གཞུང་པ་ཚེ་དབང་བསོད་ནམས།
བོད་ནི་སྲིད་པ་ཆགས་པ་ནས་སྤྱི་ལོ་ ༡༩༥༩ བར་རྒྱ་དཀར་ནག་གཉིས་ཀྱི་བར་དུ་གནས་པའི་རང་བཙན་གྱི་རྒྱལ་ཁབ་ཆབ་དཔལ་རིག་གསུམ་དམག་ཤུགས་དང་བཅས་པ་རྒྱལ་ཁབ་གཞན་ལ་མགྲན་ཐུབ་པའི་རྒྱལ་ཁབ་ཞིག་ཡིན་པ་དང་། དུས་རབས་བདུན་པའི་ནང་བོད་རྒྱལ་ཁབ་ཀྱི་མངའ་དབང་གི་སྟོབས་ཤུགས་དེ་འཛམ་གླིང་གསུམ་ཆ་གཉིས་ལ་དབང་བསྒྱུར་བའི་ལོ་རྒྱུས་ཡང་ཕྱི་ནང་གིས་ཡིག་ཆ་མང་པོའི་ནང་གསལ་ཡོད་པ་དང་སྤྱི་ལོ་ ༡༩༤༩ ཙམ་ནས་བོད་ཤར་ཕྱོགས་མདོ་ཁམས་གཉིས་སུ་བོད་ཀྱི་ཁྱིམ་མཚེས་རྒྱལ་ཁབ་རྒྱ་ནག་གི་བཙན་འཛུལ་བྱ་རྒྱུ་འགོ་བཙུགས་ནས་མཐར་སྤྱི་ལོ་ ༡༩༥༩ ལོར་བོད་ས་ཡོངས་རྫོགས་རྒྱ་ནག་གིས་བཙན་འོག་ཏུ་ཚུད་ནས་ང་ཚོ་བཙན་བྱོལ་དུ་ཡོང་དགོས་པའི་དམིགས་ཡུལ་ཡང་བོད་ཀྱི་མངའ་དབང་སླར་གསོ་བྱ་རྒྱུ་དེ་ཡིན་པ་ནས་འདས་པའི་མི་ལོ་བཅུ་ཕྲག་དྲུག་ལྷག་ཙམ་རིང་བཙན་བྱོལ་བོད་མི་རྒན་གཞོན་དར་གསུམ་དང་གཞུང་འབྲེལ་དང་གཞུང་འབྲེལ་མིན་པའི་ཚོགས་སྐྱིད་ཁག་བཅས་ང་ཚོ་ཚང་མས་སྒོ་སྐབས་ནམ་བྱུང་དང་དུས་ཚོད་ནམ་རག་ལ་རྒྱ་མིར་ངོ་རྒོལ་སྐད་འབོད་ལས་འགུལ་སྤེལ་བཞིན་པ་ནི་རང་ཡུལ་རང་བདག་ཆེད་རང་བཙན་གྱི་འབོད་སྒྲ་ཡིན་པ་དང་། བོད་ས་ཤོར་ནས་ང་ཚོ་བཙན་བྱོལ་དུ་འབྱོར་མ་ཐག་བོད་དོན་ཞུ་གཏུགས་ཀྱིས་ལས་འགུལ་དང་པོ་དེ་འཛམ་གླིང་མཉམ་འབྲེལ་རྒྱལ་ཚོགས་ལ་ཞུས་པ་ནས་འཛམ་གླིང་མཉམ་འབྲེལ་རྒྱལ་ཚོགས་ནས་སྤྱི་ལོ་ ༡༩༥༩/ ༡༩༦༡/༡༩༦༥ བཅས་སོ་སོར་བོད་དོན་དང་འབྲེལ་བའི་ཐོག་གྲོས་ཆོད་རིམ་པ་བཞག་ཡོད་ན་ཡང་ང་ཚོའི་མུ་མཐུད་ནས་འཇུག་སྐྱོང་མ་ཐུབ་པའི་འགན་དེ་ང་ཚོ་རང་ཉིད་ལ་ཡོད་པ་ལས་གཞན་སུ་གཅིག་ལ་ངན་ཁག་གཡོག་ས་མེད་པ་དང་། བོད་མི་མང་སྤྱི་འཐུས་སྐབས་བཅུ་གཅིག་ནས་ཁྲིམས་བཟོའི་འགན་འཁུར་བླངས་ནས་བཙན་བྱོལ་བོད་མིའི་བཅའ་ཁྲིམས་གཏན་འབེབས་གནང་བའི་བཅའ་ཁྲིམས་དོན་ཚན་བཅོ་ལྔའི་ནང་གསལ་བའི་ཚིག་བརྗོད་བོད་དོན་བདེན་མཐའ་གསལ་ཐབས་ཟེར་བའི་ཐ་སྙད་དེ་འགྱིག་བྱི་རིལ་ནང་བཞིན་ག་པར་འཐེན་འཐེན་ཡིན་ན་ལས་དེ་མིན་ཉེ་ལམ་རང་བཙན་ཚོགས་འདུའི་ནང་བོད་མི་མང་གི་སྐུ་ཚབ་སྤྱི་འཐུས་ཁག་ཅིག་མཉམ་བཞུགས་གནང་བ་དེ་སྤྱི་འཐུས་ཀྱིས་ལས་འཁུང་དམ་བཅའ་ ༼ བཙན་བྱོལ་བོད་མིའི་བཅའ་ཁྲིམས་ལ་ཡིད་ཆེས་དང་། བློ་གཏད། ༽ ཟེར་བའི་ཐ་སྙད་དང་ཕྱོགས་མཐུན་བྱུང་ཡོད་མེད་དེ་ཡང་འཐེ་ཚོམས་ནང་ལྷག་པ་དང་། སྤྱི་ལོ་ ༡༩༩༧ སྤྱི་ཟླ་ ༩ ཚེས་ ༡༨ ཉིན་བོད་མི་མང་གི་སྐུ་ཚབ་སྤྱི་འཐུས་གྲོས་ཚོགས་ནས་བོད་རྒྱའི་དཀའ་སྙོགས་དེ་གཉིས་སྨན་དབུ་མའི་ལམ་བརྒྱུད་ནས་སེལ་རྒྱུའི་སྤྱི་མོས་གྲོས་ཆོད་བཞག་པ་དེ་དང་སྤྱི་འཐུས་ཁག་ཅིག་རང་བཙན་ཚོགས་འདུ་ལ་ཚོགས་བཅར་ཞུས་པ་དེ་གཉིས་འགལ་འདུ་མིན་པ་ཡིན་ནམ། སྤྱི་འཐུས་རྣམས་ནི་བཙན་བྱོལ་བོད་མིའི་མང་གཙོའི་སྒྲིག་འཛུགས་ཀྱིས་ཁྲིམས་བཟོ་ལྷན་ཚོགས་དེ་ཡིན་པ་ནས་སྤྱི་འཐུས་ཚོའི་ཕྱག་ལས་ག་འདྲ་ཞིག་གནང་གི་ཡོད་ཀྱང་རུང་གསུང་བཤད་ག་འདྲ་གནང་གི་ཡོད་ཀྱང་རུང་བཙན་བྱོལ་བོད་མིའི་བཅའ་ཁྲིམས་དང་མ་འགལ་ཞིག་དགོས་པ་ནི་ཐོག་མའི་ལས་འཁུར་གྱི་དམ་བཅའ་ལ་བརྩི་སྲུང་ཞུ་དགོས་པ་ནས་ད་ལམ་རང་བཙན་ཚོགས་འདུ་ལ་སྤྱི་འཐུས་ཁག་ཅིག་མཉམ་བཞུགས་གནང་བ་དེ་བཅའ་ཁྲིམས་དང་ཕྱོགས་མཐུན་བྱུང་ཡོད་མེད་ཐོག་ཚོགས་གཙོ་སྦྲེལ་པོའི་དབུས་པའི་སྤྱི་འཐུས་རྒྱུན་ལས་དང་སྤྱི་འཐུས་ཚོའི་ངོས་ནས་ཐུགས་སྣང་དང་ཐུགས་འགན་བཞེས་དགོས་ཀྱི་མེད་པ་ཡིན་ནམ།