གཞུང་པ་ཚེ་དབང་བསོད་ནམས།
སྤྱི་ལོ་ ༡༩༥༤ ལོར་༧ སྤྱི་ནོར་༧ གོང་ས་སྐྱབས་མགོན་ཆེན་པོ་མཆོག་ནས་བོད་ཀྱི་ཆབ་སྲིད་ལམ་ལུགས་ལ་བསྒྱུར་བཅོས་གཏོང་རྒྱུར་རླབས་ཆེན་གྱི་དགོངས་པ་བཞེས་ནས་སྤྱི་ཚོགས་ལེགས་བཅོས་ལས་ཁུངས་ཆེད་འཛུགས་གནང་ནས་ལས་དོན་འགོ་འཛུགས་གནང་སྐབས་ཕྱི་ནང་གི་འགོག་རྐྱེན་འོག་ནས་རང་ཡུལ་དུ་དངོས་སུ་ལག་བསྟར་མ་ཐུབ་པ་ནས་སྤྱི་ལོ་༡༩༥༩ ལོར་རྒྱ་གར་དུ་བཙན་བྱོལ་དུ་ཕེབས་མ་ཐག་སྤྱི་ལོ་ ༡༩༦༠ ཐམ་པའི་ལོར་བོད་མི་མང་གི་སྐུ་ཚབ་ཆོལ་གསུམ་ཆོས་ལུགས་དང་བཅས་པའི་འཐུས་མི་སྤྱི་འཐུས་མི་མང་ནས་གསར་བསྐོ་གནང་ནས་མ་འོངས་བོད་ཀྱི་ཆབ་སྲིད་ལམ་ལུགས་དེ་མང་གཙོ་ལ་ཁ་ཕྱོགས་ནས་བཙན་བྱོལ་བོད་མིའི་ཆབ་སྲིད་ཀྱང་དེ་དང་ཕྱོགས་མཐུན་བྱས་ནས་བཙན་བྱོལ་བོད་མིའི་མང་གཙོ་དབུ་རྙེས་ནས་སྐབས་དེ་དུས་བཙན་བྱོལ་དུ་འབྱོར་མ་ཐག་ལ་སོང་མི་མང་གི་འཐུས་མི་སྤྱི་འཐུས་རྣམས་ད་ལྟ་ནང་བཞིན་སྤྱི་འཐུས་ཀྱི་ལས་ཁུངས་ཟུར་དུ་མེད་པ་ནས་སྤྱི་འཐུས་རྣམས་ལྷན་ཁང་ཁག་ནང་ཆ་བགོས་བྱས་ནས་ལས་དོན་གནང་བཞིན་པ་དང་། རིམ་པས་སྤྱི་ཚོགས་ཀྱི་འཕེལ་རིམ་དང་དུས་ཀྱི་དགོས་མཁོ་ལ་འགན་འཁུར་ནས་ཡར་རྒྱས་དང་ཚགས་ཚུད་དུ་ཕྱིན་ནས་སྤྱི་ལོ་ ༡༩༩༠ ལོར་སྤྱི་འཐུས་ཀྱི་གྲངས་ཚད་སྤར་ནས་བཙན་བྱོལ་བོད་མིའི་བཅའ་ཁྲིམས་ཀྱི་ཟིན་བྲིས་ཚོགས་ཆུང་བཙུགས་ནས་སྤྱི་ལོ་ ༡༩༩༡ ལོར་སྤྱི་འཐུས་སྐབས་བཅུ་གཅིག་གི་བར་འགལ་གྱི་ཁྲིམས་བཟོའི་འགན་འཁུར་བླང་ནས་བཙན་བྱོལ་བོད་མིའི་བཅའ་ཁྲིམས་དོན་ཚན་བརྒྱ་དང་བཅོ་ལྔ་ཡོད་པ་དེ་དག་གཏན་འབེབས་གནང་ནས་༧ གོང་ས་མཆོག་གི་ཆོག་མཆན་ལོ་དེའི་ཟླ་བ་ ༦ པའི་ཚེས་ ༢༨ ཉིན་ཕེབས་པ་ནས་བཙན་བྱོལ་བོད་མིའི་བཅའ་ཁྲིམས་ཀྱི་ནུས་པ་ཐོན་ནས་བཙན་བྱོལ་བོད་མིའི་མང་གཙོ་དེ་ཁྲིམས་ཀྱི་དབང་བསྒྱུར་འོག་འཚོ་ཐུབ་པའི་ལམ་སྟོན་དང་བཅས་བཅའ་ཁྲིམས་དོན་ཚན་བཅུ་གསུམ་ནང་གསལ་བའི་བོད་ཀྱི་ཡུལ་མིའི་ལས་འགན་སྒྲུབ་དགོས་པ་འདི་ལྟར། ༼ དོན་ཚན་བཅུ་གསུམ་པ། ཡུལ་མིའི་ལས་འགན། བོད་ཀྱི་ཡུལ་མི་ཚང་མས་སྒྲུབ་དགོས་པའི་ལས་འགན་གཤམ་གསལ།
༡ བོད་མིའི་སྒྲིག་འཛུགས་ལ་ཡིད་ཆེས་བློ་གཏད།
༢ བཅའ་ཁྲིམས་དང་། ཁྲིམས་ལུགས་ཁག་ལ་སྙིང་ནས་བརྩི་བཀུར་དང་། ཉམས་ལེན།
༣ བོད་དོན་བདེན་མཐའ་གསལ་ཐབས་ལ་འབད་བརྩོན་བྱ་རྒྱུ།
༤ ཁྲིམས་ལུགས་གཏན་འབེབས་གཞིར་བཟུང་དཔྱ་ཁྲལ་སྒྲུབ་འབུལ།
༥ བོད་མིའི་སྒྲིག་འཛུགས་དང་། མང་ཚོགས་ལ་ཛ་དྲག་རྐྱེན་ངན་བྱུང་སྐབས་ཁྲིམས་ཐོག་ནས་བསྐུར་བའི་ལས་འགན་ཁག་བསྒྲུབ་རྒྱུ་བཅས། ༽ བཙན་བྱོལ་བོད་མི་ཚང་མས་སྒྲུབ་དགོས་པའི་ལས་འགན་འདི་དག་ཁྲིམས་ལུགས་སུ་གཏན་འབེབས་ཟིན་པ་ནས་འགོ་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་ནས་འོག་མི་མང་དཀྱུས་མ་བར་བོད་ཀྱི་ཡུལ་མི་ཚང་མ་ཁྲིམས་ལུགས་འདིའི་འོག་མ་འདུས་པ་བོད་མི་གཅིག་ཀྱང་མེད་པ་ནས་ཚང་མས་སྒྲུབ་དགོས་པའི་ལས་འགན་ཞིག་ཡིན་པ་དང་། སྤྱི་འཐུས་ཚོའི་བོད་ཀྱི་ཡུལ་མིའི་ལས་འགན་འདི་སྒྲུབ་པའི་ཐོག་ནས་སྤྱི་འཐུས་ཀྱི་ལས་འཁུར་དམ་བཅའ་ཟུར་དུ་བཅའ་ཁྲིམས་ནས་བསྐུར་བའི་དམ་བཅའི་ཚིག་བརྗོད་ལྟར་འབུལ་དགོས་པ་འདི་ལྟར། ༼ བདག་་་་་་་་་་མིང་ཞེས་བགྱི་བ།སྐབས་་་་་་་་་་་བོད་མི་མང་སྤྱི་འཐུས་ལྷན་ཚོགས་སུ་སྤྱི་འཐུས་འོས་འདེམས་བྱུང་བ་ལགས་ན། བཙན་བྱོལ་བོད་མིའི་བཅའ་ཁྲིམས་ལ་ཡིད་ཆེས་བློ་གཏད་ཀྱི་ཐོག་ནས། སྤྱི་འཐུས་ཀྱི་ལས་འཁུར་ཞུ་སྒོ་མཐའ་དག་བཅའ་ཁྲིམས་ཀྱི་དགོངས་དོན་འགལ་མེད་ཐོག རང་དོན་ཕྱོགས་ལྷུང་དང་། འཇིགས་ཞུམ་ཆགས་སྡང་མེད་པར། དྲང་བདེན་ལྷག་བསམ་ཟོལ་མེད་ཀྱི་སྒོ་ནས་རང་ནུས་གང་ཐེག་ཞུ་རྒྱུའི།
༡ མཆོག་གསུམ་དཔང་བཙུགས་ཀྱིས་དམ་བཅའ་བརྟན་པོ་ཞུ་རྒྱུ་ཡིན། ཡང་ན། ༢ ཁས་ལེན་གཙང་མ་ཞུ་རྒྱུ་ཡིན། ༽ ཅེས་གསལ་བ་ནས་བཅའ་ཁྲིམས་ནས་བསྐུར་བའི་དམ་བཅའི་ཚིག་བརྗོད་འདི་གཉིས་གང་རུང་གི་འོག་ཏུ་དམ་བཅའ་ཕུལ་ནས་སྤྱི་འཐུས་ཚོའི་གྲོས་ཚོགས་ཀྱི་ལས་རིམ་ལ་ཆ་ཤས་ལེན་དགོས་པ་དེ་དམ་བཅའི་རྩ་དོན་ཡིན་པ་དང་། ཉེ་ལམ་གྲོས་ཚོགས་ཚོགས་དུས་དྲུག་པ་དེ་དག་མུ་མཐུད་ནས་ཚོགས་མ་ཐུབ་པ་མ་ཟད་མཐའ་མ་གྲོས་ཚོགས་འཇུག་བསྡུ་མ་ཐུབ་པ་ནི་དང་པོ་བཅའ་ཁྲིམས་དོན་ཚན་བཅུ་གསུམ་ནང་གསལ་བའི་བོད་ཀྱི་ཡུལ་མིའི་ལས་འགན་མ་འགྲུབ་པ་དང་། གཉིས་པ་སྤྱི་འཐུས་ཀྱི་ལས་འཁུར་དམ་བཅའ་དང་འགལ་བ་ནས་གཉེན་བྱམས་པས་མཐོང་ན་ངུ་བྲོ། དྭངས་དགྲ་བོས་མཐོང་ན་ཡིད་འཚིམ་ཟེར་བའི་དཔེ་ལྟར་མ་རེད་དམ། ༧ གོང་ས་མཆོག་སྐུ་ན་ཆུང་དུས་བོད་ས་མ་ཤོར་སྔོན་ནས་མ་འོངས་བོད་ཀྱི་ཆབ་སྲིད་ལམ་ལུགས་དེ་མི་མང་མང་གཙོའི་ལམ་ལུགས་ལ་ཁ་ཕྱོགས་རྒྱུའི་རླབས་ཆེན་གྱི་དགོངས་གཞི་དེ་དག་རང་ཡུལ་དུ་ཕྱི་ནང་གི་འགོག་རྐྱེན་འོག་ནས་ཕྱག་ལྟར་མ་ཐུབ་ནའང་བཙན་བྱོལ་དུ་ཕེབས་མ་ཐག་སྤྱི་ལོ་ ༡༩༦༠ ཐམ་པའི་ལོར་བཙན་བྱོལ་བོད་མིའི་མང་གཙོའི་སྒྲིག་འཛུགས་གསར་འཛུགས་གནང་ནས་འཛམ་གླིང་ཡོངས་ལ་ངོམས་སུ་ཆོག་པའི་མང་གཙོ་ཁྲིམས་ལུགས་ཀྱི་དབང་བསྒྱུར་འོག་མང་གཙོའི་སྒྲིག་འཛུགས་སྐྱོང་མཁན་གྱི་ཀ་བ་གསུམ་འགན་དབང་འདྲ་མཉམ་ཐ་དད་ཡོད་པ་ནས་སྤྱི་འཐུས་སྐབས་བཅུ་དྲུག་གི་ཁྲིམས་འགལ་གྱི་གྲོས་ཆོད་ཡིག་ཆ་ཨང་ ༣༩ ཟེར་བ་དང་། སྤྱི་འཐུས་སྐབས་བཅུ་བདུན་པ་འདིའི་རྫོགས་རྒྱུ་མེད་པའི་ལས་རིམ་རྣམ་བཞག་ལ་འགན་འཁུར་ནས་གྲོས་ཚོགས་ཀྱི་ལས་རིམ་འགྲོ་མ་ཐུབ་པ་མ་ཟད་མཐའ་མ་གྲོས་ཚོགས་འཇུག་ཡང་བསྡུ་མ་ཐུབ་པ་ནས་བཅའ་ཁྲིམས་དོན་ཚན་ ༤༩ པའི་ནང་གསེས་གཉིས་པའི་འོག་ཉུང་མཐའི་གྲངས་ཚད་མ་ལོངས་པ་ལ་ཁ་གཡར་ནས་ཚོགས་དྲུང་ལས་ཁུངས་ནས་གསལ་བསྒྲགས་གནང་བ་སོགས་མཐོང་སྐབས་ཁྲིམས་བཟོའི་ཁྲིམས་བཟོ་རྒྱུའི་ཚབ་ཏུ་ཁྲིམས་བཤིག་ནས་དགྲ་དགའ་གཉེན་སྡུག་གི་ལས་ཀ་བྱས་པ་མ་རེད་དམ། བཅའ་ཁྲིམས་དོན་ཚན་ ༤༩ པའི་ནང་གསེས་གཉིས་པའི་ཆ་རྐྱེན་དེ་གྲོས་ཚོགས་ཚོགས་ནས་འཐུས་མི་ཕེབས་མ་ཐུབ་ནས་ཉུང་མཐའི་གྲངས་ཚད་མ་ལོང་པ་ལ་གོ་དགོས་པ་ལས་གྲོས་ཚོགས་ཚོགས་བཞིན་པ་ནས་ཉིན་ཤས་རྗེས་འཐུས་མི་ཁག་ཅིག་གི་ཆེད་དུ་དམིགས་ནས་གྲོས་ཚོགས་ལས་རིམ་ལ་ཆ་ཤས་མ་བླང་པ་དེ་ཉུང་མཐའི་གྲངས་ཚད་མ་ལོངས་པ་ལ་ག་འདྲ་བྱས་ནས་ངོས་འཛིན་གནང་བ་ཡིན་དེ་ཡང་གསལ་པོ་ཤེས་མ་སོང་ན་བཅའ་ཁྲིམས་དང་མཐུན་པའི་ཁྲིམས་མཐུན་ཞིག་ལ་དུས་ནམ་ཡང་ངོས་འཛིན་ཞུ་ཐུབ་མ་སོང་ན་ཁྲིམས་འགལ་རང་ལ་ངོས་འཛིན་ཞུ་གི་ཡོད། ༧གོང་ས་མཆོག་གི་སྐུ་ཚེ་ཧྲིལ་པོ་བོད་རྒྱལ་ཁབ་དང་བོད་མི་རིགས་ཀྱི་ཆེད་དུ་སྐུ་ལས་སྐྱོན་ནས་བཙན་བྱོལ་བོད་མིའི་སྤྱི་ཚོགས་འདི་མང་གཙོ་ཡང་དག་པའི་ལམ་ལུགས་ནང་ཁྲིད་ནས་བཙན་བྱོལ་བོད་མིའི་བཅའ་ཁྲིམས་ཀྱི་ལམ་སྟོན་འོག་བཙན་བྱོལ་སྒྲིག་འཛུགས་འཚོ་དགོས་པ་ནས་ཁྲིམས་བཟོ་སྤྱི་འཐུས་གྲོས་ཚོགས་ནས་བཅའ་ཁྲིམས་ལ་འགན་འཁུར་ནས་གྲོས་ཚོགས་ཀྱིས་ལས་རིམ་མུ་མཐུད་ནས་འགྲོ་དགོས་པ་དེ་བཅའ་ཁྲིམས་ནས་བསྐུར་བའི་གྲོས་ཚོགས་འཐུས་མིའི་ལས་འགན་ངོ་མ་དེ་ཡིན་པ་ནས་ལས་འགན་དེ་སྒྲུབ་མ་ཐུབ་པ་ནི་བཙན་བྱོལ་བོད་མིའི་བཅའ་ཁྲིམས་ལ་ཡིད་ཆེས་དང་བློ་གཏད་མ་ཐུབ་པ་ནས་ལས་འཁུར་དམ་བཅའ་དང་འགལ་བ་ལ་ངོས་འཛིན་དང་བཅས། བ་མོ་དེ་ཉལ་སྟངས་ལ་བལྟ་ན་བེའུ་རྐེ་ཀྱོག་ཞིག་ཡིན་པ་ཐག་ཆོད་ཟེར་བ་ལྟར་སྐབས་བཅུ་བདུན་གྱི་སྤྱི་འཐུས་གྲོས་ཚོགས་འདིའི་འོས་འཕེན་རྒྱ་ཆེ་མང་ཚོགས་ཀྱི་མངོན་འདོད་དུས་ནམ་ཡང་སྒྲུབ་མི་ཐུབ་པ་ལོང་བས་བལྟས་ཀྱང་ཁམས་གསུམ་དང་འོན་པས་ཉན་ཡང་བྲག་ཆ་ཟེར་བ་ལྟར་སྤྱི་འཐུས་བཞི་བཅུ་ཞེ་ལྔ་ཆ་ཚང་བཟང་སྤྱོད་ལ་འགན་འཁུར་ནས་རྟ་ལམ་བོང་བུའི་བཀག་ནས་མ་བཞུགས་པར་རྩ་དགོང་ཞུ་དགོས་པའི་དུས་ལ་བབ་མི་འདུག་གམ།