གཙང་ཞོལ་བདེ་གསལ་གྱིས
ད་ལྟ་བོད་ནང་དུ་སློབ་ཕྲུག་སྟོང་ཕྲག་མང་བོས་བོད་ཀྱི་སྐད་ཡིག་གི་ཚེ་སྲོག་སྐྱོབ་ཆེད་ཞི་བའི་ངོ་རྒོལ་བྱས་པར་བྲིས།མི་རིགས་ཤིག་འཆི་གསོན་གྱི་འབྲེལ་ཐག་འཛིན་པའི་རང་གི་ཕ་སྐད་དྭངས་མོ། ཡར་ཀླུང་རིག་གཞུང་གི་དབུགས་རྔ་ཕྲ་མོ་ལ་དང་བ་འདྲེན་པའི་ཡུམ་སྐད་གཙང་མ། ཁྱེད་ཉིད་ལ་འདི་ལྟ་བུའི། བཙན་ཤུགས་དང་། དབང་ཤུགས་ཀྱི་རྒྱ་སྒོ་ནས་གནོན་བཙུར་སྡམ་གསུམ་གྱིས་སྲོག་རྩ་ལ་བརྙབ་ཡོང་དུས། ངའི་མགོ་ལུས་སྲོག་གསུམ་ལ་ཁྱབ་པའི་ཁྱེད་ཀྱི་མ་བཅོས་པའི་ཉམས་འགྱུར་གྱི་ཁུགས་སོ་རེ་རེར་སྐྱོ་བ་དང་རྒུད་པའི་ལམ་འཕྲང་གཅོང་ཞིང་རོང་།
ཤར་གླིང་གི་བོད་བཙན་པོའི་ང་རྒྱལ་དང་། ཁྲག་རྒྱུན་ལས་བཞུར་བའི་ཁྱེད་ཀྱི་དབྱངས་གསལ་གྱི་ཚིག་སྦྱོར་དེ་དག་གིས་ང་ལ་ཕྱི་མིག་ཐེངས་གཅིག་གིས་གཟིགས་སྐྱོང་ཙམ་ཡང་མི་གནང་བར་འགྲོ་རན་པ་ཡིན་ནམ།
ངོ་མ། དྲག་དཔུང་དང་ངན་གཡོའི་ཁ་རྩ་ན་རྒྱུ་འབྲས་དང་ཁྲིམས་ཡིག་གིས་ཅི་བྱ་སྟེ། ཀུན་ཀྱང་སྒེར་གཅོད་པའི་བཀའ་ལས་འདའ་མི་ཆོག་པས་སོ།
འོན་ཀྱང་། ངེད་ཕ་རིང་བུ་རྒྱུད་ཀྱི་རྨོག་དཀར་གྱི་དར་འཕྲུ་བཞིན་དབུ་ལ་བཙུགས་ཤིང་། ཁྲབ་དཀར་གྱི་རྒྱུན་ཐག་བཞིན་ལུས་ལ་བསྡམས་ཏེ། བྱམས་ལྡན་གྱི་ཕ་མ་བཞིན་གཅེས་སྲོག་ལྡན་ལ། ཞེ་འདང་གི་ཆུང་མ་བཞིན་སྙིང་ལ་ཉར་བའང་ཁྱེད་ཁོ་ན་ལགས་ཕྱིར། འབྲེལ་འདྲིས་ཀྱི་ངོ་སྐལ་ཞིག དམ་ཚིག་གི་མདུད་མཚམས་ཤིག བསྐོས་ཐང་གི་རི་མོ་ཞིག མཉམ་མྱོང་གི་སྡུག་བསྔལ་ཞིག གང་ལ་འདང་བརྒྱབ་ཀྱང་ཁྱེད་སོང་ཤུལ་ན་ང་ལ་བསྡད་ས་དང་བརྟེན་ས་ཅི་ཡང་མེད།
རིག་གནས་མེད་པའི་མི་རིགས་ཤིག་དང་། ཕ་མ་མེད་པའི་བུ་ཕྲུག་ཅིག ཁྱོ་ག་མེད་པའི་ཡུགས་མོ་ཞིག་གི་མྱ་ངན་གྱི་སྨག་རུམ་དང་དུ་བླངས་ནས་འཐོམ་ཞིང་ཞུམ་དགོས་པ་ལས། ངའི་ཚེ་སྲོག་རྟ་རྔ་འདྲ་བོ་ཡང་ཁྱོད་དང་མཉམ་དུ་སྟོང་དབྱིངས་སུ་སྤུར་བས་དགའ། ཅིའི་ཕྱིར་ཞེ་ན། ཁྱེད་ཀྱིས་བརྩེ་བརྩེ་དུངས་དུངས་ཀྱིས་ང་དང་ངའི་མི་རིགས་ཀྱི་མགོ་བཏེགས་ཤིང་འདབ་སྐྱོར་བའི་འགན་ལྕི་མོ་ཁུར་ཁུར་བའི་མཐའ་མར།
དེ་རིང་འདི་འདྲའི་བརྙས་བཅོས་དང་ན་ཟུག་ཅིག་མྱངས་ནས་འགྲོ་དགོས་བྱུང་ན། ང་ལ་ཁྱོད་ཀྱི་སྲོག་རྩ་གཅོད་མཁན་གྱི་ལག་དམར་དེར་ཤ་འཁོན་ལེན་པའི་ནུས་པ་མེད་སོང་ནའང་། ཁྱེད་དང་མཉམ་ཤི་རྒྱག་པ་དེ། ཁོག་དཔུང་དང་དྲིན་བཟོ་ཞིག་གི་ཆེད་ཡིན། ཀྱེ་མ། ངའི་སྐད་ཡིག
༢༠༡༠ ༡༠ ༢༢ ཉིན།