མགོ་ཁྲིད་ལས་བྱེད་པས་ཞིང་ཆེན་ཡོངས་ཀྱི་སློབ་གསོའི་ཚོགས་ཆེན་གྱི་དགོངས་དོན་ལ་སློབ་སྦྱོང་དང་ལག་བསྟར་བྱེད་པའི་བཞུགས་མོལ་ཚོགས་འདུ་ཟི་ལིང་ནས་བསྡུས་པ།

མཚོ་སྔོན་བོད་སྐད་རླུང་འཕྲིན་དྲ་རྒྱ་ནས་བཏུས

དུས་ཚོད་། ༢༠༡༠-10-27 10:07:46.0

ཟླ་བཅུ་བའི་ཚེས་ཉེར་ལྔ་ཉིན། ཧྲིན་ཀྲང་གཞོན་པ་ཀའོ་ཡུན་ལུང་གིས་མགོ་འཛིན་བྱས་ཏེ་མགོ་ཁྲིད་ལས་བྱེད་པས་ཞིང་ཆེན་ཡོངས་ཀྱི་སློབ་གསོའི་ཚོགས་ཆེན་གྱི་དགོངས་དོན་ལ་སློབ་སྦྱོང་དང་ལག་བསྟར་བྱེད་པའི་བཞུགས་མོལ་ཚོགས་འདུ་བསྡུས་པར་མ་ཟད་གཏམ་བཤད་གནང་། ཞིང་ཆེན་སློབ་གསོ་ཐིན་དང་ཞིང་ཆེན་མི་རིགས་ཆོས་ལུགས་ལས་དོན་ཨུ་ཡོན་ལྷན་ཁང་། ཞིང་ཆེན་དམངས་སྲིད་ཐིན། ཞིང་ཆེན་ཞིང་ཕྱུགས་ཐིན། ཞིང་ཆེན་དབུལ་སྐྱོར་ཅུའུ། ཞིང་ཆེན་རྩོམ་རིག་སྒྱུ་རྩལ་ལས་རིགས་མཉམ་འབྲེལ་ལྷན་ཚོགས། ཞིང་ཆེན་སྤྱི་ཚོགས་ཚན་རིག་གླིང་། ཞིང་ཆེན་ཚན་རྩལ་མཐུན་ཚོགས། ཞིང་ཆེན་རྒྱ་གྲམ་དམར་པོ་ཚོགས་པ། མཚོ་སྔོན་མི་རིགས་སློབ་གྲྭ་ཆེན་མོ་སོགས་འབྲེལ་ཡོད་ལས་ཁུངས་ཀྱི་མགོ་ཁྲིད་བློ་མཐུན་ཚོགས་འདུར་ཞུགས།

ཚང་མས་གཅིག་གྱུར་གྱིས་བལྟས་ན། ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་གིས་བསྡུས་པའི་ཞིང་ཆེན་ཡོངས་ཀྱི་སློབ་གསོའི་ཚོགས་ཆེན་ནི་རང་ཞིང་གི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་གནད་འགག་གི་སྐབས་སུ་བསྡུས་པའི་ཚོགས་འདུ་ཧ་ཅང་གལ་ཆེན་ཞིག་ཡིན་ལ། ཚོགས་ཐོག་ནས་དུས་རབས་གསར་བའི་ཚུན་ལ་རང་ཞིང་གིས་སློབ་གསོའི་ལས་དོན་ཐད་ནས་བླངས་པའི་གྲུབ་འབྲས་གལ་ཆེན་དང་ཉམས་མྱོང་བཟང་པོ་སྤྱི་སྡོམ་ནན་མོ་བྱས་པ་དང་། གནས་པའི་གནད་དོན་གཙོ་བོར་དངོས་ཐོག་བདེན་འཚོལ་སྒོས་དབྱེ་ཞིབ་བྱས་ཤིང་། རྗེས་ཕྱོགས་ཀྱི་ལོ་བཅུའི་རང་ཞིང་གི་སློབ་གསོའི་ལས་དོན་གྱི་བཅོས་སྒྱུར་དང་འཕེལ་རྒྱས་ཀྱི་རླབས་ཆེན་དམིགས་འབེན་ལ་ཚན་རིག་དང་མཐུན་པར་འཆར་འགོད་བྱས་པས། རང་ཞིང་གི་སློབ་གསོའི་ལས་དོན་སྔོན་ལ་འཕེལ་རྒྱས་སུ་གཏོང་བ་དང་། མཆོང་སྐྱོད་སྒོས་འཕེལ་རྒྱས་སུ་གཏོང་བ། ཚན་རིག་དང་མཐུན་པར་འཕེལ་རྒྱས་སུ་གཏོང་བ་བཅས་ལ་ལོ་རྒྱུས་ཀྱི་ཤན་ཤུགས་ཟབ་མོ་ཐེབས་ངེས་པར་འདོད། ཚང་མས་ལང་ལོང་སྒོས་བཤད་རྒྱུར། མགོ་ཁྲིད་ལས་བྱེད་པ་ཞིག་ཡིན་པའི་ཆ་ནས་སྣེ་ཁྲིད་དེ་ཚོགས་འདུའི་དགོངས་དོན་དྲིལ་སྒྲོག་དང་ལག་བསྟར་བཟང་པོ་བྱས་ཏེ། སློབ་གསོའི་ལས་དོན་གྱིས་རང་ཞིང་གི་འཕེལ་རྒྱས་བཞི་ལ་ཞབས་འདེགས་ཞུ་བར་ཡར་སྐུལ་བྱེད་པའི་ཆེད་དུ་བྱས་རྗེས་སྔར་ལས་ཆེན་པོ་འཇོག་རྒྱུ་ཡིན་ཟེར།
ཞིང་ཆེན་མི་རིགས་ཆོས་ལུགས་ལས་དོན་ཨུ་ཡོན་ལྷན་ཁང་གི་ཀྲུའུ་རིན་ཕུར་བས་བཞུགས་མོལ་བྱེད་སྐབས་བཤད་རྒྱུར། རང་ཞིང་ནི་དཔལ་འབྱོར་དར་རྒྱས་མིན་པའི་ཞིང་ཆེན་ཞིག་ཡིན་པས། སློབ་གསོ་སྤེལ་དཀའ་ལ་མི་རིགས་སློབ་གསོ་དེ་བས་ཀྱང་སྤེལ་དཀའ། ཞིང་ཆེན་ཡོངས་ཀྱི་སློབ་གསོའི་ཚོགས་ཆེན་གྱིས་དེའི་ཐད་ཀྱི་དཀའ་གནད་ལ་དབྱེ་ཞིབ་གསལ་བོ་བྱས་ཡོད་པ་དང་། བརྒལ་གཏོར་བྱེད་ས་ཡང་དག་པར་བདམས་ཡོད་ལ། ཁ་ཕྱོགས་གསལ་བོར་བསྟན་ཡོད་པ་དང་། དམིགས་འབེན་གཏན་ཁེལ་བྱས་ཡོད། ལྷག་པར་དུ་ཚོགས་ཐོག་ནས་བཏོན་པའི་མི་རིགས་སློབ་གསོ་དང་སྐད་གཉིས་སློབ་གསོའི་མཛུབ་སྟོན་བསམ་བློ་དང་འབད་འཐབ་དམིགས་འབེན། གཞི་རྩའི་རྩ་དོན་བཅས་ཧ་ཅང་ཡང་དག་པ་ཡིན་ལ། རང་ཞིང་གི་དོན་དངོས་དང་མཐུན། མི་རིགས་སློབ་གསོ་དང་སྐད་གཉིས་སློབ་གསོའི་བྱ་བར་རིགས་བཀར་ཏེ་མཛུབ་སྟོན་དང་ས་ཁུལ་བགོས་ཏེ་སྐུལ་འདེད། གོ་རིམ་དབྱེ་ནས་ལག་བསྟར་བཅས་བྱེད་དགོས་པ་ལས་དབྱེ་བ་མི་འབྱེད་པར་གཅིག་མཚུངས་ཀྱི་བྱེད་ཐབས་སྤྱོད་མི་རུང་། ཚན་རིག་དང་མཐུན་ཞིང་འོས་འཚམ་ཡིན་པའི་གདེང་འཇོག་བྱེད་ལུགས་གཏན་འབེབ་བྱས་ཏེ། ས་ཁུལ་མི་འདྲ་བར་གདེང་འཇོག་ཀྱི་ཚད་གཞི་མི་འདྲ་བ་སྤྱད་ནས། མི་རིགས་སློབ་གསོ་དང་ལྷག་པར་དུ་སྐད་གཉིས་སློབ་གསོའི་བྱ་བ་སྤེལ་བར་ཕན་འདོགས་དགོས་ཟེར།
ཞིང་ཆེན་དབུལ་སྐྱོར་ཅུའུ་ཡི་ཅུའུ་ཀྲང་བློ་བཟང་ཟླ་བས་བཞུགས་མོལ་བྱེད་སྐབས་བཤད་རྒྱུར། ཞིང་ཆེན་ཡོངས་ཀྱི་སློབ་གསོའི་ཚོགས་ཆེན་སྟེང་བཏོན་པའི་སྐད་གཉིས་སློབ་གསོའི་དམིགས་འབེན་དང་ཁ་ཕྱོགས་ནི་ཧ་ཅང་ཡང་དག་པ་ཡིན་པ་དང་། དོན་དངོས་ལ་རྐང་བཙུགས་ཡོད་པར་མ་ཟད་མ་འོངས་པར་ཁ་ཕྱོགས་ཡོད་པས། ངེས་པར་དུ་ལག་བསྟར་ནན་མོ་བྱེད་དགོས། གྲངས་ཉུང་མི་རིགས་ཡིན་པའི་ཆ་ནས་རྒྱལ་ཁབ་ཀྱིས་གཅིག་གྱུར་དུ་སྤྱོད་པའི་སྐད་རིགས་སློབ་སྦྱོང་བཟང་པོ་བྱེད་དགོས་པར་མ་ཟད། མི་རིགས་རང་གི་སྐད་རིགས་ལའང་སློབ་སྦྱོང་བཟང་པོ་བྱེད་དགོས་ཟེར།
ཞིང་ཆེན་རྩོམ་རིག་སྒྱུ་རྩལ་ལས་རིགས་མཉམ་འབྲེལ་ལྷན་ཚོགས་ཀྱི་ཀྲུའུ་ཞི་པན་ཁོ་ཡིས་བཞུགས་མོལ་བྱེད་སྐབས་བཤད་རྒྱུར། རྒྱལ་ཁབ་ཀྱིས་གཅིག་གྱུར་དུ་སྤྱོད་པའི་སྐད་རིགས་སློབ་སྦྱོང་བཟང་པོ་བྱེད་པ་དེ་མི་ཞིག་ཡར་ཐོན་འབྱུང་བར་ཧ་ཅང་གལ་ཆེ་བ་དང་། རྒྱལ་ཁབ་ཀྱིས་གཅིག་གྱུར་དུ་སྤྱོད་པའི་སྐད་རིགས་མ་སྦྱངས་ན་རྒྱལ་ཡོངས་སུ་ཁ་ཕྱོགས་མི་ཐུབ་ལ། རྒྱལ་ཁབ་ཀྱིས་གཅིག་གྱུར་དུ་སྤྱོད་པའི་སྐད་རིགས་ལ་སློབ་སྦྱོང་བཟང་པོ་བྱེད་པ་ནི་དངོས་ཡོད་ཀྱི་དགོས་མཁོ་ཡིན། གནས་སྐོར་དང་ཚོང་དོན། སྤྱི་པའི་བྱ་འགུལ་བཅས་སྤེལ་སྐབས་རྒྱལ་ཁབ་ཀྱིས་གཅིག་གྱུར་དུ་སྤྱོད་པའི་སྐད་རིགས་དང་འབྲལ་ཐབས་མེད་པ་དང་། ཚོང་རའི་དཔལ་འབྱོར་ཁྲོད་དུ་དེ་བས་ཀྱང་རྒྱལ་ཁབ་ཀྱིས་གཅིག་གྱུར་དུ་སྤྱོད་པའི་སྐད་རིགས་ལ་སློབ་སྦྱོང་བཟང་པོ་བྱེད་དགོས། མི་རིགས་ས་ཁུལ་གྱིས་མི་རིགས་ཀྱི་སྐད་རིགས་ལ་སློབ་སྦྱོང་བཟང་པོ་བྱེད་རྒྱུ་ནི་ཧ་ཅང་གལ་ཆེ་བ་དང་། མི་རིགས་ཀྱི་སྐད་རིགས་ལ་སློབ་སྦྱོང་བཟང་པོ་མ་བྱས་ན་ཕུལ་དུ་བྱུང་བའི་མི་རིགས་ཀྱི་རིག་གནས་རྒྱུན་འཛིན་བྱེད་ཐབས་བྲལ་ལ། མི་རིགས་ས་ཁུལ་གྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་སྔར་ལས་བཟང་པོའི་སྒོ་ནས་ཞབས་འདེགས་ཀྱང་ཞུ་ཐབས་མེད་ཟེར།
ཞིང་ཆེན་སློབ་གསོ་ཐིན་གྱི་ཐིན་ཀྲང་གཞོན་པ་ཚེ་རིང་ཐར་གྱིས་བཞུགས་མོལ་བྱེད་སྐབས་བཤད་རྒྱུར། ཞིང་ཆེན་ཡོངས་ཀྱི་སློབ་གསོའི་ཚོགས་ཆེན་སྟེང་བཏོན་པའི་སྐད་གཉིས་སློབ་གསོའི་ཁ་ཕྱོགས་དང་དམིགས་འབེན། རྩ་དོན་བཅས་ནི་ཧ་ཅང་ཡང་དག་པ་ཡིན་པས། ང་ཚོས་ངེས་པར་དུ་སྔར་ལས་ནུས་པ་ལྡན་ཞིང་གོ་རིམ་ཡོད་ལ་བརྟན་བརླིང་ཡིན་པའི་སྒོ་ནས་དེ་ལག་བསྟར་བྱེད་དགོས་པ་དང་། ང་ཚོས་ངེས་པར་དུ་ཞིང་ཆེན་ཡོངས་ཀྱི་སློབ་གསོའི་ཚོགས་ཆེན་གྱི་དགོངས་དོན་ལ་སློབ་སྦྱོང་བཟང་པོ་དང་དྲིལ་སྒྲོག་བཟང་པོ། ལག་བསྟར་བཟང་པོ་བཅས་བྱེད་དགོས་ཟེར།
ཞིང་ཆེན་ཡོངས་ཀྱི་སློབ་གསོའི་ཚོགས་ཆེན་གྱི་དགོངས་དོན་ལ་སློབ་སྦྱོང་དང་དྲིལ་སྒྲོག ལག་བསྟར་བཅས་བྱས་ཏེ། མི་རིགས་སློབ་གསོའི་བྱ་བ་དང་སྐད་གཉིས་སློབ་གསོའི་བྱ་བར་སྔར་ལས་ཤུགས་བསྣན་ཏེ་ལེགས་བཅོས་བྱེད་པའི་ཐད་ནས། ཧྲིན་ཀྲང་གཞོན་པ་ཀའོ་ཡུན་ལུང་གིས་བཤད་རྒྱུར། ཞིང་ཆེན་ཡོངས་ཀྱི་སློབ་གསོའི་ཚོགས་ཆེན་གྱི་དགོངས་དོན་དང་རང་ཞིང་གི་སློབ་གསོའི་འཆར་འགོད་རྩ་གནད་ཀྱི་ནང་དོན་ལ་ཆ་ཚང་ཞིང་ཡང་དག་པའི་གོ་བ་ལེན་དགོས། གཅིག་ནས་སློབ་གསོ་དེ་སྔོན་ལ་འཕེལ་རྒྱས་སུ་གཏོང་བའི་གོ་གནས་སུ་འཇོག་དགོས། གཉིས་ནས་མི་སྣ་སྐྱེད་སྲིང་བྱེད་པ་དང་སློབ་མ། དགེ་རྒན་བཅས་རྩ་བར་འཛིན་དགོས། གསུམ་ནས་བཅོས་སྒྱུར་དང་གསར་སྐྲུན་སྒུལ་ཤུགས་སུ་བརྩི་དགོས་པ་དང་། ངེས་པར་དུ་བཅོས་སྒྱུར་གྱི་བསམ་བློ་ཡོད་དགོས། འདི་ལྟར་བྱས་ན་རྒྱལ་སྤྱི་ཅན་དང་སློབ་གསོའི་རྒྱལ་ཁབ་སྟོབས་ཅན། མི་ཤུགས་ཐོན་ཁུངས་ཀྱི་རྒྱལ་ཁབ་སྟོབས་ཅན་བཅས་ཀྱི་ཕྱོགས་སུ་མདུན་སྐྱོད་བྱེད་ཐུབ། བཞི་ནས་འདྲ་མཉམ་ཡོང་བར་བྱེད་རྒྱུ་དེ་གཙོ་གནད་དུ་འཛིན་དགོས་ཏེ། སྲིད་ཇུས་དང་བྱེད་ཐབས་གཏན་འབེབ་བྱེད་པའི་ཐད་ནས་དར་རྒྱས་ཆེ་བའི་ས་ཁུལ་དང་རྗེས་ལུས་ས་ཁུལ་གཉིས་ཀྱི་སློབ་གསོའི་འཕེལ་རྒྱས་ལ་བསམ་བློ་གཏོང་དགོས་པ་དང་། མཁར་གྲོང་སློབ་གསོའི་འཕེལ་རྒྱས་ལ་བསམ་བློ་གཏོང་བ་སོགས་བྱེད་དགོས། ལྔ་ནས་རྒྱུ་སྤུས་ཇེ་བཟང་དུ་གཏོང་རྒྱུ་དེ་སྲོག་ཤིང་དུ་འཛིན་དགོས། དེས་མི་ཚད་སློབ་གསོའི་ཐད་མ་དངུལ་གཏོང་ཤུགས་ཇེ་ཆེར་གཏོང་དགོས་ཞེས་བསྟན་ཡོད་པས། ང་ཚོས་དེའི་ངོ་བོར་ཕྱོགས་ཡོངས་ནས་གོ་བ་བླངས་ཏེ་ཡོངས་སུ་ཤེས་པར་བྱེད་དགོས། ཡོངས་སུ་ཤེས་པར་བྱས་ན་ད་གཟོད་འཆལ་གཏམ་འགོག་ཐུབ་པ་དང་། བདེན་རྫུན་འབྱེད་ཐུབ་ལ། དོགས་གཞི་སེལ་ཐུབ། བོད་སྐད་ནི་སྐད་རིགས་ཡག་པོ་ཞིག་ཡིན་པས། བོད་སྐད་ཀྱི་སློབ་སྦྱོང་དང་ཞིབ་འཇུག་ལ་ཤུགས་བསྣན་ནས། བོད་ཀྱི་རིག་གནས་འཛིན་སྐྱོང་སྤེལ་གསུམ་བྱེད་དགོས། ཏང་དང་སྲིད་གཞུང་གིས་སློབ་མ་སུ་ཞིག་ལའང་བཙན་གྱིས་ཕ་སྐད་སྦྱོང་མཚམས་འཇོག་ཏུ་འཇུག་མི་སྲིད་ལ། སྐད་གཉིས་སློབ་ཁྲིད་སྤེལ་སྐབས་སློབ་མ་རེ་རེའི་འདོད་བློར་བརྩི་འཇོག་བྱེད་ངེས་ཡིན་ཟེར།
མཇུག་མཐར་ཀའོ་ཡུན་ལུང་གིས་ཞིང་ཆེན་ཡོངས་ཀྱི་རྒྱ་ཆེའི་མགོ་ཁྲིད་ལས་བྱེད་པས་སྣེ་ཁྲིད་དེ་ཞིང་ཆེན་ཡོངས་ཀྱི་སློབ་གསོའི་ཚོགས་ཆེན་གྱི་དགོངས་དོན་དང«ཉིས་སྟོང་བཅུ་ལོ་ནས་ཉིས་སྟོང་ཉི་ཤུ་ལོའི་མཚོ་སྔོན་ཞིང་ཆེན་གྱི་དུས་ཡུན་རིང་འབྲིང་གི་སློབ་གསོའི་བཅོས་སྒྱུར་དང་འཕེལ་རྒྱས་འཆར་འགོད་རྩ་གནད»ལ་ཕྱོགས་ཡོངས་ནས་རྒྱུས་ལོན་བྱས་ཏེ་གོ་བ་ཡང་དག་ལེན་པ་དང་། སྣེ་ཁྲིད་དེ་ཞིང་ཆེན་ཡོངས་ཀྱི་སློབ་གསོའི་ཚོགས་ཆེན་གྱི་དགོངས་དོན་དང«ཉིས་སྟོང་བཅུ་ལོ་ནས་ཉིས་སྟོང་ཉི་ཤུ་ལོའི་མཚོ་སྔོན་ཞིང་ཆེན་གྱི་དུས་ཡུན་རིང་འབྲིང་གི་སློབ་གསོའི་བཅོས་སྒྱུར་དང་འཕེལ་རྒྱས་འཆར་འགོད་རྩ་གནད»སློབ་སྦྱོང་དང་དྲིལ་སྒྲོག་བྱས་ཏེ། ཞིང་ཆེན་ཡོངས་ཀྱི་མི་རིགས་སོ་སོའི་ལས་བྱེད་པ་དང་མང་ཚོགས་ཀྱི་བསམ་བློའི་ངེས་ཤེས་ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་གི་ཇུས་ཆོད་བཀོད་སྒྲིག་གི་སྟེང་གཅིག་གྱུར་བྱེད་པ་དང་། ཞིང་ཆེན་ཡོངས་ཀྱི་མི་རིགས་སོ་སོའི་ལས་བྱེད་པ་དང་མང་ཚོགས་ཀྱི་སྟོབས་ཤུགས་ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་གི་ཇུས་ཆོད་བཀོད་སྒྲིག་ལག་བསྟར་བྱེད་པའི་སྟེང་དུ་གཅིག་གྱུར་བྱས་ཏེ། རང་གི་བྱ་སྤྱོད་དངོས་ལ་བརྟེན་ནས་ཞིང་ཆེན་ཡོངས་ཀྱི་མི་རིགས་སོ་སོའི་ལས་བྱེད་པ་དང་མང་ཚོགས་ལ་མཐུན་སྒྲིལ་དང་སྣེ་ཁྲིད་བྱས་ཏེ། ཞིང་ཆེན་ཡོངས་ཀྱི་སློབ་གསོའི་ཚོགས་ཆེན་སྟེང་བཏོན་པའི་འབད་འཐབ་ཀྱི་དམིགས་འབེན་མངོན་འགྱུར་བྱེད་ཆེད་འབད་བརྩོན་ལྷོད་མེད་བྱེད་དགོས་པའི་རེ་བ་བཏོན།

ལོ་ཙཱ་བ། ཕྱུག་ལོ།

http://www.qhtb.cn/news/news_view.jsp?id=20885&zt=0