ཀླུ་སྨྱོན།
དེ་རིང་གནམ་གཤིས་དེ་འདྲ་ཡག་རྒྱུ་མི་འདུག་པས།
ནང་ལ་འཛུལ་ནས་ཇ་རེ་འཐུང་བཞིན་སྙན་ངག་ཅིག་འབྲི་ན་འདོད།
དེ་ཡང་འཆར་གཞི་དང་བཀོད་སྒྲིག་སོགས་གང་ཡང་མེད་པར་ཚོད་ཚོད་ལ་འབྲི་ན་འདོད།
འོ་ན་ཅི་ཞིག་གི་སྐོར་ལ་འབྲི་དགོས་སམ།
ཁ་སང་ཉི་ནུབ་ངའི་མགོ་ཐོག་ནས་རྒྱང་རིང་དུ་འཕུར་སོང་བའི་བྱ་ཁྱུ་དེར་དམིགས་ནས་ཅིག་འབྲི་དགོས་སམ།
ཡང་ན་མདང་དགོང་བརྙན་འཕྲིན་ནང་མཐོང་བའི་ལེ་དབར་ཁྲི་ཕྲག་བརྒལ་ནས་འཚོ་གནས་སྙེག་པའི་བྱ་ཁྱུ་*དེའི་ལས་དབང་གི་སྐོར་ལ་ཅིག་འབྲི་དགོས།
ཡང་མིན་ན་རང་ཉིད་ཀྱང་རྒྱ་མཚོའི་ཕ་རོལ་ནས་འདབ་ཆགས་ཁེར་འཕུར་ཞིག་གི་ཚུལ་གྱིས་གནས་འདིར་བསླེབས་པའི་སྐོར་ལ་ཅིག་འབྲི་དགོས།
ཨོ་རེད་རེད། ད་ངས་བརྗོད་བྱ་ཞིག་རྙེད་བྱུང་།
དེ་ནི་སྨུག་ལོང་ཁྲོད་དུ་རྒྱང་རིང་གི་རི་ཆུ་སྙེག་པའི་ལས་སྐལ་དམན་པའི་བྱ་ཁྱུ་ཞིག་རེད།
བྱ་ཁྱུ་དེར་སོ་བྱ་ཟེར་བའི་ཉེན་བརྡ་གཏོང་མཁན་གྱི་བྱ་གཞོན་ཞིག་ཡོད་ལ།
སྣེ་བྱ་ཟེར་བའི་ཐག་རིང་གི་ལམ་ཚད་ལ་ཆ་རྒྱུས་ཡོད་པའི་བྱ་རྒན་ཞིག་ཀྱང་ཡོད།
ལེ་དབར་ཁྲི་ཕྲག་གི་འགྲུལ་བཞུད་རིང་མོའི་ཀློང་དུ།
ཁོ་ཚོའི་སོ་བྱ་དང་སྣེ་བྱ་གཉིས་ཀ་རེ་རེ་བཞིན་རྔོན་པའི་གདུག་རྩུབ་ཀྱི་མེ་མདའི་སོ་བར་ནས་མ་ཐར།
ད་ནི། བྱ་ཁྱུ་འདིར་དགྲ་བོ་བསླེབས་ཚེ་ཉེན་བརྡ་གཏོང་མཁན་མེད་ལ།
འཕུར་ལམ་ནོར་ཚེ་སྣེ་ཁྲིད་བྱེད་མཁན་ཡང་མེད་པས།
སྨུག་ལོང་ཁྲོད་ཀྱི་བྱ་ཁྱུ་འདིའི་བདེ་འཇགས་ལ་སུ་ཞིག་གིས་འགན་ལེན་བྱེད་ཐུབ།
ནམ་འཕང་གཤག་པའི་བྱ་ཁྱུ་འདིའི་ཁ་ཕྱོགས་ལ་གང་ཞིག་གིས་ཚོད་དཔག་བྱེད་ནུས།
ཉམས་ཉེན་ཐེབས་པའི་བྱ་ཁྱུ་འདི།
མུ་མཐུད་དེ་དཀའ་ངལ་བརྒྱ་ཕྲག་ལ་གདོང་ལེན་བྱེད་བཞིན་རི་ཚོགས་དང་གཙང་ཆེན་བརྒལ་ནས་རྒྱང་རིང་དུ་འཕུར་རམ།
བལྟས་ཚོད་ལ་ཐག་དེ་ཙམ་མི་རིང་ཞིང་ཅུང་ཟད་བདེ་འཇགས་ཡིན་པའི་ས་ཆ་ཞིག་ཏུ་འབབ་དགོས།
བྱ་ཁྱུ་འདི་དང་བྱ་ཁྱུ་འདིའི་ལས་དབང་ལ་བསམས་ནས།
མདང་དགོང་མཚན་གང་བོར་ང་ལ་གཉིད་མ་ཡོང་བས།
ད་ལྟ་ངས་སྙན་ངག་ཅིག་གི་ཚུལ་དུ་ཚོད་ཚོད་ལ་འདི་ཙམ་ཞིག་འབྲི་དགོས་བྱུང་སོང་།
*གོང་གི་འདྲ་པར་ཅན་གྱི་དངོས་བཤུས་གློག་བརྙན་”འདབ་ཆགས་གནས་སྤོ་”ཞེས་པ་དེའོ།།