གཡུ་དྲུག་དཀར། རྡ་ས།
གནམ་སྔོན་པོའི་དཀྱིལ་འཁོར་གཅིག་གི་འོག་དང་། ས་དོག་མོའི་གདན་ཁྲི་གཅིག་གི་ཐོག བདག་གི་ལོ་རྒྱུས་ཀྱི་མཁར་རྫོང་མཐོན་པོ་གཅིག་གི་གཞི་འཛིན་ཏུ་གྱུར་པའི་ཆོལ་ཁ་གསུམ།
རྫ་སྨུག་པོ་གྱེན་ཏུ་འགྲེང་སྟངས་དང་ཆུ་གཙང་བོ་ཐུར་དུ་རྒྱུག་སྟངས། རི་མཐོན་པོ་འཕྲེད་དུ་ཉལ་སྟངས་དང་མཚོ་སྔོན་མོ་རླབས་ཀྱིས་འཁྱིལ་སྟངས་སུ་གྱུར་བའི་ས་རིས་ཀྱི་སྐྱ་ཐིགས་དེ། རང་བྱུང་གི་བགོད་འགྲེམས་ཤིག་ཡིན་ཆོག་ཨང་། ཕྱིའི་ཤེལ་དཀར་གངས་ཀྱི་ལྕགས་རི་གཅིག་གི་ཁྱིམ་ཡིན།
སེམས་གཤིས་ཀྱི་ཀྱོག་འགྲོས་ལྟ་བུའི་སྐད་ངག་གི་རྒྱང་ལམ་འཐེན་སྟངས་དང་། ཡུལ་གྱི་རི་ྐློང་ལ་འཁྱམས་པའི་བྲག་ཅ་ལྟ་བུའི་མགྲིན་ངག་གི་གླུ་སྐད་བཞུར་སྟངས། ཐང་དཀར་དཀར་གྱི་རྫི་གླུའི་གདངས་དབྱངས་དྲག་ཞན་དང་དམ་ལྷོད་ཀྱི་འགྱུར་ཁུགས་བཅས་ལ་མཐོ་དམན་དང་འཇམ་རྩུབ་ཀྱི་ཁྱད་ཡོད་ཀྱང་། ངག་གི་བཟོ་བཀོད་ལ་དན་རྟགས་སུ་འགྱིང་པའི་སྲིད་པའི་གངས་རྒན་ལྟ་བུའི་བརྡ་སྤྲོད་ཀྱི་སྒྲིག་གཞི་གཅིག་གི་ཁྱིམ་ཡིན།
མེ་ཏོག་སྤང་ལ་བཀྲམས་པ་ལྟ་བུའི་རྒྱན་གོས་ཀྱིས་མཚོན་པའི་སྣ་ཚོགས་ལུས་ཀྱི་ཆ་བྱད་དང་། འགྲོ་ལུགས་སྡོད་ལུགས་ཀྱིས་མཚོན་པའི་ཡུལ་གྱི་སྲོལ་ལུགས། དཔའ་བ་བརྗིད་པ་དང་། དྲག་པ་མི་སྡུག་པ་སོགས་ལུས་ཀྱི་རྣམ་འགྱུར་མི་མཚུངས་བཟོ་བོའི་བྲིས་རིས་འདྲ་ཡང་། སྦྲ་ནག་པོའི་ཁ་དོག་གཅིག་གི་ཁྱིམ་ཡིན།
ནང་ཆོས་བོན་ཆོས་ཟེར་ནའང་འདྲ། ས་དགེ་བཀའ་རྙིང་ཡིན་ཡང་རུང་། ཆོ་ག་ཕྱག་ལེན་གྱི་བཅའ་སྲོལ་ལས་སྲོལ་དང་འདོན་ལུགས་འགུག་ལུགས་མ་གཅིག་པ་མ་གཏོགས། སེམས་ཞི་བའི་ཏིང་ངེ་འཛིན་ལ་བཞུགས་པའི་དམིགས་པ་གཅིག་གི་ཁྱིམ་ཡིན།
རྨི་ལམ་ཁྲོད་ཀྱི་དང་འཚོ་བའི་ཁྲོད་ཀྱི་འཇིགས་པ་སྣ་ཚོགས་དང་སྐྱོ་བ་སྣ་ཚོགས། དགའ་བ་སྣ་ཚོགས་དང་སྐྱིད་པ་སྣ་ཚོགས། འཇིགས་ཡེར་ཡེར་དང་དགའ་ཀྲོག་ཀྲོག སྡུག་གི་མཆི་མ་ལྷུང་ལྷུང་དང་སྐྱིད་ཀྱི་དགོད་སྒྲ་ལྷང་ལྷང་ཇི་ལྟར་ཡང་། མི་ཡུལ་གྱི་སྐྱིད་སྡུག་གཅིག་གི་ཁྱིམ་ཡིན།
བདག་གི་བླ་ཚེ་སྲོག་གསུམ། བདག་གི་ཤ་ཁྲག་རུས་གསུམ། བདག་གི་རང་བཞིན་ལ་གནས་ཤིང་། བདག་གི་ངོ་བོ་ལ་གྲུབ་པའི་བདག་གི་ཆོལ་ཁ་གསུམ།