གཞུང་པ་ཚེ་དབང་བསོད་ནམས།
སྤྱི་འཐུས་སྐབས་བཅུ་དྲུག་གི་ཁྲིམས་འགལ་དང་སྒྲིག་འགལ་འོག་བཞག་པའི་གྲོས་ཆོད་ཡིག་ཆ་ཨང་ ༣༩ ཟེར་བ་དེའི་འཇུག་འབྲས་བཙན་བྱོལ་བོད་མིའི་མང་གཙོའི་ཀ་བ་གསུམ་གྱི་ཡ་རྒྱལ་ཆེས་མཐོའི་ཁྲིམས་ཞིབ་ཁང་ནང་ཁྲིམས་ཞིབ་པ་ཆེ་བ་དང་ཁྲིམས་ཞིབ་པ་གཞན་གཅིག་བཅས་བསྐོ་མ་ཐུབ་པ་ནས་ཆེས་མཐོའི་ཁྲིམས་ཞིབ་ཁང་ནང་ཁྲིམས་ཞིབ་པ་གཅིག་ལས་མེད་པ་ནས་མང་གཙོའི་ཀ་བ་གསུམ་གྱིས་འགན་འཁུར་ལས་དོན་གནང་རྒྱུར་ཆེས་མཐོའི་ཁྲིམས་ཞིབ་ཁང་ནང་ཁྲིམས་ཞིབ་པ་ཆ་ཚང་མེད་པ་ནས་བཙན་བྱོལ་སྤྱི་ཚོགས་ནང་ལས་དོན་མང་པོ་ཞིག་ལ་དོ་ཕོག་དང་མཐུད་ཤོར་འགྲོ་བཞིན་པ་ནས་འདིའི་འགན་ཆ་ཚང་སྤྱི་འཐུས་གྲོས་ཚོགས་ལ་ཡོད་པ་བཅའ་ཁྲིམས་དོན་ཚན་སོ་དྲུག་ནས་ངོ་སྤྲད་པ་འདི་ལྟར། ༼ བཅའ་ཁྲིམས་དོན་ཚན་སོ་དྲུག་པ། ཁྲིམས་བཟོའི་དབང་ཆ། ཁྲིམས་ལུགས་བཟོ་འགོད་དང་། གཏན་འབེབས་བྱ་རྒྱུའི་དབང་ཆ་ཡོངས་རྫོགས་བོད་མི་མང་སྤྱི་འཐུས་ལྷན་ཚོགས་ལ་ཡོད་པ་དང་། ཁྲིམས་ལུགས་དེ་དག་ཁྲིམས་སུ་བཅའ་བ་ལ་སྲིད་སྐྱོང་གིས་ཆོག་མཆན་མིང་རྟགས་འགོད་དགོས། ༽ ཅེས་གསལ་བ་ནས་མཁྱེན་ཐུབ་པ་དང་། གཞི་རིམ་མི་མང་གི་ཞུ་འབོད་ལས་འགུལ་གྱི་དགོས་འདུན་ཆེས་མཐོའི་ཁྲིམས་ཞིམ་ཁང་སླར་གསོ་གནང་རོགས་ཞུ་གི་འདུག་ན་སྤྱི་འཐུས་ཀྱི་ཚོགས་གཙོ་ཚོགས་གཞོན་སར་འཐུས་མི་བཅར་སྐབས་གཡས་ཟུར་གཡོན་ཟུར་བྱས་ནས་ཐུག་རྒྱུའི་གོ་སྐབས་མ་གནང་བ་དེ་ནི་དམངས་གཙོ་གཅིག་བསྡུད་ཀྱི་ལམ་ལུགས་ཙམ་ལས་མི་མང་མང་གཙོའི་ལམ་ལུགས་ཀྱི་རྣམ་འགྱུར་ཞིག་ག་ནས་ཡིན། མི་མང་ནས་སོ་སོའི་འཐུས་མི་ལ་བདེ་སྡུག་ཞུ་བར་ས་ཐག་འགྱངས་པོ་ནས་ཡོང་བ་ལ་ཁ་ལན་ངོས་ལེན་ཕར་བཞག་ཐུག་རྒྱུའི་གོ་སྐབས་མ་གནང་ནི་མི་མང་གིས་འཐུས་མིའི་ལྟ་སྤྱོད་ཀྱི་སྤུས་ཚད་ག་འདྲ་ཡོད་དེ་ནས་གསལ་པོ་བསྟན་པ་དང་། སྤྱི་འཐུས་ཁག་ཅིག་མི་མང་གི་ཞུ་འབོད་ལས་འགུལ་བ་ཚོ་ཐུག་ཏུ་ཕེབས་པ་ནི་མི་མང་གི་འཐུས་མིའི་མི་མང་ཚོར་གདུང་སེམས་མཉམ་སྐྱེད་ཀྱི་རྣམ་འགྱུར་བསྟན་པ་ཙམ་གྱི་མི་མང་གི་འཐུས་མིའི་བཟང་སྤྱོད་ལ་འགན་འཁུར་བར་ངོས་འཛིན་ཞུ་གི་ཡོད། སྤྱི་འཐུས་ཁག་ཅིག་མ་ཕེབས་པ་ནས་མ་ཕེབས་པའི་སྤྱི་འཐུས་ཚོའི་ལྷག་བསམ་དང་ཀུན་སློང་ལ་ལྷད་མེད་ན་ཡང་སྤྱི་འཐུས་སྒེར་གྱིས་ལྟ་སྤྱོད་མི་མང་གི་མདུན་རྣམ་འགྱུར་གསལ་སྟོན་བྱས་པ་གསལ་པོ་ཆགས་པ་དང་། གྲོས་ཚོགས་ཚོགས་དུས་ལྔ་པའི་ཐོག་གྲོས་ཆོད་བཞག་ནས་བཅའ་ཁྲིམས་བསྐྱར་བཅོས་ཚོགས་ཆུང་བཙུགས་ནས་ཚོགས་ཆུང་གི་སྙན་མཐོ་རྗེས་ལོ་སྤྱི་ཟླ་གསུམ་པའི་གྲོོས་ཚོགས་སྟེང་འཇོག་རྒྱུའི་གསལ་བསྒྲགས་སྔོན་སོང་ལ་འགན་མ་འཁུར་ནས་མི་མང་མང་པོ་ས་ཐག་འགྱངས་པོ་ནས་རྡ་སར་འདུ་འཛོམས་གནང་བ་ནི་མི་རྒྱུ་གཉིས་ལ་ངལ་བའི་རྒྱུ་ལས་ཅང་མ་མཐོང་། ང་ཚོའི་ལས་ཀ་ག་འདྲ་ཞིག་བྱེད་ཀྱི་ཡོད་ཀྱང་ཕྱོགས་མང་པོ་ལ་དཔྱད་པ་བྱས་ནས་ལས་དགོས་པ་ལས་ཧར་ར་ཧུར་རེ་དང་ཚག་ག་ཚིག་གེ་དུས་ནམ་ཡང་བྱ་མི་ཉན་པ་ནི་སྤྱི་ཚོགས་ཀྱི་བརྟན་ལྷིང་དང་བདེ་འཇགས་དང་འབྲེལ་བ་གཏིང་ཟབ་ཡོད་པ་དང་། གལ་ཆེ་ཤོས་དེ་མ་འོངས་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་། རང་དབང་ཅན་གྱི་སྡེ་ཚན་གསུམ་གྱི་འགན་འཛིན་རྣམ་པ་དང་། ས་གནས་འཐུས་མི་བཅས་ཀྱི་དམ་འབུལ་བསྐོར་དེ་ཡིན་པ་ནས་ང་ཚོའི་དམ་འབུལ་དེ་ཡང་རྒྱལ་ཁབ་གཞན་ལ་མིག་བལྟ་བྱས་ནས་ལེགས་ཆ་བླང་ནས་ཆེས་མཐོའི་ཁྲིམས་ཞིབ་པའི་མདུན་དམ་འབུལ་ཞུ་རྒྱུའི་ལམ་ལུགས་དེ་ཡང་བསམ་ཞིབ་བརྒྱུད་ནས་བསྐྱར་བཅོས་ལ་ཁ་ཕྱོགས་མ་ཐུབ་ཚེ་ང་ཚོ་སླར་ཡང་རྗེས་ལུས་ནས་ཡང་ལུས་དུ་ལྷག་སྲིད་པ་ནས་སྙིགས་དོར་བཅུད་ལེན་བརྒྱུད་ནས་གསར་བརྗེ་ལ་ཁ་ཕྱོགས་དགོས་པ་དེ་དུས་ཀྱི་དགོས་མཁོ་དང་སྤྱི་ཚོགས་ཀྱི་འཕེལ་རིམ་ལ་འགན་འཁུར་ནས་མི་མང་གི་མངོན་འདོད་སྒྲུབ་དགོས་པ་དེ་སྤྱི་འཐུས་ཁྲིམས་བཟོ་གྲོས་ཚོགས་ཀྱིས་འཐུས་མིའི་ལས་འགན་ཞིག་ཡིན་པའི་ངོས་འཛིན་དང་བཅས་རེ་ཞིག་འདིར་འཇུག་བསྡུས་སོ། རྒྱ་གར་གྱི་མེས་སྤོ་དམ་པ་གྷན་རྡིས་འཁྲུངས་སྐར་ཉིན་རང་ཁྱིམ་དུ་ཟིན་བྲིས་སུ་བཏབ་པའོ། གཞུང་པས། ༢༠༢༣/༡༠/༠༢