–རྔ་བ་ཀུན་བཟང་།
ཧི་མ་ལའི་རྒྱབ་ངོས་ཀྱི་བདག་གི་སྤུན་ཟླ་ཚོ། མི་ལོ་ཉི་ཤུའོ་གོང་ལ་ངའི་ཕ་ཡུལ་དང་སྤུན་ཟླ་རྣམས་རྒྱབ་ལ་གཡུགས་ནས་ཡུལ་འཁྱམ་པའི་འཚོ་བ་རོལ། སྐབས་དེ་བྱིས་བློ་བསམ་མེད་ཅིག་གི་སྣང་བ་དེ་སྐྱིད་པས། ཕ་ཡུལ་དང་སྤུན་ཟླ་ཞེས་པ་ཐ་སྙད་ཙམ་ལས་ག་ལ་ཤེས། དེ་རིང་འདི་ལྟར་ངའི་སྤུན་ཟླ་རྣམས་བདག་མེད་ངང་འབྱུང་འཇིག་གིས་མནན་དུས། ང་ནི་བཟོད་མེད་ཀྱི་ན་ཟུག་ལྕི་མོ་ཞིག་དང་ལྷན་དུ་རབ་རིབ་དང་ཟང་ཟིང་དུ་གྱུར་ཏེ། ཁྱེད་ཚོ་ནི་སྲིད་པ་བོད་ཀྱི་མིའུ་གདུང་དྲུག་གི་ཁྲག་རྒྱུད་དང་འབྲེལ་བས། གོ་ལ་ཟླུམ་པོའི་ཡངས་ཐོག་གི་གངས་རི་དཀར་པོའི་ཕ་ཁྱིམ་ཐོག་མ་དེ་ཡིན་ལ། བོད་གངས་ཅན་པའི་རིག་མཛོད་གཏེར་བདག་གི་འཆད་རྩོད་རྩོམ་གསུམ་དང་ཐོས་བསམ་སྒོམ་གསུམ་གནང་མཁན་ཡང་ཁྱོད་ཚོ་ལས་མ་འདས། ཧི་མ་ལའི་རྒྱབ་ངོས་ཀྱི་བདག་གི་སྤུན་ཟླ་ཚོ། དེ་རིང་རང་བྱུང་གནམ་སའི་གོད་ཆག་དེ་བྱུང་བས། ཡུལ་འཁྱམ་ཚང་མས་ཐུན་མོང་གིས་ཁྱོད་ཚོ་གླེང་བཞིན་འདུག ཀུན་གྱིས་མྱ་ངན་ཞུ་བཞིན་འདུག སྐྱབས་གསུམ་ལ་གསོལ་བ་འདེབས་བཞིན་འདུག འགན་འཁྲི་མིན་རུང་འགན་འཁྲིའི་ཀློང་ན་ཟས་གོས་སྐྱེལ་བཞིན་་འདུག སྤུན་ཟླ་ཚོ། ཁྱེད་ཚོས་མཐོང་བྱུང་ངམ། གསན་བྱུང་ངམ། འདི་ནི་ཁྱོད་ཚོ་བོད་གངས་ཅན་པའི་གདུང་རྒྱུད་ཀྱི་རྩ་བ་ཡིན་པའི་རིན་ཐང་ཡིན་ལ། འདི་ནི་ཁྱོད་ཚོས་མི་ཡུལ་ལ་བཞག་པའི་བྱ་གཞག་དེའི་ཟིལ་ཤུགས་དང་སྙིང་སྟོབས་རེད། འདི་ནི་ཁྲག་རྒྱུད་གཅིག་གི་ཕྱི་གསལ་ནང་གསལ་གྱི་བརྩེ་བ་དང་ཡིད་ཆེས་མཚོན་སྟངས་ཅི་ལ་མིན། ཧི་མ་ལའི་རྒྱབ་ངོས་ཀྱི་བདག་གི་སྤུན་ཟླ་ཚོ། དྲང་མོ་བཤད་ན། ཁ་སང་དེ་རིང་། ཁྱིམ་གཞི་ཡོད་ཚད་རླུང་ནག་འཚུབ་མ་ཞིག་གི་འུར་སྒྲའི་ཁྲོད་ན་ལྷག་ཡོད། རི་ལུང་ནགས་ཆུ་ཐལ་མདོག་ཏུ་གྱུར་ཞིང་། ནང་མི་བུ་ཕྲུག་ཁ་འཐོར་དུ་བཏང་། ཚེ་སྲོག་དུ་མ་རྡོ་འོག་ལ་ཤོར་དུས། ཞེ་སྡང་གི་སྡེར་མོ་བསྐུམ་ཞིང་། བྱང་སེམས་ཀྱི་གཤོག་རུ་བསྐྱང་མཁན་མང་བས། ཡུལ་ཕུ་ནུའི་ཡན་གྱི་དྲིན་ཆེན་དང་ནང་ཕ་མའི་ཡན་ན་འདང་ཆེན་སུ་ཡོད་དམ། ཧི་མ་ལའི་རྒྱབ་ངོས་ཀྱི་བདག་གི་སྤུན་ཟླ་ཚོ། ཉི་མ་འདི་ཚོ། དགུན་རླུང་གྲང་མོའི་དཀྱིལ་ནས་ངའི་མིག་ཆུ་ལ་འགོག་ཐབས་མ་བྱུང་། ང་ཡུལ་འཁྱམ་ལ་སོང་སོང་བའི་མཐའ་མ། དཀའ་ལས་བརྒྱབ་བརྒྱབ་པའི་མཐའ་མ། རྨི་ལམ་བཏང་བཏང་བའི་མཐའ་མ། ས་མཐའ་བསྡད་བསྡད་པའི་མཐའ་མ། ད་ཁྱེད་ཚོ་དང་གཏན་ནས་ཁ་བྲལ་སོང་། ལེ་དབར་ཁྲི་སྟོང་གི་ཕ་རོལ་ནས། ངས་ནམ་ཡང་གངས་ཅན་པའི་ཡིད་སེམས་དྲང་མོ་མདའ་དང་། བསམ་པ་དཀར་པོ་དུང་། སྦྲང་དཀར་རྩམ་པའི་བྲོ་བ། དཀར་པོ་ཆོས་ཀྱི་དད་སེམས་སོགས་མི་བརྗེད་ལ། རྒྱུ་མི་རྟག་རྩྭ་འགོའི་བསིལ་བ་དང་སྐྱིད་མི་རྟག་ཕ་ཕྱུག་བུ་མོ་ཞེས་པའི་གཏམ་དཔེ་དག་དྲན་པའི་ངོས་ནས་རྙེད་བྱུང་། ནམ་ཞིག་གི་ཚེ། ང་ཡང་ཁྱོད་ཅག་གི་རྐང་རྗེས་སྙེགས་ནས་ཕྱིར་ཕ་ཡུལ་ལ་ལོག་ཡོང་། དེ་དུས་ང་ཡང་རང་བྱུང་ཁམས་ཀྱི་གོད་ཆག་ཁྲོད་ནས་ས་རྡོའི་འོག་ལ་འཐིམ་ནས་ཕ་ཁྱིམ་ནས་ངོ་མི་ཤེས་པའི་སྤུན་ཟླ་མང་པོ་ཞིག་གི་ཐུགས་སྨོན་ཀློང་ནས་བཞུད་འདོད། ཁྱེད་ཅག་དང་མཉམ་དུ་མི་རབས་དུ་མའི་གཏམ་རྒྱུད་དག་མཇུག་སྐྱོང་དགོས་ཡོད།
ཕྱི་ལོ་༢༠༢༥ལོའི་ཟླ་༡་པའི་ཚེས་༡༣ཉིན་དིང་རིའི་སྤུན་ཟླ་རྣམས་ལ་བྲིས་སོ།