ང་ལ་སྐད་ཆ་ཞིག་ཡོད། (ཉེ་དུས་ཀྱི་གསར་འགྱུར་དང་འབྲེལ་བ)

རྫ་ཚེ་རིང་བཀྲ་ཤིས།

(གསལ་བཤད། རྩོམ་ཡིག་འདི་རིང་དྲགས་པ་ཤེས་ཀྱི་ཡོད། མ་ཟད་དད་གུས་རྩེ་གཅིག་ཏུ་ཡོད་པ་ཚོར་གསལ་བཤད་འདི་མི་དགོས་ཤིང་། ལོག་འགྲེལ་བྱེད་མཁན་ཚོར་གསལ་བཤད་འདི་མི་འགྲོ་བས རྩོམ་ཡིག་འདིར་དགོས་མེད་ལྟ་བུར་སྣང་ན་ཡང་། གང་ལྟར་ང་ལ་འདི་ལས་ལྷག་པའི་རང་གི་བསམ་ཚུལ་གསལ་སྟོན་བྱེད་པའི་ཐབས་ལམ་ཞིག་མེད་པ་ལྟར་སྣང་། མ་ཟད་དང་ཡི་གེ་འདི་འདྲ་ཞིག་བྲིས་པའང་རང་ངོས་ནས་དགོས་ངེས་ཤིག་ཏུ་ངོས་འཛིན་ཞུ་བཞིན་ཡོད། འདི་ནི་ངས་གང་བཤད་འདོད་པ་དེ་བཤད་པ་ཙམ་ཞིག་ཏུ་བརྩི་རོགས། ཡི་གེ་འདི་རྒྱ་ཡིག་ཏུ་བསྒྱུར་བཞིན་ཡོད་ལ། དབྱིན་ཡིག་ཏུ་བསྒྱུར་རྒྱུའི་རིན་ཐང་ཡོད་མེད་དྲ་གྲོགས་ཚོས་ཀྱང་དགོངས་ཚུལ་རེ་གསུངས་ནའང་ཆོག་གོ ། རྫ་ཚེ་རིང་བཀྲ་ཤིས། )

དེང་སང་ང་ནི་གློ་བུར་དུ་ཁང་པ་སྤོ་དགོས་ཐུག་པ་དང་། ཅ་ལག་བསྡུ་གསོག་དགོས་པ་སོགས་ཀྱི་སྒེར་གྱི་བྲེལ་ཟིང་གི་ངང་དུ་ཡོད། ཡིན་ན་ཡང ། ཉིན་འདི་གར་༧སྐྱབས་མགོན་༧རྒྱལ་བའི་དབང་པོ་མཆོག་གིས་ཕྲུ་གུ་ཞིག་ལ་མཇལ་ཁ་གནང་སྐབས་ཀྱི་བརྙན་ཐུང་ཞིག་གི་ཐོག་གསར་ལམ་ཁག་གིས་གླེང་སློང་དང་། དྲ་འབངས་དག་གི་བསམ་ཚུལ་སྣ་ཚོགས་བྱུང་ཡོད་པ་དེའི་ཐད་ངས་ཀྱང་ ༧སྐྱབས་མགོན་རིན་པོ་ཆེ་ཉིད་སོ་སོའི་བླ་མ་ཡིན་པ་དང་། བོད་ཀྱི་བླ་ན་མེད་པའི་བསམ་བློའི་དབུ་ཁྲིད་ཡིན་པ་ཙམ་གྱི་ངོས་ནས། གསར་ལམ་ཁག་གི་སྐད་ཆས་རང་ཉིད་ལ་མ་བདེ་བའི་སེམས་ཚོར་སྤྲད་པ་དང་། དྲ་མཆན་རྒྱག་མཁན་མང་པོས་སེམས་ལ་གཟན་པའི་མཆན་ཐུང་བྲིས་པའི་ངོ་གདོང་ཙམ་ལ་ལྟས་ནས་ཁོང་ཁྲོ་དང་བློ་ཕམ་བྱེད་པ་ཙམ་མིན་པར། གནས་ཚུལ་ཁྱོན་ཡོངས་ལ་ལྟ་ཐུབ་རྒྱུར་འབད་བརྩོན་ཞུ་བཞིན་ཡོད།

དུས་རབས་འདིར་གསར་ལམ་ནི་དམངས་གཙོ་དང་རང་དབང་གི་མགྲིན་ཚབ་པ་ཞིག་དང་། སྤྱི་ཚོགས་ཁྱོན་ཡོངས་ལ་བཟང་ཕྱོགས་ཀྱི་ནུས་པ་འདོན་སྤེལ་བྱེད་པའི་སྡིངས་ཆ་ཞིག་ཡིན་པར་སྙམ་གྱི་ཡོད། ང་ཡང་ཐོག་མར་རང་དབང་ལུང་པ་རྒྱ་གར་དུ་འབྱོར་དུས། རྡ་རམ་ས་ལར་མཚོན་ན། མི་ཚང་མས་གསར་འགྱུར་ལས་ཁུངས་ལ་མང་གཙོའི་ཀ་བ་བཞི་པ་ཞེས་འབོད་ཀྱི་འདུག །རྒྱ་གར་གྱི་དུས་བབ་དང་། དབྱིན་ཇིའི་བྷི་བྷིའི་སི་སོགས་ནི་རང་དབང་དང་དྲང་བདེན་གྱི་ཕོ་ཉ་ལྟ་བུ་ཞིག་ཡིན་པའི་དད་མོས་བྱེད་བཞིན་འདུག །༧གོང་ས་མཆོག་གིས་ཀྱང་གསར་ལམ་གྱི་རང་དབང་གལ་ཆེན་ཡིན་པ་དང་། དྲང་བདེན་གྱི་གསར་འགོད་པར་ཡང་དག་པའི་སྲུང་སྐྱོབས་དགོས་པའི་བཀའ་སློབ་ཡང་ཡང་གནང་བཞིན་འདུག །ཡིན་ན་ཡང་། ད་ཐེངས་བདེན་རྫུན་དང་ལས་འབྲས་ལས་གོ་ལྡོག་པའི་གསར་འགྱུར་འགོད་སྟངས་དེས་མི་ཚེ་གང་པོར་གསར་ལམ་གྱི་ཁེ་དབང་ལ་དོ་ཁུར་དང་རྒྱབ་སྐྱོར་གནང་མཁན། མི་ཚང་མ་ལ་གཅིག་མཚུངས་ཀྱི་ལྷད་མེད་པའི་བརྩེ་བ་འཆང་མཁན། ཕྲུ་གུ་དང་ཉམ་ཆུང་ལ་ལྷག་ཏུ་བརྩེ་མཁན། མི་ཚེ་གང་བོར་ཆགས་སྲེད་སོགས་འབྲེལ་བའི་རྙོགས་གླེང་གཏན་ནས་མེད་པའི་ཤིན་ཏུ་བཙུན་པའི་ནང་པའི་དགེ་སློང་རྒན་པོ་ལོ་དགུ་བཅུར་ཉེ་བ་ཞིག་ལ་ཆགས་སྲེད་དང་འབྲེལ་བའི་ཉེས་འཛུགས་བྱས་པ་དེ་ནི་ཧ་ཅང་གིས་ལས་འབྲས་གོ་ལྡོག་ཅིག་ཆགས་ཡོད།

༧གོང་ས་མཆོག་ཀྱང་མི་ཞིག་རེད། མ་ཟད་རྒྱ་ནག་ཀུང་ཁྲན་གཞུང་ལ་མཚོན་ན། ༧རྒྱལ་བ་རིན་པོ་ཆེར་རྟག་པར་ལུག་ལྤགས་གྱོན་མཁན་གྱི་སྤྱང་གི་ཞེས་འབོད་ཀྱི་ཡོད། རྒྱ་ནག་གི་སྲོལ་རྒྱུན་ནང་པའི་སྤྱི་ཚོགས་ཀྱི་མི་མང་གི་སེམས་སུ་ནང་པའི་གྲྭ་པ་ཞིག་ཆགས་སྲེད་ཀྱི་གནད་དོན་གང་ཞིག་དང་འབྲེལ་བ་བྱུང་བ་ནི་ཀུན་སྤྱོད་ཀྱི་གནད་དོན་ཚབས་ཆེ་ཤོས་སུ་འཛིན་གྱི་ཡོད། དེའི་དབང་གི་ཆབ་སྲིད་མི་སྣ་དག་གིས་ཀྱང་གལ་ཏེ་སྤྱི་ཚོགས་ཐོག་ཤུགས་རྐྱེན་དང་ནུས་པ་ཆེན་པོ་ཡོད་པའི་གྲྭ་པ་ཞིག་གི་སྣང་བརྙན་མེད་པ་བཟོ་དགོས་ན། ཆགས་སྲེད་དང་འབྲེལ་བའི་སྐྱོན་འཛུགས་བྱ་རྒྱུ་ནི་ཆེས་སྟོབས་ལྡན་གྱི་ལག་ཆ་ཞིག་ཡིན།

དཔེར་ན། སྤྱི་ལོ་ ༢༠༡༤ ལོར་༧གོང་ས་མཆོག་གིས་ལ་དྭགས་སུ་དུས་འཁོར་དབང་ཆེན་གསུང་སྐབས་རྒྱ་ནག་ཞིན་ཧྭ་གསར་ཁང་གིས་སྐྱོན་བརྗོད་ཀྱི་རྩོམ་ཡིག་ཅིག་སྤེལ་ནས་༧གོང་ས་མཆོག་གི་དུས་འཁོར་དབང་ཆེན་གནང་བ་དེ་ཆོས་དང་མཐུན་གྱི་མེད་ཚུལ་གྱི་སྐྱོན་བརྗོད་ཅིག་བྱ་ཐབས་བྱས་ཡོད། ཡིན་ན་ཡང་། རྩོམ་ཡིག་ཧྲིལ་པོའི་ནང་དུ་རྒྱུ་མཚན་ལྡན་པའི་སྐྱོན་བརྗོད་ཚིག་གཅིག་ཀྱང་མི་འདུག་པས་སྐབས་དེར་ང་ས་སྟོང་ནས་གད་མོ་ཤོར་མྱོང་།

གང་ལྟར་དེ་ལྟ་བུའི་གནས་བབ་ཅིག་གི་འོག་ཏུ་ཡང་། ༧ཁོང་ལ་དར་མའི་དུས་ནས་ད་ལྟའི་བར་གྱི་འདས་པའི་ལོ་ངོ་བདུན་ཅུ་ལྷག་གི་རིང་གསར་ལམ་སུ་ཞིག་གིས་ཀྱང་ཆགས་སྲེད་དང་འབྲེལ་བའི་ཚུལ་མིན་གྱི་སྐྱོན་བརྗོད་ཞུ་སའི་གཞི་རྩ་ཞིག་ལག་ཏུ་ཐོབ་མེད།

འཛམ་གླིང་གི་གསར་འགྱུར་ཕལ་མོ་ཆེའང་རང་གི་ལྟ་ཀློག་གི་གྲངས་ཚད་ཀྱི་ཆེད་དུ་ཆུ་ཚོད་ཉི་ཤུ་རྩ་བཞིར་གཞན་འཚང་བསྔོག་རྒྱུར་བྲེལ་ནས་བསྡད་ཡོད་ལ། རྒྱ་ནག་གཞུང་གི་ངོས་ནས་༧གོང་ས་མཆོག་གི་སྐྱོན་འཚང་ཞིག་འཚོལ་ཐུབ་རྒྱུའི་ཆེད་དུ་དངོས་ཤུགས་བརྒྱུད་གསུམ་ནས་ཐབས་ལམ་ཡོད་ཚད་བཏོན་ནས་ལོ་ངོ་དྲུག་ཅུ་ལྷག་ལ་འཇབ་སྒུག་བྱས་ནས་བསྡད་ཡོད་པ་ལྟ་བུ་ཞིག་རེད།

ང་ཚོ་རང་ཉིད་ཀྱི་ཐོག་ལ་ཚུར་དྲན་པ་བསྐོར་ནས་བསམ་བློ་ཞིག་བཏང་ན། ཁོང་ལྟ་བུ་མཚན་དང་སྙན་གྲགས་ཕོ་སྒོ་དང་བཟོ་ལྟ་སོགས་གང་དགོས་ཡོད་མཁན་གྱི་མི་ཞིག་གིས་རང་ཉིད་གྱི་འདས་པའི་མི་ལོ་དགུ་བཅུར་ཉེ་བའི་མི་ཚེའི་ནང་ཕྱི་གཙང་ནང་གཙང་པདྨའི་སྦུབས་ལྟ་བུ་བྱས་ནས་བཞུགས་ཐུབ་པ་ནི་ལས་སླ་པོ་ཞིག་ག་ལ་ཡིན།

ཡིན་ན་ཡང་། ད་ཐེངས་ཁོང་ཚོ་ཁོང་གི་ཞལ་རྩེད་ཀྱི་གསུང་སྟངས་ཕྲན་བུ་ཞིག་ཁྱོན་ཡོངས་ནས་ཆགས་སྲེད་དང་འབྲེལ་བའི་གནད་དོན་ཞིག་ཏུ་བསམ་བློ་འཁོར་ནས་ཁོང་ཁྲོ་ལངས་པ་རེད། འདི་ནི་བསམ་བློ་ཞིབ་ཏུ་བཏང་ན་གད་མོ་ཤོར་དགོས་པ་ལྟ་བུ་ཞིག་རེད།

དོན་དངོས་ཐོག་འདི་ནི་ང་ཚོ་རང་ཉིད་དོན་དངོས་ཐོག་ཆགས་སྲེད་དང་འབྲེལ་བའི་ཚུལ་མིན་ཡིད་བྱེད་ཀྱི་རྫབ་དོང་ཞིག་ཏུ་འཕག་ཚག་རྒྱག་བཞིན་ཡོད་པའི་རང་རྟགས་བསྟན་པ་རང་རེད། ཡང་བསྐྱར་བསམ་གཞིག་ཅིག་བྱས་ན་རང་ཉིད་ལ་རང་ཉིད་ངོ་གནོང་བ་ཞིག་ཡོང་སྲིད།

གང་ལྟར་ཐེངས་འདིར་གསར་ལམ་མང་པོ་ཞིག་གིས་ལྟ་ཀློག་མཁན་གྱི་གྲངས་ཚད་དང་དེ་ལས་བྱུང་བའི་ཁེ་ཕན་གྱི་ཆེད་དུ་གནས་ཚུལ་གྱི་རྒྱབ་ལྗོངས་ཆ་ཚང་ལ་ཤེས་རྟོགས་མེད་བཞིན། ཁ་བྱང་ལ་བསྟེན་ནས་མི་གཞན་གྱི་དོ་སྣང་འདྲེན་ཐབས་བྱེད་པའི་ཕྱོགས་ལྷུང་གི་སྒྱུ་ཐབས་སྤྱད་པས་མི་ཚང་མས་དོ་སྣང་བྱ་ཡུལ་གྱི་གསར་འགྱུར་ཞིག་ཏུ་གྱུར་པ་རེད།
ཕྱོགས་གཞན་ཞིག་ནས་དངོས་གནས་ནོར་འཁྲུལ་ཚབས་ཆེན་ཞིག་བསགས་ཟིན་པ་ཡིན་ན་༧གོང་ས་མཆོག་གི་རྗེས་འཇུག་ཚོས་དང་ལེན་ཐུབ་མིན་ལ་མ་ལྟོས་པར་འགོད་སྤེལ་ལོས་དགོས། དྲང་ལྡོག་གཉིས་ཆར་གྱི་གསར་འགྱུར་འགོད་སྤེལ་བྱེད་པའི་གསར་ལམ་གྱི་རྩ་དོན་རེད། ཡེ་ཤུའི་ཆོས་ལུགས་ཀྱི་རྒྱབ་ལྗོངས་ཤུགས་ཆེན་ཡོད་པའི་སྤྱི་ཚོགས་ཀྱི་ཆོས་དཔོན་སོགས་དང་འབྲེལ་བའི་གསར་འགྱུར་སྡུག་པོ་དག་ཀྱང་དུས་ནས་དུས་སུ་འགོད་བཞིན་ཡོད་ན། ང་ཚོའི་བླ་མ་ཡིན་པ་དང་། ངའི་ཆོས་ལུགས་ཀྱི་དབུ་ཁྲིད་ཡིན་པས་ཁྱེད་ཚོས་མ་འགོད་ལབ་ས་ག་ལ་ཡོད། གནས་ལུགས་དེ་ཙམ་ངས་ཀྱང་ཤེས། ཡིན་ན་ཡང་། ད་ཐེངས་དེ་འདྲ་ཞིག་མ་རེད།

ངས་རང་ཉིད་ནང་ཆོས་ཀྱི་ངོས་ནས་༧གོང་ས་མཆོག་གི་སློབ་མ་ཞིག་ཡིན་པའི་འགྲོ་སྟངས་ཟུར་དུ་བཞག་ནས། མི་དཀྱུས་མ་ཞིག་གམ། ཡང་ན་བོད་པའི་རིག་གཞུང་དང་༧གོང་ས་མཆོག་གི་མཛད་སྤྱོད་ཐུགས་གཤིས་སོགས་ལ་ཆ་རྒྱུས་མེད་པ་ཞིག་གི་སར་བསྡད་ནས་བལྟས་ན། ༧གོང་ས་མཆོག་ཉིད་སྤྱི་ཚོགས་ཀྱི་གྲགས་ཅན་མི་སྣ་དང་། འཛམ་གླིང་གི་རིག་གཞུང་མི་འདྲ་བའི་མི་ཚང་མའི་མིག་གིས་ལྟ་ས་ཞིག་ཡིན་པའི་ཆ་ནས་གཞན་གྱིས་གོ་ནོར་ཐེབས་སྲིད་པའི་མཛད་སྤྱོད་དེ་འདྲ་གནང་ཐལ་ཤོར་བ་དེ་དགོངས་པ་གཏིང་ཟབ་མ་བཞེས་ནས་སྣང་མེད་དུ་ཤོར་བའི་ནོར་འཁྲུལ་ཞིག་རེད་ཅེས་བསམ་སྲིད། དེའི་ཆ་ནས་སྐབས་དེའི་ཁོང་གི་གནང་ཕྱོགས་དེས་རིག་གཞུང་གི་རྒྱབ་ལྗོངས་མི་འདྲ་བའི་མི་འགའ་རེའི་སེམས་ལ་ཚོར་བ་མ་སྐྱིད་པ་བྱུང་ཡོད་ན་དགོངས་དག་ཞུ་རྒྱུ་ཡིན་ཞེས་དགའ་ལྡན་ཕོ་བྲང་ཡིག་ཚང་བརྒྱུད་ནས་གསུངས་ཟིན་པ་དེ་རེད། འོན་ཀྱང་། དེ་ནི་ཁོང་གི་ངོས་ནས་མི་མང་ལ་འགན་ཁུར་བ་དང་། བརྒྱུད་ལམ་ལ་རྩི་བཀུར་ཞུས་པ་ཙམ་ཞིག་ལས། གནང་སྟངས་དེས་༧གོང་ས་མཆོག་གིས་ཀུན་སློང་ཡོད་པའི་ཐོག་ནས་ནོར་འཁྲུལ་ཞིག་བཟོས་ཡོད་པ་མཚོན་གྱི་མེད། འདིའི་སྐོར་འོག་ཏུ་རེ་རེ་ནས་ཞུ་རྒྱུ་ཡིན།

ངས་འདིར་ནན་བརྗོད་འདོད་པ་ཞིག་ནི། ༧གོང་ས་མཆོག་ལ་བསམ་བཞིན་སྐུར་འདེབས་ཞུ་མཁན་དང་། གསར་འགྱུར་ཆེན་པོ་བཟོས་ནས་རང་གི་ཁེ་སང་རགས་ཐབས་བྱེད་མཁན། མི་སྒེར་གྱི་བརྒྱུད་ལམ་ལ་དོ་སྣང་ཡོང་ཆེད་བསམ་བཞིན་སྐྱོན་བརྗོད་བྱེད་མཁན་བཅས་ལ་ངས་གཙོ་བོ་སྐད་ཆ་འདི་བཤད་ཀྱི་མེད། དེ་ཚོས་ཅིག་བྱས་ན་ང་ལས་ཀྱང་ལྷག་པ་ཞིག་དོན་དངོས་ཤེས་བཞིན་ཡོད་སྲིད། ཡིན་ན་ཡང་། སྙན་གྲགས་དང་སྒོར་མོའི་ཆེད་དུ་དེ་ལྟར་བྱེད་ཀྱིན་ཡོད་པ་རེད།

མདོར་ན། ངས་འདིར་རྩོམ་ཡིག་འདི་འདྲ་ཞིག་འབྲི་དགོས་པའི་དམིགས་ཡུལ་ནི། སྒེར་གྱི་དམིགས་ངན་པ་གང་ཡང་མེད་ན་ཡང་གནས་ཚུལ་ཁྱོན་ཡོངས་ནས་ཤེས་རྟོགས་བྱེད་པའི་ནུས་པ་མེད་པ་དང་། བསམ་བློ་ཞིབ་ཚགས་པོ་མི་འཁོར་མཁན། ནམ་རྒྱུན་༧གོང་ས་མཆོག་དང་བོད་ཀྱི་རིག་གཞུང་། བྱམས་བརྩེ་དང་བཅོས་མིན་གྱི་རྣམ་འགྱུར་བཅས་ཀྱི་ཐད་ཆ་རྒྱུས་གང་ཡང་མེད་པར། གནས་ཚུལ་ཚང་མར་ངོས་གཅིག་གི་ལྟ་སྟངས་འཛིན་མཁན་དང་། ངོས་གཅིག་ཁོ་ནའི་བཤད་སྟངས་ལ་ཡིད་ཆེས་བྱེད་མཁན་དག་ལ་བསམ་གཞིག་གི་ཁུངས་སྣེ་གཞན་ཞིག་མཁོ་སྤྲོད་བྱེད་འདོད་པ་ཙམ་ཡིན།

འགའ་ཞིག་ལ་ཕར་ལྟ་སར་མཐོང་མ་བདེ་བ་ལྟ་བུའི་སྣང་བ་བྱུང་ཡོད་པ་དངོས་ཡོད་དུ་གྱུར་ཡོད་ན་ཡང་། སྐབས་དེའི་ཡུལ་ངོས་དང་འབྲེལ་བའི་གནས་སྟངས་དང་རྒྱབ་ལྗོངས་ཧྲིལ་པོར་ཞིབ་ཚགས་པོས་བལྟས་ན་གནས་ཚུལ་ཡོངས་རྫོགས་ཧ་ཅང་རྒྱུན་ལྡན་གྱི་ཁྱབ་ཁོངས་ལས་བརྒལ་མེད། འདི་ནི་གནད་འགག་ཆེན་པོ་རེད།

བཤད་རེས་འདི་དག་ངོས་འཛིན་གྱི་དམག་འཐབ་ལྟ་བུ་ཞིག་ཏུ་སྣང་སྲིད་མོད། ངས་གང་བཤད་པ་དེ་ནི་ཡུལ་དངོས་ཀྱི་བརྒྱུད་རིམ་ཧྲིལ་པོའི་གནས་སྟངས་དངོས་དང་། སྤྱིར་བཏང་འཇིག་རྟེན་ཡོངས་ཁྱབ་ཀྱིས་གང་ལ་ཚད་འཛིན་བྱེད་པའི་ལམ་དང་ལུགས་སྲོལ། ཁྲིམས་དང་སྒྲིག་གཞིའི་ལྟ་གྲུབ་ཀྱི་རྨང་གཞིའི་ཐོག་ཏུ་འགྲེངས་ནས་བཤད་ཀྱི་ཡོད། འདིའི་ཐད་ངའི་བསམ་བློ་དྲང་ཕྱོགས་སུ་གནས་བཞིན་ཡོད། ཡི་གེ་འདི་འབྲི་བཞིན་པའི་ད་ལྟའི་སྐད་ཅིག་མ་འདིར་ཡང་ངས་རང་གི་དྲང་ཕྱོགས་ཀྱི་བསམ་བློ་རྒྱུན་སྐྱོང་ཡོང་རྒྱུར་དྲན་ཤེས་མུ་མཐུད་བསྟེན་མུས་ཡིན།

ཐོག་མར་ངས་དཔེ་མཚོན་འགའ་ཞིག་ཞུ་རྒྱུ་ཡིན། ཉེ་ཆར་ངས་དྲ་ལམ་ནས་བརྙན་ཐུང་ཞིག་མཐོང་བྱུང་། བརྙན་ཐུང་དེའི་ནང་དུ་ཁྱོ་ག་ཞིག་གིས་མི་གཞན་ཞིག་ལ་ཁ་པར་གཏོང་བཞིན་ཡོད། ཕྱི་ལོག་ཐག་རིང་དུ་ཐོན་གྲབ་ཡོད་པའི་གཟའ་ཟླས་གློ་བུར་དུ་ཁ་པར་ནང་དུ་ཁྱོ་གས་མི་གཞན་ཞིག་ལ། དོ་ནུབ་ང་གཅིག་པུ་ཡིན། ཁྱོད་རང་འདིར་ཡོང་ནས་ངའི་མཉམ་དུ་དུས་ཚོད་སྐྱེལ་རོགས་ཞེས་ལབ་བཞིན་ཡོད་པ་ཐོས། ཁྱོས་གས་དངོས་འབྲེལ་སྐད་ཆ་དེ་ག་རང་ལབ་ཡོད། མོས་ཀྱང་དེ་ག་རང་གསལ་པོར་གོ་ཡོད།
དེ་མ་ཐག་མོས་ཁྱོ་གའི་ལག་ནས་ཁ་པར་འཕྲོག་པར་མ་ཟད། ཁོང་ཁྲོ་གཏིང་ནས་ལངས་བཞིན་ཁ་པར་ཡང་ས་ལ་བསྡབས་ཟིན། འོན་ཀྱང་། ཁྱོ་གས་ཁ་པར་གཏོང་ས་ངོ་མ་དེ་སུ་རེད་ཅེ་ན། མོ་རང་གི་ཕ་རྒན་རེད། དཔེ་མཚོན་འདི་རིགས་ང་ཚོར་མང་ནས་གོམས་དྲགས་པ་ལྟ་བུ་ཞིག་ཡོད་ན་ཡང་། དོན་ལ་འདིས་ཀྱང་ང་ཚོའི་སེམས་ཁམས་ཀྱི་གནས་སྟངས་དང་ནོར་འཁྲུལ་མང་པོ་ཞིག་གི་ལྟེ་བའི་རྒྱུ་རྐྱེན་གསལ་བཤད་བྱས་ཡོད།

ཡང་ཉེ་ཆར་ང་ལ་རྒྱ་རིགས་གྲོགས་པོ་ཞིག་གིས། བོད་ནང་དུ་བུ་དང་བུ་ལག་པ་སྦྲེལ་ནས་འགྲོ་བ་དང་། གཅིག་གིས་གཅིག་གི་སྐེ་དང་ཕྲག་ཐོག་ལ་ལག་པ་བཞག་ནས་འགྲོ་བ་སོགས་རྒྱུན་ལྡན་རེད། ལུས་ཀྱི་སྐད་བརྡ་དང་འབྲེལ་བའི་གོ་བ་ལེན་སྟངས་བོད་པ་དང་ནུབ་ཕྱོགས་པ་ཧ་ཅང་མི་འདྲ །རྒྱ་ནག་ཁྲིན་ཏུ་སོགས་སུའང་སྔར་ཡིན་ན་བུ་དང་བུ་མཉམ་དུ་ལུས་པོ་ཐག་ཉེ་བོར་གཅར་བ་སོགས་ནི་ཧ་ཅང་གི་རྒྱུན་ལྡན་ཡིན། ད་ལྟ་ཚང་མས་དེ་ལྟར་བྱེད་རྒྱུར་འཛེམས་ཟོན་བྱེད་ཀྱི་འདུག་ཟེར།

དེ་ནི་དེང་སང་གི་དུས་སུ་ང་ཚོའི་སེམས་ལ་མཚན་མཐུན་ཞེས་པའི་རྣམ་རྟོག་གཞན་ཞིག་བསླེབས་ཟིན་པས་རེད། འདི་ལ་འཕྲུལ་རིག་གི་བརྡ་ཆད་ཅིག་སྤྱད་ནས་ཞུས་ན། ང་ཚོའི་ཀླད་པའི་རྩིས་འཕྲུལ་གྱི་དབང་རྩའི་མ་ལག་ཏུ་ནད་འབུ་གསར་པ་ཞིག་འཛུལ་ཟིན་པ་རེད། མདོར་ན། ང་ཚོའི་ཁོར་ཡུག་ནི་རྣམ་རྟོག་གི་དབང་གིས་རྒྱུན་ལྡན་མང་པོ་ཞིག་རྒྱུན་ལྡན་མ་ཡིན་པའི་ཕྱོགས་སུ་གོ་བ་ལེན་བཞིན་ཡོད། སེམས་ཁམས་རིག་པའི་ངོས་ནས་བཤད་ན། འདི་ནི་དུས་རབས་འདིའི་མི་རྣམས་ཀྱི་བསམ་བློའི་ན་ཚ་ཞིག་རེད།
༧གོང་ས་མཆོག་གི་ཞལ་རྩེད་དེ་དང་འབྲེལ་བའི་གསར་འགྱུར་གྱི་འོག་ཏུ་མཆན་རྒྱག་མཁན་མང་པོ་ཞིག་བཤད་སྟངས་དེ། ༧གོང་ས་མཆོག་གི་གནང་སྟངས་དེ་མཐོང་སྣང་ལ་མཛེས་པོ་མེད་པ་དང་། ལན་པོ་མེད་པ་ཞིག་རེད་སྙམ་པའི་མཐོང་ཚུལ་གསལ་སྟོན་བྱས་པ་ཙམ་མ་རེད། མང་པོ་ཞིག་གིས་བརྙན་ཐུང་དུམ་བུ་དེ་ཁོ་ནའི་རྣམ་པ་རང་ལ་དམིགས་པ་བཏད་ནས་གཞན་རྒྱབ་ལྗོངས་ངོ་མ་དེ་ཚོ་སྣང་མེད་དུ་བསྐྱུར་ཡོད།

གསར་འགྱུར་འདིར་དཔལ་འབྱོར་གྱི་རིན་ཐང་ཡོད་པ་ཞིག་ཏུ་མཐོང་ནས་བསམ་བཞིན་ལོག་འགྲེལ་ཞུ་མཁན་དག་ལ་དམིགས་བསལ་གང་ཡང་ཞུ་རྒྱུ་མེད་མོད། བྷི་བྷི་སི་དང་། སི་ཨེན་ཨེན། ཡང་ན་རྒྱ་གར་གྱི་གསར་ལམ་གང་ཞིག་ཡིན་ཡང་། དོན་དངོས་བཤད་པའི་འདུན་པ་ཡོད་པའི་དབང་དུ་བཏང་ན་གནས་ཚུལ་ཧྲིལ་པོའི་རྒྱབ་ལྗོངས་ལ་ཞིབ་འཇུག་ངེས་པར་དུ་ཐུབ་དགོས།

གནས་ཚུལ་གང་ཡིན་ཡང་། ཀུན་སློང་ངན་པ་ཡོད་པ་དང་། བྱ་བ་སྡུག་ཅག་ཡིན་པ། བརྒྱུད་རིམ་ཁ་གསལ་ཡོད་པ། མཇུག་འབྲས་ངན་པ་ཐོན་པ་སོགས་ནི་ཁྲིམས་ཐོག་ནས་བྱ་བ་དེ་སྡུག་ཅག་ཅིག་ཡིན་པར་ཐག་གཅོད་བྱེད་པའི་གཞི་རྩ་རེད།

མ་གཞི་ཉིན་དེའི་མཛད་རིམ་ཧྲིལ་པོ་བརྙན་དུ་བླངས་ཡོད། ཕྲུ་གུའི་ཨ་མ་ཡང་༧གོང་ས་མཆོག་གི་འགྲམ་དེ་གར་ཁ་མར་འཁོར་ནས་བསྡད་ཡོད། དེ་ལས་གལ་ཆེ་བ་ཞིག་ནི་མཛད་སྒོ་གྲོལ་མ་ཐག་ཕོ་བྲང་སྒོ་འགྲམ་གྱི་ནོར་ཝེ་གསར་ཁང་སོགས་ཀྱིས་འཆར་ཅན་ལྟར་༧གོང་ས་མཆོག་འཐམ་འཁྱུད་ཞུ་མཁན་གྱི་ཕྲུ་གུ་དང་། ཕྲུ་གུའི་ཨ་མ་གཉིས་ཆར་ལ་སྐུ་མདུན་དང་མཇལ་བཅར་ཞུས་པའི་མྱོང་ཚོར་བཅར་འདྲི་ཞུས་ཡོད། དེ་ནི་ཧ་ཅང་གལ་འགང་ཆེ་བའི་རྒྱུ་ཆ་ཞིག་རེད། གནས་ཚུལ་གང་བྱུང་བ་དེས་འབྲེལ་ཡོད་དོ་བདག་དང་དེའི་ནང་མའི་སེམས་ཁམས་ལ་ཕོག་ཐུག་གམ་གནོད་འཚེ་བཟོས་ཡོད་མེད་ནི་མ་གཞི་ནས་ནང་བསམ་བློ་དང་འབྲེལ་བའི་གནོད་འཚེར་སྙད་པའི་སྐྱོན་འཛུགས་དག་གི་ཞིབ་འཇུག་གི་གཞི་རྩ་གལ་ཆེ་ཤོས་ཡིན།

གནས་ཚུལ་དེ་ཁྲིམས་འགལ་ཞིག་ཡིན་པའི་དབང་དུ་བཏང་ན། ཁྲིམས་ཁང་གི་ཐག་གཅོད་ཀྱི་གཞི་འཛིན་ས་དང་། གསར་འགྱུར་ཞིག་ཡིན་པའི་ངོས་ནས་གནས་ཚུལ་འདིའི་ངོ་བོ་དྲང་ལྡོག་གང་ཡིན་ཐག་གཅོད་པའི་གཞི་འཛིན་ས་གཙོ་བོ་ཞིག་ནི་དོ་བདག་དང་དེའི་འབྲེལ་ཡོད་ཀྱི་མྱོང་ཚོར་དངོས་ལ་རྟོག་ཞིབ་བྱེད་པ་དེ་ཡིན།

བཅར་འདྲི་འདི་བོད་སྐད་དང་བོད་ཡིག་རང་གི་ཐོག་ནས་ཡིན་ན་གསར་འགྱུར་ཆེ་ཁག་དེ་ཚོས་རྒྱུས་ལོན་བྱ་རྒྱུར་དཀའ་ཁག་འཕྲད་སྲིད་མོད། ཕྲུ་གུ་དང་ཁོང་གི་ཨ་མ་གཉིས་ཆར་གྱིས་དབྱིན་ཇི་དང་རྒྱ་གར་གྱི་སྐད་རང་གིས་ལན་བཏབ་ཡོད། བློ་ཕམ་པ་ཞིག་ལ། ལྡོག་ཕྱོགས་ནས་འགྲེལ་བཤད་རྒྱག་མཁན་ཚོས་བརྒྱུད་རིམ་དངོས་གནས་འདི་དག་རྦད་དེ་སྣང་མེད་བཏང་ཡོད།

གལ་ཏེ། ང་ཕྲུ་གུ་དེ་ཡིན་པའི་དབང་དུ་བཏང་ན། ང་ལ་གནོད་འཚེ་ཆེ་ཤོས་གཏོང་མཁན་ཐུ་ཤོས་དེ་ང་དང་ངའི་ནང་མིའི་མི་ཚེའི་ནང་གི་སྤོབས་པ་དང་འོད་སྣང་དུ་གྱུར་པའི་ཉིན་མོ་དེ་ངོ་བོ་གཞན་ཞིག་ཏུ་བསྒྱུར་ཐབས་བྱས་པ་དེ་རེད་ཅེས་བརྗོད་པར་འདོད། །

ད་དུང་ངས། གསར་འགྱུར་འགོད་མཁན་ཁྱེད་ཚོས་༧གོང་ས་མཆོག་དང་འབྲེལ་བའི་དོན་དངོས་ལ་སྣང་མེད་བཟོ་མིན་ཁྱེད་རང་ཚོའི་ལས་ཀ་ཡིན་པའི་དབང་དུ་བཏང་ཡང་། ང་དང་ངའི་ནང་མིའི་དོན་དངོས་ཀྱི་ཚོར་བ་དང་དངོས་ཡོད་གནས་ཚུལ་ལ་ཡོངས་སུ་རྩིས་མེད་བྱས་པ་དེས་ང་ལ་བློ་ཕམ་མ་སྐྱིད་པའི་ཚོར་བ་སྤྲད་བྱུང་ཞེས་སྨྲ་ས་རེད། ངས་གོང་དུ་བཤད་པ་འདི་དག་བློས་བསླངས་བྱས་ནས་བཤད་པ་ཞིག་མིན།

འདི་ནས་ང་ཚོས་མཉམ་དུ་ཡིག་ཐོག་ནས་སྐབས་དེའི་ཡུལ་ངོས་ཀྱི་བྱུང་བ་དངོས་ཀྱི་བརྒྱུད་རིམ་དང་། དེ་དང་འབྲེལ་བའི་ཕྲུ་གུ་མ་བུ་གཉིས་ཀྱི་བཅར་འདྲི་ལ་ཞིབ་ལྟ་ཞིག་བྱེད།
ལར་ཡུལ་ངོས་དེ་ནི་སློབ་མ་ཚོ་གཅིག་གིས་་༧གོང་ས་མཆོག་གིས་དབུ་བཞུགས་གནང་བའི་ཐོག་ནས་སློབ་ཐོན་མཛད་སྒོ་བསྐྱངས་པ་ཞིག་རེད། སྐབས་དེར་སྟོད་ཐུང་སེར་པོ་གྱོན་པའི་ཕྲུ་གུ་དེས་༧གོང་ས་མཆོག་ལ། ངས་ཁྱོད་ལ་འཐམ་འཁྱུད་ཅིག་བྱས་ན་འགྲིག་གམ་ཞེས་དྲིས་པར། ༧གོང་ས་མཆོག་གིས་དང་ལེན་གྱི་ཕྱག་བརྡ་གནང་ཞིང་། ནམ་རྒྱུན་སྐུའི་བདེ་འཇགས་ཆེད་དོ་དམ་ནན་མོ་བྱེད་མཁན་གྱི་སྐུ་སྲུང་བས་ཀྱང་བཀག་འགོག་གང་ཡང་བྱས་མེད།

དེ་ནི་དོན་དངོས་ཐོག་དང་གཙང་སླད་མེད་མ་བཅོས་པའི་མིའི་རང་གཤིས་ཀྱི་མཛའ་བརྩེ་ལ་ཡིད་ཆེས་བྱས་པ་ཞིག་རེད། དེ་མིན་སློབ་མ་ཚོས་བླ་མར་འཐམ་འཁྱུད་བྱེད་པའི་དགོས་འདུན་འདོན་པ་ནི་གུས་མེད་བྱས་པ་ཞིག་རེད་ཅེས་སྐྱོན་བརྗོད་བྱེད་ཆོག་ལ། སྐུ་སྲུང་བ་ཚོས་ཀྱང་བདེ་འཇགས་ལ་ཉེན་ཁ་བཟོ་བའི་བྱ་སྤྱོད་ཅིག་རེད་ཅེས་འགོག་ཆག །ཡིན་ན་ཡང་། ཁོང་ཚོས་དེ་ལྟར་བྱས་མེད། སྐབས་དེའི་ཡུལ་ངོས་ནི་མཛའ་བརྩེ་དང་ཞི་ལྷོད། བག་ཕེབས་དང་ཡིད་ཆེས་ཀྱིས་ཁེངས་ཞིང་། མི་དང་མིའི་བར་གྱི་མཛའ་བརྩེ་དང་ཡིད་ཆེས་ཀྱི་སེམས་ཁམས་ཞིག་གིས་མཁའ་དབུགས་ཡོངས་རྫོགས་ཁྱབ་པ་ལྟར་སྣང་། འོན་ཀྱང་། བློ་ཕམ་པ་ཞིག་ལ་དངོས་ཡོད་ཀྱི་སྤྱི་ཚོགས་ནི་དེ་འདྲ་ཞིག་མ་རེད་ཨང་།

སྐབས་དེར་ཕྲུ་གུ་དེ་ཁོའི་ཨ་མ་དང་༧གོང་ས་མཆོག་གི་སྐུ་དྲུང་ན་འགྲེངས་བཞིན་འདུག །ཕྲུ་གུ་དེ་ཡར་སྐུ་དྲུང་དུ་བསླེབས་དུས་༧གོང་ས་མཆོག་གིས་ཀུ་རེ་དང་བསྒྲགས་ནས་ལྗགས་བསྐྱངས་ནས་ཞལ་རྩེད་གནང་ཡོད་པ་དངོས་ཡོད་ཡིན་ན་ཡང་། དབུ་ཐོད་དངོས་སུ་བཏུགས་བཞིན་ཕྲུ་གུས་ལྕེ་སྐྱོང་སྐབས་ཀུ་རེ་ཡིན་པའི་རྣམ་འགྱུར་བཅོས་མིན་དང་བཅས་༧གོང་ས་མཆོག་གིས་ལྗགས་ཕྲུ་གུའི་ལྕེར་གཏན་ནས་ཐུག་མེད་ལ། དངོས་སུ་དེ་ལྟར་གཏུགས་རྒྱུའི་དགོངས་པ་ཡང་གཏན་ནས་བཞེས་མེད། གང་རེད་ཅེ་ན། ༧གོང་ས་མཆོག་གི་ངོས་ནས་དེ་ནི་ཕྲུག་གུ་ལ་ཀུ་རེ་བརྩེས་པ་རང་རེད།

ཉེན་རྟོག་པ་དང་ཁྲིམས་རྩོད་པས་ཁྲིམས་ཀྱི་བདེན་དཔང་འཚོལ་བའི་བྱ་ཐབས་ཀྱི་ཐོག་ནས་ཞིབ་ཚགས་པོས་བརྙན་ལ་དཔྱོད་དགོས་པའི་དབང་དུ་བཏང་ན། སྐབས་དེར་ཕྲུ་གུ་དེས་གཟུགས་པོ་ཚུར་འགྲམ་དུ་བཅར་བའི་སྐབས་སུ་༧གོང་ས་མཆོག་གིས་རྩེད་མོ་ཡིན་པའི་རྣམ་འགྱུར་གསལ་པོས་ཕྲུ་གུའི་ཕྲག་པར་ཕྱག་གིས་བཞུས་ནས་བཞད་མོ་བཞད་པ་དང་། དེ་མ་ཐག་ཞལ་ཅུང་ཟད་རྒྱང་དུ་བཀྱེད་དེ་ཕྲུ་གུའི་གདོང་ལ་གཟིགས་བཞིན་ཤིན་ཏུ་བརྩེ་བའི་ཞལ་འཛུམས་མཛད་པ་མཇལ་ཐུབ།

དེ་ནས་ཡང་བསྐྱར་ཕྲུ་གུའི་ལག་པ་གཡས་པ་ནས་བཟུང་སྟེ་ཁོང་གི་འགྲམ་པ་ལ་གཏུགས་བཞིན་མུ་མཐུད་སྙིང་རྗེའི་ཐུགས་དགོངས་ཟབ་མོའི་ཀློང་དུ་ཡོངས་སུ་འཇམ་བཀླས་པ་ལྟར་ཡུད་ཙམ་བཞུགས་ཡོད།

འདི་ནི་རང་ཉིད་གཙོས་པའི་༧གོང་ས་མཆོག་གི་ཉེ་སར་གཅར་མྱོང་མཁན་མཆོག་དམན་འབྲིང་གསུམ་ཚང་མར་ཆེས་ཐུན་མོང་དང་ཆེས་ཟབ་ཤོས་སུ་བཞག་པའི་བག་ཆགས་ཅིག་ཡིན། དེ་ནི་༧གོང་ས་མཆོག་གི་ངོས་ནས་བཅོས་མ་མིན་པའི་བྱམས་བརྩེ་དེ་ང་ཚོར་གསལ་སྟོན་གནང་བར་བྱེད་པའི་ལུས་ཀྱི་བརྡ་ཐབས་ཤིག་ཡིན། འདི་ལ་དེང་སང་གི་སྐད་དུ་གཟུགས་པོའི་སྐད་ཡིག་ལབ་ཆོག །མུ་མཐུད་སྐར་ཆ་སྐར་ཆ་དྲུག་བདུན་ཙམ་གྱི་རིང་ཕྲུ་གུ་དེའི་ཕྱག་འགྲམ་པར་སྦྱར་ནས་ཐུགས་བསྐྱེད་དང་བརྩེ་བ་གཏིང་ཟབ་པོའི་ཀློང་ནས་བཀའ་མོལ་གནང་བྱུང་།

དེ་ཡང་༧གོང་ས་མཆོག་ནི་ན་ལེནྡྲའི་སློབ་དཔོན་ཆེན་པོ་རྒྱལ་སྲས་ཞི་བ་ལྷའི་རྗེས་འབྲང་དང་སྤྱོད་འཇུག་ཉམས་སུ་ལེན་མཁན་ཞིག་རེད། ཁོང་གིས་ཉིན་རྟག་པར་ཡར་བཞེངས་དུས་སྤྱོད་འཇུག་གི་ཚིགས་བཅད་གང་རུང་རེ་སྐྱོར་ནས་ཉིན་དེའི་བྱམས་བརྩེའི་ཉམས་ལེན་དབུ་འཛུགས་གནང་བཞིན་ཡོད་ཚུལ་ཡང་ཡང་གསུངས་མྱོང་། མ་ཟད་ཁོང་གིས་གཞུང་ཕྱོགས་དྲ་རྒྱའི་ཐོག་ཏུའང་སྤྱོད་འཇུག་གི་ཚིགས་སུ་བཅད་པ།

ཇི་སྲིད་ནམ་ཁའ་གནས་པ་དང་། །འགྲོ་བ་ཇི་སྲིད་གནས་གྱུར་པ། །དེ་སྲིད་བདག་ནི་གནས་གྱུར་ཅིང་། །འགྲོ་བའི་སྡུག་བསྔལ་སེལ་བར་ཤོག །
ཅེས་པའི་ཚིགས་བཅད་དེ་བྲིས་ཡོད། དེ་ནི་ཁོང་གི་མཛད་པ་ཡོངས་རྫོགས་ཀྱི་དགོངས་པ་བཞེས་སའི་ལྟེ་བ་ལྟ་བུ་རེད།

ད་དུང་ཁོང་གིས་རྟག་པར་རྒྱལ་སྲས་ཞི་བ་ལྷས་གསུངས་པའི། མིག་གིས་སེམས་ཅན་ལྟ་ན་ཡང་། །འདི་དག་ཉིད་ལ་བརྟེན་ནས་བདག །སངས་རྒྱས་ཉིད་དུ་འགྱུར་རོ་ཞེས། །དྲང་ཞིང་བྱམས་པའི་ཚུལ་གྱིས་ལྟ། །ཞེས་པའི་ཚིགས་བཅད་དེའི་ནང་དོན་ཕྱག་ལེན་དུ་བསྟར་བཞིན་ཡོད། ལར་ཁྱེད་ཚོའི་ངོས་ནས་ངས་འདིར་སྤྱོད་འཇུག་གི་ལུང་འདྲེན་ཁུར་ནས་དྲ་འབུ་ཚོར་ཁ་བརྡ་བྱེད་པ་ནི་ཧ་ཅང་གི་གླེན་ལས་ཤིག་རེད་དགོངས་སྲིད་ན་ཡང་། ༧གོང་ས་མཆོག་གི་ཐུགས་དགོངས་དང་གནང་ཕྱོགས་ལ་དོན་དངོས་དང་མཐུན་པའི་གོ་བ་ཞིག་ལེན་དགོས་ན། ཁོང་གི་ཉིན་རེའི་བསམ་བློ་དང་ཉམས་ལེན་གྱི་རྒྱབ་ལྗོངས་སུ་གྱུར་པའི་ལྟ་གྲུབ་དང་སློབ་གསོ་སོགས་ཀྱི་ཁོར་ཡུག་ལ་རྒྱུས་ལོན་ཞིབ་ཚགས་པོ་ཞིག་ཡོང་དགོས་པ་ནི་ཧ་ཅང་ཚན་རིག་དང་མཐུན་པ་ཞིག་ཡིན།

ད་དུང་ཁོང་གིས་འགྲོ་བ་སེམས་ཅན་ཚང་མ་མི་གཅིག་པ་ཡིན་པའི་འདུ་ཤེས་གཏིང་ཟབ་པོ་ཞིག་གིས་གཞན་དང་འབྲེལ་ལམ་འཛིན་གྱི་ཡོད་ཅིང་། འདི་ནི་གོང་ས་མཆོག་གི་ཆེས་བླ་ན་མེད་པའི་དགོངས་པ་བཞེས་སྟངས་ཤིག་རེད། ཨ་རིའི་སྲིད་འཛིན་ནས་སྤྱིར་བཏང་གི་གྲྭ་ཆུང་དཀྱུས་མ་སུ་འདྲ་ཞིག་ལ་ཐུག་ཀྱང་། ཚང་མ་མི་གཅིག་པ་ཡིན་པ་དང་། གོ་ལ་སྔོ་རིལ་འདིའི་ཐོག་ཏུ་མཉམ་འཛོམས་བྱུང་བའི་ནང་མི་གཅིག་མཚུངས་ཡིན་པའི་བཀའ་མོལ་གནང་བཞིན་ཡོད།

དེ་ནི་དུས་རབས་འདིའི་༧གོང་ས་མཆོག་གིས་སའི་གོ་ལའི་ཐོག་གི་མི་རྣམས་ལ་བཞག་པའི་བག་ཆགས་ཟབ་ཤོས་དེ་ཡིན་པར་བརྗོད་ན་ཐལ་ཆ་གང་ཡང་མེད། ཡིད་མ་ཆེས་ན་ད་བར་༧གོང་ས་མཆོག་དང་དངོས་སུ་མཇལ་བའི་མི་ཚེའི་མྱོང་ཚོར་བྲིས་པའི་ཡི་གེ་མང་པོ་ཞིག་གིས་བདེན་དཔང་བྱེད་ངེས་ཡིན།

ད་དུང་བརྙན་དེར་མུ་མཐུད་མཇལ་སྐབས་ཡང་བསྐྱར་༧གོང་ས་མཆོག་གིས་ཕྲུ་གུའི་ལག་པ་དལ་གྱིས་ཀློད་དེ་བསྐྱར་དུ་བརྩེ་བའི་སྤྱན་ཟུང་གིས་ཕྲུ་གུར་གཟིགས་བཞིན།
ང་ཚོ་ཚང་མ་འགྲོ་བ་མིའི་རིགས་ཀྱིས་ཕུ་ནུ་མིང་སྲིང་གཅིག་པ་རེད་ཨང་། ཅེས་གསུངས་ཞོར་ཕྲུ་གུ་ལ་ཕྱག་གི་འཁྱུད་ཀྱིན་ཕྲུ་གུའི་མགོ་ལྟག་ལ་ཞལ་འགྲམ་སྦྱར་ནས་ཡང་བསྐྱར་བརྩེ་བ་དང་སྙིང་རྗེ་རྦ་རླབས་ལ་ཐུགས་གཏད་དེ་སྐར་ཆ་བཅུ་ཙམ་ཞིག་གི་རིང་དེ་མུར་དགོངས་པ་གཏད་ནས་བཞུགས་བཞིན་འདུག །

སྐབས་དེར་ཚོགས་ཁང་ཡོངས་རྫོགས་དལ་ཅག་གེར་ཡོད་ཅིང་། ཁོང་གི་ངོས་ནས་ཕྲུ་གུ་འདི་ནི། མ་སྨིན་པ། ཉམ་ཆུང་། ནུས་པ་མེད་པ། ལོ་ན་མ་སོན་པ། བསམ་བློ་གཏོང་མི་ཤེས་པ་སོགས་ང་ཚོའི་ནམ་རྒྱུན་གྱི་ལྡོག་ཕྱོགས་ཀྱི་བསམ་ཚུལ་གྲངས་མེད་ཅིག་གཡོག་བཞིན་ཡོད་པའི་ཕྲུ་གུའི་སྣང་བརྙན་དེ་མིན་པར། ཚོགས་ཁང་དེའི་ཆ་ཤས་ཤིག་ཡིན་པ། ཐ་ན་ཚོགས་ཁང་དེའི་ཆེས་བླ་ན་མེད་པའི་མ་འོངས་པའི་ཚབ་མཚོན་ལྟ་བུ་ཞིག་ཡིན་པར་གཟིགས་བཞིན་ཡོད་དེ། དེའི་དབང་གིས་སྐབས་དེའི་ཚོགས་ཁང་ཡོངས་རྫོགས་ཕྲུ་གུ་དེར་དབང་བ་ལྟ་བུ་ཞིག་ཏུ་གྱུར་ཡོད།

དེང་སང་གི་སྐད་ཆ་བཤད་སྟངས་ལྟར་གུའི་ཆེ་མཐོང་དང་ཐོབ་སྟངས་ཀྱི་ངོས་ནས་བཤད་ན། འདི་ལས་ལྷག་པའི་ཆེ་མཐོང་ཞིག་མེད་པ་ལྟ་བུའི་ཚད་དུ་བསླེབས་ཡོད། དུས་རྒྱུན་བླ་ཆེན་དཔོན་ཆེན་ཚོས་མི་དཀྱུས་མ་ཚོར་ལྟ་སྟངས་འཛིན་སྟངས་དང་། དཀྱུས་མ་ཚོ་དྲུང་དུ་བསླེབས་སྐབས་གྱི་རྣམ་འགྱུར་དང་བཀའ་མོལ་གནང་སྟངས་ནི་ང་ཚོར་རྒྱུས་ཡོད་ཅིག་ཡིན་ན་ཡང་། ༧གོང་ས་མཆོག་ནི་མི་མཆོག་དམན་ཚང་མ་ལ་རྣམ་པར་དག་པའི་ལྷག་བསམ་ཁོ་ནས་བཀའ་མོལ་གནང་མཁན་ཞིག་ཡིན་པ་བཞིན། སྐབས་དེར་ཡང་ཆེས་རྒྱུན་ལྡན་ཡིན་ལ་ཆེས་དམིགས་བསལ་ཡིན་པའི་གནང་སྟངས་དེ་གས་ཕྲུ་གུ་དེར་དང་ལེན་གནང་ཡོད།

མཚམས་འདིར་བསླེབས་དུས། ངས་རྒྱལ་གྱི་སྲིད་བློན་གཞོན་པ་ཟུར་པ་ཨེལ་ཀེ་ཨ་ཌི་ཝ་ནི་ (Lal Krishna Advani) མཆོག་གིས་བཀའ་མོལ་ཞིག་དྲན་བྱུང་། ཁོང་གིས། “༧གོང་ས་མཆོག་སྔར་ཞིག་ལ་ར་ཤི་གྷེ་ཤིའི་ཡེ་ཤུའི་དུས་སྟོན་ཞིག་ལ་ཕེབས་སྐབས། ཡེ་ཤུའི་ཆོས་ལུགས་གསར་མ་དང་རྙིང་མའི་ཆོས་དཔོན་རྒན་རབས་གཉིས་འདུག །སྐབས་དེར་༧གོང་ས་མཆོག་གིས་ཁོ་གཉིས་ལ་འཐམ་གནང་སྟེ། མཉམ་འཛོམས་བྱེད་བཅུགས་ནས་ཁོང་གིས་ཁོ་གཉིས་ཀྱི་ཨོག་ཚོམ་ནས་འཐེན་པ་གནང་སོང་བས་གཉིས་ཀ་དགའ་པོ་བྱུང་སོང་། ངས་དེ་ནི་ཁོང་གིས་སུ་གཅིག་ལའང་གནོད་འཚེ་བྱ་རྒྱུའི་ཀུན་སློང་རྩ་བ་ནས་མ་འཆང་བས་ཡིན་པ་ངོས་ཟིན་བྱུང་།” ཞེས་བརྗོད་ཡོད། དེ་ནི་༧གོང་ས་མཆོག་གི་ལྷད་མེད་ཀྱི་མཛའ་བརྩེས་སྐྱེ་བོ་རྣམས་ལ་བཞག་པའི་བག་ཆགས་ཁྲི་ཁྲི་འབུམ་འབུམ་གྱི་ནང་ནས་རྒྱ་མཚོའི་ནང་གི་ཆུ་ཐིག་གཅིག་ཙམ་རེད།

ད་དུང་ནོ་བྷེལ་ཞི་བདེའི་གཟེངས་རྟགས་བཞེས་མྱོང་མཁན་སྐུ་ཞབས་ཀེ་ལ་ཤི་སཏྱར་ཐི་ (Kailash Satyarthi) མཆོག་གིས་ཡིད་སེམས་འགུལ་བའི་བཀའ་མོལ་འདི་འདྲ་ཞིག་གནང་མྱོང་སྟེ། ཁོང་གིས་གསུངས་དོན། “ཐེངས་ཤིག་ང་འཇར་མན་རྒྱལ་ས་བྷར་ལན་གྱི་དུས་སྟོན་ཞིག་ལ་སྐད་ཆ་བཤད་པར་སྐད་བཏང་བྱུང་། སྐབས་དེར་༧གོང་ས་མཆོག་སྐུ་མགྲོན་གཙོ་བོར་གདན་ཞུ་གནང་འདུག་ལ། སྟབས་ལེགས་ནས་ངེད་གཉིས་སྡོད་ས་མཉམ་དུ་འཁེལ་འདུག །ཁོང་གིས་ང་ལ་ལག་པ་འཆང་བྱུང་བས་ངའི་སེམས་སུ་ཆོས་ཀྱི་གསོན་ཤུགས་ཤིག་རྒྱས་སོང་། ངས་ཉིན་ཤས་རིང་ལག་པ་འཁྲུ་རྒྱུ་མིན་བསམ་པའི་ཀུན་སློང་ཞིག་འཁོར་བྱུང་། ༧གོང་ས་མཆོག་གིས་སུ་དང་ཐུག་འཕྲད་གནང་ཡང་དབུ་ཐུག་གནང་གི་ཡོད་པ་ལྟར། ང་ལའང་སྐབས་དེར་དབུ་ཐུག་གནང་བྱུང་བས། ངས་ཉིན་ཤས་རིང་མགོ་ཡང་འཁྲུ་རྒྱུ་མིན་པའི་ཐག་གཅོད་བྱས་པ་ཡིན། ངས་དངོས་གནས་ཉིན་ཤས་རིང་མགོ་དང་ལག་པ་འཁྲུས་མེད།” ཅེས་བཤད་ཡོད།

དེ་ཡང་རྒྱ་གར་གྱི་གྲོས་ཚོགས་གོང་མའི་ལ་དྭགས་པའི་མཐུས་མི་འཇམ་དབྱངས་ཚེ་རིང་རྣམ་རྒྱལ་གྱིས་ཁ་སང་རང་གི་གཏམ་བཤད་དུ། ༸ ང་རང་ཚོ་ལ་དྭགས་པ་ཡོངས་ལ་རྒྱུས་མངའ་ཡོད་པ་ཡང་ཁ་ཆེའི་ཆོས་ལུགས་པའི་མི་སྣར་མཇལ་ཁ་སྩལ་སྐབས་ཁོང་ཚོའི་སྨ་ར་འཐེན་པ་དང་། ཡང་མགོར་སྐྲ་སྤུ་མེད་མཁན་དག་ལ་ཐལ་ལྕག་ཞུ་བ། གཞོན་ནུ་ལ་སྐུ་རྩེད་གནམང་བ་སོགས་ཀྱི་མཛད་པ་ནི་སྐུ་མདུན་གྱི་བྱམས་བརྩེ་ངོ་མ་དེའི་མཚོན་བྱེད་ཡིན། སུ་ཞིག་ལའང་ཀུན་སློང་ངན་པས་དམའ་འབེབས་བྱེད་པའི་ཐུགས་བཞེད་དང་། མ་རུང་བའི་སྤྱོད་པ་ཕྲ་མོ་ཚུན་ཆད་ཅིག་གི་དྲི་མ་ཙམ་ཡང་སྐུ་མདུན་ལ་འགོས་མེད་པ་དེར། ལ་དྭགས་པ་ཡོངས་དཔང་པོ་ཡིན། ཞེས་བཤད་པ་ལྟར། ༧གོང་ས་མཆོག་གིས་སྐུ་རྩེད་གང་འདྲ་བྱས་ཀྱང་དེ་ལ་སུས་ཀྱང་༧གོང་ས་མཆོག་གིས་ང་ལ་གུས་ཞབས་མེད་པ་བྱས་སོང་བསམ་གྱི་མེད་དེ། རྒྱུ་མཚན་ནི། ཁོང་ཚོས་གོང་ས་མཆོག་གི་ཞལ་ཞེ་གཉིས་མེད་ཀྱི་བརྩེ་བ་དེ་སེམས་ཐོག་ནས་ཚོར་གྱི་ཡོད་པས་ཡིན།

འདི་ལ་དགོས་ནས། སངས་རྒྱས་ཀྱི་གསུང་གྲགས་ཅན་ཚིགས་སུ་བཅད་པའི་མཛོད་དུ། བསམ་པ་ནང་ན་ཡོད་པ་ཀུན། ཕྱི་རོལ་དུ་ནི་ཉེ་བར་དམིགས། །ཞེས་གསུངས་ཡོད།
བརྙན་གྱི་ནང་དུ་ཕྲུ་གུ་དེ་དལ་བུས་སྐུ་དྲུང་ནས་ཕར་ཐོན་གྲབ་བྱེད་སྐབས་ཡང་བསྐྱར་༧གོང་ས་མཆོག་གིས་ཐུགས་ཚོར་ཆེན་པོས་ཕྲུ་གུ་དེར་ཐུགས་རྗེ་ཆེ་ཞེས་གསུངས་ནས། ཁྱོད་ཀྱིས་ཞི་བདེ་དང་བདེ་སྐྱིད་ལ་བརྩོན་པའི་མི་བཟང་བོ་དེ་ཚོ་མིག་དཔེར་འཛིན་དགོས། མ་རབས་ངན་པ་དེ་ཚོ་ལ་སློབ་སྦྱོང་མ་བྱེད། མི་མ་རབས་ཀྱི་རྗེས་སུ་མ་འགྲོ །ཞེས་ཕྱག་འཛུབ་གེར་ནས་ཐུགས་ཤིན་ཏུ་བསྒམ་པའི་རྣམ་འགྱུར་གྱི་བཀའ་ལན་གནང་སོང་།

ཕྱུག་བདག་ཚོས་སྒོར་མོ་ཁོ་ནའི་ཆེད་དུ་དེང་རབས་ཀྱི་རོལ་རྩེད་སྣ་ཚོགས་བཟོས་ནས་ཕྲུ་གུ་ས་ཡ་མང་པོའི་བདེ་ཐང་དང་མི་ཚེ་ལ་ཤུགས་རྐྱེན་ངན་པ་སྤྲོད་མཁན་ཚོར་ཁོང་ཁྲོ་མི་ཟ་བར། བླ་ན་མེད་པའི་བྱམས་བརྩེས་མི་ཚེའི་ལམ་སྟོན་གནང་མཁན་གྱི་དགེ་སློང་བགྲེས་པོ་ཞིག་ལ་ཕྲུ་གུའི་དཔུང་གཉེན་ཡིན་འདོག་གིས་ཉེས་འཛུགས་བྱེད་པ་ནི་དྲིན་ལན་ལོག་མཇལ་ཞིག་རེད། ཡིན་ན་ཡང་། ང་ལ་དེའི་ཐད་ཁྱེད་ཚོར་ཁོང་ཁྲོ་ཟ་བཞིན་པ་དེ་འདྲ་མིན། འདི་ནི་ཐུན་མོང་གིས་གདོང་ལེན་དགོས་པའི་ང་ཚོའི་མི་རབས་འདིའི་སེམས་ཁམས་ཀྱི་ན་ཚ་དང་ཀུན་སྤྱོད་ཀྱི་ཉམས་ཆག་རེད།

མུ་མཐུད་ང་ཚོས་སྐབས་དེའི་བརྙན་ལ་བལྟས་ན། ཕྲུ་གུ་དེས་ཀྱང་ཡིད་ལ་ངེས་པའི་རྣམ་འགྱུར་གྱིས་མགོ་ལྕོགས་ལྡེམ་ལྡེམ་བྱས་པ་མཇལ་དུ་ཡོད། སྐབས་དེར་གོང་ས་མཆོག་གི་བཀའ་མོལ་ནི་འཛམ་གླིང་གི་མི་ཆེན་པོ་དང་། ཚོགས་སྡེ་དང་མི་སྒེར་གང་འདྲ་ཞིག་ལའང་གསུང་སྲིད་པའི་གལ་ཆེ་བའི་མི་ཚེའི་བསླབ་བྱ་ཞིག་རེད། ང་ཚོར་ཁ་ཡོད་ལག་ཡོད་ཀྱི་དགོས་པ་དེའང་རེད། སྐབས་དེར་ཁོང་གི་མདུན་ན་ཡོད་པའི་ཕྲུ་གུ་དེ་ནི་ང་ཚོའི་བསམ་པ་ནང་བཞིན་གྱི་བསམ་མེད་ཅིག་མིན་པར། འོད་དུ་མཚེར་བའི་མིའི་རིགས་ཀྱི་མ་འོངས་པའི་བདག་པོར་བཞེངས་རྒྱུའི་ནུ་བོ་ཞིག་རེད། ༧གོང་ས་མཆོག་ཐུགས་ཀྱི་གཏིང་ནས་དེ་ལྟར་དགོངས་ཀྱི་ཡོད་པ་ངས་གཏིང་ཟབ་པོས་ཚོར་ཐུབ་ཀྱི་འདུག །

དེ་མུར་གོང་ས་མཆོག་གིས་ཡང་བསྐྱར་ཕྲུ་གུ་དེ་སྐུ་གམ་དུ་བླངས་ནས་དམ་པོར་འཁྱུད་གནང་ཞིང་། ཕྲུ་གུས་ཀྱང་འཛེམས་དོགས་དང་འཇིགས་སྣང་། དོགས་མ་བདེ་བ་སྤུ་ཙམ་མེད་པར་ཕྲུ་གུ་ཞིག་རང་གི་ཨ་མྱེའི་འགྲམ་དུ་ཡོད་པ་བཞིན་གྱིས་༧གོང་ས་མཆོག་ལ་ཐ་མའི་འཐམ་འཁྱུད་དེ་ཞུས་ཡོད། སྐབས་དེར་༧གོང་ས་མཆོག་གིས་ཕྲུ་གུ་དེ་དང་མཉམ་དུ་མཛའ་བརྩེའི་བཀའ་ལན་གནང་སྟངས་ནི་སྤྱིར་བཏང་༧གོང་ས་མཆོག་གིས་ཨ་རིའི་སྲིད་འཛིན་བྷུ་ཤི་དང་། ཨ་ཧྥི་རི་ཀའི་ཆོས་དཔོན་ཀྲུ་ཀྲུ། དེང་རབས་ཀྱི་གླུ་མ་སྐད་གྲགས་ཅན་ལེ་ཀྲི་སྒ་སྒ་ནས་དགོན་པ་དང་གྲོང་གསེབ་པ་དཀྱུས་མ། དེ་བཞིན་རི་བོ་ཧི་མ་ལ་ཡའི་གངས་རིའི་མུ་ཁྱུད་བརྒལ་ནས་སྲོག་བསྡོས་ཀྱིས་གསེར་ཞལ་མཇལ་དུ་ཡོང་མཁན་གྱི་གསར་འབྱོར། ཕེབས་ལམ་གཡས་གཡོན་དུ་བང་བསྒྲིགས་བཞིན་པའི་འགྲུལ་པ་དག་ལ་གནང་བའི་མཛའ་བརྩེའི་ཕྱུག་པའི་བཅོས་མིན་གྱི་རྣམ་འགྱུར་དེ་རང་རེད།

འདིའི་ཐད་ཁོ་བོས་ཀྱང་ཐེངས་མང་པོར་༧གོང་ས་མཆོག་མཇལ་སྐབས། བླ་མ་ཁོང་གི་སྤྱན་འོག་ཏུ་མི་ཚང་མ་འདྲ་མཉམ་ཡིན་པ་དང་། ཡང་ན་མི་ཚང་མ་དམིགས་བསལ་ཡིན་པའི་བརྗོད་པར་དཀའ་བའི་ཚོར་བ་དེ་དག་ནམ་ཡང་བརྗེད་དུ་མེད་པ་ཞིག་ཡིན། ཁོང་གི་ཕྱག་འོག་ཏུ་བསླེབས་པའི་སྐབས་ཀྱི་དྲོད་ཁོལ་དེ་ནི་སྨྲ་བསམ་བརྗོད་ལས་འདས་པའི་སྙིང་རྗེ་དང་བྱང་ཆུབ་སེམས་ཀྱི་དྲོད་ཁང་དུ་བསླེབས་པ་ཞིག་ཡིན་ཞིང་། དེང་སང་གི་བཤད་སྟངས་ལྟར་བཤད་ན་འཇིག་རྟེན་གྱི་ཚད་རིམ་གཞན་ཞིག་ཏུ་བསླེབས་པ་ལྟ་བུ་ཞིག་ཡོད།

དེ་ལྟར་བརྒྱུད་རིམ་རེ་རེ་བཞིན་ཞིབ་ཏུ་མཇལ་སྐབས་ང་ལ་སེམས་ཚོར་དེ་ལས་ཀྱང་ཆེ་བ་ཞིག་བྱུང་། ༧གོང་ས་མཆོག་ནི་འཛམ་གླིང་རང་བཞིན་གྱི་མི་སྣ་ཆེན་པོ་ཞིག་རེད། ཉིན་དེའི་སྐུ་མགྲོན་གཙོ་བོ་ཡིན་པ་ཨ་ཅང་ཅང་། ད་དུང་གཡས་གཡོན་དུ་གལ་ཆེན་གྱི་མི་སྣ་ཧ་ཅང་མང་པོ་འཛོམས་ཡོད། དུས་ཚོད་དང་མཛད་བྲེལ། ཡང་ན་དགོང་ནའི་བབས་སོགས་མང་པོ་ཞིག་ལ་བཀའ་ལན་སོགས་གནང་རྒྱུར་དཀའ་སྣང་དང་ཉོབ་སྣང་ཡོང་སྲིད་པ་སོགས་ནི་ཧ་ཅང་བསམ་ཤེས་ཐུབ་པ་ཞིག་རེད།

༧གོང་ས་མཆོག་གི་མཚན་སྙན་དབང་ཐང་གི་བརྒྱ་ཆ་གཅིག་ཙམ་ཡོད་པ་ཞིག་ཡིན་ན་ཡང་། སྤྱིར་བཏང་གི་ཕྲུ་གུ་ཞིག་གི་སྐད་ཆ་ལ་བདག་སྤྲོད་དང་ཆེ་མཐོང་། ལྷད་མེད་ཀྱི་བྱམས་པོ་དེ་འདྲ་གནང་མཁན་གྱི་བག་ཡངས་དང་བཅོས་མིན་གྱི་ངང་རྒྱུད་ནི་ཧ་ཅང་མཐོང་དཀོན་པོ་ཞིག་རེད།

ཡང་དེ་ཡོད་ཚད་ཁྱོད་སྒེར་གྱི་མཐོང་སྣང་རེད། ཕྲུ་གུ་དང་ཕྲུ་གུའི་ནང་མིར་ཚོར་བ་མ་སྐྱིད་པ་བྱུང་ཡོད་སྲིད་སྙམ་ན། དྲི་བ་འདི་ཧ་ཅང་གལ་ཆེན་རེད་ལ། འདི་ནི་ང་ཚོའི་གནས་ཚུལ་འདིའི་ངོ་བོ་བཟང་ངན་གང་གི་ཕྱོགས་སུ་ཡོད་པ་མཇལ་བྱེད་ཀྱི་ཐིག་ཤིང་ལྟ་བུ་ཞིག་རེད། དེས་ན་ང་དྲི་བ་འདི་ལ་ཧ་ཅང་དགའ།

གནས་ཚུལ་འདི་ཕྲུ་གུའི་ཨ་མའི་མིག་གི་མཐོང་ས་ནས་ཕྲུ་གུ་ལུས་ཐོག་ཏུ་བྱུང་བ་ཞིག་ཡིན་སྟབས། འདིའི་ཐད་ཁོང་གཉིས་དང་འདྲ་བའི་སྐད་ཆ་བཤད་རྒྱུའི་ཐོབ་ཐང་ཡོད་མཁན་གཞན་ཞིག་འཇིག་རྟེན་འདིར་གཞན་སུ་ཡང་མེད་པ་སྟེ། དེ་ནི་འགྲོ་བ་མིའི་སྤྱིར་བཏང་གི་བསམ་བློ་དང་། ཡང་ན་ཁྲིམས་དང་ལམ་ལུགས་ཀྱི་ངོས་གཉིས་ཆར་གཞི་གྲུབ་པ་ཞིག་ཡིན།

གཤམ་དུ་ང་ཚོའི་ཁོང་མ་སྨད་གཉིས་ཀྱིས་སྐབས་ཐོག་དེ་ག་རང་དུ་བཤད་པའི་གསར་ལམ་གྱི་དྲིས་ལན་ལ་མཉམ་དུ་ལྟའོ། །

ཐོག་མར་ངས་གསལ་བཤད་ཞུ་འདོད་པ་ཞིག་ལ། གཤམ་གྱི་དྲིས་ལན་དེ་ནི་གནས་ཚུལ་འདི་བྱུང་བའི་རྗེས་ཀྱི་དུས་ཚོད་གཞན་ཞིག་གམ། གནས་ཚུལ་འདི་གསར་ལམ་དུ་ཁྱབ་རྗེས་༧གོང་ས་མཆོག་གི་ཕྱོགས་ནས་སྒྱུ་ཐབས་ཀྱིས་བཅར་འདྲི་ཞུས་པ་ལྟ་བུ་ཞིག་མ་རེད། འདི་ནི་ནོར་ཝེ་རླུང་འཕྲིན་གྱི་གསར་འགོད་པས་སྐབས་ཐོག་དེ་ཀ་རང་དུ་མཇལ་བཅར་བ་ཚོར་བཅར་འདྲི་ཞུ་བཞིན་པའི་ཉིན་རེའི་བྱེད་སྒོའི་ཆ་ཤས་རེད། ཐོག་མར་དེ་སེམས་ལ་ངེས་དགོས།

དེ་ཡང་ཕྲུ་གུས་བཤད་དོན། ༧གོང་ས་མཆོག་མཇལ་བ་ནི་ཧ་ཅང་མཛེས་སྡུག་ལྡན་པ་ཞིག་ཡིན་ཙང་། ངས་གོང་ས་མཆོག་མཇལ་ཐུབ་པ་བྱུང་བ་ནི་ཧ་ཅང་སྐལ་བ་བཟང་པོ་བྱུང་། ངས་ཁོང་གི་མདུན་ནས་མཆོག་ཏུ་གྱུར་པའི་བྱིན་རླབས་ཐོབ་སོང་། གལ་ཏེ་ང་ཚོས་བྱིན་རླབས་དེ་འདྲ་ཞིག་ཐོབ་པ་ཡིན་ན། ཁྱེད་རང་སྔར་ལས་བདེ་སྐྱིད་དང་ལྡན་པ་དང་། སྔར་ལས་ཀྱང་འཛུམ་མདངས་སྟོན་མཁན་ཞིག་ཏུ་འགྱུར་གྱི་རེད། ང་སྒེར་ལ་མཚོན་ན་འདི་ཆེས་མཛེས་སྡུག་ལྡན་པའི་ཉམས་མྱོང་ཞིག་ཡིན། ཞེས་ལན་བཏབ་ཡོད། ལན་འདི་དབྱིན་སྐད་ཀྱི་ཐོག་ནས་བཏབ་ཡོད་ཅིང་། ལན་འདེབས་སའང་༧གོང་ས་མཆོག་དང་མཇལ་ཁ་ཞུ་སའི་ས་གནས་དེ་ག་རང་རེད་འདུག །

༧གོང་ས་མཆོག་གི་འཛུམ་མདངས་ཀྱི་རིན་ཐང་དང་། དེས་ཁོང་རང་ཉིད་ཐེ་བའི་ང་ཚོའི་མི་ཚེར་ཤུགས་རྐྱེན་འདྲ་ཞིག་སྤྲོད་ཐུབ་ཀྱི་ཡོད་པའི་ཐད་ཕྲུ་གུ་ཁོའི་དྲིས་ལན་གྱི་གོ་སྟོབས་ནི་ང་ཚོ་དྲ་འབངས་ཧ་ཅང་མང་པོ་ཞིག་ལས་ལྷག་པའི་ཚད་དུ་ཐོན་འདུག །དེ་ཡང་གཙོ་བོ་ཕྲུ་གུའི་སེམས་ཁམས་ལྷད་མེད་ཡིན་པས་ལོས་ཡིན།

བུ་མོའི་ཨ་མས་ཀྱང་། ངའི་མིང་ལ་ཕ་ཡཱལ་ཁན་ནོ་སྒྲི་ཡ་ཟེར་གྱི་ཡོད། ང་འབུམ་རིམ་པ་ཞིག་ཡིན། ང་ལ་ལོ་སྔ་མ་ནས་༧གོང་ས་མཆོག་གི་མཇལ་ཁ་ཐོབ་མྱོང་། དེ་རིང་ཡང་གོ་སྐབས་བཟང་པོ་འདི་འདྲ་ཞིག་ཐོབ་བྱུང་། ཁྱད་པར་དུ་། ངའི་ནང་མི་ཚོ་དང་། ང་ཚོའི་impower གྱི་སློབ་ཐོན་པ་བཅས་མཉམ་དུ་རྩ་ཆེ་བའི་དུས་ཚོད་འདི་འདྲ་ཞིག་མཉམ་སྤྱོད་ཐུབ་པ་དེར་དགའ་སྤོབས་ཆེན་པོ་བྱུང་། ང་ཚོར་༧གོང་ས་མཆོག་གིས་བྱིན་གྱིས་བརླབས་བྱུང་། ཁོང་གིས་ང་ཚོར་འཛམ་གླིང་གི་ཞི་བདེ་ཡོད་ཚད་མི་རེ་ངོ་རེ་ནས་ཕན་ཚུན་སྤུན་ཟླ་མིང་སྲིང་གི་འདུ་ཤེས་འཛིན་པ་ཞིག་བྱུང་བ་ལས་ཡོང་དགོས་པ་ཞིག་ཡིན་པ་གསུངས་བྱུང་། དེ་ལྟ་བུའི་སྙིང་རྗེ་ཆེན་པོས་བྱིན་གྱིས་བརླབས་པའི་ཚོར་སྣང་དེ་ཚོ་ནི་ཚིག་གིས་མཚོན་ཐུབ་པ་ཞིག་མ་རེད། ཅེས་ལན་བཏབ་ཡོད།

གོང་གི་སྐད་ཆ་ནི་ད་ལྟའང་མཐོང་དུ་ཡོད་པའི་བརྙན་ལམ་གྱི་ཚིག་ཅི་བཞིན་དུ་བསྒྱུར་བ་ཞིག་ཡིན། ཁོང་མ་བུ་གཉིས་ཀྱི་མི་ཚེའི་ནང་དུ་ཆེས་ཐོབ་པར་དཀའ་བའི་བདེ་སྐྱིད་དང་མཐའ་མེད་པའི་བྱིན་རླབས་ཀྱི་ཉམས་མྱོང་ཟབ་མོ་དེ། འགའ་ཞིག་ལ་ཅིའི་ཕྱིར་ཁོང་ཁྲོ་དང་མ་བདེ་བའི་ངོ་བོར་གྱུར་པ་རེད། འདི་ནི་ལྷའི་བདུད་རྩི་ཡི་དྭགས་ལ་རྣག་ཁྲག་ཏུ་སྣང་བའི་དཔེ་དང་ཅི་འདྲའི་འདྲ་བ་ལ་ཨང་།

དེས་ན་འདིའི་ཐད་ང་ཚོས་ཀྱང་སོ་སོ་ལ་དྲི་བ་རེ་འདྲི་དགོས་པ་འདུག །
དེ་ཡང་ང་ཚོ་ལ་གནས་ཚུལ་དེ་ཁོང་མ་བུ་གཉིས་ལས་གསལ་ཆ་ཆེ་བ་རེད་དམ།
ང་ཚོ་ལ་གནས་ཚུལ་དེའི་ཐད་ཁོང་མ་བུ་གཉིས་ལས་མྱོང་ཚོར་ཟབ་པ་རེད་དམ།
ང་ཚོར་གནས་ཚུལ་དེའི་ཐད་ཁོང་མ་བུ་གཉིས་ལས་འགན་འཁྲི་ཆེ་བ་རེད་དམ།
དོན་ངོ་མར་གང་ཡང་མ་རེད།

ང་ཚོའི་རང་ཉིད་ཀྱི་དོགས་པ་རྣམ་རྟོག་དང་། སེམས་ཀྱི་གཏིང་རུམ་དུ་ཡོད་པའི་ན་ཚ་ཞིག་ཕྱིར་མངོན་པ་རེད། ང་ཚོ་ནམ་རྒྱུན་གྱི་ཚོར་བ་མང་ཆེ་བ་འདི་འདྲ་རེད། དཔེར་ན། དེ་རིང་ཁྱོད་རང་མི་ཞིག་གི་ཐོག་ཏུ་སྤྲོ་ལངས་པའམ། གང་ལྟར་སེམས་པ་མ་སྐྱིད་པར་ཡོད་སྐབས། མཐོང་སྣང་མང་པོ་ཞིག་ཁྱོད་རང་ལ་ཁ་གཏད་ནས་ཡོད་པ་དང་། སྐྱོན་ཅན་དུ་མཐོང་གིན་ཡོད་པ་རེད། འདི་ཚང་མའི་རྩ་བ་དེ་ནམ་རྒྱུན་གྱི་ད་ལྟའི་ང་ཚོའི་འཚོ་བའི་ཁྲོད་ཀྱི་ནང་སེམས་ཀྱི་དཀའ་ངལ་དང་འབྲེལ་བ་ཡོད། འདི་ལ་སྲོལ་རྒྱུན་གྱི་སྐད་ཆའི་ནང་དུ། འཁྲིས་ནད་ཅན་གྱིས་གངས་རི་སེར་པོར་མཐོང་ཞེས་ཟེར་གྱི་ཡོད།

དེང་སང་རྒྱུག་ཆེ་བའི་ཐ་སྙད་དྲ་རྒྱའི་གནོད་འཚེའི་སྟོབས་ཤུགས་ཅེས་པ་ཞིག་ཡོད། དེས་མི་མང་པོ་ཞིག་ལ་ཧ་ཅང་གི་སེམས་ཀྱི་དཀའ་ངལ་སྤྲོད་ཀྱི་ཡོད། མི་ཚེའི་རེ་བ་ཡོངས་རྫོགས་བརླག་ཏུ་འཇུག་བཞིན་ཡོད། མང་པོ་ཞིག་རང་ཤི་རྒྱག་ཏུ་འཇུག་གིན་ཡོད། འདི་དོན་དངོས་ཐོག་དཀའ་ངལ་ཆེན་པོ་ཞེ་དྲག་རེད། དྲ་ཐོག་ནས་མི་གཞན་ལ་དམའ་འབེབས་དང་འཇིགས་སྐུལ་སོགས་ཀྱི་ཞབས་མཆན་འབྲི་མཁན་མང་ཆེ་བ་ནི་གཞན་གྱི་གནས་སྟངས་ལ་རྒྱུས་ལོན་གཏན་ནས་མེད་བཞིན་ཐད་ཀའི་ཚོར་སྣང་རང་གིས་སྐད་ཆ་ཤོད་པ་དང་། དེ་ཡང་སྡུག་ས་ཁོ་ན་ནས་བསམ་བློ་གཏོང་མཁན་གྱི་རིགས་ཡིན། དེ་ཡང་ནང་སེམས་ཀྱི་ཟབ་སར་ཡོད་པའི་སྡང་སེམས་དེ་སུ་ལ་ཐུག་ན་དེ་ལ་ཁ་གཏད་ནས་ཕྱིར་སྟོན་ཐབས་བྱེད་ཀྱི་ཡོད།

དེ་ནི་དོགས་འཚེར་ནད་པའི་མངོན་རྟགས་དང་འདྲ་བར་རྒྱུ་མེད་རྐྱེན་མེད་དུ་སྣང་བ་དགྲ་རུ་ལངས་པའི་ནད་རྟགས་ཤིག་ཡིན། དེ་ཉིད་ད་ལྟའི་དུས་རབས་འདིའི་ང་ཚོའི་ཐུན་མོང་གི་སེམས་ཁམས་ཀྱི་ན་ཚ་རུ་གྱུར་ཟིན།

ཡང་བསམ་བཞིན་དུ་གཞུང་དང་ཚོགས་པ་དེ་འདྲས་དྲ་དམག་སྤྱད་ནས་གནས་ཚུལ་ཆེ་རུ་གཏོང་བ་དང་། མཆན་སྡུག་རུ་སྡུག་ཚད་རྒྱག་པ་དེ་ཚོ་ནི་སྐད་ཆ་ཁ་ཁ་ཞིག་རེད། གང་ལྟར་གནས་སྟངས་དེས་ཀྱང་ད་ཐེངས་ཀྱི་གསར་འགྱུར་འདིར་ནུས་པ་མང་པོ་བཏོན་ཡོད་པ་ནི་སྨོས་མ་དགོས་པ་ཞིག་རེད།

ངས་རང་གི་རྩོམ་ཡིག་འདིས་༧གོང་ས་མཆོག་དཀར་འདོན་བྱེད་པ་དང་། རྒྱལ་སྤྱིའི་གསར་ལམ་ཁག་གི་ཁ་གཏད་དུ་ལངས་ནས་གནས་ཚུལ་འདིར་གོ་བ་ལེན་སྟངས་ཀྱི་ཁ་ཕྱོགས་ལ་འགྱུར་བ་གཏོང་རྒྱུའི་རེ་སྟོང་བཅངས་མེད།

ལར་ངའི་སྐད་ཆ་འདི་གསར་ལམ་ཆེན་པོ་དེ་དག་གི་རྣ་ལམ་དུ་ཐོས་པའམ། ཁོང་ཚོས་དོན་དངོས་འདི་ཅི་བཞིན་ཤེས་ན་ཡང་ཁོང་ཚོས་གང་བཤད་ཟིན་པ་དེར་འགན་ཁུར་ལྡན་པའི་གསལ་བཤད་བྱེད་པ། བསྐྱར་དུ་ནོར་འཁྲུལ་ཡོ་བསྲངས་བྱེད་པ། དོན་དངོས་ཀྱི་གནས་ཚུལ་གསལ་བཤད་བྱེད་པ་སོགས་ནི་མི་སྲིད་པ་ལྟ་བུ་ཞིག་རེད།
འདིའི་ཐད་ང་ལ་ཉམས་མྱོང་གཏིང་ཟབ་ཡོད། ང་ཐའེ་ཝན་དུ་ཡུན་རིང་སྡོད་མྱོང་ཡོད། སྤྱིར་བཏང་ཐའེ་ཝན་གྱི་གསར་འགྱུར་ལ་ལྟ་རྒྱུར་དགའ་པོ་ཡོད། ཐའེ་ཝན་གྱི་གསར་འགྱུར་རང་དབང་ནི་ཧ་ཅང་ཚད་མཐོན་པོ་རེད། ཡིན་ན་ཡང་། གསར་ལམ་ཕལ་མོ་ཆེས་མི་ཞིག་ལ་མ་འགྲིགས་པ་ཞིག་བྱུང་བ་དང་། གསར་འགྱུར་ངན་པ་ཞིག་ཐོན་ན་དེ་ཁོ་ན་ཡང་དང་ཡང་དུ་འགོད་ཅིང་། མི་དེ་གཏན་ནས་ཡར་ལངས་ས་མེད་ཞིག་གི་ཚད་དུ་མ་བསྐྱལ་གྱི་བར་དུ་མི་རབས་ཚ་བརྒྱུད་དང་བཅས་པ་ཚུར་དྲུད་ནས་སྐྱོན་འཚང་ཡོད་ཚད་བརྔོགས་ངེས་ཡིན།

དེ་ཡང་ཀུན་སློང་ནི་བརྒྱ་ཆ་དགུ་བཅུ་གཞན་གྱིས་གཞན་གྱི་ལུས་ཐོག་ཏུ་བྱུང་བའི་སྡུག་བསྔལ་དང་བཀྲ་མ་ཤིས་པ་གནས་ཚུལ་དེ་རང་སྤྱད་ནས་རང་གི་བརྒྱུད་ལམ་གྱི་ཁྱབ་ཚད་དང་། ཡོང་འབབ་མཐོར་འདེགས་ཡོང་བར་བྱེད་པ་ཞིག་རེད། མཐར་གཏུགས་ན་ཕྱི་གསལ་ནང་གསལ་དང་ཁྲིམས་མཐུན་གྱི་ཐོག་ནས་གཞན་ལ་གནོད་འཚེ་གཏོང་བའི་བྱ་ཐབས་ཀྱི་ཐོག་ནས་རང་གི་མངོན་འདོད་བསྒྲུབས་པའི་ཐབས་ལམ་ཞིག་རེད།

ཕ་རོལ་པོ་དེས་ཚབས་ཆེ་བའི་ནོར་འཁྲུལ་ཞིག་བཟོས་ཡོད་ན་དེ་ལྟར་ཡིན་དུ་ཆུག་མོད། སྐབས་མང་པོ་ཞིག་ལ་བདེན་རྫུན་མ་ངེས་པའི་གསར་འགྱུར་ཞིག་ཐོན་མ་ཐག །དེ་ཉིད་ཡང་དང་ཡང་དུ་སྒྲོགས་སྤེལ་བྱེད་ཅིང་། ཐོག་མ་ནས་ཧ་ལམ་མི་དེ་དང་དེའི་འབྲེལ་ཡོད་ཚང་མ་མིའི་མཐོང་ཡུལ་དུ་ཡོང་ས་མེད་པ་ལྟ་བུ་ཞིག་བཟོས་ཟིན་པ་དང་། དེ་ནས་གནས་ཚུལ་དེ་མ་ཉེས་ཁ་ཡོག་ཡིན་པ་ར་འཕྲོད་པ་སོགས་བྱུང་བ་དེ་ཙ་ན་གསར་ལམ་དག་གིས་མི་དེ་ལ་དྲང་བདེན་ཡོད་པ་ངོས་ལེན་བྱེད་པའི་གསར་འགྱུར་ཙམ་ཡང་མི་འགོད། རང་གིས་སྔར་བཀོད་ཟིན་པའི་འབྲེལ་ཡོད་གསར་འགྱུར་དེ་ཚོ་བདེན་པ་མིན་པ་ར་འཕྲོད་ཀྱང་ད་དུང་དྲ་ཐོག་ནས་བསུབ་པ་ཙམ་ཡང་མི་བྱེད། དེ་དང་དེ་ལྟ་བུའི་བྱེད་བབས་མང་པོ་ཞིག་གིས་གསར་ལམ་དག་གིས་རང་དབང་སྤྱད་ནས་གཞན་གྱི་ཁེ་དབང་ལ་བསམ་ཡུལ་ལས་འདས་པའི་དོ་ཕོགས་གཏོང་བཞིན་པ་ངས་མཐོང་ཡོད། ཁོང་ཚོར་བཟང་ཕྱོགས་ཀྱི་ཡོན་ཏན་དང་བྱས་རྗེས་མེད་པའང་ག་ལ་ཡིན་མོད། གང་ལྟར་ང་ལ་མཚོན་ན་གསར་ལམ་ནི་རེ་བ་དང་ཡིད་ཆེས་བྱ་ཡུལ་ཞིག་ཡིན་མིན་ཐད་དོགས་པ་ཆེན་པོ་བསླེབས་ཟིན།

ཁོང་ཚོ་གསར་འགྱུར་གྱི་ཁ་བྱང་འབྲི་བར་ཧ་ཅང་མཁས་པོ་ཡོད། རང་གི་ལངས་ཕྱོགས་ཡིན་པར་ཁ་གསལ་མི་གཏོད་ཅིང་། ཁ་བྱང་ལ་བལྟས་པ་ཙམ་གྱི་གནས་ཚུལ་ཛ་དྲག་ཡིན་པ་དང་། དོན་དངོས་ངེས་བརྟན་མེད་པའི་ཚིག་བརྗོད་འབྲི་ཤེས། ཁྲིམས་ཀྱི་གསལ་ཁ་མེད་པའི་མག་མོག་གི་ལམ་ཁ་དང་། ཡི་གེའི་རོལ་རྩེད་ཀྱིས་གཞན་ལ་གནོད་འཚེ་གཏོང་བའི་ཐབས་ལམ་ལ་བྱང་ཆ་ལྡན། དེའི་ཕྱིར་ངས་ཁོང་ཚོར་བཅངས་པའི་ཡིད་ཆེས་དེར་སྔར་ནས་གས་ཆག་ཤོར་ཟིན།

སྐབས་འདིར་ཉེ་ཆར་གུས་པས་༧སྐྱབས་རྗེ་རྫོང་སར་མཁྱེན་བརྩེ་དང་མཉམ་དུ་གླེང་མོལ་ཞུས་པ་ཞིག་ཏུ་རིན་པོ་ཆེས། སྔར་ཡིན་ན་ནིའི་ཡོག་དུས་བབ་དང་བྷི་བྷི་སི་སོགས་ནི་དྲང་བདེན་གྱི་ཚད་ཐིག་ཏུ་བསམ་མྱོང་ཡོད་ལ་རྗེས་འབྲངས་པ་རྣལ་མ་ཞིག་ཡིན། ད་ཆ་ཡིད་ཆེས་དེ་དག་ཡོངས་སུ་བརླགས་ཟིན་པ་དང་། ཁོང་ཚོ་ནི་རྐྱག་རྫུན་ལ་བྱང་ཆ་ཆེ་ཤོས་ཤིག་རེད། ཅེས་གསུངས་པ་དྲན་བྱུང་། མདོར་ན། གསར་ལམ་ཁག་མང་པོ་ཞིག་ནི་རྐྱག་རྫུན་གྱི་སྒྱུ་རྩལ་བ་ཞིག་ཡིན་པར་མ་ཟད། གཞན་ལ་གཟུགས་མེད་ཀྱི་གནོད་འཚེ་གཏོང་མཁན་གཏེ་བོ་ཞིག་རེད།

བོད་ཀྱི་གཏམ་དཔེ་ཞིག་ལ། གཏམ་ལ་མདའ་མཚོན་མེད་ཀྱང་མི་སྙིང་ཚལ་བར་འབིགས་ཅེས་པ་ཞིག་ཡོད། དེ་ནི་གསར་ཁང་དེ་ཚོའི་ཆེད་ལས་རེད།
ངས་འདིར་བཤད་འདོད་པ་ནི་གཙོ་བོ་ཁོང་ཚོར་སྐྱོན་བརྗོད་བྱ་རྒྱུ་དེ་མིན་པར། ང་ཚོ་བར་མ་དོ་ན་ཡོད་པའི་མི་དཀྱུས་མ་ཚོས་གསར་ལམ་གྱི་གླེང་ཕྱོགས་ལ་ཚད་ལས་བརྒལ་བའི་ཡིད་ཆེས་བྱ་མི་རུང་ཞེས་གསལ་འདེབས་ཤིག་ཞུ་བ་ཙམ་ཡིན། མ་མཐའ་ཡང་གསར་ལམ་གྱི་གླེང་ཕྱོགས་ཀྱིས་རང་གི་ཚོར་བ་འཕར་ནས་རྟོག་དཔྱོད་ཀྱི་བསམ་བློ་ལ་འགོག་རྐྱེན་བཟོ་མི་འོས། འདི་ཧ་ཅང་གལ་ཆེན་པོ་ཞིག་རེད།

ཡང་རྒྱ་གར་ནི་བོད་ཀྱི་མི་རྣམས་ཀྱིས་རྟག་ཏུ་འཕགས་ཡུལ་ཞེས་འབོད་ས་དེ་ཡིན་ཞིང་། ༧གོང་ས་མཆོག་གིས་ང་ནི་རྒྱ་གར་གྱི་བུ་ཕྲུག་ཅིག་ཡིན་གསུངས་ཡོད། མ་ཟད་༧གོང་ས་མཆོག་གི་རྒྱ་གར་སྲོལ་རྒྱུན་རིག་གཞུང་ཉམས་གསོའི་རླབས་ཆེན་གྱི་དགོངས་བཞེད་ནི་རྒྱ་གར་གྱི་གཅེས་ནོར་རེད།

འདི་ངས་བཤད་བཞག་པ་ཞིག་མ་རེད། དེ་ཡང་༢༠༡༦ ལོའི་ཟླ་དང་པོའི་ནང་རྒྱ་གར་གྱི་རྒྱལ་ས་ལྡི་ལའི་ཨོ་བྷེ་རོ་ཡི་གསོལ་མགྲོན་ཁང་དུ་གོ་སྒྲིག་ཞུས་པའི་༧གོང་ས་མཆོག་གི་གྱ་སྟོན་གྱི་མཛད་སྒོར་རྒྱ་གར་གྱི་སྲིད་བློན་ཟུར་བ་མན་མཱ་ཧན་སིང(Dr.Manmohan Singh) ་གིས། “ཁྱེད་ཀྱིས་ང་ཚོའི་རྒྱལ་ཁབ་འདི་ཞི་བདེ་དང་འཆམ་མཐུན། བཟོད་སྒོམ་ཅན་ཞིག་ཏུ་འགྱུར་རྒྱུར་བྱིན་རླབས་སྩོལ་རོགས། ཁྱེད་རང་རྒྱ་གར་མི་མང་ལ་བཀའ་དྲིན་ཆེན་པོ་ཡིན། ཁྱེད་ཀྱིས་ང་ཚོའི་རྒྱལ་ཁབ་འདིའི་ཕུགས་བསམ་འགྲུབ་རྒྱུར་ལམ་སྟོན་གནང་རོགས་ཞུ་བཞིན་ཡོད།” ཅེས་ཞུས།

ཡང་རྒྱ་གར་གྱི་ཁྲིམས་འཛིན་བློན་ཆེན་ཟུར་བ་རམ་ཇི་ཐ་མ་ལ་ནི་ (Ram Jethamalani) ལགས་ཀྱིས་ཀྱང་། “ང་ཚོ་རྒྱ་གར་བས་འབྲས་བུ་བཟང་པོ་བསགས་ཡོད་སྟབས་ད་ལྟ་ང་ཚོར་ལས་བཟང་གི་འབྲས་བུ་ལོངས་སུ་སྤྱོད་རྒྱུ་རག་ཡོད། ང་ཚོར་ཁྱེད་ཀྱི་བྱིན་རླབས་དགོས། རྒྱ་གར་བས་ཁྱེད་ཀྱི་བཀའ་དྲིན་སྙིང་བཅངས་ཞུ་བཞིན་ཡོད།” ཅེས་གསོལ་བ་བཏབ་ཡོད། དེ་ནི་༧གོང་ས་མཆོག་གིས་རྒྱ་གར་གྱི་ས་གཞི་ཆེན་པོ་དེར་གནང་བཞིན་པའི་མཛད་པའི་ཆ་ཤས་ལ་དྲང་བདེན་གྱི་ངོས་འཛིན་བྱས་པ་ཞིག་རེད།

ཡིན་ན་ཡང་། ཐེངས་འདིར་གསར་ལམ་དང་མི་སྒེར་ཅི་རིགས་པ་ཞིག་གིས་འགན་ཁུར་མེད་པའི་གཏམ་སྤྱོད་དེ་རིགས་ཀྱིས་༧གོང་ས་མཆོག་གི་ལྷག་བསམ་རྣམ་དག་ལ་ལོག་སྒྲུབ་བྱས་ཡོད་ཅིང་། དེས་སྤྱིར་འཛམ་གླིང་དང་། དགོས་རྒྱ་གར་གྱི་རང་དབང་སྲོལ་རྒྱུན་རིག་གནས་བསྐྱར་དར་གྱི་རླབས་ཆེའི་དྲང་སྲོང་ཞིག་གི་རྩ་ཆེ་བའི་རིན་ཐང་ལ་དོ་ཕོག་གཏོང་བའི་སྦྱོར་བ་བརྩམས་པ་ཞིག་ཡིན་པའི་ངོས་འཛིན་དགོས་ངེས་སུ་གྱུར་ཡོད།

ཡང་འགའ་ཞིག་གིས། ལྕེ་སྣར་བ་ནི་བོད་པའི་རིག་གཞུང་ཡིན་ཚུལ་གྱི་འགྲེལ་བཤད་རྒྱག་གིན་འདུག །དེ་ཡང་རྒྱུ་མཚན་མེད་པ་ཞིག་མ་རེད། འབྲོག་པ་མང་ཆེ་བས་ཕོར་བ་ཡང་ལྕེས་ལྡག་པ་དང་། གནའ་སྔ་མོ་འོག་མས་གོང་མར་གུས་ཞབས་ཀྱི་བརྡར་ངེས་པར་དུ་ལྕེ་སྐྱོང་དགོས་པ་སོགས་ནི་རྒྱུན་ལྡན་རེད། ཡིན་ན་ཡང་། ངའི་ངོས་ནས་༧གོང་ས་མཆོག་གི་གནང་སྟངས་དེ་ནི་གུས་ལུགས་ཀྱི་སྒྲོམ་གཞི་བྱེ་བྲག་པ་ཞིག་གི་སྐད་ཆ་ཡིན་པའི་ངོས་འཛིན་བྱ་བཞིན་མེད། དེ་ཡང་འདི་ངའི་རིག་གནས་ཤིག་ཡིན་ཟེར་བ་དང་། ཁྱོད་ཀྱི་དེ་ལམ་ལུགས་སྲོལ་ཞིག་ཡིན་དགོས་ཟེར་བ་ཚང་མ་ཕྱི་ཚུལ་རང་ལུགས་ཀྱི་གཟུགས་བརྙན་ཙམ་གྱིས་འགྲེལ་བ་རྒྱག་སྟངས་ཤིག་རེད། དེས་ན་རིག་གནས་གོམས་གཤིས་ཁོ་ནས་འགྲེལ་བཤད་རྒྱག་འདོད་ཀྱི་འདུན་པ་དེ་ང་ལ་མེད།

གལ་ཏེ་ཀུན་སློང་མ་དག་པ་ཞིག་ཡོད་ན། རིག་གནས་གོམས་སྲོལ་ལ་ཁ་གཡར་ནས་ཀྱང་གུས་མེད་ཀྱི་ལས་ཀ་ལས་ཆོག །དེ་འདྲའི་སྣང་ཚུལ་ཉི་མ་རྟག་པར་ཡོང་གིན་ཡོད། ཀུན་སློང་ལ་སྐྱོན་མེད་ན་འགའ་རེའི་མིག་ལ་མི་བདེ་ཙམ་ཡོང་སྲིད་ཀྱང་དེ་སྐྱོན་ཆེན་པོ་ཞིག་ཡིན་པའི་ངེས་པ་ཁྱོན་ནས་མེད། མཐར་ཐུག་ས་གཙོ་བོ་ནི་ཀུན་སློང་དང་བྱུང་རིམ་དངོས་ཀྱི་སྦྱོར་དངོས་མཇུག་གསམ་གྱི་གནས་སྟངས་ལས་ཐག་གཅོད་དགོས། དེ་དང་མཉམ་དུ་མི་རིགས་སོ་སོར་སོ་སོའི་རིག་གནས་རྒྱབ་ལྗོངས་དང་འབྲེལ་བའི་སྐད་ཆ་དང་ཐ་སྙད་ཀྱིས་ཚོར་བ་སྤྲོད་སྟངས་ཧ་ཅང་མ་འདྲ་བ་ཞིག་ཡོད་པ་སོགས་ཀྱང་ངེས་པར་ཤེས་དགོས། སྐད་ཆ་དང་ཐ་སྙད་རེ་རེ་མེ་ཏོག་རྐང་རེ་རེ་ཡིན་པའི་དབང་དུ་བཏང་ན། སྐད་ཆ་དང་ཐ་སྙད་དེ་དག་རེ་རེ་ལ་སྐྱེ་ཁམས་ཀྱི་ཁོར་ཡུག་ཁ་ཁ་རེ་ཡོད་པ་འདིར་རྩི་བཀུར་ནུས་པ་ཞིག་དགོས། ཕྱོགས་གཅིག་ཁོ་ནའི་ལྟ་ཚུལ་སྤྱད་ནས་བཤད་ན་ཚང་མ་ལ་དཀའ་ངལ་གཅིག་མཚུངས་སུ་ཡོད།

ང་ལོ་ཉི་ཤུ་རྩ་གྲངས་སྔོན་ཐོག་མར་ཟི་ལང་གྲོང་ཁྱེར་དུ་བསླེབས་སྐབས་སྲང་ལམ་ནས་བརླ་ཤ་རྗེན་པར་མངོན་པའི་བུད་མེད་རིག་ན་ངོ་ཚ་ནས་ཐད་ཀར་ལྟ་མི་ཕོད། སྲོལ་རྒྱུན་གོམས་སྲོལ་གྱི་ངོས་ནས་དེ་ནི་ཆགས་སྲེད་ཀྱི་རྣམ་འགྱུར་ཞིག་རེད། ནམ་རྒྱུན་དེང་རབས་གསར་ལམ་གྱི་མདོ་འཛིན་པ་དང་གཙོ་སྐྱོང་བ་དེ་ཚོ་སྤོབས་པ་ཆེན་པོའི་སྒོ་ནས་བརླ་དང་ནུ་མ་ཕྱེད་ཙམ་མངོན་པའི་གོས་སྲབ་མོ་ཤ་མི་སྒྲིབ་ལ་མི་སྒྲིབ་ཙམ་རེ་གོན། ནུ་མ་རས་ཁུག་དང་ཐག་པས་བསྡམས་ནས་ཆེད་དུ་འབུར་དུ་གཏོད། ཐ་ན་མཚན་མ་ཡང་འབུར་དོད་དུ་མཐོང་ལ་ཁད་པ་ཞིག་བྱས་ནས་སྡོད་སྐབས། ཆོས་ལུགས་ཀྱི་ངོས་ནས་སམ། ཁྱེད་ཅག་གི་རིག་གནས་ཀྱི་རྒྱབ་ལྗོངས་མི་ཤེས་པ་ང་ལྟ་བུའི་ངོས་ནས་དེ་ནི་ཧ་ཅང་མི་འོས་པའི་མཐར་ཐུག་ཏུ་ཡོད་པ་ཞིག་རེད། དེ་ཁྱོད་ཀྱིས་བསམ་བློར་འཁོར་མྱོང་ཡོད་རྒྱུ་མ་རེད། གང་རེད་ཟེར་ན། མང་པོ་ཞིག་གིས་རང་གི་རིག་གནས་ཀྱི་ལྟ་ཚུལ་ཁོ་ན་རིག་གནས་ཐམས་ཅད་ལ་བཙན་འགེལ་བྱེད་བཞིན་ཡོད་པ་རེད། དོན་ལ་ང་ཚོ་མི་ཚང་མ་རང་རང་གི་འཇིག་རྟེན་ཞིག་ཏུ་འཚོ་བཞིན་ཡོད།

ང་དང་ང་ལྟ་བུའི་འཛམ་གླིང་གི་སྣེ་གསུམ་པའི་མི་ཚོས་ཀྱང་དེ་ནི་ནུབ་ཕྱོགས་ཀྱི་རིག་གཞུང་རེད། དེང་རབས་ཀྱི་དར་སྲོལ་རེད་སྙམ་ནས་རྒྱབ་ལྗོངས་ལ་བསམ་ཤེས་ཀྱིས་དང་ལེན་གང་ཐུབ་ཞུ་བཞིན་ཡོད་ན་ཡང་། ཁྱེད་ཚོ་མང་པོ་ཞིག་དེ་ལས་ལྡོག་སྟེ་སློབ་སྦྱོང་དང་མཐོང་རྒྱ་ཡོད་བཞིན་རང་གི་ལྟ་ཚུལ་ཁོ་ན་ཨང་དང་པོ་ཡིན་སྙམ་པའི་ང་རྒྱལ་དང་རྨོངས་ཞེན་དེས་བསྡམས་ནས་ཡོད།

དེང་སང་གི་མི་ཚོའི་བསམ་ཤེས་དང་དཀྱེས་ཡངས་ཀྱི་བསམ་བློ་དེ་ཚད་གཞི་ཧ་ཅང་ཞན་པོ་རེད། མང་པོ་ཞིག་གིས་སོ་སོའི་རིན་ཐང་དང་མཛེས་དཔྱོད་ཀྱི་ལྟ་བ་ཁོ་ན་ཚང་མའི་མཛེས་དཔྱོད་དང་རིན་ཐང་གི་ལྟ་བ་ཡིན་དགོས་སྙམ་པའི་བཙན་ཤེད་ཀྱི་བསམ་བློ་ལས་སད་མེད།

བོད་དང་ཨེ་ཤ་ཡ་ཕལ་མོ་ཆེར། ཕྲུ་གུར་ལག་པས་འཆང་བ་དང་། བྱམས་པོ་བྱེད་པ། རྩེད་མོ་འདྲ་མིན་རྩེ་བ་སོགས་ལ་ཆགས་སྲེད་ཀྱི་ངོས་ནས་ལྟ་བ་འདི་ད་ལྟ་གཞི་ནས་དར་མགོ་ཚུགས་པ་ཙམ་ཡིན། བོད་དུ་ཨ་ཅང་ཅང་། ང་ཐའེ་ཝན་དུ་ཡོད་སྐབས་ཀྱང་རང་གི་སློབ་མའི་ཕྲུ་གུ་པང་དུ་ལེན་པ་དང་། བྱམས་པོ་བྱེད་པ་སོགས་ནི་ཧ་ཅང་རྒྱུན་ལྡན་ཞིག་རེད། ཡིན་ན་ཡང་། ང་ཨོ་གླིང་དུ་བསླེབས་ནས་དེ་ལྟར་ཕོད་ཀྱི་མེད། གང་རེད་ཟེར་ན། དེ་ལྟར་བྱས་ན་ང་ལ་མཐོང་ཚུལ་གཞན་ཞིག་ཡོང་སྲིད་པ་དེ་ངས་ཤེས་ཀྱི་ཡོད། སྐབས་མང་པོ་ཞིག་ལ་འདི་ཉིད་ཡར་རྒྱས་ཤིག་ཏུ་ངོས་འཛིན་དགོས་མིན་ཐད་ང་ལ་ཐེ་ཚོམ་འདུག །དེ་ལས་ལྡོག་སྟེ། འགྲོ་བ་མིའི་བྱ་སྤྱོད་ལས་བྱུང་བའི་བསམ་བློ་དང་ཡིད་ཆེས་ཀྱི་ཉམས་རྒུད་ཅིག་ཏུ་ངོས་འཛིན་བྱེད་ཀྱིན་ཡོད་པ་འདི་ངའི་ལྟ་ཚུལ་ཡིན།

གནའ་ཡིན་ན་ང་ཚོས་ཕྲུ་གུ་ལ་ཕྲུ་གུར་ལྟ་ནས་བྱམས་པོ་བྱེད། རྒན་པས་ཕྲུ་གུ་ལ་ཞི་དྲག་གཉིས་ཀྱི་སྒོ་ནས་སྐྱོང་། ཐ་མ་དེར་རྒན་པས་གཞོན་པ་གཅེས་ཤིང་གཞོན་པས་རྒན་པར་བཀུར་བ་དང་། མི་ཚེ་གང་པོར་རྒན་པ་དང་གཞོན་པའི་བར་གྱི་མཛའ་འབྲེལ་བཟང་པོ་ཞིག་གི་རྒྱུན་མཐུད་ཐུབ་ཀྱིན་ཡོད་མོད། ད་ཆ་ནི་ཕྲུ་གུ་ཡང་ཆགས་སྲེད་ཀྱི་ཡུལ་དུ་བལྟས་ཤིང་། ཕན་ཚུན་དོགས་པ་རྣམ་རྟོག་ཚ་རུ་ཕྱིན། ཡིད་ཆེས་ཀྱི་ཚད་གཞི་དམའ་རུ་ཕྱིན་དེ་རྒན་གཞོན་བར་གྱི་འབྲེལ་ཐག་རིང་ནས་རིང་དུ་འགྲོ་ཞིང་། ཐ་མ་དེར་རྒན་གཞོན་གཉིས་ཆར་བརྩེ་བས་ཕོངས་པའི་ཁེར་རྐྱང་གི་སྡུག་བསྔལ་གྱིས་མནར་བཞིན་ཡོད།

གནའ་བོའི་རང་བྱུང་བཅོས་མིན་གྱི་འཚོ་བ་ལ་ཅི་ཙམ་སྣང་ཆུང་བྱས་པ་དེ་ཙམ་ང་ཚོར་ཕམ་ཁ་མང་བ་ཡོད། དོན་དངོས་ནི་དེ་འདྲ་ལགས་མོད། སྐད་ཆ་འདི་བཤད་སྐབས་ང་ལ་གྲོག་མ་ཞིག་གིས་རི་བོ་ཇོ་མོ་གླང་མ་ཡར་འགྱོགས་འདོད་བྱེད་བཞིན་ཡོད་པ་ལྟ་བུའི་ཚོར་སྣང་ཞིག་སྤྲད་ཀྱི་འདུག །དེ་ནི་ངའི་སྐད་ཆ་དེར་ཁྱོད་ཀྱིས་མཉན་འཇོག་བྱེད་མི་སྲིད་སྙམ་པའི་ཡིད་ཆེས་ད་ངའི་སེམས་ནང་དུ་འཛུལ་བཞིན་ཡོད་པས་ཡིན།

དོན་དངོས་ཀྱིས་ད་ལྟའི་གསར་འགྱུར་འདིས་༧གོང་ས་མཆོག་གི་ངེས་པ་དོན་གྱི་མཛད་པ་འཕྲིན་ལས་ལ་དོ་ཕོགས་གང་ཡང་འགྲོ་རྒྱུ་མིན་མོད། གལ་ཏེ་འགྲོ་སྲིད་པའི་དབང་དུ་བཏང་ན་དེ་ནི་འགྲོ་བ་མིའི་ཆེས་གལ་འགངས་ཆེ་བའི་རང་དབང་དང་ཞི་བདེ། བྱམས་བརྩེ་དང་དྲང་བདེན། ཁྱད་པར་དུ་སྟོན་པ་ཐུགས་རྗེ་ཅན་དང་། ན་ལེནྡྲའི་ཤེས་ཡོན་སྙིང་སྟོབས་ཀྱི་གསོན་ཤུགས་སུ་གྱུར་པའི་མཚོན་རྟགས་ཤིག་ལ་དོ་ཕོག་བཏང་བ་ཞིག་ཡིན་པ་དང་། དེ་ནི་མིའི་རིགས་དང་རྒྱ་གར་གྱི་ས་གཞི་ཆེན་པོ་དེའི་གྱོང་གུད་རེད།
ལྷག་པར་དུ་རྒྱ་གར་གྱི་ས་གཞི་ཆེན་པོའི་ཐོག་ཏུ་ཡོད་པའི་ནང་པ་ཡོངས་རྫོགས་དང་། ཧི་མ་ལ་ཡའི་ལྗོངས་ཀྱི་མི་མང་། ཁྱད་པར་རྒྱ་གར་ལ་ཡིད་ཆེས་ཆེན་པོ་བྱེད་མཁན་གྱི་བོད་པ་ཚང་མར་བློ་ཕམ་ཆེན་པོ་བཟོས་ཡོད་པ་འདི་རྒྱ་གར་གྱི་བརྒྱུད་ལམ་དག་གི་ངོས་ནས་ངེས་པར་དུ་ཚོར་དགོས། ནམ་རྒྱུན་འདར་དབྱངས་ཀྱི་ཐོག་ཏུ་༧གོང་ས་མཆོག་གིས་མཚན་ཟུར་ཙམ་དང་། འདྲ་པར་ཙམ་ཡང་འགོད་སྤེལ་བྱས་ན་བཙོན་འཇུག་གི་ཉེས་ཆད་ཕོག་སའི་རྒྱ་ནག་ཏུའང་། ད་ཐེངས་རྒྱ་གར་གྱི་རྒྱུད་ལམ་ཁག་གི་བཤད་སྟངས་ལ་རྗེས་ཟློས་བྱས་ནས་བརྒྱུད་འགོད་བྱ་མགོ་ཚུགས་ཡོད་མོད། ཁོར་ཡུག་དེར་མཚོན་ན། གནས་ཚུལ་གང་ཡིན་པ་དེ་གསལ་བཤད་བྱེད་པའི་ལམ་ཁ་གང་ཡང་མེད་དེ། དེའི་ཆ་ནས་རང་དབང་གི་ཁོར་ཡུག་ཏུ་ཡོད་པའི་གསར་འགྱུར་དང་བརྒྱུད་ལམ་དག་གིས་སོ་སོའི་གཏམ་སྤྱོད་ཀྱི་མཇུག་འབྲས་དེར་བསམ་བློ་བསྐྱར་དུ་གཏོང་དགོས་པ་ཞིག་ཆགས་ཡོད།
ནམ་རྒྱུན་ཁྱེད་ཚོས་འཛུབ་མོ་ཕར་བཙུགས་ནས་༧རྒྱ་ནག་གཞུང་གིས་༧གོང་ས་མཆོག་ལ་སྐྱོན་བརྗོད་བྱ་བཞིན་ཡོད་པ་དང་། ༧གོང་ས་མཆོག་བོད་མི་དང་འཛམ་གླིང་གི་ནང་པ་ཡོངས་ཀྱི་དབུ་ཁྲིད། རང་དབང་དང་དྲང་བདེན་གྱི་མཚོན་རྟགས་ཡིན་པར་བཤད་ཀྱི་ཡོད་པ་དེ་བདེན་ན། དེ་རིང་ཁྱེད་ཚོས་རང་འགུལ་གྱི་སྒོ་ནས་བོད་དང་ནང་པའི་སེམས་ཀྱི་བླ་སྲོག་དེར་གནོད་འཚེ་གཏོང་ཐབས་བྱས་ཡོད་པ་འདིར་འགྲེལ་བཤད་ཅིག་དགོས་ངེས་རེད། སྔ་ཕྱི་མ་གཏོགས་གནས་ལུགས་འདི་ངོས་ཟིན་རྒྱུའི་རེ་བ་ཡོད།
དེ་དང་མཉམ་དུ་དོན་དངོས་ལ་ཞིབ་ཏུ་དཔྱོད་པའི་བློ་གྲོས་མངའ་ཞིང་། དྲང་བདེན་དང་ལས་འབྲས་དཔང་དུ་བྱེད་པའི་སྤྱི་སྒེར་མང་པོ་ཞིག་གིས་དོན་དངོས་དང་མཐུན་པའི་དཔྱད་བརྗོད་དང་བསམ་ཚུལ་མང་པོ་གསུང་ཡོད་པ་དེ་དག་ལ་ཐུགས་རྗེ་ཆེ་ཞུ་བཞིན་ཡོད། ཧི་མ་ལ་ཡའི་༧གོང་ས་མཆོག་གི་དད་འབངས་དག་གིས་ཀྱང་། ཞི་བ་དང་མི་འཚེ་བའི་ངང་ཚུལ་དང་མ་བྲལ་བའི་ཐོག་ནས་རང་གི་རྩ་བའི་བླ་མར་འཛིན་པའི་དད་གུས་དང་། ཕ་རོལ་པོའི་འགན་ཁུར་མེད་པའི་གཏམ་བརྗོད་དང་འབྲེལ་བའི་སེམས་ཚོར་གང་ཡོད་པ་ནི་གསལ་པོ་བཟོ་དགོས་རེད། དེ་ཡང་ངའི་བླ་མ་ལ་སྐྱོན་བརྗོད་མི་ཆོག་ཟེར་བ་ཙམ་མིན་པར། དངོས་འབྲེལ་མིན་པའི་འཁྱོགས་བཤད་ཀྱི་རིགས་ལ་རྒྱུ་མཚན་ལྡན་པའི་འགྲེལ་བརྗོད་དགོས་པ་དེ་ཡིན། རྫོགས་སོ།།