པ་མ་ཟད། རང་ཅག་སློབ་གྲོགས་རྣམས་ལ་མཚོན་ན་དེ་བས་ཀྱང་ཆེས་སྐལ་བ་བཟང་པོའི་དུས་ཚིགས་རྩ་བ་ཆེན་པོ་ཞིག་ཅི་ལ་མིན། མཁའ་རླུང་གཙང་ཞིང་གཟི་བྱིན་འཕྲོ་བའི་བཞུགས་སྒར་གྱི་ཞོགས་པའི་རི་གྲོང་ཁྱོན་ཏུ། དབང་ཕྱོགས་ཤར་རིའི་རྩེ་ནས་དལ་གྱིས་བྱོན་པའི་ཉི་གཞོན་གྱི་ཟེར་བརྒྱས་བྱིལ་བྱིལ་བྱས་པས་ཁོར་ཡུག་ཐམས་ཅད་སྔར་ལས་མཛེས་ཤིང་བལྟ་ན་སྡུག་པར་གྱུར་པའི་ངང་ཚུལ་ནི་ཁོ་བོ་ཅག་གིས་ཕྲག་པར་དཔྱངས་པའི་ངུར་སྨྲིག་གི་ཆོས་གོས་དག་ལ་འགྲན་སློང་བ་དང་གཉིས་སུ་མ་མཆིས།
ཞོགས་པའི་ཆུ་ཚོད་བདུན་པའི་ཐོག་འཆད་རྩོད་ཀྱི་དུང་སྒྲ་ཆད་མ་མྱོང་ཞིང་ལྷག་པར་དུ་༸གོང་ས་༸སྐྱབས་མགོན་ཆེན་པོས་དུས་ནས་དུས་སུ་མདོ་སྔགས་ཀྱི་བཀའ་ཆོས་ཟབ་མོའི་བཀའ་དྲིན་གྱིས་གཟི་བྱིན་ལེགས་པར་བཏབ་པའི་གནས་ཁྱད་པར་ཅན་ཐེག་ཆེན་ཆོས་གླིང་གཙུག་ལག་ཁང་གི་གསུང་ཆོས་རྭ་བའི་ནང་ངེད་ཅག་ལས་བསོད་བཟང་པོས་གཅིག་ཏུ་འདུས་ཤིང་། སྐྱིད་སྡུག་གི་ལོ་ཟླ་མཉམ་དུ་བགྲོད་པའི་དམ་མཐུན་ཆོས་གྲོགས་རྣམས་རིམ་བཞིན་འཛོམས། ཆོས་གྲོགས་ཡོངས་ཀྱི་སྡུག་པའི་བཞིན་ལ་འཛུམ་པའི་མདངས་ཕྱུར་བ་དང་གཅིག་མཚུངས་སུ་ཡུན་རིང་བྲལ་བའི་མ་བུ་ལྷན་འཛོམས་ཀྱི་སྐལ་བཟང་མངོན་དུ་ཕྱོགས་པ་ལྟ་བུའི་འཚབ་འཚུབ་དང་། དགའ་སྤྲོའི་རྣམ་འགྱུར་ཕན་ཚུན་འགྲན་པ་ལྟར་སྟོན་བཞིན་མཆིས། རབ་བྱུང་ཕོ་མོ་རྣམས་ལ་དར་གོས་རིན་ཆེན་གྱི་གཟབ་འཆོར་སྤྲོས་རྒྱུ་ཅང་མ་མཆིས་ཀྱང་ཚང་མའི་ལུས་ལ་གཙང་ཞིང་དག་པའི་ཆོས་གོས་རྣམ་གསུམ་གྱིས་ལེགས་པར་བསྣབས་པས་སྐལ་ལྡན་དང་བ་འདྲེན་པའི་མིག་རྒྱན་དུ་གྱུར་པ་ནི་སོམ་ཉི་ཅི་ལ་དགོས། བསོད་ནམས་ཀྱི་ཁུར་ཤིན་ཏུ་ལྕི་བའི་ཆོས་གྲོགས་སྐྱ་བོ་འགའ་རེ་ཡོད་པ་དག་ཀྱང་གཡུ་བྱུར་སྤྲོས་པའི་རྒྱན་ཆས་དོར་ཀྱང་བོད་ཆས་གཙང་མའི་ལུགས་ཀྱིས་མཛེས་པ་ནི་ཅི་འདྲའི་ཉམས་དོད་ཅིང་མཐོང་སྣང་ཤིན་ཏུ་སྤམ་པ་ལགས། ལོ་གསར་མིན་ཡང་ལོ་གསར་གྱི་དགའ་སྟོན་ལ་རོལ་བའི་ལོ་ཆུང་བྱིས་པའི་ངང་ཚུལ་ལྟར་གྱི་ངེད་ཅག་གིས་བྱེད་བབས་འདི་འདྲ་འཆང་དོན་ཅི་ཡིན་ནམ་ཞེ་ན། བཀའ་དྲིན་གྱི་ཕུང་པོ་ཆེས་ཤིན་ཏུ་ལྕི་བའི་མ་ཡུམ་རིགས་ལམ་སློབ་གཉེར་ཁང་གི་ཡིག་ཚང་ནས་ཇི་ལྟར་གསོལ་བ་བཏབ་པའི་རེ་འབྲས་སྐལ་བཟང་གི་གོ་སྐལ་དུ་སོན་པ་ནི། ཇི་སྲིད་བྱང་ཆུབ་ཀྱི་གོ་འཕང་མ་རེག་བར་དུ་བཀའ་དྲིན་གྱི་ཆ་ཙམ་གསབ་ཏུ་བྲལ་བ་རང་ཅག་རྣམས་ཀྱི་༧བཀའ་དྲིན་གསུམ་ལྡན་གྱི་རྩ་བའི་བླ་མ་རིན་པོ་ཆེའི་སློབ་ཐོན་མཇལ་ཁའི་སྐལ་བཟང་གི་གོ་སྐལ་ཐོབ་ལ་ཉེ་བ་དེའི་དབང་གིས་ཡིན།
ཆོས་རྭའི་ནང་ཆུ་ཚོད་ཕྱེད་ཀ་ཙམ་གྱི་རྗེས་ཞོགས་པའི་ཆུ་ཚོད་བདུན་དང་ཕྱེད་ཀ་ཡོལ་ཙམ་གྱི་ཐོག་ཕོ་བྲང་གི་ལས་བྱེད་མི་སྣས་ང་ཚོ་འབོད་དེ་ཕོ་བྲང་ནང་འཛུལ་རྒྱུའི་སྟ་གོན་བྱེད་པར་མངགས། བཀའ་དྲིན་གྱི་བདག་ཉིད་དགེ་བའི་བཤེས་གཉེན་རྣམ་པ་སྔོན་དུ་ཕེབས་ཤིང་རིམ་པར་ངེད་ཅག་སློབ་མ་རྣམས་འཛིན་གྲྭ་གོང་འོག་གི་བང་རིམ་ལྟར་རུ་སྟར་ལེགས་པར་བསྒྲིགས་ཏེ་ཕོ་བྲང་གི་ཕེབས་སྒོའི་ནང་རིམ་བཞིན་ཞུགས། ཕོ་བྲང་གི་སྐུ་སྲུང་ཞབས་ཞུ་བ་ཚོས་ཞིབ་ཚགས་དོ་ནན་གྱིས་ལུས་བཤེར་དང་། བྱིན་རློབས་དང་རབ་གནས་ཞུ་ཆེད་འཁྱེར་ཡོང་བའི་སྐུ་གསུང་ཐུགས་རྟེན་སོགས་ཀྱི་དངོས་རྫས་ཡོངས་ལ་ཞིབ་བཤེར་ལེགས་པར་གྲུབ་པའི་ལུས་ངག་གི་རྣམ་འགྱུར་ལེགས་ཤིང་། ཞིབ་ཚགས་དོ་ནན་གྱིས་ལས་དོན་ལྷག་བསམ་དག་པ་ནི་༧རྒྱལ་བའི་སྐུ་ཕྱྭའི་སྲུང་སྐྱོབ་ཐད་ལྷོད་གཡེང་མེད་པར་འགན་ཁུར་ཆེར་བཞེས་གནང་བའི་ཚུལ་དེས་ཁོ་བོར་ཡི་རངས་སྤྲོ་བ་འཕེལ་བའི་སྐྱེས་སུ་ཐོབ་པ་ཡང་ཆུང་དུས་བོད་ནང་མཐོང་ཐོས་མྱོང་བའི་དམག་མིའི་སྤྱོད་ཚུལ་ལས་ཡོངས་སུ་ཐ་དད་པས་དམག་མི་ཡིན་ན་དྲག་པོའི་སྤྱོད་ཚུལ་ཅན་ཞིག་ཡིན་མི་དགོས་པར་འདུག་སྙམ་པ་བྱུང་།
ལུས་བཤེར་གྲུབ་རྗེས་ཐོག་བརྩེགས་ཉིས་ཐོག་སྟེང་ཡོད་པའི་ཕོ་བྲང་གི་མཇལ་ཞུ་ཁང་དུ་གོ་རིམ་མ་འཆོལ་བར་གྲལ་ལ་འཁོད། མཇལ་ཕྲད་ཁང་དེའི་བཀོད་པ་གཙང་ཞིང་མདུན་ངོས་སྟོན་པ་སངས་རྒྱས་ཀྱི་མཛད་པ་སྟོན་པའི་སྐུ་ཐང་སྟར་ལ་སྒྲིག་ཅིང་། གཤམ་གྱི་སྤྲོས་པ་བྲལ་བའི་ཤིང་མདོག་གི་ཆ་སྒམ་སྟེང་དབུས་སུ་སྟོན་པ་ཐུབ་པའི་དབང་པོའི་སྣང་བརྙན་ལོ་དྲུག་དཀའ་སྤྱད་ཀྱིས་སྐུ་ལུས་རིད་པར་གྱུར་པའི་མཛད་པ་སྟོན་པ་ཞིག་དང་། གཡས་གཡོན་དུ་གསེར་ཟངས་ཀྱི་འཁོར་ལོ་དང། མཎྜལ་སོགས་ཀྱི་མཆོད་རྫས་བཤམས་པའི་བཀོད་པས་མཛེས་པར་བྱས། དེ་དག་གི་མདུན་དུ་སྟོན་པའི་སྐུ་བརྙན་ཁྲུ་གང་མ་བརྒྱ་ཚར་ཙམ་མཚར་དུ་དངར་བར་བཞུགས་སུ་གསོལ་བ་དང་ཆ་སྒམ་དང་ཅུང་ཉེ་བའི་སྟེག་བུ་ལྗང་ཁུ་ཧ་ཅང་ཆེན་པོ་མ་ཡིན་པ་ཞིག་གི་སྟེང་དུ་༧རྒྱལ་དབང་བཞུགས་སུ་གསོལ་སའི་ཆེས་སྤྱིར་བཏང་གི་ཞབས་བཀྱག་ས་མདོག་ཅན་སྐོར་བ་རྒྱག་རྒྱུ་ཡོད་པ་ཞིག་དང་། དེའི་མདུན་དུ་བརྐོས་དཀྲོལ་ཕྲན་བུ་བཏབ་པའི་ཁྱི་སུག་སུ་འབོད་པའི་རྒྱ་ལྕོག་སྟེང་ཁེབས་ཀྱིས་བརྒྱན་པ་ཞིག་བསྒྲིགས། གཡས་གཡོན་དང་རྒྱབ་ངོས་ཀྱི་གྱང་སྟེང་དུ་འཕགས་ཡུལ་པཎ་གྲུབ་བཅུ་བདུན་གྱི་བྲིས་ཐང་ཡིད་དུ་འོང་བ་འགའ་དཔྱང་ནས་ཡོད་པ་དེ་དག་གིས་ནི་ཁྱེད་ཚོས་སློབ་གཉེར་བྱེད་པའི་གཞུང་དེ་དག་ཁོ་བོ་ཅག་གིས་བརྩམས་པ་ཡིན་ཞེས་དྲན་སྐུལ་མཛད་པ་ལྟ་བུའི་ཆོ་གར་བཞུགས་པ་ལྟར་སྣང་།
ཆུ་ཚོད་བདུན་དང་སྐར་མ་བཞི་བཅུ་ཡས་མས་ཤིག་ལ་དགེ་སློབ་མ་ལུས་པ་མཇལ་ཞུ་ཁང་དུ་བཞུགས་གྲལ་ལ་འཁོད་ཟིན། དེ་ནས་༧གོང་ས་སྐྱབས་མགོན་ཆེན་པོ་མཆོག་ཕྱག་ཚོད་བརྒྱད་དང་ཕྱེད་ཀ་ཡོལ་ཙམ་བར་ཆིབས་བསྒྱུར་མ་གནང་རིང་མཇལ་ཕྲད་ཁང་ནང་ཁུ་སིམ་མེར་རེ་བའི་མིག་ཟུང་ཕེབས་སྒོར་ཅེར་སྟེ་ཅི་ཡང་མི་སྨྲ་བའི་བརྟུལ་ཞུགས་ལ་གནས་པས་གྱང་ངོས་སུ་བཀལ་བའི་ཆུ་ཚོད་ཀྱི་ཚགས་སྒྲ་ནི་རྣ་དབང་གཅིག་པུའི་ཡུལ་དུ་ཆགས།
ཆུ་ཚོད་བརྒྱད་དང་ཕྱེད་ཀ་ཡོལ་ཙམ་ཐོག་སྐུ་ངོ་འཆི་མེད་ལགས་ཀྱི་གཅུང་པོ་ཕེབས་ཏེ་ཚང་མ་ཡར་བཞེངས་ཅེས་གསུངས། དེ་མ་ཐག་དགེ་སློབ་ཚང་མ་ཡར་བཞེངས་ཤིང་ལག་ཟུང་ཐལ་མོ་སྦྱར་བའི་དབུས་སུ་རབ་དཀར་ལྷ་རེག་བཏེགས་ཏེ་ཕེབས་སྒོ་ནས་༧རྒྱལ་དབང་མཆོག་ལ་གུས་ཕྱག་གིས་ཕེབས་བསུ་ཞུས། ༧རྒྱལ་དབང་མཆོག་ངུར་སྨྲིག་གི་ཆོས་གོས་སྐུ་ལ་མཛེས་ཤིང་། གཟི་འོད་འཕྲོ་བའི་ཞལ་མཛུམ་མདངས་དང་བཅས་ཏེ། མཆོག་ཟུང་ལྟ་བུའི་ཉེ་གནས་ཟུང་གིས་ཕྱག་ཟུང་ནས་སྐྱོར་ཏེ་དལ་བུར་ཕེབས་པའི་ངང་ཚུལ་སྐུ་མཆོག་ལྟ་བས་ཆོག་མི་ཤེས་པ་མཇལ་མ་ཐག་ལ་ལའི་འདྲེན་བྱེད་ལས་དགའ་བའི་མཆི་མས་འཁུར་ཚོས་བརླན་ཞིང་། ལ་ལའི་ངོ་གདོང་ལས་འཛུམ་པའི་སོ་ཕྲེང་སྟོན་པ་དང་། ཡང་ལ་ལས་མགོ་བོ་དུད་ཅིང་ངག་ནས་ཤབ་ཤུབ་ཀྱི་སྨོན་ལམ་འདེབས། ལ་ལས་ལུས་ཀྱི་གནས་གསུམ་ལ་ཐལ་སྦྱར་གྱིས་ཡང་ཡང་རེག་པ་སོགས་ལུས་ངག་གྱི་རྣམ་འགྱུར་མཐའ་ཀླས་པའི་དད་གུས་མཚོན་པ་ནི་ནིའུ་སེང་ལྗོན་པའི་གསེབ་ཏུ་འདབ་ཆགས་སྣ་ཚོགས་དགའ་སྤྲོའི་སྤུ་ལོང་གཡོ་བ་དང་མཚུངས། ཁོ་བོར་མཚོན་ན་དེ་ནི་རྨི་ལམ་ལྟ་བུའི་སྣང་བ་འཆར་ཞིང་། བོད་དུ་བཞུགས་པའི་དྲིན་ཆེན་མ་ཡུམ་གྱིས་མཚོན་པའི་གཞིས་ལུས་ས་ཡ་མང་པོར་དེ་ལྟ་བུའི་སྐལ་བཟང་ཞིག་ནམ་ཡོང་ངམ་སྙམ་པའི་རེ་སྨོན་དང་། རང་ཉིད་ལ་དེ་ལྟ་བུའི་བསོད་ནམས་ཀྱི་བགོ་སྐལ་ཐོབ་པའི་དགའ་སྐྱོ་འདྲེས་མའི་ཚོར་བ་ཞིག་གིས་ཡིད་འགུལ་བར་བྱས་ཤིང་། དེ་ལྟ་བུའི་ཚོར་སྣང་ནི་བོད་འབྱོར་ཆོས་གྲོགས་གཞན་འགའ་ལ་ཡང་བྱུང་བ་རྗེས་སུ་ཤེས།
དེ་ནས་༧གོང་ས་སྐྱབས་མགོན་ཆེན་པོ་མཆོག་ཞབས་སྟེགས་སྟེང་བཞུགས་པ་དང་། བཀྲ་ཤིས་བདེ་ལེགས་ཀྱི་ཁམས་བདེའི་འཚམས་འདྲི་སྩལ། དེ་རྗེས་རང་རེའི་དབུ་འཛིན་མཆོག་ནས་ཕུལ་བའི་གསོལ་ཅོག་སྟེང་གི་མཇལ་བཅར་བའི་སྡེ་ཚན་གཞིར་བཟུང་བཀའ་རྩད་ཕེབས་ཤིང་། རིགས་ལམ་གྱི་ཐོག་ནས་བོད་ཀྱི་སངས་རྒྱས་པའི་ཆོས་རིག་འཛིན་སྐྱོང་སྤེལ་གསུམ་བྱེད་པའི་ལམ་སྲོལ་ལ་བསྔགས་བརྗོད་ཀྱི་མེ་ཏོག་གཏོར་བར་མཛད་ཅིང་། ༧མགོན་པོ་གང་ཉིད་ཀྱིས་ཀྱང་དེ་ལྟར་བསླབ་པ་སློབ་གཉེར་མཛད་ཚུལ་སོགས། མདོར་ན་གང་གིས་རིགས་ལམ་སློབ་གཉེར་ཁང་ཞེས་པའི་མཚན་གསོལ་སྩོལ་གནང་མཛད་པ་ལྟར་མཚན་དོན་འགྲེལ་བརྗོད་ལྟ་བུར་སྣང་ཞིང་། དེ་རྗེས་བོད་ཀྱི་ནང་དེ་སྔ་ཆོས་བརྒྱུད་ཀྱི་ཐོག་ནས་འཐེན་འཁྱེར་ཕྲན་བུ་བྱུང་བ་དེ་དག་ནི་རིས་མེད་གཞུང་ལ་སློབ་གཉེར་མ་བྱས་པའི་ལན་པ་ལ་ཐུག་ཅིང་། ཡང་དག་པར་སློབ་གཉེར་བྱས་ཚེ་ལྟར་མི་ཡོང་བ་དང་། ༧མགོན་པོ་གཏེར་ཆེན་གང་ཉིད་ཀྱིས་རིས་སུ་མ་མཆིས་པའི་ཆོས་བརྒྱུད་ཁག་ལ་གསན་བསམ་ཉམས་བཞེས་ཇི་ལྟར་མཛད་ཚུལ་གྱི་བཀའ་གནང་བ་ཡང་། རང་རེའི་སློབ་གཉེར་ཁང་གིས་༧རྒྱལ་བའི་དགོངས་པ་ལྟར་རིས་མེད་ཀྱི་ལྟ་གྲུབ་ལ་འཆར་གཞི་ལྡན་པའི་ཐོག་ནས་འཆད་ཁྲིད་སློབ་གཉེར་བྱེད་པར་ལེགས་སོའི་དབུགས་དབྱུང་གནང་བར་ངེས། དེ་བཞིན་མ་འོངས་པར་ཚན་རིག་ཐོག་དོ་སྣང་དགོས་སྐོར་གྱི་ལམ་སྟོན་སྩལ་བ་སོགས། ཆུ་ཚོད་ཕྱེད་ཀ་ཙམ་གྱི་རིང་རིན་བྲལ་བཀའ་སློབ་བཀའ་དྲིན་བུམ་པ་གང་བྱོའི་ཚུལ་དུ་སྩལ་གནང་མཛད།
བཀའ་སློབ་གྲུབ་མ་ཐག་འཛིན་གྲྭ་སོ་སོའི་སློབ་གཉེར་བ་སྡེ་ཚན་ཁག་བགོས་ཀྱི་སྐུ་པར་ལྷན་སྒྲོན་སྐལ་བཟང་གནང་ཞིང་། ༧མགོན་པོ་མཆོག་གི་ཞབས་རྡུལ་དྲི་མ་མེད་པ་ལ་མགོ་བོས་བཏུད་ཅིང་རེག་པ་དང་། འཇམ་གཉན་ཕྱག་གི་འཁོར་ལོའི་ཅོད་པཎ་ཁོ་བོའི་ལག་ཟུང་གི་སྙིམ་པར་འཇོག་གནང་མཛད་པ་ནི་ལུས་སེམས་ལ་དགའ་བདེའི་སྤྲོ་སྣང་འབྱིན་པར་མཛད།
དེ་རྗེས་སྐུ་འཁོར་འགས་རིམ་བཞིན་ལྗགས་མདུད་དང་། སྟོན་པ་ཐུབ་པའི་དབང་པོའི་སྐུ་པར་མཐོང་གྲོལ་རིན་པོ་ཆེ། བྱིན་རྟེན་བདུད་རྩི་མཆོག་སྨན་བཅས་གསོལ་རས་གནང་བ་བཅས་ག་ལེར་མཇལ་ཞུ་ཁང་གི་ཕྱི་རོལ་དུ་ཐོན། ཕོ་བྲང་གི་སྒོ་ཆེན་འགྲམ་དང་། གཙུག་ལག་ཁང་གི་སྒོ་འཕྱོར་འོག་དགེ་སློབ་མཉམ་འཛོམས་ཀྱིས་ཀུན་དགའི་བཞིན་ལ་འཛུམ་པའི་འདབ་མ་གྲོལ་བའི་དྲན་རྟེན་སྐུ་དཔར་ལྷན་སྒྲོན་གྱིས་མཇུག་བསྡུས་སྟེ་སྐལ་བཟང་གི་དྲན་གསོའི་རྡོ་རིང་སྟེ། ཆེས་སྐལ་བཟང་གི་ཉིན་མོ་རྩ་ཆེན། ཁོ་བོའི་ལོ་རྒྱུས་ཀྱི་ཟིན་ཐོར་བཀོད་དོ།། །།
དད་དམ་གཙང་མའི་ལས་སྨོན་རྟེན་འབྲེལ་ཟབ་པ་ནས་འཇིག་རྟེན་མགོན་པོའི་ཞལ་མཇལ་གསུང་ཐོས་སྐལ་བཟང་སྟོང་གི་འབྲས་བཟང་སྨིན་པའི་བྱུང་བ་བརྗོད་པའི་དྲན་གསོའི་རྡོ་རིང་ཆ་ཚང་ཀློག་སྐབས་མགོན་པོ་གང་ཉིད་རང་དང་མཇལ་བའི་དད་པའི་ཚོར་བ་བརྒྱུད་ནས་མཆན་འདི་བཀོད་པ་བདེ་ལེགས་སུ་རྒྱུར་ཅིག་།