བོད་ཁུལ་གྱི་ཁྲམ་པ་མི་དྲུག

…………………………………   མགོ་ལོག་འཇིགས་བྱེད་ཚེ་རིང་།
བོད་ཁུལ་གྱི་ཁྲམ་པ་མི་དྲུག

དང་པོ། རྩོམ་པ་པོ།
སྦྱིར་རྩོམ་པ་པོ་ཞིག་ཡིན་ན་མ་མཐའ་ཡང་རྫུན་མི་བཤད་མཁན་ཞིག་ཡིན་དགོས།
རྩོམ་པ་པོའི་ཐོག་མའི་རྨང་གཞི་ནི་སུམ་རྟགས་དང་སྙན་ངག་ཡིན་མོད།
ང་ཚོའི་བོད་ཀྱི་རྩོམ་པ་པོ་མང་པོ་ཞིག་རྨང་གཞི་ཙམ་ཡང་མེད་པར་
བོད་ཀྱི་རྩོམ་རིག་གར་སྟེགས་སུ་འུར་རྒྱག་གིན་འདུག
ད་དུང་རང་མཐོང་ཆེ་ལ་ང་རྒྱལ་གྱི་ལྒང་བུར་གྱུར་འདུག ཡིན་ཡང་ཁོང་ཚོས་
སྐད་ཆ་དངོས་མ་ཞིག་བཤད་ཐུབ་ཀྱི་མི་འདུག་ནའང་དོན་མེད་སྟོང་བའི་འུད་གཏམ་
དང་ཡིག་ནོར་མང་པོའི་རྫོབ་དྲི་དེ་ཁོང་ཚོའི་རྒྱན་ཆ་རེད་ལ། བོད་ཀྱི་སུམ་རྟགས་དང་
སྙན་ངག་ཁོང་ཚོའི་ལག་ནས་འཇིག་ལ་ཉེ་བས། དེ་རིང་ངས་ཁོང་ཚོ་བོད་ཀྱི་ཁྲམ་པ་
དང་པོར་བདམས་པ་ཡིན།
གཉིས་པ། དགེ་རྒན།

དགེ་རྒན་ནི་མིའི་རིགས་ཀྱི་ལམ་སྟོན་སྒྲོན་མེ་ཡིན། དགེ་རྒན་ཞིག་ལ་མ་མཐའ་ཡང་
ལྷག་བསམ་རྣམ་པར་དག་པ་ཞིག་གིས་གཞིར་བྱས་རིག་པའི་གཞུང་ལུགས་
གང་ལ་ཡང་ལྟ་རྒྱ་ཐོས་རྒྱ་ཆེ་བ། མི་རིགས་སློབ་གསོའི་ལས་དོན་ཕྲག་ཏུ་ཁུར་ཐུབ་
མཁན་ཞིག་མ་མཐའ་ཡང་ཡིན་དགོས་མོད། དེ་ལས་ལྡོག་སྟེ་བོད་རིགས་
དགེ་རྒན་ཚོ་སློབ་ཁྲིད་ཀྱི་ཉམས་མྱོང་མེད་ལ། རིག་གཞུང་ལ་ལྟ་རྒྱ་དང་
ཐོས་རྒྱ་མེད་པ། མི་རིགས་སློབ་གསོ་ལ་ཐུགས་ཁུར་དང་མི་རབས་གསར་བ་ཞིག་
ཇི་ལྟར་བསྐྱེད་བསྲིངས་དགོས་མིན་ལ་འདང་རྒྱག་གིན་མི་འདུག་པས། དེ་རིང་
ངས་ཁོང་ཚོར་བོད་ཀྱི་ཁྲམ་པ་གཉིས་པར་བདམས་པ་ཡིན།
གསུམ། དཔོན་པོ།

དཔོན་པོ་ནི་རྒྱལ་ཁམས་མིག་གིས་མཐོང་ཞིང་རིག་པའི་ཁོ་ལག་རྒྱས་པ།
འབངས་མི་སེར་གྱི་དཀའ་སྡུག་ལ་ཐུགས་བརྩེ་ཆེ་བ། རང་ལས་མི་དམངས་ལ
ཤ་ཚ་མཁན་དང༌། སྙིང་སྟོབས་དང་སྤོབས་སེམས་ཀྱིས་མི་རིགས་ལ་སྣེ་ཁྲིད་
ཐུབ་པ་ཞིག་མ་མཐའ་ཡང་ཡིན་དགོས་མོད། དེང་དུས་ཀྱི་དཔོན་པོ་ཚོས་
ཏང་གི་རྒྱུགས་ཁྱི་ལྟར་མི་དམངས་ལ་གཉའ་གནོན་དང་བོད་རིགས་ལ་
རྡུང་རྡེག་འཕྲོག་བཅོམ་བྱས་ནས་ད་དུང་ཏང་གི་སྲིད་ཇུས་བཟང་ཚུལ་གྱི་
ཁ་གཡང་རེ་བསྒྲགས་ནས་རང་སར་བསྡད་ཡོད་པས། དེ་རིང་ངས་འདི་ནས་
ཁོང་ཚོ་བོད་ཀྱི་ཁྲམ་པ་གསུམ་པར་བདམས་ཐོན་བྱས་ཡོད།

བཞི། གཞས་པ་དང་གཞས་མ།
གླུ་གར་རིག་གནས་ནི་འཛམ་གླིང་གི་མཁས་པ་ཚོས་གསུངས་བ་བཞིན
རྒྱལ་ཁབ་ཅིག་གི་སྒོ་ཡོལ་ཡིན་མོད། བོད་ཀྱི་གཞས་པ་གཞས་མ་
མང་ཕྱོགས་ནི་ཡིག་རྨོངས་བ་ཡིན་པས་ལས་འགན་དེ་ཐེག་གིན་མི་འདུག
ཁོང་ཚོས་ལོ་རེ་བཞིན་སྒྲ་བརྙན་འཁོར་གྱིས་ས་སྟེང་བཀང་གིན་འདུག་མོད་
མང་ཕྱོགས་ཀྱི་གླུ་ཚིག་ནི（བླ་བསྟོད）ཙམ་དང་ཡང་ན་རི་ལུང་ལ་
བསྟོད་པ་སོགས་བྱས་ནས་གླུ་ངོ་མ་ཞིག་ལེན་ཐུབ་ཀྱི་མི་འདུག
ཡང་ཁ་ཤས་ཀྱི་གླུ་ཚིག་ནི་ཡིག་ནོར་མང་ལ་དབྱངས་དང་
ཚིག་གཞན་ལ་བརྐུ་བྱས་པའང་ཧ་ཅང་མང་པོ་ཡོད་པས།
དེ་རིང་ངས་ཁོང་ཚོ་བོད་ཀྱི་ཁྲམ་པ་བཞི་བར་བདམས་ཐོན་བྱས་ཡོད།

ལྔ། གྲྭ་བ།
གྲྭ་བ་ཞིག་ཡིན་ན་ལམ་བསླབ་པ་གསུམ་ལ་ཉམས་ལེན་དང་
ལུང་སྡེ་སྣོད་གསུམ་ལ་འཆད་ཉན་དགོས་མོད།
བོད་ཀྱི་གྲྭ་བ་ཚོས་རྒྱ་ཡུལ་འགྲིམ་ནས་ནས་མགོ་སྐོར་གྱི་
བྱ་བ་སྐྱུག་དྲི་ཐུལ་བ་མང་པོ་བརྩམས་མྱོང་ལ་གྲོང་ཁྱེར་འགྲིམ་ནས་
སློབ་གསོའི་ལས་དོན་གཉེར་ཞིང་ཆབ་སྲིད་ཀྱི་འགྲན་རྩོད་ལ་
དངོས་སུ་བཞུགས་ཀྱི་འདུག་པས། ངས་དེ་རིང་ཁོང་ཚོ་བོད་ཀྱི་
ཁྲམ་པ་ལྔ་བར་བདམས་ཐོན་བྱས་ཡོད།

དྲུག སློབ་ཆེན་སློབ་མ།
ཁྱེད་ཚོ་མི་རིགས་ཤིག་གིས་རེ་བའི་རི་མོ་འཆང་ས་ཡིན་ལ་
མི་རབས་ཤིག་གིས་སྐྱིད་སྡུག་གི་བདག་པོ་ངོ་མ་དག་ཡིན་མོད།
རང་རིགས་དང་ཕ་སྐད་བརྗེད་ཀྱིན་པའི་སློབ་བུ་མགོ་སྟོང་ཚོ་
སློབ་གྲྭ་འགྲིམ་པ་ནི་ཁ་རྒྱབ་ཀྱི་ཆེད་དུ་ངོས་འཛིན་གནང་ཡོད་ལ་
ད་དུང་རང་ཉིད་ནི་ལྟ་རྒྱ་ཅན་དང་མཐོང་རྒྱ་ཅན་རེ་ཡིན་མདོག་ཁ་པོ་
བྱས་ནས་མགོ་སྐོར་གྱི་བྱ་བ་སྣ་ཚོགས་དང་འཁྲིག་སྲེད་ཀྱི་ལས་འགུལ་སྣ་
ཚོགས་ལ་མགོ་འཁོར་ནས་རང་རིགས་དང་མི་རབས་གསར་བར་བསམ་
གཞིགས་གཏན་ནས་བྱེད་ཀྱིན་མི་འདུག་པས། ངས་དེ་རིང་ཁྱེད་ཚོ་
བོད་ཀྱི་ཁྲམ་པ་དྲུག་པར་བདམས་ཐོན་བྱས་ཐུབ་ཐལ།