>>>>>>>>>>>>>>>>སྒོ་ཡོན།
༡
བོད་ཁོག་གི་ཞིང་འབྲོག་ཕལ་བ་དག་གིས་ལོ་གཅིག་ལ་འབད་པས་བསྒྲུབས་པའི་ཡོང་སྒོའི་གསོག་དངུལ་རྣམས་ཕྱོགས་གཅིག་ཏུ་བསྡུས་ཏེ། ལོ་གསར་བའི་དགའ་སྟོན་ལ་ཅ་ལག་ཙག་ཙིག་ཉོ་བཞིན་པའི་སྐབས་འདིར། བོད་དམངས་སྤྱིའི་ཁ་གདངས་ཤིང་མིག་ཅེར་རེར་བལྟས་ནས་ཡོད་པའི་གླུ་བ་གླུ་མ་དག་གིས་ལོ་གསར་དགོང་ཚོགས་གང་ཞིག་ལ་གླུ་ལེན་བྲོ་འཁྲབ་ཀྱི་གྲ་སྒྲིག་བྱེད་ཀྱིན་པའི་དུས་ཚོད་འདིར། བོད་ཀྱི་འདི་ཕྱི་གཉིས་ཆར་གྱི་སྐྱབས་འཇུག་ཞུ་བའི་བླ་དཔོན་རྣམ་པས་གང་ཞིག་ནས་ཤ་ཆང་གི་མཆོད་པ་རྩིས་ཀྱིས་མི་ཐེབ་པ་ཞིག་བཞེས་གྲབས་ཀྱི་ཐུགས་ཁུར་ཆེ་བའི་གནས་སྐབས་འདིར།
སྔར་ལོ་རྣམས་དང་འདྲ་བར་རྒྱལ་ཁབ་དེ་བ་ཚང་གིས་བོད་ཁྱིམ་ལྡོམ་པོ་འགའ་རེ་བརྙན་དུ་བླངས་ཤིང་པར་དུ་བསྡབས་ཏེ། བོད་ལ་སྔར་མེད་ཀྱི་དགའ་སྤྲོ་ཕུན་སུམ་ཚོགས་པ་ཞིག་ཤར་ནས་ཡོད་ཚུལ་གྱི་འཁྲབ་སྟོན་དགོད་བྲོ་བ་དག ཕྱི་ནང་གི་ཆབ་སྲིད་བྲན་གཡོགས་རྣམས་ལ་འུར་གྱིས་སྒྲོག་པར་བརྩོན་གྱིན་པའི་བར་ཐོག་འདིར། ནམ་རྒྱུན་ཁ་གསོན་པོ་དང་ལག་མྱུར་མོས་སྤྱི་ཚོགས་ཀྱི་འཚོ་བ་དང་སྐྱིད་སྡུག་དངོས་གླེང་བར་འབད་དགོས་ཟེར་མཁན་གྱི་ཁོ་བོ་རང་ཉིད་གཏོགས་པའི་ཤེས་ཡོན་པར་ཁས་འཆེས་པ་རྣམ་པས། དུས་ད་ལོར་ལོ་གསར་གྱི་དགའ་སྟོན་བྱེད་རྒྱུ་ཡིན་ནམ་མིན།
༢
སྤྱི་ཟླ་བཞི་བའི་ནང་དུ་བོད་ཁམས་ཡུལ་ཤུལ་གྱི་གནས་སུ་ལོ་རྒྱུས་སྟེང་བྱུང་མ་མྱོང་བའི་ས་ཡོམ་གྱི་གོད་ཆགས་འཇིགས་སུ་རུང་བ་ཐེབ་པ་དེས།གནས་མཆོག་དེ་ཡི་ཕ་མ་བུ་ཕྲུག་དང་སྒོ་ནོར་ཁྱིམ་གཞིས་ཡོད་ཚད་ཐལ་བའི་རྡུལ་དུ་བརླགས་ཤིང༌། དེ་ནས་ཅུང་མ་འགོར་བར་ཨ་མདོ་འབྲུག་ཆུ་རྫོང་དུ་ཆུ་ལོག་གི་འཇིགས་པ་སྔར་ཡོང་མ་མྱོང་བ་ཞིག་བྱུང་སྟེ། སྤུན་ཟླ་གང་མང་གི་ཚེ་སྲོག་ཕ་རོལ་དུ་བསྐྱལ་བས་མི་ཚད། ཟླ་འགའ་ལས་མ་སོང་བར་སླར་ཡང་འབྲུག་ཆུ་རྫོང་དུ་མེ་སྐྱོན་ཚབས་ཆེན་བྱུང་ནས་མི་ཤི་རྟ་འགྱེལ་གྱི་གོད་ཆག་བསླངས་པ་དང༌།
དེ་བཞིན་ཁམས་རྟའུ་རྫོང་དུ་རི་རྩྭ་ཤོར་བའི་འཇིགས་པ་མིག་གིས་མི་བཟོད་པ་ཞིག་བྱུང་སྟེ།བོད་མི་བཅོ་ལྔ་ལྷག་ཚེ་ལས་འདས་པའི་གྱོང་རྒུད་བྱུང་བ་སོགས། འདས་པའི་ལོ་ངོ་འགའི་ནང་དུ་སེམས་ལ་དྲན་མེད་པའི་རང་བྱུང་ཁམས་ཀྱི་གནོན་པ་འདྲ་མིན་གྱིས།བོད་པ་གཉོམ་ཆུང་ཚོ་ཆག་ཆག་ཉིལ་ཉིལ་དུ་བཏང་དང་གཏོང་གིན་པའི་དུས་ཐོག་འདིར།ཤེས་རིག་གི་མཐོ་ས་ནས་བལྟས་ཤིང་མིའི་རིགས་ཀྱི་ཟབ་ས་ནས་མྱང་བར་རློམ་པའི།ཁོ་བོ་རང་ཉིད་གཏོགས་པར་ཤེས་ཡོན་པར་ཤུགས་གྱིས་བསྒྲེངས་པ་རྣམས་ཀྱིས།སྤུན་མི་ཁོང་ཚོ་གཤེགས་ཤུལ་གྱི་དུས་ད་ལོར་ལོ་གསར་བའི་དགའ་སྟོན་བྱེད་རྒྱུ་ཡིན་ནམ་མིན།
༣
འབའ་བ་ཨ་གྲགས་དང་གནས་རྩ་འཇམ་དབྱངས།བྲག་འགོའི་ཀུན་དགའ་སོགས་ཀྱི་རིན་ཐང་གི་ཚེ་སྲོག་ཕྱི་མར་འཕང་ཞིང༌།གོ་འཇོའི་འབུམ་དགའ་དང་འཆི་མེད་དབང་འདུས།བྱང་ཆུབ་ཆོས་མཚོ་སོགས་ཀྱི་ཚེ་ལུས་ཀྱི་མིག་ཟུང་མུན་ནག་ཏུ་བསྐྱལ་ལ།མགོ་ལོག་གངས་ཉི་དང་འཇང་རྩེ་དོན་ཁོ།རྔ་བའི་བྷུད་ཟླ་སོགས་ཀྱི་ལྕགས་སྨྱུག་གི་སྐུ་སྲོག་རྡོ་ལ་བརྡབས་པའི་སྟེང༌། «ཤར་དུང་རི»དང«གནམ་ལྕགས»«དུས་རབས་ཀྱི་ང»ཚང་གི་ཁྱིམ་མི་འཁོར་དང་བཅས་པ་བཙོན་མུན་གྱི་གནས་སུ་བཟུང་ཞིང༌།སྟག་སྨྲིག་དང་གངས་དགའ་འཁྱམས་པོའི་གཙོས་པའི་བོད་ནང་གི་ན་གཞོན་ཤེས་ཡོན་པ་སུམ་བཅུ་ལྷག མིག་མཐོང་ལག་ཟིན་གྱིས་ལོ་ངོ་གཅིག་གི་རིང་ལ་བཙོན་འཇུག་གི་ལས་སུ་སོང་བའི་དུས་མཐའ་འདིར།
ཁོང་ཚོ་སུ་ཡི་ཆེད་དང་གང་གི་ཕྱིར་དུ་མནར་གཅོད་སྟོང་གིས་གདུང་བའི་གནས་ངན་དེར་ལྷུང་སོང་བ་ཀུན་ནས་ཤེས་ཡོད་པའི་ང་ཚོས།དཔའ་བོ་བཀའ་དྲིན་ཅན་དེ་དག་དང་ཤེས་ཡོན་པ་ལྷག་བསམ་ཅན་དེ་དག་གི་སྐུ་ཁྲག་མིག་ལ་སྣང་བཞིན་དུ།དྲྭ་དེབ་དུ་མའི་གདན་ཐོག་ཏུ་བདེན་དྲང་དང་ཐོབ་ཐང༌།རང་དབང་དང་དམངས་གཙོ་ཟློ་བའི་ཁོ་བོ་རང་ཉིད་གཏོགས་པའི་བོད་ཡིག་རྩོམ་མཁན་གྱི་ཤེས་ཡོན་པར་བརྩི་བའི་ན་གཞོན་གསར་བ་གསར་རྐྱང་ཚོས།ཁོང་རྣམ་པའི་རྗེས་ཤུལ་དུ་གསོན་པོར་ལངས་ནས་དུས་ད་ལོར་ལོ་གསར་བའི་དགའ་སྟོན་བསུ་རྒྱུ་ཡིན་ནམ།
༤
དོན་དམ་པར་བོད་རང་ལ་ཁ་ཚ་དགོས་གཏུགས་ཀྱིས་མཁོ་ཞིང་བོད་རང་ལ་ཁ་ཡོད་ལག་ཡོད་ཀྱིས་ཕན་པའི།མི་སྒེར་རང་གི་ཡིན་པའི་སྐད་ཆ་ཚིག་གཅིག་ཀྱང་སྔུན་ལ་གཡུག་རྒྱུ་མེད་བཞིན་དུ།དགག་སྒྲུབ་ཀྱི་མདའ་མོ་ནང་ལ་བསྐོར་ཞིང་སྐྱོན་འབྲུ་ཡི་ཞྭ་མོ་ནང་ལ་བླངས་ཏེ་ནང་འཁྲུགས་ཅི་འདོད་འདོད་རེ་བྱེད་ཀྱིན།དམའ་འབེབས་དང་རྫུན་ཚིག་གི་འཁོར་ལོའི་བར་ནས་སྐབས་རེར་མི་རིགས་བོར་གྱིན་པ་དང༌། ལན་རེར་རང་ཉིད་བོར་གྱིན་པའི་སྣང་བ་འཆར་ཞིང༌།
ཁོ་བོ་སྒེར་ལ་མཚོན་ན་ཡང་ལོ་དེབ་འགའ་རེ་དཔར་ཁུལ་དང་ཚོགས་པ་རེ་ཟུང་འཛུགས་ཁུལ།ཚོགས་འདུ་རེ་གཉིས་བསྐྲུན་ཁུལ་སོགས་ཀྱི་གཟུགས་བརྙན་ཙམ་རེ་རིས་སུ་ཕབ་ཁུལ་བྱས་ན་ཡང་།དོན་ངོ་མར་ད་སྔོན་བོད་མི་རིགས་ལ་འདི་སྦྱིན་ནོ་སྙམ་པའི་རང་ཉིད་ཀྱི་ཡིད་མགུ་བའི་རིན་དོད་ཅན་གཅིག་ཀྱང་སྟོན་རྒྱུ་མེད་པ་མ་ཟད།ད་ལྟའི་བར་དུ་རང་ཉིད་ཀྱི་འཚོ་བ་ཙམ་པོ་ཡང་གཞན་ལ་བསྟེན་ཅིང་གཞན་གྱིས་གསོས་ནས་ཡོང་བའི་དབང་གིས།རང་གི་བསམ་བློའི་གསར་གཏོད་ནི་འདི་དང་དཔལ་འབྱོར་གྱི་སྒེར་ཚུགས་ནི་འདིའོ་ཞེས་ཆེ་ཆེ་ཞིག་ཁྱོན་ནས་སྟོན་རྒྱུ་མེད་ནའང་།
ད་དུང་ཡིན་རློམ་དང་ཆེ་ཚུགས་གང་ཞིག་ཡོད་མདོག་གིས།འགྲོ་བ་མིའི་རིགས་དང་ཤར་ནུབ་ཀྱི་སྐྱེས་བུ་དམ་པ་དག་རྒྱ་མར་གཞལ་ནས།དེ་ཉིད་འགྲིག་དང་འདི་ཉིད་མི་འགྲིག་པར་བཤད་ཀྱིན་པའི། ཁོ་བོ་རང་ཉིད་གཏོགས་པའི་བོད་པ་ཤེས་ཡོན་པར་གྲགས་པའི་ཀུན་ཀྱིས་དུས་ད་ལོར་ལོ་གསར་བའི་དགའ་སྟོན་བྱེད་རྒྱུ་ཡིན་ནམ་མིན།
༥
མདོར་ན། ཕྱི་ནང་དང་སྤྱི་སྒེར་གང་གི་ཐད་ནས་བལྟས་ན་ཡང༌། དུས་ད་ལོར་ང་ཚོས་ལོ་གསར་བའི་དགའ་སྟོན་བྱེད་འོས་སམ། །
ལོ་གསར་གྱི་ཉིན་མོར་སྐྱེས་སྐར་དུས་ཆེན་འཁེལ་སྟབས་ཁོམ་ལོང་ཞིག་གཏན་ནས་མི་ཡོང་བས་
ངས་ནི་དེ་སྔོན་ནས་མི་ཚེའི་ནང་ལོ་གསར་མི་གཏོང་བར་ཐག་བཅད་བྱས་ཟིན།
འཇར་མན་གྱི་རྒྱའི་རིག་གནས་ཆེད་མཁས་བ་ཀོས་པན་གྱིས་རྒྱའི་དེང་རབས་རྩོམ་རིག་ནི་གད་སྙིགས་རེད་བཅས་བརྗོད་ཡོད་ལ། འཇར་མན་ལ་མཚོན་ན་གང་སར་རྩོམ་པ་པོ་ཡོད་ལ། ཁོང་ཚོས་འཇར་མན་མཚོན་གྱི་ཡོད་ལ། འཇར་མན་གྱི་ཚབ་བྱེད་དེ་སྐད་ཆ་བཤད་ཀྱི་ཡོད། དེར་བརྟེན་ང་ཚོ་ལ་འཇར་མན་གྱི་འབོད་སྐད་ཡོད་ཟེར། འོན་ཀྱང་རྒྱ་ནག་གི་འབོད་སྐད་དེ་གང་ན་ཡོད་རྩ་བ་ཉིད་ནས་མེད་དེ་རྒྱ་ནག་གི་རྩོམ་པ་པོ་དེ་ཚོ་སྙིང་ཆུང་སྡར་མ་ཤ་སྟག་རེད་ལ་ཕན་ཚུན་བརྩི་བཀུར་མི་བྱེད་པ་རྐྱང་རེད་བཅས་བརྗོད་ཡོད།
ང་ཚོའི་བོད་ལ་འབོད་སྐད་ཡོད་དེ། ཚེ་རིང་འོད་ཟེར་གཙོས་ཞོགས་དུང་དང་། ཤར་དུང་རི། དུས་རབས་ཀྱི་ང་བཅས་ནི་བོད་རང་ཉིད་ཀྱི་ཚབ་མཚོན་འབོད་སྒྲ་རྣལ་མ་ཡིན་ལ། སྒོ་ཡོན་གྱིས་འདི་ལྟར་འབོད་སྐད་རེ་སྒྲོག་བཞིན་པ་ཆེས་བཀུར་བའི་གནས་ཡིན་ལ།
༼སྨྲ་ལྕེ་དེ་ནམ་ཡང་འཇིགས་སྣང་འོག་ནས་བསྐུམས་བསྡད་ཚེ་ནམ་ཞིག་གོམས་ལོབས་སུ་གྱུར་འགྲོ༽བའི་སྒོ་ཡོན་གྱིས་གསལ་འདེབས་རེ་བྱེད་བཞིན་པ་རྟུལ་ཕོད་ཀྱི་ལས་རེད་ལགས།