ལྷ་ལུང་རྒྱལ།
ཕྲག་དོག་གདོན་གྱི་བྱེད་བབ་ནག་པོའི།།
རྣོ་དབལ་སྤུ་གྲིས་སྙིང་གི་གླང་པོ།།
ཁྲག་ཏུ་བརྫུས་ཀྱང་ཤེས་རབ་སྣ་ཞགས།།
རིང་བར་བརྐྱངས་པ་འགོག་ཐབས་ཨེ་ཡོད།།
ལང་ལོང་སྤྲིན་པ་གོས་སུ་སྙམ་པའི།།
རྨོངས་མུན་སེམས་ཀྱི་འབོད་པའི་ལན་ལ།།
སྤར་གང་ཐལ་སྐྱའི་འཚུབ་མ་གཡོས་པ།།
དཀར་ནག་དབྱེ་བར་དུངས་པའི་བརྡ་ཡིན།།
ལྷ་ལ་གདོང་གྲོགས་གསོལ་མཆོད་མི་བྱ།།
མིའང་རྒྱབ་རྟེན་ངོ་དགས་མི་འགུགས།།
སྒོ་གསུམ་བདེན་པའི་རི་ལ་བརྙེས་ཏེ།།
དགའ་སྡུག་བར་མའི་ལམ་ལ་སྙེག་འགྲོ།
ཇག་པས་ཇག་པར་ཆོས་བཤད་མི་རན།།
གྲོག་མའི་གཅིན་པས་ས་གཞི་མི་རློན།།
བདག་གིས་བདག་ཉིད་ཤེས་བར་བརྩོན་ནོ།།
ཁྱོད་ཀྱང་རང་ལ་ཐེངས་གཅིག་གཟིགས་རོགས།།
རྒོད་པོ་ལྟ་བུའི་ལྡིང་སྐོར་སེམས་ཀྱང༌།།
གཤོག་པ་མེད་ན་ལག་པས་མི་ཡོང༌།།
སྦལ་ནག་གྲོང་མཐའི་རྫིང་བུར་འགྱིང་བ།།
འཕྲུལ་བའི་སྣང་བར་གླིང་དཀར་སྟོད་ཡིན།།
སྨྱོན་པས་རལ་གྲི་ཐེངས་གཅིག་གཡུགས་པར།།
སྡེ་ཆེན་མི་ཚོགས་འཇིགས་སྣང་མ་སྐྱེས།།
ཚངས་ཆེན་བྱིན་རླབས་རྫུ་འཕྲུལ་མེ་ཡིས།།
གྲི་ཡི་འཁྲི་ཤིང་སོལ་བར་བསྒྱུར་འགྲོ།
ག་ལེར་བཞུགས་དང་མི་ཚོགས་ཀློང་ནས།།
ངན་གཡོ་སྦྲུལ་གྱི་མགོ་བོ་གཅོད་པའི།།
བདེན་དོན་མཚོན་གྱི་གནམ་ལྕགས་ཐོག་མདའ།།
ཨ་ཇོའི་སྙིང་གི་དཀྱིལ་ལ་བབས་ཡོང༌།།
ཕྱི་ལོ་ ༢༠༠༨ ཟླ་ ༦ ཚེས་ ༡ ལ་བྲིས།
ངེད་ཀྱིས་ཡུན་རིང་ནས་སྙན་ངག་ཀློག་ལ་མི་སྤྲོ་བ་ཞིག་ཡོད་པ་བསྒྱུར་ནས་སྙན་ངག་འདི་ལན་ཁ་ཤས་ཤིག་བཀླགས་པ་ཡིན། སེམས་ལ་ཟུག་འགྲོ་བ་ཞིག་འདུག ཐུགས་རྗེ་ཆེ། གློ་བུར་དུ་ང་ལ་དྭོགས་པ་ཁ་ཤས་སྐྱེས། གཅིག་ནི། རྣོ་དབལ་སྤུ་གྲིས་སྙིང་གི་གླང་པོ།།
ཁྲག་ཏུ་བརྫུས་ཀྱང་ཤེས་རབ་སྣ་ཞགས།།
ཞེས་པའི་ནང་གི་བརྫུས་ཞེས་པ་འདི་ཡིན། བརྫུས་ནི་བྱ་བྱེད་ཐ་མི་དད་པ་ཞིག་སྟེ། ཁོང་སྤྲང་བོར་བརྫུས་ནས་བྲོས་བྱོལ་ལ་ཕེབས་ལྟ་བུ་ཞིག་རེད་སྙམ། དེ་ལས་འདི་ལ་བརྫིས་ཞེས་འབྲི་དགོས་མེད་དམ་སྙམ། གཞན་ཞིག་ནི།
སྦལ་ནག་གྲོང་མཐའི་རྫིང་བུར་འགྱིང་བ།།
འཕྲུལ་བའི་སྣང་བར་གླིང་དཀར་སྟོད་ཡིན།།
ཞེས་པའི་འཕྲུལ་འདི་ནི་སྤྲུལ་པའི་འཕྲུལ་ཡིན་ལ། གལ་སྲིད་ནོར་བའི་དོན་ཡིན་ན་འཁྲུལ་ཞེས་འབྲི་དགོས་སམ་སྙམ།
very good