ལྷ་ལུང་རྒྱལ།
མི་ཤེས་པ་བསླབས་ཏེ་ཤེས་པར་བྱས་པའི་མཐུས། སེམས་ཀྱི་རྨོངས་པ་གང་ཞིག་སྦྱོང་བའམ་རྨེག་མེད་གཙང་སེལ་གྱི་བྱ་བའི་རིམ་པར་སློབ་སྦྱོང་ཟེར་ཞིང༌། སློབ་སྦྱོང་ནི་གཙོ་བོ་སེམས་ཀྱི་བསམ་གཞིགས་བྱ་སྟངས་རིགས་ཤིག་ཡིན། སློབ་སྦྱོང་བྱ་བཞིན་པའི་མི་གང་རུང་བ་ཞིག་ལ་ཅི་ཞིག་ནི་སློབ་སྦྱོང་ཡིན་ཅེས་དྲི་བ་བཏང་བའི་དབང་དུ་བཏང་ན། འབྲི་ཀློག་དྲི་གསུམ་གྱི་སྦྱོར་བར་སློབ་སྦྱོང་ངོ་ཞེས་ཐོགས་ཐུག་མེད་པར་ལན་འདེབས་བྱ་ངེས་ལས། སློབ་སྦྱོང་ནི་བསམ་གཞིགས་རིགས་ཤིག་ཡིན་པའི་དོན་དངོས་ལན་དུ་ཐོབ་མཁན་ཞིག་ཧ་ཅང་ཉུང་ཉུང་ཡིན་རྒྱུ་རེད།
དོན་ངོ་མར། འབྲི་ཀློག་དྲི་འདེབས་དེ་བསམ་གཞིགས་ཀྱི་སྐུལ་སྐྱེད་ཐོན་དངོས་ལས། རྒྱུ་མེད་རྐྱེན་མེད་དུ་བརྡོལ་འོང་བ་ཞིག་མ་རེད་ལ། བསམ་གཞིགས་ཀྱི་འོ་མ་དཀྲོག་པ་ལས་འབྲི་ཀློག་དྲི་སོགས་ཀྱི་སྦྱོར་བའི་མར་ལོ་ཐོན་ཅིང༌། མར་དེས་སླར་ཡང་སེམས་ཀྱི་ཕུང་ཁམས་གསོ་བར་བྱེད་པ་བཅས་དེ་གཉིས་ཕར་ཚུར་འཁོར་བསྐྱོད་ཀྱི་འབྲེལ་བ་ཧ་ཅང་དམ་པོ་ཡིན།
ཡིན་ནའང༌། བསམ་གཞིགས་ལ་གནད་དུ་ཐོན་མིན་གྱི་ཚད་རིམ་མི་འདྲ་བ་མང་ཞིང༌། དེ་བཞིན་བསམ་གཞིགས་བྱ་སྐབས་ཀྱི་སེམས་པའི་ཤེད་རྩོལ་ཡང་ཆེ་ཆུང་མི་མཚུངས། བྱ་དངོས་ལ་ཤས་ཤིག་ལ་བསམ་གཞིགས་བྱེད་དུས་སེམས་ངལ་ལྕི་ལ། རེ་འགར་དེ་ཙམ་མིན་པ་ལྟ་བུ་ཡུལ་ཅན་སེམས་པ་འཇུག་སའི་ཡུལ་གང་རུང་བའི་ངོ་བོ་རྙོག་འཛིང་ཡིན་མིན་གྱིས་སེམས་ངལ་ཐག་གཅོད་བྱེད་ཀྱི་ཡོད་པ་རེད།
ཕྱི་རོལ་ཡུལ་གྱི་དངོས་པོ་དག་སེམས་སུ་ཚུར་འདྲིས་པར་བྱེད་པ་ནི་སློབ་སྦྱོང་དང༌། སློབ་སྦྱོང་ནི་ཆུ་བཞིན་རྙོག་ལ་རྩ་ལྟར་འཛིང་བ་ཞིག་ཡིན་སྟབས། གང་ལྟར། སློབ་སྦྱོང་བྱེད་མཁན་རྣལ་མ་ཞིག་ལ་མཚོན་ན་བསམ་གཞིགས་ཀྱི་སེམས་ངལ་གཞན་ལས་ལྕི་བ་ཡིན་ཟེར། གནས་ལུགས་འདི་ཤེས་རྗེས། ཕྱིར་རང་ཉིད་ཀྱི་སློབ་སྦྱོང་རྒྱུད་རིམ་ལ་བསམ་བློ་རེ་བཏང་ཡོང་དུས། མི་ལོ་ཉི་ཤུ་ལྷག་གི་སློབ་སྦྱོང་དེ་སློབ་སྦྱོང་ཡིན་མིན་གྱི་ཐེ་ཚོམ་ཞིག་སྐྱེ་ཡི་འདུག གང་གིས་ཞེ་ན། ང་རང་ལ་མཚོན་ན། འབྲི་ཀློག་དྲི་འདེབས་ཀྱི་སྦྱོར་བར་ཞུགས་པ་ཙམ་མ་གཏོགས། བསམ་གཞིགས་ཀྱི་སེམས་ངལ་ལྕི་མོས་སློབ་སྦྱོང་བྱས་བ་ཞིག་དྲན་གྱི་མི་འདུག་པས་རེད། འདི་ལྟར་བསམ་གཞིགས་ཀྱི་ནུས་སྟོབས་རྩལ་དུ་མ་སྟོན་པར་སློབ་འབྲས་ལེགས་པོ་ཞིག་ལེན་མི་ཐུབ་ཅིང༌། རང་ཉིད་ཀྱི་བསམ་བློའི་སེམས་ངལ་དང་བྲལ་བའི་སློབ་སྦྱོང་རྐྱང་ལས། བསམ་གཞིགས་རྒྱུན་འཁྱེར་གྱི་སློབ་སྦྱོང་བྱ་ཐབས་ཤིག་བསྟེན་ཐུབ་མ་བྱུང་བ་ཅི་ཞིག་གིས་མ་འགྲིག་པའི་ཐད་ལ་མནོ་བསམ་གཏོང་དུས། བསམ་གཞིགས་ནི་ཆུང་ནས་རྒྱུད་ལ་གོམས་འདྲིས་སུ་གཏོང་རྒྱུ་ཞིག་ཡིན་འདུག་ཅིང༌། དེའང་ཕ་མ་དང་དགེ་རྒན་གྱི་ལམ་སྟོན་རོགས་འདེགས་དང་ཁ་བྲལ་ཐབས་མེད་པ་ཞིག་རེད། ཡིན་ནའང༌། ང་ཚོའི་ཕ་མ་ཚོ་སྨོས་ཅི། དགེ་རྒན་ཚོས་ཀྱང་ཇི་ལྟར་བསམ་གཞིགས་བྱ་སྟངས་ཀྱི་ལམ་སྟོན་རོགས་འདེགས་ཁ་ཚ་དགོས་གཏུགས་ཅན་ཞིག་བྱེད་ཐུབ་ཀྱི་མེད། ཁོང་ཚོས་ནམ་རྒྱུན་སློབ་སྦྱོང་ལ་ཧུར་བརྩོན་བྱ་དགོས་ཚུལ་སོགས་ཡང་དང་བསྐྱར་མས་བཤད་རྒྱུའི་གོམས་སྲོལ་ཡོད་པ་མ་ཟད། ཐ་ན་ཤ་ཚས་རྡུང་རྡེག་བྱེད་སྲོལ་ཡང་ཡོད་མོད།
འོན་ཏང༌། ཇི་ལྟར་ཧུར་བརྩོན་བྱ་དགོས་བའི་ཐབས་ལམ་རྒྱས་སྟོན་བྱེད་ཐུབ་ཀྱི་མེད་ལ། སློབ་སྦྱོང་དང་བསམ་གཞིགས་གཉིས་ཕན་ཚུན་དབར་གྱི་འབྲེལ་བའི་ཐད་ལ་དེ་བས་ཀྱང་ཅི་གང་བཤད་ཀྱི་མེད། ང་ཚོའི་ཕ་མ་ཚོ་དང་དགེ་རྒན་ཚོས་སློབ་ཞུགས་ཀྱི་ཉིན་མ་དང་པོ་ནས་བཟུང༌། མཁས་པ་སློབ་པའི་དུས་ན་སྡུག ལྟ་བུའི་ཚིག་བཅད་རེ་འགའི་ནང་དོན་འགྲེལ་བཤད་ཀྱི་ཞོར་དུ། སུ་དང་གང་རྣམས་ཀྱིས་དཀའ་སྡུག་གིས་སློབ་སྦྱོང་བྱས་རབས་ཀྱི་མི་སྣ་དཔེ་སྟོན་ཅན་རེ་འགའ་བགྲངས་ཏེ། དེ་དང་དེ་ལ་མིག་བལྟས་བྱ་འོས་པའི་སྐུལ་མ་བྱེད་ཀྱི་ཡོད། སློབ་གྲྭ་ནས་ཕྱི་ལ་མ་ཐོན་བར་སློབ་སྐུལ་རོགས་འདེགས་ཀྱི་ལམ་སྟོན་རྒྱུན་ལྡན་ཅན་ཞིག་ཡོད་པ་ནི་དེ་ལྟ་བུ་ཞིག་ལས་མེད།
སློབ་སྦྱོང་ནི་སྔ་ཕྱིའི་བརྒྱུད་རིམ་སྤྱི་དང༌། ལྷག་དོན་དེང་གི་རིག་གནས་སློབ་གཉེར་བ་ཞིག་གི་ངོས་ནས་བཤད་ན། རང་ཉིད་ཀྱི་སེམས་པའི་འགུལ་སྐྱོད་དང་མཐུན་པའི་སློབ་སྦྱོང་ཐབས་ལམ་ཞིག་འཚོལ་དགོས་ལ། དེའང་བསམ་གཞིགས་བྱ་སྟངས་ཤིག་གིས་ཡིན་པ་ངོས་ཟིན་དགོས་རྒྱུ་དེ་ཅི་བས་ཀྱང་གལ་ཆེན་པོ་རེད།
སློབ་སྦྱོང་ཞེས་པའི་ཐ་སྙད་ལ་ཟུར་མི་འདྲ་བ་ནས་འགྲེལ་བརྗོད་ཀྱང་འདྲ་མི་འདྲ་སྣ་ཚོགས་བྱེད་ཆོག་ཆོག་ཡིན། ཐ་སྙད་རྐྱང་རྐྱང་གི་ཆ་་ནས་སྤྲོས་པ་ཆེར་བྱེད་པ་ལ་དགོས་པ་ཆེན་པོ་མ་མཐོང་། འཚོ་གནས་ནི་སློབ་སྦྱོང་དང་སློབ་
སྦྱོང་ནི་འཚོ་གནས་ཡིན་པ་ངོས་ཟིན་དགོས་རྒྱུ་དེ་ཅི་བས་ཀྱང་གལ་ཆེན་པོ་རེད། དེ་ལས་ཀྱང་གལ་ཆེ་ཤོས་ནི་བསླབས་
པའི་རིག་པ་ལོབས་པ་དང་སྦྱངས་པའི་ཆོས་་ལ་བྱང་སྟེ་ཕ་ཤུལ་བུ་ཡིས་ཟིན་རྒྱུ་དེ་རེད་སྙམ། ཁྱེད་རང་གིས་བལྟས་ན་ག་
འདྲ་རེད།
སློབ་སྦྱོང་ཞེས་པའི་ཐ་སྙད་ལ་ཟུར་མི་འདྲ་བ་ནས་འགྲེལ་བརྗོད་ཀྱང་འདྲ་མི་འདྲ་སྣ་ཚོགས་བྱེད་ཆོག་ཆོག་ཡིན། ཐ་སྙད་རྐྱང་རྐྱང་གི་ཆ་་ནས་སྤྲོས་པ་ཆེར་བྱེད་པ་ལ་དགོས་པ་ཆེན་པོ་མ་མཐོང་། འཚོ་གནས་ནི་སློབ་སྦྱོང་དང་སློབ་
སྦྱོང་ནི་འཚོ་གནས་ཡིན་པ་ངོས་ཟིན་དགོས་རྒྱུ་དེ་ཅི་བས་ཀྱང་གལ་ཆེན་པོ་རེད། དེ་ལས་ཀྱང་གལ་ཆེ་ཤོས་ནི་བསླབས་
པའི་རིག་པ་ལོབས་པ་དང་སྦྱངས་པའི་ཆོས་་ལ་བྱང་སྟེ་ཕ་ཤུལ་བུ་ཡིས་ཟིན་རྒྱུ་དེ་རེད་སྙམ། ཁྱེད་རང་གིས་བལྟས་ན་ག་
འདྲ་རེད།