____ ཨ་འབྲུག་དཀོན་མཆོག
དབྱངས་ཀྱི་ལྷ་མོ་བརྩེ་བའི་འཛུམ་མདངས་ཅན་ལ་ཕྱག་འཚལ་ལོ། །
རྣམ་དཔྱོད་བློ་ཡི་ཡོན་ཏན་བྱེ་བ་བརྒྱས། །
མི་འཇིགས་སེང་གེའི་ཁྲི་ལ་མངོན་བཞེངས་པ། །
བྱམས་བརྩེའི་སློབ་དཔོན་ཆེན་པོའི་མཚན་བཟང་གིས། །
མཛེས་པའི་དཔལ་ལྡན་བླ་མ་རྒྱལ་གྱུར་ཅིག །
ཤེས་རབ་ཆར་དུ་འབབ་པ་དང་། །
སྙིང་རྗེའི་ཉི་འོད་འགྱེད་པ་ཡི། །
སྐྱེས་ཆེན་ནམ་མཁའ་མཐའ་ཡས་གང་། །
སྟོན་པར་མི་བཀུར་སུ་ཞིག་བཀུར།
བརྩེ་ཆེན་རལ་བ་སྟུག་པོ་ཡིས། །
རིག་པའི་གཉའ་བ་རབ་བརྗིད་པའི། །
སྔོན་མེད་གངས་ཀྱི་སེང་གེ་ཁྱེད། །
ཙོང་ཁའི་སྐྱེས་རིའི་དབུ་ནས་འགྱིང་། །
དེ་ཚེ་གནའ་དེང་རིག་པའི་རྒྱན། །
མགྲིན་པར་ཐོགས་པའི་མཁས་པའི་ཚོགས། །
གུས་ཤིང་ཞུམ་པའི་རལ་བ་ནི། །
ཁྱེད་ཀྱི་ཞབས་སེན་རྩེ་རུ་འཁྱིལ། །
ཁྱོད་ནི་སྙིང་རྗེའི་ལུས་མཛེས་ཤིང་། །
ཟབ་གསལ་ལེགས་བཤད་མགྲིན་པའི་རྒྱན། །
སྐྱེ་དགུའི་ཡིད་བརྟན་འཕྲོག་པ་ལ། །
བཟང་པོ་སྤྱོད་པའི་དོ་ཤལ་འཕྱང་། །
འགྲོ་ཚོགས་སྙིང་གི་ཟེའུ་འབྲུ་ལ། །
གསུང་གི་བདུད་རྩི་འགྱེད་པ་ཁྱོད། །
ཕྱོགས་ལས་རྒྱལ་བའི་རྔ་ཆེན་གྱི། །
སྒྲ་དབྱངས་སྲིད་པའི་རྩེ་ན་འཁོར། །
མཁྱེན་པའི་ཉིན་བྱེད་ཁྱོད་དྲིན་ལས། །
སྐྱེ་དགུ་བློ་བསལ་པདྨའི་ཚོགས། །
ཡང་དག་ལམ་གྱི་སྐྱེད་ཚལ་དུ། །
མཛེས་སྡུག་འདབ་མ་ཅི་ཡང་གྲོལ། །
ས་སྟེང་མཛེས་པའི་རྟགས་མའི་རིགས། །
མ་ལུས་མེད་པར་བཞེས་པས་ན། །
ད་ནི་འཛམ་གླིང་ཤར་ནུབ་ཀྱི། །
འགྲོ་ཚོགས་རང་ལུས་བྲན་དུ་འབུལ། །
ད་ལྟ་བདེན་པའི་ཉི་འོད་ལས། །
ལོག་པར་ཞུགས་པའི་སྙིང་མུན་ཅན། །
ཁྱོད་ཀྱི་ཡོན་ཏན་འོད་ཟེར་བརྒྱར། །
བཟོད་པར་དཀའ་བའི་ཚུལ་དུ་ལྷག། །
སྙིང་སྟོབས་ཆ་ཤས་ཡོངས་རྫོགས་པའི། །
ཞི་བའི་ཟླ་བ་ཁྱོད་འཛུམ་པས། །
བློ་ངན་འབྱུང་བོའི་བྱ་ཡི་ཁྱུ། །
རང་ལུས་སྐུང་བའི་ཆོ་གར་བརྩོན། །
ལོག་སྒྲུབ་གཏམ་གྱིས་ལྕེ་ངལ་བའི། །
ཙི་ནའི་སྲིད་སྟེགས་ནོན་པའི་ཚོགས། །
བདེན་དོན་སྦར་མོས་མ་ཁོབ་པས། །
ཡིད་གདུང་ཚེར་མ་སྙིང་ལ་བབ། །
ངོ་མཚར་ཟབ་རྒྱས་ངག་གི་རྒྱུན། །
ཡན་ལག་བརྒྱད་པའི་འབབ་རྒྱུན་ཅན། །
མཛད་བཟང་རྒྱ་མཚོ་ཆེན་པོ་འདིས། །
སེམས་ཀྱི་ནམ་མཁའ་དྭངས་པར་བྱེད། །
དུས་ཀྱི་དུ་ཁ་མི་བཟད་པས། །
ཤིན་ཏུ་ནོན་པའི་གངས་ཅན་པར། །
ཁྱེད་ཀྱི་མཛད་བཟང་ཐུར་མ་ཡིས།།
འཛུམ་གྱི་གོང་བུ་གདོང་ལ་བྲིས།
མུན་པའི་ཀློང་དུ་འོད་ཀྱི་ལམ། །
འབྲི་བའི་ཐབས་མཁས་ལག་རྩལ་ཅན། །
ཁྱོད་འདྲ་སྲིད་པ་འདིར་བྱོན་པས། །
དུས་འདི་སྙིགས་མ་མིན་པར་ངེས། །
ཁྱོད་ཀྱི་ཡོན་ཏན་ཆུ་གཏེར་ཆེའི། །
ཟེགས་མའི་ཟེགས་མ་ཙམ་ཞིག་ལ། །
མྱོང་བར་བྱེད་པའི་སྐབས་ཐོབ་པ། །
བདག་གི་ལྕེ་ཡང་སྐལ་བ་བཟང་། །
འདི་ལྟར་བདག་ཉིད་ཆེན་པོའི་ཡོན་ཏན་གྱི། །
ཆ་ཤས་ཤིན་ཏུ་ཆུང་བའི་ཕྲ་རབ་འགའ། །
ཁ་བ་རི་བའི་སྙན་ཚིག་ངག་གི་དཔལ། །
མྱོང་བའི་སྐལ་བ་ཅན་དེས་ཤར་མར་སྤེལ། །
ཨེ་ཤ་ཡའི་ནང་བའི་ཚོགས་ཆེན་ཐོག་༸བླ་མ་བདག་ཉིད་ཆེན་པོ་ནང་བ་ཡོངས་ཀྱི་དབུ་ཁྲིད་དུ་གཏན་འབེབས་དང།ཁོང་གི་འཁྲུངས་སྐར་དེ་བྱམས་བརྩེའི་ཉིན་མོར་གཏན་འབེབས་བྱས་པའི་གནས་ཚུལ་དང་འབྲེལ་ཏེ་བོད་གངས་ཅན་གྱི་སྙན་ངག་པ་ཆེན་པོ་མཁས་གྲུབ་དགེ་ལེགས་དཔལ་བཟང་པོས། རྗེ་ཙོང་ཁ་པའི་རྒྱལ་ཚབ་དང་པོ་དར་མ་རིན་ཆེན་ལ་ཕུལ་བའི་སྙན་ངག་དཔལ་ལྡན་ཡོན་ཚོགས་མའི་འགྲོས་ལ་ཅུང་ཟད་བཟློས་ནས་སྤེལ་བའོ།
དད་པ་བརྟན་པའི་བློ་འདི་བཟང་།
བཀའ་དྲིན་དྲན་པའི་བློ་འདི་བཟང་།
མོས་གུས་ཟབ་པའི་བློ་འདི་བཟང་།
དད་བཀའ་མོས་གུས་བློ་འདི་བཟང་།་ ཤིན་ཏུ་ལེགས། རྗེས་སུ་ཡིད་རངས་ཞུ།