རྒྱ་ནག་གཞུང་གིས་འཛིན་བཟུང་བྱས་ནས་ཟླ་བ་བདུན་ཙམ་རིང་ག་ཡོད་གསལ་ཆ་མེད་པའི་གཞོན་སྐྱེས་རྩོམ་པ་པོ་བཀྲ་ཤིས་རབ་བརྟན་ལགས་ཉེ་སྔོན་རྔ་བ་ཁུལ་ཡོད་སའི་འབར་ཁམས་ལྟ་སྲུང་ཁང་ནང་བཅུག་ཡོད་པ་ཤེས་རྟོགས་དང་། ནང་མིར་ཐེངས་ཁ་ཤས་ལ་གོན་པ་དང་ཟ་མ་སྐྱེལ་དུ་བཅུག་ཡོད་ཀྱང་། ནང་མི་དང་དངོས་སུ་ཐུག་འཕྲད་བྱེད་དུ་བཅུག་མེད་ལ། གནས་ཚུལ་ཡོངས་ཁུངས་ནས་མི་འགྱངས་བར་རྔ་བ་ཁུལ་ཁྲིམས་ཁང་གིས་ཁྲིམས་ཞིབ་འདྲི་གཅོད་བྱེད་རྒྱུའི་སྐད་ཆ་ཞིག་ཐོས་པ་ལྟར་། སྤྱི་ཟླ་༡༢པའི་ཚེས་༢ཉིན་རྔ་ཁུལ་འབྲིང་རིམ་མི་དམངས་ཁྲིམས་ཁང་གིས་བཀྲ་ཤིས་རབ་བརྟན་ལགས་སུ་མངོན་གསལ་མ་ཡིན་པའི་ཁྲིམས་ཞིབ་འདྲི་གཅོད་བྱས་ཡོད་ཀྱང་བཅད་ཁྲ་ཁྱབ་བསྒྲགས་བྱས་མེད་པ་རེད།
ཉེ་ཆར་ཁུངས་ལྡན་གནས་ཚུལ་ཡོང་ཁུངས་ནས་ཨེ་ཤེ་ཡཡ་རང་དབང་རླུང་འཕྲིན་ཁང་ལ་འགྲེལ་བརྗོད་གནང་བ་ལྟར་ན། སྤྱི་ཟླ་བཅུ་གཉིས་པའི་ཚེས་༡ཉིན་གྱི་དགོང་མོ་རྩོམ་པ་པོ་བཀྲ་ཤིས་རབ་བརྟན་ལགས་ཀྱི་ནང་མིར་ཁ་པར་འབྱོར་ཏེ་ཁོང་ལ་ཚེས་༢ཉིན་ཁྲིམས་ཞིབ་འདྲི་གཅོད་བྱེད་རྒྱུའི་བརྡ་བརྒྱབ་ཡོད་པ་དང་། དགུང་མོ་དེར་ཁོང་གི་ནང་མི་ཚོས་རླངས་འཁོར་ཆུང་བ་ཞིག་གླས་ནས་རྔ་བ་ཁུལ་ཡོད་སའི་འབར་ཁམས་སུ་བསྐྱོད་ཡོད་ལ། སྤྱི་ཟླ་༡༢པའི་ཚེས་༢ཉིན་གྱི་ཕྱི་དྲོའི་དུས་ཚོད་གཉིས་བ་ཙམ་ལ་བཀྲ་ཤིས་རབ་བརྟན་༼ཐེའུ་རང་༽ལགས་སུ་རྔ་བ་ཁུལ་འབྲིང་རིམ་མི་དམངས་ཁྲིམས་ཁང་གིས་མངོན་གསལ་མ་ཡིན་པའི་ཁྲིམས་ཞིབ་འདྲི་གཅོད་བྱས་ཡོད་པ་དང་། སྐབས་དེར་བཀྲ་ཤིས་རབ་བརྟན་ལགས་ཀྱི་ཨ་མ་དང་ཕུ་བོ་།ཕ་གཡར་བཅས་ལ་ཟུར་ཉན་བྱེད་དུ་བཅུག་ཡོད་ལ། ཁྲིམས་ཞིབ་འདྲི་གཅོད་དུས་ཚོད་གཅིག་ཙམ་རིང་ལ་བྱས་ཡོད་པ་དང་། བཀྲ་ཤིས་རབ་བརྟན་ལགས་སུ་ཁྲིམས་རྩོད་པ་མེད་པར་ཁོང་གིས་རྒྱ་སྐད་ནང་རང་ཉིད་ལ་དག་འབུད་བཤེར་རྩོད་བྱེད་བཞིན་ཡོད་པ་དང་། དྲི་བ་ཚང་མ་ཤར་དུང་རི་དུས་དེབ་དང་ཁྲག་ཡིག་དཔེ་དེབ་ཀྱི་སྐོར་ལ་འདྲི་གི་ཡོད་པ་གནས་ཚུལ་ཡོངས་ནས་བརྗོད་པ་ཙམ་ལས་ཉེས་པ་ཅི་ཞིག་འཛུགས་ཀྱི་ཡོད་མེད་སོགས་གསལ་ཁ་མེད། ཁྲིམས་ཞིབ་གཅོད་བྱས་ཚར་རྗེས་སུ་བཅད་ཁྲ་ཁྱབ་བསྒྲགས་བྱས་མེད་པ་དང་། ག་དུས་བཅད་ཁྲ་གསལ་བསྒྲགས་བྱེད་རྒྱུའི་སྐོར་ལའང་ཞིབ་ཕྲ་འགྲེལ་བརྗོད་བྱས་མེད།བཀྲ་ཤིས་རབ་བརྟན་ལགས་དང་ཁོང་གི་ནང་མི་གསུམ་པོར་སྐར་མ་ལྔ་དྲུག་ཅིག་ལ་ཤེལ་སྒོའི་བར་བཀག་པའི་ཕར་ཚུར་ནས་ཁ་བརྡ་ཅུང་བྱེད་དུ་བཅུག་ཡོད་ལ། བཀྲ་ཤིས་རབ་བརྟན་ལགས་ཀྱིས་ཨ་མར་ཁོང་གི་གཟུགས་གཞི་བདེ་པོ་ཡིན་པས་སེམས་ཁྲལ་བྱེད་མི་དགོས་ཞེས་པ་ལས་གཞན་གང་ཡང་གསུང་མ་སོང་ལ། ཕར་མིག་གིས་ལྟ་དུས་ཁོང་གི་གཟུགས་པོ་བདེ་ཐང་འདྲ་བོ་མཐོང་གི་འདུག དེ་མ་གཏོགས་གནས་ཚུལ་ཞིབ་ཕྲ་གང་ཡང་མེད་གསལ་ཁ་མི་འདུག་ཟེར།
བོད་ཀྱི་གཞོན་སྐྱེས་རྩོམ་པ་པོ་བཀྲ་ཤིས་རབ་བརྟན་ནམ་ཐེའུ་རང་ལགས་ནི་ལན་གྲུ་ནུབ་བྱང་མི་རིགས་སློབ་གྲྭ་ཆེན་མོའི་སློབ་མ་ཞིག་ཡིན་པ་དང་། ད་ལོའི་སྤྱི་ཟླ་༤པའི་ཚེས་༦ཉིན་ཁོང་དང་འཛིན་གྲྭ་གཅིག་པའི་སློབ་གྲོགས་སྟེ།གཞོན་སྐྱེས་རྩོམ་པ་པོ་ཞོགས་ལྗང་གཉིས་རྒྱ་ནག་སྤྱི་བདེ་མི་སྣས་འཛིན་བཟུང་བྱས་ཡོད་ལ། ཟླ་བ་ཁ་ཤས་རྗེས་སུ་ཞོགས་ལྗང་ལགས་གློད་གྲོལ་བཏང་ཡོད་ཀྱང་། བཀྲ་ཤིས་རབ་བརྟན་ལགས་ད་བར་གར་སོང་ཆ་མེད་གྱུར་ཡོད་།སྤྱི་ལོ་༢༠༠༩ལོའི་སློབ་གྲྭའི་དབྱར་གནང་སྐབས་དང་བསྟུན་ནས་ཡང་ཁོང་སུ་ཁྲོན་ཞིང་ཆེན་བདེ་འཇགས་མི་སྣས་དུས་ཐུང་རིང་བཙོན་འཇུག་འཛིན་བཟུང་བཀག་ཉར་བྱས་མྱོང་ཡོད་པ་དང་། སྐབས་དེར་གནས་ཚུལ་ནང་ཁོང་གིས་སྤྱི་ལོ་༢༠༠༨ལོའི་བོད་ཆོལ་ཁ་གསུམ་གྱི་བོད་མིའི་ཞི་བའི་ངོ་རྒོལ་སྐོར་བྲིས་པའི་ཤར་དུང་རི་དུས་དེབ་ཀྱི་རྩོམ་སྒྲིག་པ་དང་ཁོང་གིས་བརྩམས་པའི་ཁྲག་ཡིག་དཔེ་དེབ་དང་འབྲེལ་བ་ཡོད་པར་བརྗོད།
(ཁུངས། གཡུ་ཞུན་དྲ་བ།)
དྲ་ཚིགས་འདིའི་བདག་གཉེར་བ་རྣམ་པར་ཐུགས་རྗེ་ཆེ་ཞུ་འདོད་བྱུང་། གང་ལ་ཟེར་ན། གནས་ཚུལ་དང་གསར་འགྱུར་གལ་ཆེན་མང་པོ་ཞིག་ང་ཚོར་མཁོ་འགྲེམས་གནང་སོང་།
ཁྱེད་ཚོར་བདེ་མོ་ཡིན་ནམ།