ཞི་བདེའི་ལམ་བུ་འཚོལ་བ།

(དུས་བབ་ནས་བླངས)
ཆབ་བྲག་ལྷ་མོ་སྐྱབས

སྤྱི་ཟླ་བཅུ་གཉིས་པའི་ཚེས་བཅུ་ནི་འཛམ་གླིང་གི་ཞི་བདེའི་ཉིན་མོ་དེ་ཡིན། ཉིན་འདིར་བོད་པ་ཚང་མས་ཆེས་གསལ་བོར་དྲན་སོས་པ་ནི་ལོ་ཉེར་གཅིག་སྔོན་ལ་༸གོང་ས་མཆོག་གིས་འཛམ་གླིང་ནའོ་བྷེལ་ཞི་བདེའི་གཟེངས་རྟགས་བཞེས་པའི་དགའ་སྟོན་དེ་ལོས་ཡིན།
ང་ཚོས་ལོ་རེ་བཞིན་དུ་ཉིན་མོ་འདི་དྲན་གསོ་དང་དགའ་སྐྱིད་ལ་རོལ་གྱིན་ཡོད། འོན་ཀྱང་༸གོང་ས་མཆོག་གི་ཞི་བདེའི་མཛད་འཕྲིན་སྤྱི་དང། བཀའ་སློབ་ལམ་སྟོན་ལ་ལེགས་པར་བསམ་གཞིགས་བྱས་པ་དང་བྱེད་མཁན་ཉུང་ལ། དེ་བས་རྗེས་སུ་གོམ་པ་རེ་གཉིས་སྤོ་མཁན་ཡང་ཧ་ཅང་ཉུང་། གང་ལྟར་ཚང་མའི་ཁ་ལག་གཉིས་ནས་ཞི་བདེ་ཟེར་བ་ནི་བཏོན་དང་འབྲི་བཞིན་པའི་མིང་ཚིག་གལ་ཆེན་ཞིག་ཆགས་ཡོད།

ཁྱོད་ཅག་གིས་གཟེངས་རྟགས་དེ་༸གོང་ས་གཅིག་པུས་བཞེས་པ་ཞིག་དང་༸གོང་ས་གཅིག་པུར་ཕུལ་བ་ཞིག་ལ་བསམས་ནས་རང་དང་རང་མི་རིགས་དེའི་རིག་གཞུང་དང་བཅས་པར་གཟི་བརྗིད་ཀྱི་ཆ་ཤས་རེ་ཡོད་པ་ཚོར་གྱིན་མེད། དེ་བས་ང་ཚོས་ནམ་རྒྱུན་ཉིན་མོ་འདིར་༸གོང་ས་མཆོག་གིས་གཟེངས་རྟགས་བཞེས་ཉིན་གྱི་གསུང་འཕྲིན་དེ་ཐེངས་རེ་ཀློག་རྒྱུ་ནི་སྐྱེ་བོ་གཞན་དག་གི་གསུང་བཤད་གང་མང་ལས་ཕན་ཆེ་ངེས་ཡིན།
དེ་བཞིན་ཞི་བདེའི་ཉིན་མོ་འདིར་ཞི་བདེའི་སྐོར་གྱི་ལེགས་སྦྱར་དང་བགྲོ་གླེང་དམིགས་བསལ་བྱེད་པའི་ལས་འགུལ་རིགས་ཀྱང་དགོས་གལ་ཆེ་བར་མཐོང།
ཞི་བདེའི་ལམ་བུ་འཚོལ་ན་ཞི་བདེའི་ལམ་སྟོན་པའི་རྗེས་སུ་འབྲང་དགོས། དེ་ཡང་ཇི་ལྟར་འབྲང་ཚུལ་ཤེས་དགོས་པས། བཀའ་སློབ་རིན་པོ་ཆེ་རྣམས་ལ་སློབ་སྦྱོང་ཡང་དག་པ་རེ་བྱས་ནས་རང་ལམ་རང་གིས་མ་ནོར་བ་བྱེད་རྒྱུ་འདི་ལས་ལྷག་པའི་ལམ་བུ་འཚོལ་ཐབས་ཤིག་དཀོན།
ང་ཚོས་སྤྱི་ཚོགས་གཞན་དང་གཞན་གྱི་དགེ་སྐྱོན་ལ་བལྟ་བ་དང་མཉམ་དུ་རང་རེའི་སྤྱི་ཚོགས་གསར་རྙིང་གི་དགེ་སྐྱོན་ལ་ལྷག་པར་བལྟ་དགོས། ད་དུང་རང་གིས་རང་ལ་བལྟ་དགོས། རང་ཉིད་ཀྱི་ཐོག་ན་གཞན་ཕན་དང། བྱམས་བརྩེ། སྙིང་རྗེ། འཚེ་མེད་སོགས་ཀྱི་ཡོན་ཏན་ཅི་ཙམ་ཡོད་མེད་དང། རང་ཉིད་ཀྱིས་རང་ཉིད་ལ་འགན་ག་རེ་སྤྲད་ཡོད་མེད། རང་གི་མི་རིགས་དང་དེའི་རིག་གཞུང་ཐད་ལ་འགན་ལེན་ཅི་ཙམ་ཐུབ་ཀྱི་ཡོད་མེད་བཅས་ལ་རང་དཔྱད་བྱེད་དགོས།
གལ་ཏེ་ཁྱོད་ཀྱིས་རང་ཉིད་ལ་མཐོང་ཆུང་མ་བྱས་ཚེ་ཁྱོད་ཀྱང་མི་རིགས་འདི་དང་འདིས་རིག་གཞུང་གིས་བསྐྱེད་པ་ཞིག་ལགས་ན་ཁྱོད་ཀྱི་ལུས་ངག་ཡིད་གསུམ་ན་གཟི་བྱིན་གྱི་འོད་ཟེར་ཕྲ་མོ་རེ་ཡོད་པ་ཅིས་ཀྱང་ཚོར་ཐུབ། ཐོག་མར་མི་རེ་རེ་ནས་ཞི་བདེ་ལྷིང་འཇགས་ཀྱི་འཚོ་བའི་ལམ་བུ་རེ་སྙེག་ཐུབ་ཚེ་དེའི་མི་རིགས་སམ་སྤྱི་ཚོགས་ཀྱི་གཞུང་ལམ་ལའང་ཞི་འཇགས་ཀྱི་རྣམ་པ་ཐོན་ངེས། རང་ཉིད་མི་མཐོང་བར་གཞན་དང་སྤྱི་ཁོ་ནར་ཅེར་བ་དག་ལ་ལག་རྗེས་རྐང་རྗེས་ཅི་ཡང་མེད།
མཐར། “མཉེས་གཤིན་བྱམས་བརྩེས་འགྲོགས་ཐབས་འཚེ་མེད་ལམ། །མཐའ་གཉིས་སྤངས་པ་གཉིས་སྨན་དབུ་མའི་ལམ། །འཇིགས་རུང་དྲག་མཚོན་མ་མཆིས་ཞི་བདེའི་ཡུལ། །སྐྲུན་པའི་ཐབས་ཚུལ་འགྲུབ་པའི་མཐུ་དཔུང་སྐྱེད། །”ཅེས་པའི་བཀའ་རྩོམ་རིན་པོ་འདི་བོད་མི་སྤྱི་བོ་གནམ་བསྟན་ཚང་མས་ཞལ་འདོན་གནང་རོགས་ཀྱི་གཞེན་སྐུལ་དང་ལྷན། ༸གོང་ས་མཆོག་ལའང་ཁོང་གི་དགོངས་གཞི་ལེགས་འགྲུབ་ཡོང་སླད། ཁོང་གིས་ནན་གྱིས་ཡང་དང་ཡང་དུ་གསུང་བཞིན་པའི་ལམ་སྟོན་གང་ལའང་བསམ་ཤེས་བྱེད་ཐུབ་རྒྱུ་ནི་ངའི་རེ་བ་ཡིན། བདག་གིས་ནི་ཁོང་གི་བགྲེས་ཡོལ་གནང་བཞེད་ཀྱི་དགོངས་གཞི་འདིར་ཡང་རྒྱབ་སྐྱོར་གཙང་མ་ཞུ་གིན་ཡོད། ཁོང་གི་ཞི་བདེའི་འཕྲིན་ལས་ཕྱོགས་བཅུར་རྒྱས་གྱུར་ཅིག།

པེན་བོད་ཀྱི་རྩོམ་པ་པོའི་མཐུན་ཚོགས་ཀྱི་ཚོགས་གཙོའི་མིང་འཛིན་པ་

ཆབ་བྲག་ལྷ་མོ་སྐྱབས་ཀྱིས་གུས་ཕུལ།།