དཔའ་བོ་ཞོགས་དུང་ལ་ཕུལ་བའི་འབེལ་རྩོམ་བཀྲ་ཤིས་དགུ་འཕྱུར།

(ཞོགས་དུང་གློད་ཙམ་གྱི་གཏམ་བཟང་རྣ་བར་སོན་རྗེས་ཀྱི་ཚོར་བའི་འཕྱུར་སྟངས་ཤིག)

བོན་རྒྱ་བསྟན་འཛིན་རབ་རྒྱས།

ཕྱག་སྟོང་སྤྱན་སྟོང་གོ་དེ་རིང་མཉམ་དུ་བརྡབ་ཞོག།
ཕྱག་མཚན་མེ་ཏོག་དེ་དེ་རིང་མཉམ་དུ་ཁུར་ཞོག།
སྲིད་པ་སྐས་དྲུག་གི་སྲས་མཆོག་རུས་པ་ཅན་པོ།།
སྲིན་པོ་བཙན་རྫོང་ནས་ཐར་ཏེ་དེ་རིང་ཐོན་ཡོད།།

སྲིད་པའི་ལྷ་རྒན་དེ་རྨ་ཆེན་སྦོམ་ར་ཕེབས་ཤོགས། །
སྔོན་ཚེ་ཙོང་ཁ་བའི་རྗེས་སུ་དབུས་ལ་སོང་ཚོད། །
ཁ་སང་ཞོགས་དུང་གི་རྗེས་སུ་བཙོན་ལ་སོང་ངེས། །
སྤྲུལ་བའི་སྐྱེས་ལྷ་ཁྱོད་དམིགས་བསལ་དཔལ་དར་ཡོད་དོ།།

མངའ་རིས་སྐོར་གསུམ་ནས་སྐོར་བྲོ་ཤུགས་ཀྱིས་མཆོང་ཤིགས། །
དབུ་གཙང་རུ་བཞི་ནས་སུག་བཞི་བྲོ་ལ་རོལ་ཞོག །
མདོ་ཁམས་སྒང་དྲུག་ནས་རྒྱུད་དྲུག་སྟོབས་ཀྱིས་བརྡུང་ཞོག །
དེ་རིང་ང་རྒྱལ་གྱི་དབུ་འཕང་དགུང་ལ་ཟུག་ཡོད། །

གནམ་གྱི་ཁྲི་བདུན་གྱིས་འཇའ་ཐག་འཐེན་ལ་ཕེབས་ཤོགས། །
ས་ཡི་ལེགས་དྲུག་གིས་ས་ཆེན་གཤོག་ལ་ཕེབས་ཤོགས། །
དམར་ཡག་སྟག་རྒོད་ཀྱི་སྟག་སྤགས་སྣོམས་ལ་ཕེབས་ཤོགས། །
དཔའ་བོ་སྟག་ལྤགས་ཀིས་གཡོགས་དུས་དེ་རིང་ཡིན་ནོ། །

ཉི་ཟླ་ནམ་མཁའ་ནས་ཤར་ནས་ཤོར་ལ་ཤོགས་ཡ། །
ཁ་འབབ་ཆུ་བོ་བཞི་བྲུག་ནས་འཕྱུར་ལ་ཤོགས་ཡ། །
མེས་པོ་དུར་སྒྲོམ་ནས་དགའ་ནས་དགོད་ལ་ཤོགས་ཡ། །
དེ་རིང་ཤི་གསོན་གཉིས་སྐོར་བྲོ་མཉམ་དུ་མཆོང་དགོས། །

དགའ་དུས་དགོད་སྒྲ་ལ་རོལ་བའི་གྲོགས་ཤིག་དགོས་ཡ། །
སྡུག་དུས་སྐྱོ་བ་དེ་ཐེག་པའི་སྙིང་ཞིག་དགོས་ཡ། །
འཚོ་བ་དོན་ལྡན་ལ་རོལ་སྟངས་འདི་འདྲ་ཡིན་པས། །
དེ་རིང་ས་ཡ་དྲུག་དགོད་ལ་མཆོང་ང་རྩེད་ཡ། །

ད་རུང་ནམ་འཛིན་གྱི་ཚོད་དཔག་ཐུབ་ཚོད་དཀའ་ལ། །
དེ་རིང་གཏན་ཐར་གྱི་དུས་ཚོད་གཏན་ནས་མིན་མོད། །
ལན་གཅིག་གློད་ཙམ་གྱི་དུས་ཚོད་གསེར་མགོ་མ་བོ། །
གསེར་འོད་ལམ་ལེམ་ལེམ་དགའ་བས་སྐྱིད་པོས་རོལ་ཡ། །

ཁབ་མིག་འུ་ཁུང་ནས་ལྟ་བའི་སོ་བ་ཡོད་ལ། །
འགྲོ་འདུག་སྤྱོད་གསུམ་ལ་དཔྱོད་པའི་དམག་མི་ཡོད་པ། །
མ་བཤད་མ་བསམ་ན་ཤེས་པའི་ཉམས་མྱོང་ཡིན་མོད། །
དེ་རིང་དེ་དག་ལ་བསམ་བློ་གཏོང་ཁོམ་མི་འདུག །

ནམ་མཁའ་སྔོན་པོ་ག་སྟོན་ན་མནའ་ཞིག་སྐྱེལ་ཡ། །
གངས་རི་དཀར་པོ་ག་སྟོན་ན་ཚད་ཅིག་འཇོག་ཡ། །
སྐྱེས་ནས་ད་ལྟའི་བར་དགའ་བ་འདི་འདྲ་ཞིག་གི། །
དུས་ཚོད་སྐར་ཆ་གཅིག་བདག་ལ་ཐོབ་མྱོང་མེད་དོ། །

གནངས་སང་གྲོགས་པོ་ཀུན་མཉམ་དུ་འཛོམས་ནས་རྩེད་དགོས། །
སྙན་ངག་གྱེར་འདོན་དང་གླུ་གཞས་རྒྱང་འཐེན་བྱེད་དགོས། །
ཁ་བཏགས་དཀར་ཤར་ཤུར་ཁ་བ་ཅན་ལ་གཡུགས་དགོས། །

བཀྲ་ཤིས་དོན་འགྲུབ་ཀྱི་ཀི་སྒྲ་མཉམ་དུ་སྒྲོག་དགོས། །

_____བོན་རྒྱ་བས་སྤྱི་ལོ 2010 ལོའི་ཟླ་ 10 ཚེས 16 ཉིན།