ཞིང་པའི་བུ་ནས།
༢༠༡༠ལོའི་དུས་ཚོད་དེ་ཕལ་ཆེར་སྤྱི་འཐུས་དང་བཀའ་ཁྲིའི་ཐོག་རྫོགས་སོང་གཅིག་བྱས་ན་འགྱོད་མི་འོས་པ་ཞིག་རེད་བསམ། འོན་ཀྱང་རང་ཉིད་ཀྱི་བསམ་བློའི་གྲ་སྒྲིག་ནང་ད་དུང་ཐག་ཆོད་པོ་ཞིག་རང་རེད་མ་སོང་བསམ་པའི་ཚོར་སྣང་འོང་གི་འདུག
གློ་བུར་དུ་ཅི་ཞིག་གིས་རྐྱེན་བྱས་པས་ཕ་ཡུལ་གྱི་སྒྲུང་ཐུང་ཞིག་ཡིད་ལ་གསལ་ཐལ་ལེར་འཆར་འོང་བས། ཁྱོད་ཚོ་ལ་གཅིག་ཤོད་འདོད་བྱུང་། ང་ཚོའི་གྲོང་སྡེ་ནི་ལུང་པ་བཞི་མདོ་ཞིག་གི་ཟུར་ཁུག་ན་ཆགས་ཡོད་ཅིང་དུད་ཚང་ཕལ་ཆེར་བརྒྱ་མ་ལོང་ཙམ་ཞིག་ཡོད། ཡུལ་པའམ་རོང་པ་ཡིན་པས་མ་གཞི་འཚོ་བ་མང་ཆེ་བ་ས་ཞིང་རྨོས་འདེབས་ཀྱིས་སྟོན་ཐོག་ལ་བརྟེན་ནས་འཚོ་བ་བསྐྱལ་བཞིན་ཡོད་ཀྱང་དུད་ཚང་འབྱོར་ལྡན་རྣམས་ལ་ཕུ་རུ་སའང་ཡོད། ནམ་དུས་སྟོན་ཀ་ཤར་ཞིང་ནས་བརྔས་ཚར་བ་མ་ཚད་བམ་པོ་ཁང་ཐོག་དུ་བསྡུསཟིན་པས་ཁང་པ་རྣམས་ཀྱི་སྟེང་དུ་སྐྱ་ཆ་ལེར་བམ་པོ་བརྩིགས་བཞག་འདུག ང་ཚོའི་གྲོང་ཚོ་ལོ་ལྟར་སྨ་ལག་ཞེས་པའི་ལུང་པ་ཆེན་པོ་དེའི་ནང་རྩྭ་འཐུ་རུ་འགྲོ་བའི་ལུགས་སྲོལ་ཡོད་པས། ད་ལོ་ཡང་སྔར་བཞི་རྩྭ་འཐུ་རུ་དུད་ཚང་འབྱོར་པ་ཅན་རྣམས་ཕ་དང་བུ། དེ་བཞིན་དུ་རྩྭ་ལས་བྱེད་མཁན་བུ་མོ་དང་གནའ་བཅས་ཁྱིམ་སྲུང་རྒན་རྒོན་དང་བྱིས་པ་རེ་ཟུང་ཙམ་མ་གཏོགས་ཕལ་ཆེར་རྩྭ་འཐུ་རུ་ཁལ་མ་རྣམས་ལ་གུ་རུ་དང་ཐབས་ཅ་ག་སོགས་འགེལ་ནས་ལ་ལས་རྟ་ཞོན་ཞིང་ལ་ལས་ཁྲིད་ནས་ནམ་གསལ་ལ་མ་གསལ་ཙམ་ནས་ཆས་སོང་། ང་ཡང་སྐབས་དེར་ལོ་བཅུ་གཉིས་ཡིན་པས་ཕ་དོན་གྲུབ་དང་མཉམ་དུ་རྟའི་འཕྱམ་འཕངས་ཞོན་ནས་རྩྭ་འཐུ་སར་ཕྱིན། སྔ་དྲོ་ཉི་མ་ཡང་ཡག་པོ་ཞིག་ཤར་སོང་བས་ང་ཚོས་གུ་རུ་ཡང་མ་ཕུབ་པར་ཞོགས་ཇ་སྟབས་བདེ་ཞིག་འཐུང་ཚར་མ་ཐག དུད་ཚང་རེ་ནས་མི་དྲག་རེ་འཛོམས་ནས་མི་སྐལ་མང་ཉུང་བཞིན་རྩྭ་བགོས་བརྒྱབ་སོང་། དེ་ནས་ཉིན་གུང་ཁ་ལག་སྐབས་ཇ་བསྐོལ་ཞིང་ཤ་ཡང་བཙོས་ནས་ཧ་ཡང་གི་ཁ་ཕྱེ་མ་ཙུམ་བར་ནས་རླངས་པ་འཕྱུར་འཕྱུར་བྱེད་བཞིན་ཤ་ཁུ་ཐིགས་པ་རེ་ཟུང་མེ་ནང་དུ་ལྷུང་ཡང་ཅི་མི་སྙམ་པར། རྒྱ་དམར་གྱིས་བཟོས་པའི་ལྕགས་ཕོར་ཆེན་པོ་རེ་ནང་པག་ཆེན་པོ་རེ་བརྫིས་ནས། ཤ་ཚོས་པ་ལ་སྒུག གློ་བུར་དུ་ཁྱུང་པོའི་རི་སྐེད་ནས་རྐྱ་མི་ཁ་ཤས་རྟ་བོང་མ་འདུར་གྱིས་ང་ཚོའི་སར་གཏད་ནས་སླེབས་བྱུང་། སྐབས་དེར་ཨ་ཕས་ད་ཕལ་ཆེར་དེ་རིང་ཆགས་སྒོ་ཞིག་ཡོང་རྒྱུ་ཡིན་པ་འདྲ། ད་ཡག་མ་སོང་ཟེར་བཞིན་སྒ་སྟན་བར་དུ་ཡོད་པའི་འབྲུག་གྲི་རིང་པོ་དེ་ཚུར་ལེན་སོང་། ང་ནི་སྐྲག་ནས་ལུས་པོ་ཆ་ཚང་ཚ་ལམ་མེར་གྱུར་ནས་མིག་ཅེར་བཞིན་བལྟ་འདུག་རྒྱུ་ལས་གཞན་འདི་བྱ་དེ་བྱེད་གང་ཡང་མ་བྱུང་། མཚམས་དེར་རྐྱ་མི་རྣམས་ཇེ་ཉེ་ནས་ཇེ་ཉེ་སླེབས་པ་ཙམ་མ་ཚད་ང་ཚོའི་རྩྭ་འགེལ་སའི་ཁལ་མ་མཛོ་དང་། གཡག་རྣམས་སྒ་སྟན་བཅད་ནས་ཆུ་ཆུང་འགྲམ་གྱི་སྤང་ཁར་བཀྲམ་ཡོད་པ་དག་དེད་འགྲོ་རྒྱུའི་སེམས་ཐག་གཙང་བཅད་ཐོག རྐྱ་མི་ལོ་བཞི་བཅུ་ཞེ་གྲངས་ཡིན་པ་འདྲ་པོ་ཞིག་གིས་ད་ཁྱོད་རང་ཚོ་ཁ་གར་བསྡད་ན་མ་གཏོགས་ང་ཚོའི་རྗེས་ལ་ཡོང་ན་གཅིག་ཀྱང་མ་ལུས་པར་སྒུམ་བུ་འཐུ་འཐུ་བྱེད་ནས་གསོད་རྒྱུ་ཡིན་པས་ཚོད་བཟུང་ན་དགའ་ཟེར་ཞོར་དུ་ང་ཚོའི་ཁལ་མ་རྣམས་དེད་སོང་། ཕོ་སར་ལོ་ཆུང་རྣམས་ཀྱིས་གྲི་དང་མེ་མདའ་ལག་ཏུ་གང་ཐེབས་རེ་ཁྱེར་ནས་ང་ཤི་ཁོ་ཤི་ཟེར་བཞིན་སོ་སོའི་རྟ་ལ་སྒ་སྟན་བརྒྱབ་ནས་རྗེས་ལ་དེད་འགྲོ་རྩིས་བྱེད་བཞིན་འདུག ལོ་རྒན་ཁ་ཤས་ཀྱིས་ག་ལེར་གྱིས་དང་བྲེལ་བ་ལང་མི་ཉན། ཁོང་ཚོ་ཐག་རིང་པོ་ཐར་གྱི་མ་རེད་ཅེས་ཤོད་ཀྱི་འདུག ནག་མོ་ཚང་མས་ངུ་འབོད་སྐད་ཤུགས་ཆེན་པོ་རེ་བྱེད་བཞིན་ཡར་རྒྱུགས་མར་རྒྱུགས་ཀྱིས་ད་གང་དྲག་ཅི་དྲག ཁོ་རང་ཚོ་ལ་མཛོ་གཡག་དེ་ཚོ་དེད་བཅུག་ཤོག རྒྱུ་ལས་མི་རྩ་ཆེ་བ་རེད། ད་གཡུག་ཤོག་ཅེས་ཕོ་སར་རྣམས་བཀག་རྩིས་བྱེད་བྱུང་། སྐབས་དེར་ཟེར་ལོང་གཏམ་ལོང་མེད་པར་ཕོ་གསར་རྣམས་གཅིག་རྗེས་གཉིས་མཐུད་ཀྱིས་རྟ་ལ་ཞོན་ནས་བོང་མ་འདུར་གྱིས་ཤོར་སོང་། ཁོ་ཚོ་རྐྱ་མི་བཞི་ནང་ནས་གཉིས་ཀྱི་མཛོ་གཡག་རྣམས་ཡར་དེད་ཅིང་གཉིས་ཀྱིས་ཁ་མར་འཁོར་ནས་མེ་མདའ་འཕེན་འགོ་བཙུག་ཡོང་གི་འདུག ཕོ་གསར་རྣམས་ཀྱང་ཕྱི་ནུར་མཐོ་གང་མེད་པར་རྟ་ལ་ཡོབ་བརྡུང་རེ་བྱེད་ཞོར་དུ་རྒྱུགས་སོང་བས་མེ་མདའ་སྒྲ་ཆེ་མ་ཆུང་མང་པོ་ཞིག་གྲགས་པ་དང་མཉམ་དུ་ཕོ་གསར་རེ་ཟུང་རྟ་ཐོག་ནས་ཤུད་ཅིང་རྟ་སྒ་སྟོང་འགྲོ་གི་འདུག དེ་ནས་ཆུ་ཚོད་གཅིག་ཡན་མ་ཙམ་ལ་མེ་མདའ་ཡར་འཕེན་མར་འཕེན་བྱེད་ནས་བསྡད་སོང་ལ་མཚམས་དེར་ཁོ་ཚོས་མེ་མདའ་འཕེན་ཡ་མཚམས་བཞག་ནས་ལམ་སེང་རྟ་ལ་ཞོན་ནས་འགྲོ་རྩིས་བྱས། ལོ་རྒན་པོ་ཚོས་ད་ཕོ་གསར་ཚོ་གཏོང་མ་བཞག་ཟེར་ནས་འབོད་པ་དང་ཁོང་ཚོ་དང་ཇེ་ཉེ་ས་ནས་མེ་མདའ་མང་པོ་འཕང་པས་གཞི་ནས་རྐྱ་མི་གཅིག་ས་ལ་འགྱེལ་སོང་། དེ་ནས་གཞན་པ་དེ་བྲོས་བརྩིས་བྱས་ཀྱང་འགྲམས་དེར་འབྲོང་རྒྱས་ཚང་གི་བུ་ཕོ་ལྷ་སླེབས་ཚར་འདུག་པས་གྲི་གཅིག་གཡུག་ཞོར་དུ་ཁོང་ཡང་ས་ལ་ལྷུང་སོང་། དེ་ནས་ཁོ་ཚོས་རྐྱ་མི་གཞན་གཉིས་ཀྱིས་མཛོ་གཡག་ཁལ་མ་རྣམས་དེད་འགྲོ་སར་རྒྱུགས་སོང་བས་ཁོ་གཉིས་པོས་རྐྱ་མི་གཞན་པ་གཉིས་པོས་བཀག་མ་ཐུབ་པར་མཐོང་བས་མཛོ་གཡག་རྣམས་གཡུག་ནས་ཕྱིར་བལྟས་མེད་པར་བྲོས་ཕྱིན་སོང་། དེ་ནས་དཔོན་ཆུང་ཚང་གི་ཕ་མགོན་པོས་ད་དེ་ཙམ་གྱིས། ད་ཚོད་བཟུང་ན་དགའ། དེ་རིང་ཆགས་སྒོ་ཆེན་པོ་འདུག་ཅེས་འབོད་སོང་བས་ཕོ་གསར་རྣམས་ཀྱང་རྟ་ཁ་མ་འཁོར་བྱུང་། དེ་ནས་ང་དང་ང་འདྲ་བའི་ཕྲུ་གུ་ཚོ་དང་ནག་མོ་རྣམས་འདུར་རྒྱུགས་ཀྱིས་ཡར་རྒྱུགས་སོང་བས་སྟག་ར་ཚང་བུ་བཀྲ་མགོན་བརྩིས་པའི་ཕོ་གསར་གསུམ་ཤི་ཚར་འདུག་ལ། རྙ་པ་ཚང་བུ་རིག་ཆུང་བརྩིས་པའི་ཕོ་གསར་ལྔ་ཤི་མ་གསོན་ཙམ་བཟོ་ཚར་འདུག བུ་མོ་དང་གནའ་མ་བརྩིས་པའི་གྲོང་ཚོ་དེའི་སྐྱེས་དམན་ཕལ་ཆེར་དེར་འདུར་བཞིན་ངུ་འབོད་དང་ཆོ་ངེ་འདོན་པའི་སྒྲ་དང་ཕ་རིའི་བྲག་ཆ་གཉིས་སྡེབ་པས་ལུང་པ་དེར་འུར་ཆལ་ལེར་ཁྱི་ཚང་ནས་རྡོ་འཕེན་པ་ལྟ་བུ་ཞིག་ཏུ་འདུག་ དེ་ནས་ང་རང་ཨ་ཕ་མཐོང་རྒྱུགས་མི་འདུག་པས་ཆུ་ཆུང་དེའི་འགྲམས་དུ་ཡར་ཙམ་རྒྱུགས་ཕྱིན་པས་ཕ་རྒན་གྱི་མགོ་ལ་མེ་མདའ་ཕོག་ཅིང་ཕལ་ཆེར་དབུགས་ཆད་གྲབ་འདུག ངས་ཕ་རྒན། ཕ་རྒན། ཁྱེད་ཅི་རེད་སོང་ཞེས་བོས་ཀྱང་ཁ་གྲགས་མི་ཐུབ་པར་ངས་བལྟས་བལྟས་རིག་རིག་ཁ་ལ་མིག་ཡར་གཡོག་སོང་། དེ་ནས་ང་སྙིང་ནས་ཚ་ཤར་ཞིག་ལོང་བ་དང་མཉམ་དུ་དེ་ག་རང་དྲན་མེད་དུ་འགྱེལ་ཚར་འདུག
ཁྱེད་རྣམས་པས་འདི་ལ་གཟིགས་ནས་མ་འོངས་པར་བོད་འདི་དུས་རབས་ཉེར་གཅིག་པའི་ཚོགས་སྡེ་ཞིག་ཏུ་བསྒྱུར་འདོད་ན་གྲོང་གསེབ་ནས་འགོ་འཛུགས་དགོས།
གོ་རྒྱུ་ཆེ་བ་མི་འདུག་ཀྱང། བྲིས་པ་ལེགས།
བོད་ཀྱི་གྲོང་གསེབ་ཁ་ཤས་ནང་ད་དུང་འདི་འདྲའི་གནས་ཚུལ་བྱུང་དང་འབྱུང་བཞིན་པ་མང་པོ་གོ་རྒྱུ་འདུག་པས་ད་གང་མགྱོགས་དུས་རབ་ཉེར་གཅིག་པའི་ཚོགས་སྡེ་ཞིག་ཏུ་འགྱུར་རན་འདུག དེ་མིན་གྲངས་ཉུང་མི་རིགས་འདི་སྟོང་ཉེན་ཆེན་པོ་འདུག
༼བསྐྱར་བཅོས།༽
བོད་ཀྱི་གྲོང་གསེབ་ཁ་ཤས་ནང་ད་དུང་འདི་འདྲའི་གནས་ཚུལ་བྱུང་དང་འབྱུང་བཞིན་པ་མང་པོ་གོ་རྒྱུ་འདུག་པས་ད་གང་མགྱོགས་དུས་རབ་ཉེར་གཅིག་པའི་ཚོགས་སྡེ་ཞིག་ཏུ་བསྒྱུར་རན་འདུག དེ་མིན་གྲངས་ཉུང་མི་རིགས་འདི་སྟོང་ཉེན་ཆེན་པོ་འདུག