࿑ བཙན་བྱོལ་བོད་མིའི་གཞིས་ཆགས་ཁག་སྲ་བརྟན་དང་། རྒྱུན་གནས་། རང་ཁ་རང་གསོ་ཐུབ་པའི་འགན་དེ་གཞིས་ཆགས་སོ་སོའི་ས་གནས་མཉམ་འབྲེལ་ནས་བཞེས་དགོས་པའི་དུས་ལ་བབས་མི་འདུག་གམ།
གཞུང་པ་ཚེ་དབང་བསོད་ནམས།
བོད་མིའི་བླ་ན་མེད་པའི་དབུ་ཁྲིད་༧ སྤྱི་ནོར་༧ གོང་ས་སྐྱབས་མགོན་ཆེན་པོ་མཆོག་གི་རླབས་ཆེན་མཛད་འཕྲིན་འོག་བོད་མི་བཙན་བྱོལ་བ་རྣམས་རང་ཡུལ་དུ་ཕྱིར་ལོག་མ་ཐུབ་བར་འཚོ་བའི་མདུན་ལམ་ཆེད་གནས་ཡུལ་རྒྱ་གར་གཞུང་ནས་གཞིས་ཆགས་ཀྱི་ས་ཁང་དང་མི་མང་གི་འཚོ་བར་འགན་འཁུར་ལེན་མཁན་གནས་ཡུལ་ལུང་པའི་ཁྲིམས་སྒྲིག་འོག་ས་གནས་མཉམ་འབྲེལ་ཁག་ཆེད་དུ་བཙུགས་ནས་རང་ཁ་རང་གསོ་དང་། རང་མི་རང་ལས་བྱས་ནས་གཞན་ལ་བརྟེན་མི་དགོས་པར་མཉམ་འབྲེལ་གྱི་ཡོང་འབབས་ཐོག་ནས་ས་གནས་ཀྱི་སློབ་གྲ་དང་།
སྨན་ཁང་། གཞིས་ཆགས་ལས་ཁུངས། མཉམ་འབྲེལ་དང་བཅས་པའི་ས་གནས་ཀྱི་འགྲོ་སོང་ཆ་ཚང་ས་གནས་མཉམ་འབྲེལ་རང་ནས་འགན་བཞེས་ནས་མཉམ་འབྲེལ་དེ་དག་གཞིས་ཆགས་སོ་སོའི་གཞུང་གི་ངོ་བོར་ཐོག་མ་བཙུགས་དགོས་པའི་དམིགས་ཡུལ་ཡང་དེ་ཡིན་པ་ནས་ས་གནས་འགོ་འཛིན་རྣམས་མཉམ་འབྲེལ་གྱི་ཚོགས་གཙོའི་འགན་འཁུར་ནས་གཞིས་མཉམ་གཉིས་ཁྱིམ་ཚང་གཅིག་གི་ངོ་བོར་གནས་ཡོད་ན་ཡང་བཀའ་ཤག་སྐབས་བཅུ་གཉིས་ནས་ས་གནས་མཉམ་འབྲེལ་ཁག་རང་སྐྱོང་ལ་ཁ་རྒྱུར་ནས་ད་ལྟའི་ཆ་ལ་གཞིས་མཉམ་གཉིས་རྟ་རྒྱུགས་ན་མཉམ་རྒྱུགས་དང་གུར་རྒྱབ་ན་ཁ་སྤྲོད་ལྟབུ་མ་ཡིན་པ་མི་མང་སྤྱི་པའི་མཉམ་འབྲེལ་དེ་ས་གནས་གཞིས་ཆགས་མི་མང་གི་གཞུང་ཡིན་པ་དང་ས་གནས་འགོ་འཛིན་དེ་གཞིས་ཆགས་ཀྱི་གཞིས་འགོ་ཡིན་པའི་ཆ་ནས་ས་གནས་འགོ་འཛིན་མཉམ་འབྲེལ་གྱི་ཚོགས་གཙོ་གནང་ནས་གཞིས་མཉམ་གཉིས་ཁྱིམ་ཚང་གཅིག་གི་ངོ་བོར་གནས་ནས་ས་གནས་གཞིས་མིའི་འཚོ་བའི་མདུན་ལམ་ལ་དེ་སྔ་ལས་ལྷག་པའི་འགན་འཁུར་ནས་ས་གནས་འགོ་འཛིན་ལས་ཁངདང་། ས་གནས་འཐུས་མིའི་ཚོགས་འདུ། ས་གནས་ཀྱི་འཕྲོད་བསྟེན་སྨན་ཁང་། ས་གནས་ཀྱི་ཉིན་སློབ། ས་གནས་ཀྱི་རྒན་གསོ་ཁང་། སོགས་ས་གནས་གཞིས་ཆགས་ཀྱི་སྔོན་རྩིས་ནང་གསལ་བའི་འགྲོ་སོང་ཆ་ཚང་གཞན་བརྟེན་འཚོ་སྐྱེལ་ལ་སྐྱབས་བཅོལ་ནས་དབུས་བོད་མིའི་སྒྲིག་འཛུགས་ལ་ཞུ་མ་དགོས་པ་ས་གནས་མཉམ་འབྲེལ་གྱི་ཚོང་མཁེ་ཡོང་འབབས་ནས་གཏོང་རྒྱུའི་ལམ་ལུགས་གསར་གཏོད་ཐུབ་ཚེ་དབུས་བོད་མིའི་སྒྲིག་འཛུགས་ལ་མཛད་དཀའ་ཉུང་དུ་འགྲོ་རྒྱུར་ཕན་ཐོག་ཆེན་པོ་ཡོང་རྒྱུ་དང་། ཐོག་མ་མཉམ་འབྲེལ་བཙུགས་སྐབས་ཀྱི་དམིགས་ཡུལ་དང་མཐུན་པ་བཅས་གཞིས་ཆགས་བསྲ་བརྟན་དང་། རྒྱུན་གནས་ཐུབ་པ། རང་ཁ་རང་གསོ་དང་། རང་མི་རང་ལས། གཞན་བརྟེན་འཚོ་སྐྱེལ་གྱི་ཀུན་སློང་ཉུང་དུ་དོར་ཐུབ་པའི་ཐབས་ལམ་བཟང་བཤོས་དེ་ཡིན་པ་ནས་ད་ལྟའི་ས་གནས་མཉམ་འབྲེལ་ཁག་ནས་ས་གནས་གཞིས་ཆགས་མི་མང་གི་འཚོ་བ་ལ་འགན་འཁུར་ནས་གནས་ཡུལ་རྒྱ་གར་གཞུང་གི་ཁྲིམས་སྒྲིག་འོག་ཁྲིམས་མཐུན་གྱི་ཚོང་ལས་རྒྱ་ཆེ་ཙམ་སྤེལ་ནས་མཉམ་འབྲེལ་སོ་སོའི་ཡོང་འབབས་ལས་གཞི་ཤུགས་ཆེ་རུ་བཏང་ནས་གཞིས་ཆགས་སོ་སོའི་འགྲོ་སོང་རང་འགོ་རང་ཐོན་ཐུབ་ན་དབུས་བོད་མིའི་སྒྲིག་འཛུགས་ལ་མཛད་དཀའ་ཉུང་དུ་འགྲོ་རྒྱུ་དང་བཙན་བྱོལ་བོད་མིའི་སྤྱི་ཚོགས་ནང་གཞན་བརྟེན་འཚོ་སྐྱེལ་གྱི་བསམ་བློའི་གོམས་གཤིས་ངན་པ་རྒྱང་དུ་དོར་ཐུབ་པར་མིག་དཔེ་བཟང་པོ་འཇོག་ཐུབ་པ་བཅས་རེ་ཞིག་འདིར་འཇུག་བསྡུས་པའོ། གཞུང་པས། ༢༠༢༣/༠༩/༠༢