མཚོ་ནུབ་ཁུལ་མདོ་སྨད་ཐེམ་ཆེན་རྫོང་བོད་ཡིག་སློབ་འབྲིང་གི་སློབ་མ་༣༠༠ལྷག་གིས་མཚོ་སྔོན་གྱི་སློབ་གསོ་བཅོས་བསྒྱུར་སྲིད་ཇུས་ལ་མི་འདོད་པའི་རྣམ་འགྱུར་བསྟན་ནས་རྫོང་སྲིད་གཞུང་གི་མདུན་དུ་སོང་སྟེ་ངོ་རྒོལ་དང་རེ་སྐུལ་ཞུས་འདུག
ཚེས་༢༦ཉིན་ཨེ་ཤེ་ཡ་རང་དབང་རླུང་འཕྲིན་ཁང་ལ་གནས་ཚུལ་འབྱོར་བ་ལྟར་ན། སྤྱི་ཟླ་༡༠ བའི་ཚེས་༢༥ཉཉིན་གྱི་ཕྱི་དྲོ་ཆུ་ཚོད་གཉིས་ཙམ་ལ་མཚོ་སྔོན་ཞིང་ཆེན་མཚོ་ནུབ་ཁུལ་ཐེམ་ཆེན་རྫོང་མི་རིགས་སློབ་འབྲིང་གི་སློབ་མ་༣༠༠ ལྷག་གིས་རྔམ་སྟོན་ཁྲོམ་སྐོར་བྱས་ནས་རྫོང་སྲིད་གཞུང་གི་མདུན་དུ་སོང་སྟེ་ངོ་རྒོལ་བྱས་ཡོད་པ་དང་། ངོ་རྒོལ་སྐབས་སློབ་མ་རྣམས་ཀྱིས་༼སྐད་ཡིག་གཅེས་སྐྱོང་། མི་རིགས་འདྲ་མཉམ་༽ཞེས་འབོད་ཚིག་སྒྲོག་བཞིན་ཐེམ་ཆེན་རྫོང་བོད་ཡིག་སློབ་འབྲིང་ནས་རྫོང་སྲིད་གཞུང་གི་མདུན་བར་དུ་གོམ་བགྲོད་བྱས་ཡོད་ལ། རྫོང་སློབ་འབྲིང་ནས་སྲིད་གཞུང་ཕལ་ཆེར་སྤྱི་ལེ་གཉིས་གསུམ་ཞིག་ཡོད་པ་དང་། སློབ་མ་ཚོས་༼༢༠༡༠ནས་༢༠༢༠ལོའི་མཚོ་སྔོན་ཞིང་ཆེན་གྱི་དུས་ཡུན་འབྲིང་རིང་གི་སློབ་གསོ་བཅོས་བསྒྱུར་དང་འཕེལ་རྒྱས་ཀྱི་འཆར་འགོད་རྩ་གནད་༽ཅེས་པའི་ཡིག་ཆའི་ནང་དོན་ལ་འདོད་མོས་མེད་ཚུལ་གྱི་རྣམ་འགྱུར་ཤུགས་ཆེན་བསྟན་པ་དང་ཆབས་ཅིག་སྲིད་ཇུས་དེ་ལག་བསྟར་བྱ་རྒྱུར་ངོ་རྒོལ་བྱས་ཡོད་འདུག རྫོང་སྲིད་གཞུང་གི་མདུན་དུ་སྐད་འབོད་ངོ་རྒོལ་ཆུ་ཚོད་ཕྱེད་ཀ་ཙམ་བྱས་རྗེས་རྫོང་ཉེན་རྟོག་པ་ཡོང་ནས་སློབ་མ་རྣམས་ཕྱིར་སློབ་གྲྭར་བསྐྱལ་ཡོད་ཅིང་། ད་ལྟའི་བར་ཉེན་རྟོག་པས་སློབ་མ་ཚོར་གཅར་རྡུང་དང་འཛིན་བཟུང་སོགས་བྱས་མེད་ཟེར།ཡང་གནས་ཚུལ་ཡོང་ཁུངས་ནས་བརྗོད་ན། ད་ལྟ་སློབ་མ་ཚོ་རྫོང་བོད་ཡིག་སློབ་འབྲིང་ནང་བཅུག་ནས་ཕྱི་ལ་འགྲོ་ཆོག་གི་མེད་པ་མ་ཟད་གཙང་སྤྱོད་དུ་འགྲོ་སྐབས་ཀྱང་ཉེན་རྟོག་པས་ལྟ་རྟོག་བྱེད་ཀྱི་ཡོད་ཚུལ་བརྗོད་བྱུང་།ཐེམ་ཆེན་རྫོང་སློབ་འབྲིང་ཡོངས་ལ་སློབ་མ་ཆིག་སྟོང་དྲུག་བརྒྱ་ནས་བདུན་བརྒྱ་བར་ཡོད་འདུག ཐེམ་ཆེན་རྫོང་ནི་མཚོ་སྔོན་ཞིང་ཆེན་གྱི་རང་སྐྱོང་ཁུལ་དྲུག་ཡོད་པའི་ནང་གི་བོད་རིགས་གཅིག་པོ་མ་ཡིན་པའི་མཚོ་ནུབ་སོག་རིགས་བོད་རིགས་རང་སྐྱོང་ཁུལ་གྱི་ཁོངས་གཏོགས་ཡིན་པ་དང་། དེ་སྔོན་བོད་ཡིག་ལས་སློབ་ཁྲིད་གཞན་ཚང་མ་རྒྱ་ཡིག་ནང་འཆད་ཁྲིད་བྱེད་བཞིན་ཡོད་ནའང་། ལོ་རབས་དགུ་བཅུའི་མགོ་སྟོད་ནས་རྨ་ལྷོ་དང་མཚོ་ལྷོ་སོགས་ནས་ཆེད་དུ་ལོ་རེ་བཞིན་བོད་ཡིག་དགེ་རྒན་གདན་འདྲེན་གྱིས་སློབ་ཁྲིད་མང་པོ་ཞིག་བོད་ཡིག་བསྒྱུར་ཟིན་པའམ་སྒྱུར་བཞིན་པའི་སྒང་ཡིན་པ་མ་ཟད་། ལོ་འདི་འགའི་ནང་གཏེན་ཁ་གྲོང་ཁྱེར་དུ་ཐེམ་ཆེན་རྫོང་མི་རིགས་སློབ་འབྲིང་གཉིས་པ་བཙུགས་ནས། བོད་ཡིག་གོང་སྤེལ་འཕེལ་རྒྱས་འགྲོ་བཞིན་པའི་སྒང་ཡིན་ཡང་། ད་ལྟ་ཡང་བསྐྱར་བོད་ཡིག་ཉམས་དམས་ཀྱི་ཉེན་ཁར་འཕྲད་པ་རེད། སྤྱིར་བོང་སྟག་ཅེས་འབོད་པའི་ཐེམ་ཆེན་རྫོང་ནི་མཚོ་ནུབ་ཁུལ་གྱི་བོད་རིགས་ཁོ་ན་གནས་སྡོད་ཀྱི་འབྲོག་སྡེ་འབྱོར་ཕྱུག་ལྡན་པ་དང་། རི་མཐོ་ས་གཙང་རིན་ཆེན་གཏེར་གྱིས་ཁེངས་བ་ཞིག་ཡིན་ལ། རྒྱ་ནག་གཞུང་འབྲེལ་གྱི་སྤྱི་ལོ་༢༠༠༣ལོའི་སྤྱི་བསྡོམས་ལྟར་ན་། 
ས་གནས་རང་དུ་གནས་སྡོད་མི་གྲངས་ཁྲི་གཅིག་དང་སྟོང་བརྒྱད་ལས་མེད་ལ། དེའི་ཁྲོད་བརྒྱ་ཆའི་བརྒྱད་ཅུ་བོད་རིགས་ཡིན་ཡང་། ལོ་བཅུ་ཁ་ཞིག་གི་སྔོན་ནས་ཐེམ་ཆེན་གྱི་མུ་རི་གཏེར་ཁུལ་ཞེས་རང་བྱུང་རྡོ་སོལ་གཏེར་ཁ་ཆེན་པོ་བསྔོག་འདོན་གྱིས་། ད་ལྟ་ས་གནས་དེར་ཉུང་མཐའ་རྒྱ་རིགས་ཁྲི་བདུན་བརྒྱད་ཅིག་གནས་སྡོད་བྱས་ཡོད་པར་ས་གནས་བོད་མིས་ཡིད་ཆེས་བྱེད་བཞིན་ཡོད་ལ། ན་ནིང་ས་དེར་༼རང་འབར་སོལ་རླངས་༽ཟེར་བའི་གཏེར་རྫས་རྩ་ཆེན་ཞིག་རྙེད་པས་རྐྱེན་གྱིས་། ད་ལྟ་ས་གནས་དེར་ཉུང་མཐའ་རྒྱ་རིགས་འབུམ་གཅིག་གཞིས་སྤོ་ཆེད་ཐོག་ཁང་དང་རྒྱ་ལམ་སོགས་འཛུགས་སྐྲུན་གཞི་རྒྱ་ཆེན་པོ་བྱེད་ཀྱིན་ཡོད་པས་། ས་གནས་བོད་མི་ཚོ་དཀའ་ངལ་ཆེན་པོར་འཕྲད་བཞིན་པ་གནས་ཚུལ་ཡོང་ཁུངས་ནས་གསུང༌ཡོད་།
རེད་ཡ། ས་ཆ་དེ་ནི་བོད་རིགས་གནས་པའི་ས་ཆ་ཕུན་སུམ་ཚོགས་པ་ཞིག་ཡིན་ན་ཡང་། བོད་ཕྱོགས་ན་རྒྱུས་ཆེན་པོ་མེད་པས། རྒྱ་རྒན་ཚང་གིས་ཁུ་ཁུ་སུམ་སུམ་ལ་མི་སེར་སྤེལ་རྒྱུ་ཡིན་པ་གཏན་འཁེལ་བ་རེད། ས་ཆ་དེ་འདྲ་འཛོམས་པོ་ཞིག གསར་འགོད་པས་དེའི་ཕྱོགས་ཀྱི་གནས་ཚུལ་སྤེལ་བ་རིན་ཐང་ཆེ། མུ་མཐུད་ནས་དེའི་ཕྱོགས་ཀྱི་གསར་འགྱུར་རྣམས་སྤེལ་དགོས་པར་སེམས།
གནས་ཚུལ་མཁོ་སྤྲོད་གནང་བར་ཡག་བྱུང་། ལོ་ཆུང་སློབ་མ་ཚོ་སྙིང་སྟོབས་ཆེན་པོ་རེད། ང་ཚོ་རྒན་པ་ཚོས་ཀྱང་ཧུར་ཐག་བྱེད་དགོས་འདུག སྐད་ཡིག་གི་གནད་དོན་དེས་རྒྱ་གཞུང་ལ་བཟོ་ལྟ་ཡག་པོ་ཞིག་མ་སྤྲས་ན་ང་ཚོའི་ཡོད་ཚད་ཁོང་ཚོར་ཤོར་ཚར་གྱི་འདུག ཁ་སྔོན་བདག་དབང་དང་རང་དབང་དོན་དུ་སྐད་འབོད་བྱས་པ་དག་ལ་རྒྱ་གཞུང་ཁ་ནག་དེས་མི་རིགས་ཀྱི་གདོང་གཏུག་དང་ཆབ་སྲིད་ཀྱི་གནད་དོན་ཕྱོགས་ལ་ཁ་བསྐོར་ནས་ང་ཚོ་བོད་མི་མང་པོའི་ཚེ་སྲོག་ཤོར་བ་དང་དཀའ་སྡུག་ཚད་མེད་མྱངས་ཡོད། སྐབས་དེ་དུས་རྒྱ་གཞུང་གིས་ཆབ་སྲིད་བདག་དབང་དང་མི་རིགས་གདོང་གཏུག་གི་ཕྱོགས་ནས་སྐད་ཆ་བཤད་པ་དང་། བོད་མིའི་ཞི་བའི་འོས་ལངས་དེར་མྱུལ་མ་མང་པོ་བཏང་ནས་དྲག་པོའི་ཟིང་ཆ་ཞིག་གི་ཕྱོགས་སུ་ཁ་ལོ་སྒྱུར་བས་ང་ཚོ་བོད་མིར་གྱོང་ཆེན་པོ་རག་ཡོད་ཀྱང་རྒྱལ་སྤྱིའི་ཕྱོགས་ནས་འཕྲལ་མར་ཕན་པའི་རོགས་རམ་དང་བྱ་འགུལ་ཆེ་བ་སྤེལ་ཁག་པོ་ཆགས་པ་རེད། དེ་རིང་སྐད་ཡིག་གི་རང་དབང་དེ་མི་རིགས་འདྲ་མཉམ་དང་མི་རིགས་ཀྱི་དབང་ཆའི་དོན་དག་ཡིན་ལ། སློབ་མས་ཁྲོམ་སྐོར་དང་སྐད་འབོད་བྱས་པའི་ཐོག་ལ། དགེ་རྒན་དང་ལས་བྱེདཔས་དེ་ཕན་གྱི་རང་མི་རིགས་ཀྱི་རྩ་བའི་དབང་ཆ་རྩོད་ལེན་ལ་གཞོགས་འདེགས་དང་དཔུང་རོགས་བྱས་པ་དེ་རྗེས་དཔག་བློ་ཡིས་ཚོད་འཛིན་ཡོད་པའི་རྩོད་ལེན་བྱེད་ཐབས་ཤིག་རེད་འདུག ང་ཚོས་ཡུན་རིང་པོའི་ཞི་བའི་འཐབ་རྩོད་བྱེད་ཐབས་ལ་ཉམས་མྱོང་བསགས་དགོས་འདུག སྔོན་མ་སྐད་ཆ་དེ་འདྲ་ཞིག་གོ་མྱོང་། ༢༠༠༨ལོར་བོད་དུ་འོས་ལངས་བྱུང་དུས་ཚེས་༡༠ནས་༡༤བར་ཉེན་རྟོག་པས་བཀག་འགོག་ཕྲན་བུ་ལས་དམ་དྲག་མ་བྱས་པར་བཞག་རྗེས་ཉིན་གཅིག་གཉིས་བོད་མིའི་གང་བྱས་ལྟ་བུ་ཞིག་ཆགས་པ་དང་དེའི་ཞོར་ལ་དམག་མི་མྱུལ་མས་བོད་མིར་བརྫུས་ནས་བཅག་བཅོག་རྡུང་བསྲེགས་བྱས་པའི་སྐབས། རྒྱ་དཔོན་ཞིག་གིས་ང་ཚོས་ལྷ་ས་ནམ་ཡང་བཟུང་ཐུབ་པའི་ཆེད་དུ་ཁྱོད་བོད་པ་ལྷ་ས་ཉིན་གཉིས་བཟུང་འཇུག་ཆོག་ཅེས་བཤད་པ་རེད་ཟེར། སྐད་ཆ་དེ་ལས་རྒྱ་མིའི་ཇུས་ངན་དང་གནག་སེམས་མཐོང་ཐུབ། བྱས་ཙང་ང་ཚོ་བོད་མིས་ཞི་བའི་འཐབ་རྩོད་རྒྱུན་འཁྱོངས་བ་བྱེད་པ་དང་། དུས་སྐབས་གཅིག་ཉིན་གཅིག་གི་རྒྱལ་ཁའི་ཆེད་དུ་བློས་གཏོང་ཆེན་པོ་འགྲོ་མི་དགོས་པ་དང་རྒྱ་མིའི་གཡོ་ཇུས་ནང་མི་ཚུད་པ་བྱེད་དགོས་འདུག བོད་མིས་ཐོག་མར་རྒྱ་མིའི་ཁྲིམས་ཡིག་ནང་ང་ཚོར་སྤྲད་པའི་དབང་ཆ་དེ་ཚོ་རེ་རེ་བཞིན་ཚུར་ལེན་དགོས་པ་དང་། དེ་ནས་དོན་ཚན་བཅུ་བདུན་པའི་ནང་ང་ཚོར་སྤྲད་པའི་དབང་ཆ་དེ་ཚོ་ཚུར་ལེན་དགོས། དེ་ཚོ་ཐོབ་ཚར་རྗེས་རང་ཚུགས་འཛིན་རྗེས་རྒྱ་དང་ཅོག་ཙེའི་ཁ་སྤྲོད་དུ་བསྡད་ནས་རྒྱལ་སྤྱིའི་ཁྲིམས་གཞི་བཀྲམས་ཏེ་མཐའ་མའི་བདག་དབང་རྩོད་དགོས། གོམ་པ་དེ་ལྟར་སྤོས་ན་རྒྱ་གཞུང་ཇུས་ངན་དེ་གྱང་ཟུར་ལ་བཀར་ཐུབ་ཀྱི་རེད།