གློག་ལམ་གྱི་བརྩེ་འཕྲིན་བདུན་པ།

ཀུན་དགས་དབྱིན་ཡིག་ནས་བོད་བསྒྱུར་བྱས།

བརྩེ་བའི་ཡིག་འབྲེལ་བ་ལགས།གློག་འཕྲིན་གྱི་བརྒྱུད་ལམ་སྤྱད་ནས་ང་ཚོའི་བར་དུ་བརྗོད་ན་རིན་ཐང་ལྡན་པའི་བརྩེ་འཛུམ་ཞིག་གི་མེ་ཏོག་ཁ་ཕྱེས་པ་རེད།ངས་སུ་ཞིག་ལ་ཐུགས་རྗེ་ཆེ་ཞུའི་ལེགས་སྐྱེས་འབུལ་དགོས་སམ།
ཁྱེད་རང་བདེ་བོ་ཡིན་ནམ།དེང་སང་ཁྱེད་ཀྱི་ལས་ཀའི་གནས་བབ་གང་འདྲ་འདུག
འདིར་ང་རང་གི་ཆོས་ལུགས་དང་འབྲེལ་བའི་སྐོར་ཞིག་བཤད་རྒྱུ་ཡིན།ཁྱེད་རང་དཀོན་མཆོག་ལ་ཡིད་ཆེས་ཡོད་དམ།ཁྱེད་ཀྱིས་དཀོན་མཆོག་གི་གནང་སྦྱིན་ལ་དང་ལེན་བྱེད་ཀྱིན་ཡོད་དམ།
འཇིག་རྟེན་གྱི་མི་མང་པོ་ཞིག་དཀོན་མཆོག་ལ་དགའ་ཞེན་དང་།ཆོས་ལུགས་ལ་དད་མོས་ཀྱི་འདུ་ཤེས་མེད་ཀྱང་།གྲུབ་ཚུལ་སྣ་ཚོགས་ལས་སྐྱེས་པའི་མི་དང་མིའི་ཁམས་དང་མོས་པའི་ལྟ་ཚུལ་ལ་ང་ཚོས་རང་ཉིད་ཀྱི་བློ་ངོར་འདོད་པའི་འགྲེལ་བཤད་བརྒྱབ་ན་ག་ལ་འགྲིག་་
ཆོས་ལུགས་སོ་སོར་ཡང་ནུས་པ་ཐ་དད་པ་སྟེ།གནམ་ལ་འཕུར་ཤེས་པ་དང་།ས་རུ་འཛུལ་ཐུབ་པ།འཇིག་རྟེན་ནས་འཇིག་རྟེན་དུ་འཁྲིད་ཐུབ་པའི་དཀོན་མཆོག་ལ་བྱིན་རླབས་དང་ནུས་པ་མ་འདྲ་བ་ཡོད་ངེས་པ་ཡིན་པས།སུ་ཞིག་གིས་རང་ཉིད་དགའ་སའི་དཀོན་མཆོག་ལ་དད་མོས་བྱེད་ན་ངས་དེ་ལ་བརྩི་བཀུར་ཞུ་རྒྱུ་ཡིན།
ང་ནི་བྱིས་པའི་དུས་ནས་ཡེ་ཤུའི་ཆོས་ལུགས་པ་ཞིག་ཡིན་ལ་དཀོན་མཆོག་ལ་དད་མཁན་ཞིག་ཀྱང་ཡིན།སྐབས་རེར་ཡེ་ཤུའི་ལྷ་ཁང་སོགས་སུ་མཆོད་འབུལ་ཆེད་བཅར་བཞིན་ཡོད།ཡིན་ནའང་།མི་ཚེ་ནང་དུ་ལམ་འགྲོ་མ་ཡོང་བ་དང་།ཁེར་རྐྱང་དུ་ལྷག་པ།བརྩེ་བ་ལ་ཡིད་ཆེས་དང་དྲང་བདེན་ལ་བརྩི་བཀུར་མི་བྱེད་པའི་ཡོ་ར་སོགས་ཀྱིས་བློ་ཕམ་དུ་བཅུག་པ་སོགས་དཀོན་མཆོག་ལ་འཁང་ར་དང་།བློ་འགྱོད་བྱེད་དགོས་པ་མང་ཙམ་བྱུང་མོད།ངས་ད་དུང་ཁོང་ལ་ཡིད་ཆེས་བརླག་མེད།ངས་བསམ་བློ་བཏང་ན་མི་མངོན་པའི་དབྱིངས་སུ་དཀོན་མཆོག་གི་བྱིན་རླབས་ཀྱི་ཟེགས་མ་ཉི་འོད་ཀྱི་འགྲོས་ལྟར་ང་ཚོའི་ཕྱོགས་སུ་འཕྲོ་བཞིན།གོ་སྐབས་གསར་བ་ཞིག་དང་།རེ་བ་གསར་བ་ཞིག་་གནང་སྦྱིན་གསར་བ་ཞིག་་ད་དུང་མི་ཚེ་ནང་གི་གཏན་གྲོགས་གསར་པ་ཞིག་ཀྱང་གོ་སྒྲིག་བྱེད་བཞིན་པས་ཡིད་ཆེས་ཡོད།
ང་ཚོའི་ལུང་པའི་ནང་ཡེ་ཤིའི་ལྷ་ཁང་མང་བ་དང་།ཆོས་བྱེད་མང་ཤོས་ནི་བུད་མེད་རེད།སྐྱེས་པ་ཁ་ཤས་ཤིག་ཆོས་ལུགས་ལ་དད་པ་ཡོད་ཀྱང་།མང་པོ་ཞིག་གིས་དཀོན་མཆོག་ལ་ཡིད་ཆེས་དང་དད་པ་བྱེད་པ་ལས་ཨ་རག་ལ་དགའ་མོས་བྱེད་པ་རེད།ཨ་རག་ཧམ་འཐུང་བྱེད་མཁན་ཚོ་བློ་མེད་རེད།ཁོ་ཚོས་དཀོན་མཆོག་བརྗེད་འགྲོ་བ་མ་ཟད་རང་གི་བརྩེ་དུང་འང་བརླག་འགྲོ་གིན་རེད།ཐ་ན་གཟའ་ཟླ་དང་བུ་ཕྲུག་འང་གཡུག་འགྲོ་གིན་རེད།ངོ་མ།འཇིག་རྟེན་ན་བདེན་རྫུན་གྱི་དབང་པོ་བྱེད་པའི་གནམ་བསྐོས་ཀྱི་བདག་པོ་ཞིག་མེད་པ་ཡིན་ནམ།འཇིག་རྟེན་ནི་གཡོ་ཁྲམ་པ་ཚོས་གང་འདོད་བྱེད་སའི་རྩེ་ར་རེད་དམ།
བུ་མོ་མང་ཤོས་ནི་དྲང་བདེན་དང་བརྩེ་བ་ལ་དང་དོད་བྱེད་མཁན་ཡིན་ཀྱང་།སྐྱེས་པ་ཚོས་བུ་མོའི་བརྩེ་དུང་ལས་ལས་གནས་ཡག་བཙོག་ལ་གདམ་གསེས་བྱེད་ངེས་རེད།ད་དུང་བུ་མོ་ཚོ་བེད་སྤྱོད་བཏང་རྗེས་དབེན་གནས་ཀྱི་སྨན་ཁང་དུ་བདག་མེད་དུ་གཡུག་ངེས་རེད།དེའི་ཕྱིར་བུ་མོ་མང་པོ་ཞིག་ནི་བུ་ཕྲུག་དང་མཉམ་དུ་ཁེར་རྐྱང་གི་འཚོ་གནས་སུ་རོལ་མཁན་རེད།འདི་ཚོར་བསམ་ན་དཀོན་མཆོག་གི་བྱིན་རླབས་དང་ནུས་པའང་ཆ་སྙོམས་མ་རེད།དཀོན་མཆོག་གིས་གཟིགས་སྐྱོང་དང་བརྩེ་བའང་འདྲ་མཉམ་མ་རེད།
ནམ་ཞིག་ངས་རང་ཉིད་ལ་དབང་བའི་མི་ལ་བརྩི་བཀུར་དང་བརྩེ་བ་སྤྲོད་རྒྱུ་ཡིན།ངས་ཁོ་ལ་གཏན་ནས་སེམས་གཅོང་དང་དཀའ་ངལ་བཟོ་འདོད་མེད།
ངས་བསམ་གཞིགས་དང་རྨི་ལམ་ཁྲོད་ཀྱི་ཡིག་འབྲེལ་བ་ལགས།ངའི་མཐོང་སྣང་དུ་ཁྱོད་རང་ལ་བརྗོད་ཐབས་མེད་པའི་ཡིད་ཆེས་ཤིག་ཡོང་བཞིན་འདུག་མོད།ཁྱད་ཆོས་དང་།ཡོན་ཏན།གཤིས་རྒྱུད་གང་འདྲ་ཡོད་པའི་བུ་མོ་ཞིག་མ་འོངས་པར་ཁྱེད་ཀྱི་བདག་མོར་ཉར་རྩིས་ཡོད།
ངས་བསམ་གཞིགས་ཀྱི་ཀློང་དུ་ཁྱེད་ཀྱི་སྐོར་ལ་འཆར་སྣང་ཧ་ཅང་མང་བས།ངས་རང་ཉིད་ཀྱི་ཚོར་བ་འདི་ལ་ཅི་ལྟར་འགྲེལ་བཤད་རྒྱག་དགོས་སམ།
ཡང་གཅིག་བཤད་ན་ང་ནི་ལས་སྐལ་བཟང་པོའི་བུ་མོ་ཞིག་ཡིན་པ་འདྲ།སྟོན་པ་སངས་རྒྱས་ཞེས་པའི་སྐྱེས་བུ་ཞིག་གསར་ཏུ་ངོ་ཤེས་པ་རེད།ཁོང་གི་བྱམས་བརྩེ་དང་སྙིང་རྗེ་འཁུར་བའི་ཕོ་ཉ་བ་ཞིག་ངེད་ཀྱིས་ཞགས་པས་ཟིན་པ་རེད།ངའི་དཀོན་མཆོག་ཡེ་ཤི་དང་སྟོན་པ་སངས་རྒྱས།སྙིང་ཁུང་རུས་པའི་སྟེང་ནས་ཁྱོད་ཚོར་བཀའ་དྲིན་ཞུ་རྒྱུ་ཡིན།དྲང་བདེན་གྱི་བརྩེ་དུང་སློང་བའི་བུ་མོ་ཚོར་བདག་སྐྱོང་གནང་རོགས།ང་ཚོ་ཡང་འགྲོ་བ་མིའི་ནང་གི་ཉམ་ཐག་གི་སེམས་ཅན་ཞིག་མ་ཡིན་ནམ།
བརྩེ་བའི་ཡིག་འབྲེལ་བ་ལགས།ངེད་ཀྱི་ཚོར་སྣང་དང་རྨི་ལམ་མང་པོ་ཞིག་གི་སྒོ་མོ་ཕྱེས་ཡོད་པས་དུས་སྐབས་འཚམ་པོ་རེ་བྱུང་ན་ཡིག་ལན་རེ་གནང་བའི་བཀའ་དྲིན་ཞུ་རྒྱུ་དང་།ཁྱོད་ལ་སུན་སྣང་བཟོ་བ་དང་ཐང་ཆད་དུ་འཇུག་པའི་བསམ་བློ་མི་གཏོང་བར་མཁྱེན།
འདི་ནི་དྲང་བདེན་གྱི་བརྩེ་བ་ཞིག་གི་འཚོལ་སྙེག་གི་ལམ་བུ་ཡིན་ལ།ཕ་མའི་བྱམས་བརྩེ་མ་ཐོབ་པའི་ཁེར་རྐྱང་བུ་མོ་ཞིག་གི་མི་ཚེ་ཡི་རེ་སྒུག་ཡིན།ཁྱོད་ཁོ་ནས་ཕྱིར་ཏུ་འཁྱོར་བཞིན་པའི་གོམ་འགྲོས་ཤིག་གི་ཐག་སྒྲ་ཡིན།གཉིད་དང་ཟས་ཀྱི་ཡི་ག་ཉུང་དུ་སོང་བའི་བུ་མོ་ཞིག་གི་ཚོར་བའི་བཞུར་རྒྱུན་ཡིན།
སླར་ཡང་རེ་ལྟོས་དང་བཅས་ཁྱེད་རང་གི་ཏ་ཏའི་ཡ་ན་ནས་ཕུལ།