གཞུང་པ་ཚེ་དབང་བསོད་ནམས།
ཀ་ཁའི་འོག་ཏུ་བཙུགས་པའི་བཙན་བྱོལ་བོད་མིའི་གྲོས་ཚོགས།
ཁ་བཤད་ཆུ་ཡིས་སྦོ་བ་གྲོས་ཚོགས་ལས་རིམ་གཟིགས་དང་།
ག་དུས་གྲོས་ཚོགས་ཚོགས་ཀྱང་ནང་ཁུལ་ཚིག་རྩུབ་ཟུར་ཟ།
ང་རྒྱལ་འགྲན་སེམས་འོག་གིས་སྤྱི་འཐུས་གྲོས་ཚོགས་འཐུས་མི།
ཅ་ཅོ་འར་འུར་མ་མང་ཁྲིམས་བཟོའི་འགན་འཁུར་བཞེས་དང་།
ཆ་ལག་ཚང་བའི་མང་གཙོ་བཅའ་ཁྲིམས་འོག་ཏུ་སྲུང་དང་།
ཇ་ཆང་དུད་རྩི་འདྲ་བའི་བཙན་བྱོལ་བོད་མིའི་བཅའ་ཁྲིམས།
ཉོན་མོངས་ང་རྒྱལ་གཏམ་གྱིས་གྲོས་ཚོགས་ལས་རིམ་བཀག་སོང་།
ཏ་ལའི་བླ་མས་མཛད་འཕྲིན་བོད་ཀྱི་མང་གཙོ་བཙུགས་ཀྱང་།
ཐ་མེ་ཐོམ་མེ་ཅན་གྱིས་གྲོས་ཚོགས་འཐུས་མི་རྣམས་ནས།
ད་ཆ་བཙན་བྱོལ་མང་གཙོ་ཀ་བ་གཉིས་ལ་རྒྱུར་སོང་།
ན་གཞོན་མི་རབས་གསར་པས་བཙན་བྱོལ་མང་གཙོ་སྐྱོབས་དང་།
པ་ཕ་ཨ་མ་འདྲ་བའི་མི་མང་འཐུས་མི་རྣམ་པ།
ཕ་བཟང་བུ་རབས་འདྲ་བའི་འཐུས་མིའི་འགན་འཁུར་བཞེས་དང་།
བ་དང་གླང་རྒོད་ནང་བཞིན་ནང་ཁུལ་འཁོན་སེམས་མ་མང་།
མ་དང་བུ་ཕྲུག་བཞིན་དུ་ནང་ཁུལ་དམ་ཚིག་གཙང་དང་།
རྩ་བ་འཐུས་མིའི་ལས་འགན་ཁྲིམས་དང་སྒྲིག་གཞི་བཟོ་རྒྱུ།
ཚ་གྲངས་དཀའ་སྡུག་ཆེ་ཡང་ཐོག་མའི་དམ་བཅའ་སྲུང་དང་།
ཛ་དྲག་ཆེ་བའི་ལས་དོན་ཁྲིམས་ཞིབ་ཁ་བསྐོང་གནང་དང་།
ཝ་ལེར་ཐུགས་བསམ་བཞེས་དང་ཁྲིམས་བཟོའི་ཐུགས་འགན་གང་རེད།
ཞ་མོ་མི་ལ་མ་བསྐོན་རང་སྐྱོན་མཐོང་བ་གནང་དང་།
ཟང་ངི་ཟིང་ངི་བཟོ་མཁན་སྤྱི་འཐུས་གྲོས་ཚོགས་འཐུས་མི།
འ་འུར་ཁ་དམག་རྒྱབ་ནས་བཅའ་ཁྲིམས་ནུས་མེད་བཏང་སོང་།
ཡ་རབས་བཟང་སྤྱོད་མེད་ནས་བཅའ་ཁྲིམས་ནུས་མེད་བཏང་སོང་།
ར་ལང་ཆ་ལང་བྱེད་ས་གྲོས་ཚོགས་ར་བ་མ་རེད།
ལབ་སྟོང་ལུང་སྟོང་བཤོད་ས་གྲོས་ཚོགས་ར་བ་མ་རེད།
ཤ་ངོམ་དཔུང་ངོམ་བྱེད་ས་གྲོས་ཚོགས་ར་བ་མ་རེད།
ས་ངན་ཐལ་བ་གཏོར་ས་གྲོས་ཚོགས་ར་བ་མ་རེད།
ཧམ་བཤད་སྟོང་བཤད་བྱེད་ས་གྲོས་ཚོགས་ར་བ་མ་རེད།
ཨ་ཀྱང་དགོངས་པ་མ་འཚོམས་སྐུ་རྩེད་ཚུལ་དུ་བྲིས་ཡིན