གཞུང་པ་ཚེ་དབང་བསོད་ནམས།
སྤྱི་ལོ་ ༡༩༩༡ སྤྱི་ཟླ་ ༥ པའི་ཚེས་ ༢༩ ཉིན་བོད་མི་མང་གི་སྐུ་ཚབ་སྤྱི་འཐུས་སྐབས་བཅུ་གཅིག་གིས་ཁྲིམས་བཟོའི་འགན་འཁུར་བླངས་ནས་བར་རྒལ་གྱི་ཚོགས་གཙོ་ཐད་བསྐོས་སྤྱི་འཐུས་མཁས་དབང་ཟམ་གདོང་རིན་པོ་ཆེ་མཆོག་དང་ཚོགས་གཞོན་བོན་པོའི་སྤྱི་འཐུས་བྱ་དུར་བསོད་ནམས་བཟང་པོ་མཆོག་ཚོགས་གཙོ་སྦྲེལ་པོའི་དབུ་ཁྲིད་འོག་བཅའ་ཁྲིམས་དོན་ཚན་བརྒྱ་དང་བཅོ་ལྔ་ཅན་གཏན་འབེབས་གནང་ནས་༧གོང་ས་མཆོག་གི་ཆོག་མཆན་མཚན་རྟགས་དེ་སྤྱི་ལོ་ ༡༩༩༡ སྤྱི་ཟླ་ ༦ པའི་ཚེས་ ༢༨ ཉིན་ཕེབས་པ་ནས་བཅའ་ཁྲིམས་ཀྱི་ནུས་པ་འཐོན་ནས་བཅའ་ཁྲིམས་ལེའུ་བཞི་པ། སྒྲིག་འཛུགས་ཀྱི་འགན་འཛིན། དོན་ཚན་བཅུ་དགུ་པ། འགན་འཛིན་དབང་ཆ། ལེའུ་ལྔ་པ། ཁྲིམས་བཟོའི་དབང་འཛིན། དོན་ཚན་སོ་དྲུག་པ། ཁྲིམས་བཟོའི་དབང་ཆ་། ལེའུ་དྲུག་པ། ཁྲིམས་ལུགས་དབང་འཛིན། དོན་ཚན་དྲུག་བཅུ་རེ་གཉིས་པ། ཆེས་མཐོའི་ཁྲིམས་ཞིབ་ཁང་། བཅས་མང་གཙོའི་སྒྲིག་འཛུགས་འཛིན་སྐྱོང་གནང་མཁན་གྱི་ཀ་བ་གསུམ་འགན་དབང་འདྲ་མཉམ་ཐ་དད་དུ་ཡོད་པ་ནས་བཅའ་ཁྲིམས་དོན་ཚན་སོ་དྲུག་པ། ཁྲིམས་བཟོའི་དབང་ཆ། ཁྲིམས་ལུགས་བཟོ་འགོད་དང་གཏན་འབེབས་བྱ་རྒྱུའི་དབང་ཆ་ཡོངས་རྫོགས་སྤྱི་འཐུས་ལྷན་ཚོགས་ལ་ཡོད་པ་དང་། ཁྲིམས་ལུགས་དེ་དག་ཁྲིམས་སུ་བཅའ་བ་ལ་སྲིད་སྐྱོང་གིས་ཆོག་མཆན་མིང་རྟགས་འགོད་དགོས། ཅེས་གསལ་བ་ནས་སྲིད་སྐྱོང་གི་ཆོག་མཆན་མིང་རྟགས་མ་བཀོད་བར་ཁྲིམས་ཡིག་ཡིན་ན་ཁྲིམས་འཆར། ༼ Bill ༽ ཐོག་ལྷག་རྒྱུ་དང་། གྲོས་ཆོད་ཡིན་ན་གྲོས་འཆར་ཐོག་ལྷག་རྒྱུ་ལས་ལག་ལེན་ལྟར་རྒྱུའི་ཁྲིམས་ལུགས་དང་། ལག་ལེན་ལྟར་རྒྱུའི་གྲོས་ཆོད། ༼ Act ༽ ཐོག་ནམ་ཡང་འགྲོ་མི་ཐུབ་པ་ནས་མཐའ་མའི་དབང་ཆ་དེ་འཛིན་སྐྱོང་བཀའ་ཤག་ལ་ཡོད་པ་བཅའ་ཁྲིམས་ནས་ངོ་སྤྲོད་གནང་མི་འདུག་གམ། བཅའ་ཁྲིམས་དོན་ཚན་གྱ་གཉིས་པ། ས་གནས་འཐུས་མིའི་དབང་ཚད། ས་གནས་ཀྱི་ལས་དོན་འབྲེལ་བའི་སྒྲིག་གཞི་བཟོ་འགོད་དང་གཏན་འབེབས་བྱ་རྒྱུའི་འགན་དབང་ཡོངས་རྫོགས་ས་གནས་འཐུས་མིའི་ཚོགས་འདུར་ཡོད། འོན་ཀྱང་གཏན་འབེབས་མ་བྱས་གོང་ས་གནས་འགོ་འཛིན་དང་འགོ་འཛིན་ལས་རོགས་ལ་གོ་བསྡུར་བྱ་དགོས་ཟེར་བ་ནས་ས་གནས་འགོ་འཛིན་དང་འགོ་འཛིན་ལས་རོགས་ལ་གོ་བསྡུར་མ་བྱས་པར་ས་གནས་འཐུས་མིའི་ཚོགས་འདུ་ནས་སྒྲིག་གཞི་གཏན་འབེབས་མི་ཐུབ་པ་ནས་མཐའ་མའི་དབང་ཆ་དེ་ས་གནས་ཀྱི་འཛིན་སྐྱོང་སྡེ་ཚན་ས་གནས་འགོ་འཛིན་དང་འགོ་འཛིན་ལས་རོགས་ལ་ཡོད་པ་བཅའ་ཁྲིམས་ནས་ངོ་སྤྲོད་གནང་མི་འདུག་གམ། བཅའ་ཁྲིམས་ལེའུ་དྲུག་པ། ཁྲིམས་ལུགས་དབང་འཛིན། དོན་ཚན་རེ་དྲུག་པ། ༡ ཆེས་མཐོའི་ཁྲིམས་ཞིབ་ཁང་ནི་བཙན་བྱོལ་བོད་མི་སྤྱི་སྒེར་ཡོངས་ཀྱི་མཐར་ཐུག་གི་ཞུ་གཏུགས་བྱ་ཡུལ་ཁྲིམས་ཞིབ་ཁང་དང་། བོད་མིའི་སྒྲིག་འཛུགས་ཀྱི་ཁྲིམས་འཛིན་གོང་ན་མེད་པ་དེ་ཡིན། ༢ བཙན་བྱོལ་དུ་གནས་རིང་གནས་ཡུལ་རྒྱལ་ཁབ་སོ་སོའི་ཁྲིམས་འོག་ཏུ་གནས་དགོས་སྟབས་ནག་ཉེས་དང་མཁར་དབང་རྩོད་རྙོག་གི་ཁྲིམས་ཞིབ་བྱ་རྒྱུར་འབྲེལ་བ་མེད་ནའང་གཙོ་ཆེར།
ཀ བཙན་བྱོལ་བོད་མིའི་བཅའ་ཁྲིམས་ཀྱི་ཚིག་དོན་འགྲེལ་བརྗོད་བྱེད་ཕྱོགས་ལ་བརྟེན་པའི་རྩོད་གླེང་དང་།
ཁ བོད་མིའི་སྒྲིག་འཛུགས་ཀྱི་འགན་འཛིན་ལས་ཁུངས་སམ། ལས་བྱེད་པའི་ལས་དོན་བྱེད་ཕྱོགས་དང་། དྲང་བདེན་བྱུང་མིན་ལ་བརྟེན་པའི་རྩོད་གླེང་།
ག བོད་མིའི་སྒྲིག་འཛུགས་ཀྱི་ལས་བྱེད་ཁག་གི་ལས་དོན་དང་། ཁེ་ཕན་རྗེས་འབྲེལ་གྱི་རྩོད་གླེང་།
ང བོད་མིའི་སྡོད་སྒར་ཁག་གི་ས་ཁང་སྐོར་གྱི་རྩོད་གླེང་།
ཅ བོད་མིའི་སྤྱི་ཚོགས་ཀྱི་རྩོད་རྙོག་དང་། སྤྱི་ཚོགས་ཀྱི་བདེ་འཇགས།
ཆ གོང་གསལ་དོན་ཚན་ཁག་ནང་མ་གསལ་བའི་རྩོད་གཞི་ཁག་བཅས་ལ་གཟུ་བོའི་ཚུལ་གྱིས་ཁྲིམས་ཞིབ་ཐག་གཅོད་བྱ་རྒྱུ་དང་།
ཇ གཞན་ཡང་ཁྲིམས་ཞིབ་ཁང་འོག་མ་རྣམས་དང་། ཁྲིམས་དོན་དང་འབྲེལ་བའི་ལས་ཁུངས་ཁག་གི་ལས་དོན་བྱེད་ཕྱོགས་དང་། འཛིན་སྐྱོང་གི་བྱ་བར་ཞིབ་འཇུག་ལམ་སྟོན་དང་། སྟངས་འཛིན་བྱ་རྒྱུའི་དབང་ཆ་ཡོད། ཅེས་གསལ་བ་ནས་མཐར་ཐུག་གི་དབང་ཆ་དེ་མང་གཙོའི་ཀ་བ་གསུམ་གྱི་ནང་ནས་ཁྲིམས་ལུགས་དབང་འཛིན་ཆེས་མཐོའི་ཁྲིམས་ཞིབ་ཁང་ལ་ཡོད་པ་གོང་གི་བཅའ་ཁྲིམས་ཀྱི་དོན་ཚན་ཁག་ནས་ངོ་སྤྲོད་གནང་འདུག་ན་ཡང། སྤྱི་འཐུས་སྐབས་བཅུ་དྲུག་དང་བཀའ་ཤག་སྐབས་བཅོ་ལྔ་གཉིས་ནས་སྡིག་པ་མིག་རྩུམ་གྱིས་ཁྲིམས་འགལ་གྱིས་ཐོག་ནས་ཆེས་མཐོའི་ཁྲིམས་ཞིབ་ཁང་ནུས་མེད་དུ་བཏང་བ་ནས་ད་ལྟའི་སྐབས་བཙན་བྱོལ་སྤྱི་ཚོགས་ནང་ཞུ་གཏུགས་བྱ་སའི་ཁྲིམས་ཞིབ་ཁང་མེད་པ་འདིའི་འགན་ཡང་སྤྱི་འཐུས་སྐབས་བཅུ་དྲུག་དང་བཀའ་ཤག་སྐབས་བཅོ་ལྔ་ནས་བཞེས་དགོས་པ་ནི་ལོ་རྒྱུས་ཀྱི་ངོ་སྤྲད་པའི་སུབ་ནས་ཟུབ་རྒྱུ་མེད་པའི་ལོ་རྒྱུས་ནག་པོའི་བདེན་དཔང་ཞིག་མ་རེད་དམ།