དྲ་ཐོག་བོད་མི་གླེང་བ།

ཤིས་ཚང་ལྗང་མྱུག
—————
ཉིན་འདི་ཚོར་ངས་༼བོད་ཁམས་ཉུལ་བ་༽ཞེས་པའི་དཔེ་དེབ་གསར་བ་ཞིག་ལ་རོལ་མྱོང་བྱེད་ཀྱིན་ཡོད་ལ། རྩོམ་པ་བོ་ནི་ཨ་འཇམ་དབྱངས་ཚུལ་ཁྲིམས་ལགས་རེད། ཕྱི་ལོ་༢༠༠༦ ལོར་རྩོམ་པ་བོ་ཁོང་གསང་བའི་ངང་བོད་ཁམས་ཡོངས་སུ་བསྐོར་སྐྱོད་བྱས་པའི་མཐོང་ཚུལ་ལ་གཞིགས་ཚེ། ད་ལྟའི་དྲ་ཁང་ནང་གི་འུ་ཚོའི་བོད་མི་ཚོ་ནམ་རྒྱུན་ཁུ་ཚུར་དང་མེ་མདའི་འཐབ་འཁྲུག་སོགས་བྱིས་པའི་རོལ་རྩེད་འདྲ་མིན་ལ་རོལ་བཞིན་ཡོད་ཚུལ་ཡང་ཡང་མཐོང་རྒྱུ་འདུག་པས། ངས་ཀྱང་དྲ་ཐོག་བོད་མིའི་སྐོར་ལ་འདི་ལྟར་བསམ་གཞིགས་ཐེངས་ཤིག་བྱེད་དགོས་བྱུང་།
འགྲོས་སྐྱེན་པའི་བརྡ་འཕྲིན་འཕྲུལ་རིག་གི་རླབས་ཤུགས་ཀྱིས་གོ་ལ་ཧྲིལ་བོར་ཕྱོགས་ཡོངས་ནས་སྒུལ་སྐྱོམ་ཚད་མེད་ཐེབས་པ་དང་འུ་ཚོའི་བོད་མི་རིགས་ཡང་དེ་རིང་གི་བརྡ་འཕྲིན་བརྒྱུད་ལམ་འདིར་དངོས་སུ་འཁྱར་འཁྱོར་གྱི་གོམ་པ་སྤོ་འགོ་ཚུགས་པ་ནི་རྙིང་ཞེན་བག་འཁུམས་ཀྱི་མལ་ནས་འཛམ་གླིང་སྔོན་ཐོན་གྱི་གྲལ་དུ་སྙེགས་པར་བརྩོན་པའི་ལོ་ཟླ་ཞིག་གི་འགོ་མ་དང་། རྟོགས་སད་ཀྱི་རྣམ་རིག་གསར་དུ་རྒྱས་པའི་དན་རྟགས་ཤིག་ཏུ་འཁུམས་པས་ངོ་མ་དགའ་འོས་པའི་དོན་བཟང་ཞིག་ཅི་ལ་མིན། ཡིན་ནའང་། ང་ཚོར་ད་སྔ་བརྡ་འཕྲིན་ལག་རྩལ་ལ་ནང་བྱན་ཆུད་པའི་ཆེད་མཁས་པ་མང་བོ་ཞིག་བྱུང་མྱོང་མེད་ལ། མི་རིགས་སྤྱིའི་གྲངས་འབོར་ལ་དཔག་ན་ད་དུང་དྲ་ཐོག་བོད་མིའི་སྤྱི་ཚོགས་ཡང་ཆེས་ཆུང་ཆུང་ཞིག་ལས་གྲུབ་མེད།
ད་ལྟའི་དྲ་ཐོག་བོད་མི་ཚོའང་ནམ་རྒྱུན་དྲ་ཐོག་ནས་ཆགས་སྲེད་ཀྱི་ལྟད་མོ་འདྲ་མིན་བལྟ་བ་དང་། འགུལ་རིས་ཀྱི་རྩེད་མོ་འདྲ་མིན་རྩེ་རྒྱུར་གོམས་པ་ལས་དྲ་ཐོག་ནས་རང་ཉིད་ལ་མཁོ་བའི་ཤེས་བྱ་གང་ཞིག་ཚུར་ལེན་བྱས་པའི་གནས་བབ་ཧ་ཅང་དམའ་ལ། ནམ་རྒྱུན་དྲ་ཐོག་ཏུ་ཅི་ཞིག་གི་ཆེད་དུ་མ་ཁོམ་པར་ཡོད་ཀྱང་། ད་དུང་གློག་འཕྲིན་(E-mail)ཙམ་ཞིག་གཏོང་མི་ཤེས་མཁན་ཡང་ཉུང་ཉུང་ཞིག་གཏན་ནས་མིན། དེ་བས་དྲ་ཐོག་བོད་མི་ཚོས་ཆུ་ཚོད་ཡོད་ཚད་དེ་ལྟར་བྱིས་པའི་རོལ་རྩེད་ལ་བརྗེ་སྟེ་དོན་མེད་མིག་འབྲས་འཕྲོ་བརླག་ཏུ་གཏོང་བ་ལས་རང་ལ་མཁོ་བའི་བརྡ་འཕྲིན་ཤེས་བྱ་སྣ་གཅིག་ཨེ་ཤེས་བལྟས་ན་དེ་ལ་དོན་སྙིང་ཆེ་བར་འདོད།
ཕྱི་ལོ་༢༠༠༧ ལོར་རྒྱལ་སྤྱིའི་གཅིག་གྱུར་ཨང་རྟགས་ཅན་གྱི་བོད་ཡིག་(སྤྱིར་རྒྱལ་སྤྱིའི་གཅིག་གྱུར་ཨང་རྟགས་ཅན་གྱི་བོད་ཡིག་སྔོན་མ་ནས་ཡོད་ཚོད་འདུག་པས་འདིར་གཙོ་བོ་ཧི་མ་ལ་ཡའི་བོད་ཡིག་གླེང་གི་ཡོད།) གློག་ཀླད་མ་ལག་གསར་བ་Window Vista དང་ལྷན་དུ་རྒྱལ་སྤྱིའི་ཁྲོམ་རྭར་དངོས་སུ་ཐོན་པ་ནས་བཟུང་བོད་པ་ཚོས་རང་གི་སྐད་ཡིག་གི་ལམ་ནས་ཐད་ཀར་གློག་འཕྲིན་(E-mail)གཏོང་བ་དང་ཆ་འཕྲིན་གླེང་མོལ་(chat)སོགས་བྱེད་ཐུབ་མོད། ད་དུང་བོད་མི་མང་བོ་ཞིག་གིས་བོད་ཡིག་གི་བཀོལ་སྤྱོད་དེ་ལྟར་ཆེ་བ་ཤེས་ཀྱིན་མེད་ལ། དངོས་སུ་ལག་ལེན་དུ་བསྟར་མཁན་དེ་བས་ཀྱང་ཉུང་།
ཉེ་ལམ་ནས་རྒྱལ་སྤྱིའི་གཅིག་གྱུར་ཨང་རྟགས་ཅན་གྱི་བོད་ཡིག་སྟེང་བཟོས་པའི་དྲ་ཚིགས་(འདིའི་ཁྲོད་དུ་ཟིན་བྲིས་དང་གླེང་སྟེགས་སོགས་འདུ།)མི་ཉུང་བ་ཞིག་གཅིག་རྗེས་གཉིས་མཐུད་དུ་བྱུང་དང་འབྱུང་བཞིན་པ་ནི་ཡུན་རིང་ཁ་འཐོར་དུ་སོང་བའི་གོ་ལའི་ཉིན་སྲིབ་ཀྱི་བོད་མི་ཚོ་སྐུད་ལམ་གཅིག་ཏུ་ལྷན་འཛོམས་ཐུབ་པའི་གོ་སྐབས་གསར་བ་ཞིག་དང་ཕན་ཚུན་བསམ་ཚུལ་བརྗེ་རེས་བྱ་སའི་གླེང་སྟེགས་སྔར་མེད་པ་ཞིག་ཡིན་ནའང་། ད་ལྟའི་དྲ་ཐོག་བོད་མི་ཚོས་གནས་ལུགས་དང་རྒྱུ་མཚན་ཡོད་པའི་སྒོས་ཕན་ཚུན་ལ་ལྷག་བསམ་དག་པའི་བསམ་བློ་བརྗེ་རེས་བྱེད་པ་ལས་ལྡོག་སྟེ། ཕན་ཚུན་གྱི་སྐྱོན་འཚང་སྔོག་རེས་ཀྱིས་དམའ་འབེབ་དང་ཁྱད་གསོད་བྱེད་པའི་ངན་གོམས་ཤིག་འགོས་བཞིན་པ་ནི་དྲ་ཐོག་བོད་མིའི་ཞན་ཆ་ཆེ་ཤོས་ཤིག་རེད་ལ། མ་འོངས་དྲར་ཞུགས་བོད་མིར་འགོས་འགྱུར་གྱི་ནད་ཡམས་ཚབས་ཆེན་ཞིག་ཀྱང་རེད་ཅེས་སྨྲ་བར་སྤོབས།
དེ་བས་ཚུལ་འདིར་གཞིགས་ཏེ་དྲ་ཐོག་བོད་མི་ཚོས་སྔར་བཞིན་དྲ་ཐོག་ཏུ་དོན་སྙིང་མེད་པའི་སྐད་ཆའི་གད་སྙིགས་སྤུངས་རྒྱུར་ཅིས་ཀྱང་འཛེམ་སོན་བྱེད་དགོས་ལ། ངོ་ཤེས་མིན་ལ་མ་ལྟོས་པར་གདེང་འཇོག་དང་བརྩི་བཀུར་ཡོད་པའི་རྣམ་པའི་འོག་ལྷག་བསམ་དག་པས་ཕན་ཚུན་གྱི་བསམ་ཚུལ་འདོན་གླེང་བྱས་ཚེ། ང་ཚོས་གཞི་རྩའི་ཆིག་སྒྲིལ་གྱི་ནུས་པ་གཅིག་ཏུ་སྤུངས་ཐུབ་ལ། མ་འོངས་པའི་དྲར་ཞུགས་བོད་མི་ཚོར་ཡང་མིག་དཔེ་བཟང་བོ་ཞིག་གིས་སྣེ་འདྲེན་བྱེད་ཐུབ་པས། དྲ་གྲོགས་ཚོས། བསམ་གཞིགས་ཀྱིས་བསླངས་པའི་ཁོ་བོའི་སྐད་ཆ་ཐུང་ངུ་འདིར་ཅིས་ཀྱང་དོ་སྣང་ཙམ་རེ་ཡོང་བའི་རེ་བ་ཤུགས་ཆེར་འབོད་ཀྱིན་ཡོད།
༢༠༠༩།༡།༤ ཉིན་བྲིས།

རྒྱང་རིང་ཉི་མའང་ཕྱི་དྲོར་སླེབས་ཡོད།

སྤྲིན་ནག་དང་འབྲུག་སྒྲ་ལྷན་དུ་ལྡིར་བས
ས་ཆེན་གྱི་རྨི་ལམ་འཁྲིགས་འགོ་བརྩམས

ཉི་འོད་ཀྱི་མཛེས་སྡུག་བོར་བའི་མྱ་ངན་ནག་པོ་
ལུང་བའི་ཉིན་སྲིབ་དུ་ཁ་བ་བཞིན་བབས་པས
གདུག་རྩུབ་དང་ཚེར་མའི་རྐང་ལམ
ཕ་མཁར་སྨུག་པོའི་གཞིས་སུ་ཁྱབ

སྐྲ་ལོའི་ནགས་ཚལ་བྲེགས
ཆུ་མོའི་བཞུར་རྒྱུན་བཅད
ཟླ་བ་སྨག་རུམ་གྱིས་སྒྲིབ་པའི་མཚན་མོ་རེ་རེ་
དེ་ལྟར་ཕར་ལ་བསྐྱལ་རྗེས
ད་གཟོད མི་ཡུལ་གྱི་རྒྱུ་འབྲས་ཤི་བའི་འདས་དོན་ལའང
བསམ་བློ་ཡང་ཡང་འཁོར་ངེས

ད་ལྟ རྒྱང་རིང་གི་ཉི་མའང་ཕྱི་དྲོར་སླེབས་ཡོད
རྣམ་ཤེས་ཀྱི་རེ་བས་ཀྱང་ཕྱིར་མིག་བལྟས་ཡོད
ཏག་ཏག མུན་པ་ཡོངས་སུ་མ་འཐིབ་པའི་དུས་ཚིགས་འདིར
ང་ཚོས་རྒྱུ་འབྲས་ཤི་བའི་འདས་དོན་རྟོགས་དགོས
ཟླ་བ་བཞུད་པའི་གསང་ལམ་འཚོལ་དགོས

ད་དུང་། དེ་རིང་གི་མི་ལོ་ལྔ་བཅུའི་རྒས་འཁོགས་བསམ་བཞིན
སང་ཉིན་གྱི་ཉི་འོད་བསུ་བའི་རམ་འདེགས་འཚོལ་དགོས
ཨ ངའི་སྤུན་ཟླ་ཚོ

༢༠༠༩།༡།༤དགོང་མོར་བྲིས།